“Mlumbwana muyakine wa zina yakuti Will eciti “Nuona kuti kuŵelenga Baibo kungankhale lini kosangalasa ngati uziŵa lini njila yabwino yaungakonkhe poiŵelenga.”

 Kansi mungakonde kuziŵa zamungacite kuti kuŵelenga Baibo kukokusangalasani? Nkhani iyi ingakuthandizeni.

•  Mukoyelekezela kuti muona zinthu zucitika m’nkhani yamuŵelenga

•  Fufuzani mokwanila

•  Zakulaŵila acilumbwana ayanu

 Pamuŵelenga nkhani iyakine, mukocita monga kuti mweo mwenzepo. Yesani kucita izi:

1.   Sankhani nkhani ya m’Baibo yamufuna kuti muphunzile. Mungasankhe nkhani iyakine yamene yecitika, kaya yupezeka m’mabuku a Uthenga Wabwino olo nkhani ya m’Baibo yoŵelengewa mwasewelo pa jw.org.

2.   Iŵelengeni. Mungaŵelenge nkhani iyo pamweka. Mungaiŵelenge soti mokuwa pamozi na ayanu kapena ŵanthu a m’banja mwanu. Muyakine angaŵelenge mbali ya wofotokoza, pamene ayakine angaŵelenge mbali za ŵanthu otomolewa m’nkhani iyo.

3.   Mungayese kukonkha njila imozi olo zoŵelengeka pa njila izi:

   •   Durowing’ani vithunzithunzi vamungafotokozelemo vinthu vucitika m’nkhani iyo koma soti voonesha vinthu vecitika pa nthawi iyakine. Mungalembe mau oonesha vinthu vucitika pa mbali iliyonse ya nkhani iyo.

   •   Durowing’ani cithunzithunzi ca munthu wotomolewa m’Baibo ndipo lembani soti minkhalidwe yabwino yeenze nayo koma soti zecicita. Mungalembe soti madaliso yecilandila.

   •   Konzani nkhani yamene yufotokoza vinthu vecitika koma soti kunkhala na mbali yokonsha makonsho, ŵanthu atomolewa m’nkhani iyo na ayakine amene eonako pevenzocitika vinthu ivi.

   •   Ngati m’mozi wa ŵanthu a mu nkhani iyo esankha vinthu molakwika, yesayesani kuganizila vinthu viyakine veenzofunika kucita kuti vinthu vimuyendele bwino. Mwacisanzo, ganizilani mwezecitikila kuti Petulo akane Yesu. (Maliko 14:66-72) Kansi enzofunika kucitanji kuti acite zinthu mwanzelu?

   •   Ngati muli na luso yopeka nkhani, lembani sewelo yanu potolela nkhani yamwaŵelenga m’Baibo. Mungayangizhyilemo soti zatingaphunzilemo mu nkhani iyo.​—Aroma 15:4.

 Ngati mufufuza mokwanila zamuŵelenga, mungapeze mfundo ziyakine zobisika. Mwacisanzo, nthawi ziyakine mungapeze mau amozi kapena aŵili m’Baibo amene angakuyavyeni kumvwishisha mfundo zinyinji za nkhani iyo.

 Mwacisanzo, linganizhyani zili pa Mateyu 28:7 na zili pa Maliko 16:7.

•    Ndaŵa yanji Maliko eyangizhyilapo “Petulo” pofotokoza kuti Yesu akaonekele kwa ophunzila ŵake?

•  Zokuyavyani: Maliko ni mboni lini yoona na menso zocitika izi cifukwa pa nthawi iyi yove penzeve, koma cuoneka kuti ecimvwa kwa Petulo.

•  Mfundo yobisika: Ndaŵa yanji tinganene kuti Petulo elimbikishiwa peecimvwa kuti Yesu ofuna kuonana naye pamozi na ophunzila ayakine? (Maliko 14:66-72) Kansi Yesu eonesha tyani kuti enze cendi muyake wapamtima wa Petulo? Nanga mweo mungaoneshe tyani kuti nimwe shamwali wenewene potolela zecicita Yesu?

 Ngati muyelekezela kuti muona vinthu vucitika m’nkhani yamuŵelenga na kufufuza mokwanila, mungaone kuti kuŵelenga Baibo ni kosangalasa ngako.