Kaŵili pa wiki, Mboni za Yehova zusonkhana pa malo yakulambilila yoitiwa kuti Ng’anda ya Ufumu. Kansi ku Ng’anda ya Ufumu kucitika cinji? Nanga mungapindule tyani ngati mwapezeka pa misonkhano yao?

•  N’cinji cucitika ku Ng’anda ya Ufumu?

•  Ndaŵa yanji mufunika kupezekapo pa misonkhano yamene iyi?

•  Zakulaŵila acilumbwana ayanu

 Ku Ng’anda ya Ufumu, ŵanthu onkhala na mwai wophunzila mfundo zothandiza za m’Baibo. Misonkhano iyi ingakuyavyeni:

•   kumuziŵa bwino Mulungu.

•   kuziŵa cifukwa cake vinthu vaipa ngako pacalo.

•   kunkhala munthu wa minkhalidwe yabwino.

•    kupeza ŵanthu a minkhalidwe yabwino amene angankhale ashamwali ŵanu.

 Kansi muziŵa? Malo yazusonkhanako Mboni za Yehova yoitiwa kuti Ng’anda za Ufumu cifukwa mfundo zinyinji zuphunziliwa kwamene uku zunkhala zokhuza Ufumu wa Mulungu.​—Mateyu 6:9, 10; 24:14; Luka 4:43.

 Zinthu zuphunziliwa pa misonkhano iyi zingakuyavyeni. Mfundo za m’Baibo zakuphunzila ŵanthu pa misonkhano ya Mboni za Yehova zingakuyavyeni “kupeza nzelu.” (Miyambo 4:5) Izi zuonesha kuti mfundo za m’Baibo zingakuyavyeni kupanga zosankha zanzelu pa umoyo wanu. Zingakuyavyeni soti kupeza mayankho pa makonsho okhuza umoyo monga akuti:

•   Kansi moyo uli na colinga?

•   Kansi Mulungu ndiye ocitisha mavuto?

•   Kansi n’cinji cucitika tikafwa?

 Onani iyakine mwa mitu ya nkhani zulaŵiliwa pa misonkhano ya kosilizhyila kwa wiki iliyonse:

•   Ndaŵa Yanji Tufunika Kukonkha Malangizo a m’Baibo?

•   Kansi Mungapeze Kuni Thandizo pa mavuto?

•   Zauticitila Ufumu wa Mulungu Pali Lomba

 Brenda elaŵila kuti: “Siku iyakine muyangu wa kusukulu epezeka pa misonkhano yasu. Enkhala pamozi na banja yasu ndipo nenzoŵelenga naye pamozi mabuku. Misonkhano peyesila, eniuzhya kuti esangalala ngako na ndemanga zenzopeleka akwasu na azilongosi. Eniuzhya soti kuti waona kuti n’zosiyana ngako na ku chechi kwao cifukwa onkhala lini na mabuku oseŵenzesha pophunzila.”

 Kansi muziŵa? Mukafwika ku Ng’anda ya Ufumu, mungankhale paliponse pamungakonde, ndipo kunkhala lini kupitishamo mbale ya zopeleka.

 Mukalimbikishiwe ngako na ŵanthu ŵati mukakumane nao kwamene uku. Baibo yulaŵila kuti cifukwa cimozi cakusonkhanila Akhristu ni cakuti ‘akolimbikishana.’ (Aheberi 10:24, 25) Ku Ng’anda ya Ufumu, mukakumane na ŵanthu amene okonda ngako Mulungu nocita vinthu moganizila ayakine. Ndipo izi zucitika lini m’calo.

 Elisa elaŵila kuti: “Nikacoka ku nchito, nunkhala woŵewa koma soti wokhumudwa. Koma nikaluta ku Ng’anda ya Ufumu, nukumana na ŵanthu amene onilimbikisha ngako. Misonkhano ikasila, nuwelela ku ng’anda nili wosangalala cakuti kukaca m’mawa nikuya ku nchito niliye nkhaŵa iliyonse.”

 Kansi muziŵa? Pacalo conse pali mipingo ya Mboni za Yehova yopitilila 120,000 yamene yosonkhana m’malo opitilila 60,000. Pofwana kuti ciŵelengelo ca ŵanthu osonkhana cikuya cuyangizhyilika, pa avaleji Ng’anda za Ufumu pafupifupi 1,500 zumangiwa caka ciliconse. *