Ŵanthu anyinji ofuna kuziŵa mayankho a makonsho okhuza moyo. Ayakine ozikonsha kuti, “Ndaŵa yanji tili pacalo? Kansi moyo wangu uli na colinga ciliconse?” Baibo yulaŵila kuti colinga ca moyo wasu ni kunkhala pa ushamwali na Mulungu. Onani zayuphunzisa Baibo:

•   Mulungu ni Nyamalenga wasu. Baibo yukamba kuti: “Yove [Mulungu] niye etipanga, tiliyozipange seka.”​—Salimo 100:3; Chivumbulutso 4:11.

•   Vinthu vonse vecilenga Mulungu ali navo na colinga, kuyangizhyilapo seo teŵanthu.​—Yesaya 45:18.

•   Mulungu etilenga m’njila yakuti tikokwanisha kuzindikila ‘zosoŵa zasu zauzimu,’ zamene zuyangizhyilapo kuziŵa colinga ca moyo. (Mateyu 5:3) Yove ofuna kuti tikokhutilisha zosoŵa zasu zauzimu noyesayesa kuziŵa colinga ca moyo wasu.​—Salimo 145:16.

•   Tuonesha kuti tuzindikila zinthu zofunika ngako pa umoyo wasu ngati tuyesayesa kunkhala pa ushamwali wotang’a na Mulungu. Olo kuti ayakine angaone kuti n’zosakwanishika kunkhala pa ushamwali na Mulungu, Baibo yutilimbikisha kuti: “Vwendelani pafupi na Mulungu, ndipo naye avwendele pafupi namwe.”​—Yakobo 4:8; 2:23.

•   Kuti tinkhale pa ushamwali na Mulungu, tufunika kukonkha malamulo ŵake. Baibo yufotokoza zakufuna Mulungu kuti tikocita pa lemba ya Mlaliki 12:13. Lemba iyi yukamba kuti: “Yopa Mulungu wacendi nosunga malamulo ŵake. Cifukwa izi niye zakufunika kucita munthu.”

•   Msogolo, Mulungu akapeleke moyo wosasila uliye mavuto alionse ku ŵanthu amene omulambila ndipo ali naye pa ushamwali wotang’a. Akacite izi cifukwa ici niye colinga cake kuyambila pecilenga ŵanthu.​—Salimo 37:10, 11.