David wamene ali na vyaka 23, eciti: “Penenzokula, nenzolimbana na vuto yokopeka na alumbwana ayangu. Nenzoona kuti mwina zikacinje nikayokula koma mpaka lomba nikali na vuto iyi.”

 David ni Mkhristu wamene ofuna kucita zinthu zosangalasa Mulungu. Koma kansi angakwanishe kusangalasa Mulungu uku akalukopeka na analume ayake? Nanga Mulungu akumvwa tyani ngati oona ŵanthu amene olalana na analume kapena anakazi ayao?

•  Kansi Baibo yukamba zotyani?

•  Kansi zutanthauza kuti . . . ?

•  Koma tyani ngati . . . ?

 Maganizo a ŵanthu osiyanasiyana pa nkhani ya kulalana kwa analume kapene anakazi ŵeka-ŵeka, mokatizhyana na cinkhalidwe olo kucalo kwakufumila munthu. Ndipo mwaangaionele nkhani iyi acilumbwana na acikulile, zunkhala zosiyana soti. Akhristu okonkha lini zinthu ziyakine cifukwa cakuti ŵanthu anyinji oganiza tetyo olo ‘kutoleka kuluta uku na uku na mphepo iliyonse ya ciphunziso.’ (Aefeso 4:14) Koma oona nkhani iliyonse olo nkhani ya kulalana kwa analume kapena anakazi ŵeka-ŵeka, mogwilizana na mfundo za m’Baibo.

 Baibo yufotokoza movwika bwino za nkhalidwe iyi kuti:

•  “Usalale na munalume monga ni mwaulalila na munakazi.”​—Levitiko 18:22.

•  “Molingana na vilakolako va m’mitima mwao, . . . Mulungu eŵaleka kuti akonkhe vilakolako vomvwisha nsoni va kulalana, pofwana kuti anakazi pakati pao eleka njila yacibadwa ya miŵili yao noyamba kucita vinthu vosemphana na cibadwa.”​—Aroma 1:24, 26.

•  “Musasoŵeshewe. Adama, opembeza mafano, acigololo, analume amene olaliwa na analume ayao, analume olala analume ayao, akawalala, acigolo, acakolwa, olalata, kapena olonda, onse aŵa akaloŵe lini mu Ufumu wa Mulungu.”​—1 Akorinto 6:9, 10.

 Mfundo izi zecipeleka Mulungu, n’zofunika kuli munthu aliyense. Kaya munthu muyakine olalana na munalume kapena munakazi muyake, olo olalana na munthu wamene ni munalume lini kapena munakazi muyake, ofunikila kukonkha mfundo izi. Mfundo ni yakuti, aliyense ofunika kunkhala wozilesha kuti osati akokopeka na vilakolako vofuna kucita vinthu vakuzonda Mulungu.​—Akolose 3:5.

 Kansi izi zuonesha kuti Baibo yulimbikisha kuzonda ŵanthu amene olalana na analume kapena anakazi ayao?

 Yai. Baibo yulimbikisha lini zozondana na munthu aliyense, kaya munthu uyu olalana na analume kapena anakazi ayake olo yai. Koma yulimbikisha “kunkhala pa mtendele na ŵanthu onse” olo kuti ŵanthu aŵa ali na nkhalidwe yotyani. (Aheberi 12:14) Tetyo mufunika lini kuniata, kunyoza kapena kucitila nkhanza ŵanthu amene olalana na analume kapena anakazi ayao.

 Kansi izi zutanthauza kuti Akhristu akosusha malamulo amene ovomelezhya ukwati wa analume kapena anakazi ŵeka-ŵeka?

 Baibo yuonesha kuti Mulungu ekonza zakuti ukwati ukonkhala wa munalume m’mozi na munakazi m’mozi. (Mateyu 19:4-6) Koma kukambilana za malamulo aboma pa nkhani yonena za ukwati wa analume kapena anakazi ŵeka-ŵeka, kukatizhyana na nkhani za ndale osati kulimbikisha minkhalidwe yabwino. Baibo yulimbikisha Akhristu kuti osati akoloŵelela mu nkhani za ndale. (Yohane 18:36) Tetyo, Akhristu olimbikisha lini kapena kususha malamulo aboma amene onena za ukwati olo za kulalana kwa analume kapena anakazi ŵeka-ŵeka.

 Nanga tyani ngati munthu olalana na munalume olo munakazi muyake, kansi munthu wotetyo angacinje?

 Eee. Ŵanthu ayakine m’nthawi ya atumwi enzocita soti zoteti. Baibo peyefotokoza zakuti analume [kapena anakazi] amene olalana na analume [kapena anakazi] ayao akaloŵe lini mu Ufumu wa Mulungu, yekamba soti kuti: “Ayakine a mweo mwenze teti.”​—1 Akorinto 6:11.

 Kansi izi zutanthauza kuti ŵanthu amene eleka nkhalidwe iyi olakalaka lini soti kulalana na analume kapena anakazi ayao? Yai. Baibo yukamba kuti: “Muvwale umunthu walomba wakupeleka Mulungu, kutanthauza kuti mwa kuziŵa zinthu molondola, mucitishe umunthu wanu kunkhala walomba.” (Akolose 3:10) Kucinja kusila lini ndipo kutola nthawi.

 Nanga tyani ngati munthu wamene ofuna kukonkha zakufuna Mulungu, olimbana na cilakolako cofuna kulalana na munalume kapena munakazi muyake?

 Monga ni mwazunkhalila na cilakolako ciliconse, munthu osankha kucikhutilisa olo kucinyalanyaza. Kansi angacite tyani zamene izi? Baibo ikuti: “Pitilizhyani kuyenda mwa mzimu, ndipo mukonkhe lini cilakolako ca muŵili olo patontho.”​—Agalatiya 5:16.

 Ngati mwaoneshesha, lemba iyi yunena lini kuti munthu uyo angankhale lini soti na cilakolako camuŵili. Koma yuonesha kuti angakwanishe kulimbana na cilakolako ici. Angakwanishe kucita izi ngati angankhale na pulogilamu yophunzila Baibo koma soti kupemphela.

 Naye David watatomola koyambilila kwa nkhani ino ovomelezhya mfundo izi. David efotokoza kuti ekwanisha kulimbana na vuto iyi pavuli posenga thandizo kuli makolo ŵake amene ni Akhristu soti. Eciti: “Necimvwa monga kuti natula cimtolo colema. Ndipo nuona kuti sembe zinthu zeniyendela bwino kuti nenze neŵauzhya kamangu makolo ŵangu.”

 Zinthu zutiyendela bwino ngati tuyesayesa kukonkha malamulo a Yehova. Tuona kuti malamulo ŵake ni “olungama, osangalasa mtima” koma soti ‘munthu woŵasunga opeza mphoto ikulu.”​—Salimo 19:8, 11.