“Nthawi zinyinji nikafuna kuŵelenga Baibo, nucita ulesi cifukwa nuona kuti ni cibuku cikulu”​—Briana.

 Ngati namwe mukumvwa tetyo, nkhani iyi ingakuyavyeni.

•  Ndaŵa yanji kuŵelenga Baibo n’kofunika?

•  Ningacitenji kuti kuŵelenga Baibo kukonisangalasa?

•  Zakukonsha acilumbwana ayanu

 Kansi muona kuti kuŵelenga Baibo ni kosangalasa? Mwina muona kuti Baibo ni buku ikulu, ya mapeji anyinji koma iliye vithunzithunzi mwakuti mungailinganizhye lini na mwamungasangalalile ngati muonelela TV kapena mavidyo.

 Koma tiyeni tiyelekezele kuti mwaona cikwama ca ndalama camene cuoneka kuti ni cakale. Kansi mungankhale lini na cidwi kuti muone zili mkati?

 Baibo ili monga ni cikwama coteti. Mupezeka mfundo zanzelu zamene zingakuyavyeni. Ingakuyavyeni pa nkhani izi:

•   Kusankha zocita mwanzelu

•   Kukatizhyana na makolo ŵanu

•   Kupeza ayanu abwino

•   Kucefya nkhaŵa

 Koma kansi zingakwanishike kuti buku yakale teti inkhale yoyavya masiku ŵano? Eee, tanena tetyo cifukwa “Malemba onse euzhyiliwa na Mulungu.” (2 Timoteyo 3:16) Izi zuonesha kuti malangizo a m’Baibo ecokela ku munthu wodalilika ngako.

 Coyamba, mukoiŵelenga kufumila koyambilila mpaka kosilizhyila. Kucita izi kungakuyavyeni kumvwisha uthenga wonse wa m’Baibo. Koma pali njila zinyinji zingakuyavyeni poŵelenga Baibo. Mwacisanzo, mungakonkhe njila izi:

•    Mungaŵelenge mabuku onse 66 a m’Baibo kuyambila Genesis mpaka Chivumbulutso.

•    Mungaŵelenge soti Baibo pokonkha nthawi yezecitikilamo zinthu ziyakine.

 Mfundo Zingakuyavyeni: Ŵelengani Zakumapeto 21 mu Baibulo la Dziko Latsopano kuti muone zocitika zikuluzikulu mu umoyo wa Yesu peenze pacalo.

 Caciŵili, mukosankha nkhani yokatizhyana na mavuto yamukumana nao. Mwacisanzo:

•   Ngati mufuna kupeza ayanu odalilika, ŵelengani nkhani ya Yonatani na Davide. (1 Samueli, macapita 18-20) Pavuli pake, seŵenzeshani peji ya pa webusaiti yasu yakuti, “Zamungacite kuti Mupeze Ayanu Odalilika” kuti muone mfundo zamene zingakuyavyeni.

•   Ngati mufuna kuti osati mukogonja mukakumana na mavuto, ŵelengani nkhani ya Yosefe kuti muone zecicita pecikumana na mayeselo. (Genesis, capita 39) Pavuli pake, seŵenzeshani peji ya pa webusaiti yasu yakuti “Zamungacite Mukakumana na Mayeselo . . . Yosefe​—Mbali 2” kuti muone mfundo zamene zingakuyavyeni.

•   Ngati mufuna kuziŵa mwaingakuyavyileni pemphelo ŵelengani nkhani ya Nehemiya. (Nehemiya, capita 2) Pavuli pake, seŵenzeshani peji ya pa webusaiti yasu yakuti “Mulungu Eyankha Pemphelo Yake” kuti muone mfundo zamene zingakuyavyeni.

 Mfundo Zingakuyavyeni: Poŵelenga Baibo, mukooneshesha kuti mwankhala pamalo pamene paliye congo kuti osati mukosokonezewa.

 Cacitatu, mukosankha nkhani iyakine olo salimo iyakine, ndipo mukaŵelenga, mukoganizila mwaingakuyavyileni nkhani yamene iyo. Mukasilizhya kuŵelenga, mukozikonsha kuti:

•    Ndaŵa yanji Yehova elola kuti izi zilembewe m’Baibo?

•    Kansi izi zuniphunzisanji ponena za Yehova na mwakucitila zinthu?

•    Kansi mfundo izi ningaziseŵenzeshe tyani pa umoyo wangu?

 Mfundo Zingakuyavyeni: Mungaseŵenzeshe Baibo yophunzilila ya mu Cizungu ya New World Translation kuti mupeze mavidyo, mamapu na zinthu ziyakine zamene zingakuyavyeni kuti mukopindula mokwanila poŵelenga Baibo.