Kafukufuku uyakine weonesha kuti 80 pesenti ya acilumbwana ku America opemphela, koma hafu ya acilumbwana aŵa ndiye opemphela siku iliyonse. Payakine ayakine angozikonsha kuti: ‘Kansi pemphelo yuyavya tyala kunkhazikako maganizo m’malo, olo yuyavya soti m’njila ziyakine?’

•  Kansi kupemphela n’kucita cinji?

•  Kansi Mulungu akumvwa mapemphelo?

•  Ningatomole zinthu zotyani m’pemphelo?

•  Zakulaŵila acilumbwana ayanu

 Kupemphela ni njila yokambilana na Nyamalenga wa zinthu zonse. Ganizilani tyala! Olo kuti Yehova ni wapalulu ngako kupambana ŵanthu m’njila iliyonse, “yove ali lini kutali na aliyense wa seo.” (Machitidwe 17:27) Ndipo n’zocitisha cidwi ngako kuti Baibo yutiuzhya kuti: “Vwendelani pafupi na Mulungu, ndipo naye avwendele pafupi na mweo.”​—Yakobo 4:8.

 Kansi mungavwendele tyani kwa Mulungu?

•   Coyamba, mufunika kupemphela. Iyi ni njila yolaŵizhyilana na Mulungu.

•   Caciwili, mufunika kuphunzila Baibo. Iyi ni njila “yakulaŵilila” namwe Mulungu.

 Ngati mulaŵila na Mulungu m’pemphelo koma soti kuphunzila Baibo, ankhale muyanu wapamtima.

 “Kulaŵila na Yehova, wamene ni wapalulu ngako m’cilengedwe conse, ni mwai wapadela ngako kuli seo teŵanthu.”​—Jeremy.

 “Kupemphela kwa Yehova kufumila pansi pa mtima kunicitisha kumvwa kuti ni muyangu wapamtima.​—Miranda.

 Olo kuti mumukhulupilila Mulungu nopemphela kuli yove, nthawi ziyakine zunkhala zovuta kukhulupilila kuti omvwishila. Koma, Baibo yulaŵila kuti Yehova ni “Wakumvwa pemphelo.” (Salimo 65:2) Koma soti yutilimbikisha kuti ‘mukomutulila nkhaŵa zanu zonse, pakuti okudelani nkhaŵa.’​—1 Petulo 5:7.

 Ganizilani izi: Kansi mweo mukonda kutandala na ayanu nthawi zonse? Ngati mukwanisha, ndiye kuti mungacite soti zamene izi na Mulungu. Mukopemphela kuli yove nthawi zonse, ndipo mukoseŵenzesha zina ya Mulungu, yakuti Yehova. (Salimo 86:5-7; 88:9) Pa nkhani iyi, Baibo yutilimbikisha kuti “mukopemphela mosalekezhya.”​—1 Atesalonika 5:17.

 “Ngati nupemphela, nunkhala kuti nulaŵila na Atata akululu, ndipo nuŵauzhya zonse za mumtima mwangu.”​—Moises.

 “Yehova numuuzhya ciliconse cili mu mumtima mwangu monga ni mwaningacitile na amama olo muyangu wapamtima.”​—Karen.

 Baibo yukamba kuti: “Pa ciliconse, mwa pemphelo na pembezelo, pamozi na kuyamikila, zosenga zanu ziziŵike kwa Mulungu.”​—Afilipi 4:6.

 Kansi izi zutanthauza kuti tikopemphelela mavuto ŵasu? Eee, ndipo Baibo yulaŵila kuti: “Umutulile Yehova nkhaŵa zako, ndipo yove akucilikize.”​—Salimo 55:22.

 Koma ngati mupemphela kwa Mulungu, mukotomola soti zinthu ziyakine osati mavuto wanu ŵeka. Msimbi muyakine zina yake Chantelle elaŵila kuti: “Ningalaŵile lini kuti Yehova ni muyangu wapamtima ngati nungomusenga kuti aniyavye. Nuona kuti nufunika kuyamba na kumuyamikila pa zinthu zinyinji zakunicitila.”

 Ganizilani izi: Ni zinthu zotyani zawakucitilani Mulungu zamuyamikila? Kansi mungaganizileko zinthu zitatu zamungayamikilile Yehova lelo?

 “Tingakwanishe kupeleka pemphelo yoyamikila Yehova olo pa zinthu zitontho-zitontho, monga maluŵa okongola.”​—Anita.

 “Ganizilani cinthu ciyakine ca m’cilengedwe camene cukugomesani kapena vesi yamene yukufwikani pa mtima ndipo muyamikileni Yehova pa zamene izo.”​—Brian.