Munthu ocimwa ngati ocita kapena kuganiza zinthu zakuzonda Mulungu. Mwacisanzo, ocimwa ngati aliyokonkhe mfundo kapena malamulo a Mulungu. (1 Yohane 3:4; 5:17) Koma Baibo yulaŵila soti kuti munthu ocimwa ngati wakangiwa kucita zinthu zoyenela.​—Yakobo 4:17.

 M’vilaŵilo voyambilila veciseŵenzesha polemba Baibo, mau akuti cimo otanthauza “kuphonia.” Mwacisanzo, m’nthawi ya Aisiraeli kwenze masoja amene enzocita kuti akaponya mwala na mvuluma ‘enzophonia lini.’ Ngati mau aya angayamasulile m’cilaŵilo coyambilila, niye kuti angatanthauze kuti masoja aŵa ‘enzocimwa lini.’ (Oweruza 20:16) Tetyo, cimo ingatanthauze kuphonia olo kukangiwa kucita zakufuna Mulungu.

 Pofwana kuti Mulungu niye etilenga, ni woyenela kutipasa mfundo zatufunika kukonkha pa umoyo wasu. (Chivumbulutso 4:11) Tetyo, tikayankhe mlandu kwa Mulungu ngati tucita zinthu zolakwika.​—Aroma 14:12.

Kansi n’zokwanishika kupewelatu kucita macimo?

 Yai. Takamba teti cifukwa Baibo yulaŵila kuti: “Onse ni ocimwa ndipo ni opeleŵela pa ulemelelo wa Mulungu.” (Aroma 3:23; 1 Mafumu 8:46; Mlaliki 7:20; 1 Yohane 1:8) Ndaŵa yanji zili teti?

 Poyamba, Adamu na Eva enze angwilo. Ndipo enzocimwa lini cifukwa elengewa m’cifanizilo ca Mulungu. (Genesis 1:27) Koma pavuli pake ecimwa cifukwa aliyomvwile Mulungu. (Genesis 3:5, 6, 17-19) Tetyo, peciyamba kunkhala na ŵana, eŵapasako ucimo wamene uyo. (Aroma 5:12) Niye cifukwa cake Mfumu Davide elaŵila kuti: ‘Nevyalika wocimwa.’​—Salimo 51:5.

Kansi macimo ayakine ni akulu ngako kupambana ayakine?

 Eee. Mwacisanzo, Baibo yulaŵila kuti ŵanthu a ku Sodomu enze “aipa koma soti ocimwa ngako.” (Genesis 13:13; 18:20) Tiyeni tione mfundo zitatu zamene zingatiyavye kuziŵa ngati cimo ni ikulu olo yai.

1.   Mtundu wake. Baibo yuticenjeza kuti tufunika kupewa kucita macimo akulu-akulu monga ciwelewele, kulambila mafano, kuiŵa, kukolwa, kupaya munthu na kukhulupilila mizimu. (1 Akorinto 6:9-11; Chivumbulutso 21:8) Baibo yusiyanisha macimo aŵa na macimo ayakine yakucita ŵanthu mosaganizila monga kulaŵila kapena kucita zinthu zokhumudwisa ŵanthu ayakine. (Miyambo 12:18; Aefeso 4:31, 32) Koma Baibo yutilimbikisha kuti tufunika lini kuona cimo iliyonse kunkhala itontho cifukwa izi zingacitishe kuti tiyambe kucita macimo akulu-akulu.​—Mateyu 5:27, 28.

2.   Colinga cake. Ŵanthu ayakine ocita macimo cifukwa oziŵa lini zakufuna Mulungu. (Machitidwe 17:30; 1 Timoteyo 1:13) Baibo yucefya lini macimo aŵa, koma yuŵasiyanisha na macimo ayakine yamene ŵanthu oyacita mwadala. (Numeri 15:30, 31) Munthu wamene ocita macimo mwadala onkhala na ‘mtima uipa.’​—Yeremiya 16:12.

3.   Kucita mowelezhyawelezhya. Baibo yusiyanisha soti munthu wacita cimo kamozi tyala na munthu ocita macimo mowelezhyawelezhya. (1 Yohane 3:4-8) Mulungu akaweluze ŵanthu amene ocita “macimo mwadala” pavuli pakuti waziŵa zolondola.​—Aheberi 10:26, 27.

 Ŵanthu amene ocita macimo akulu angamvwe cisoni ngako pa vinthu vakucita. Mwacisanzo, Mfumu Davide elemba kuti: “Zolakwa zangu zakwela kupitilila mutu wangu. Zanilema ngako monga katundu wolema.” (Salimo 38:4) Koma Baibo yukamba kuti: “Munthu muipa aleke njila zake ndipo wowononga ayake aleke maganizo ŵake. Awelele kwa Yehova ndipo amucitile cifundo. Awelele kwa Mulungu wasu, pakuti okhululuka na mtima wonse.”​—Yesaya 55:7.