M’Baibo, mau yecimasulila kuti ‘ciukililo,’ yecokela ku mau acigiriki akuti a·naʹsta·sis, amene otanthauza “kuuka” olo “kupanama soti.” Munthu wamene waukishiwa, onkhala soti na moyo monga ni mweenzele akaliyokufwa.​—1 Akorinto 15:12, 13.

 N’cendi kuti mau akuti ‘ciukililo’ opezeka lini m’Malemba Aciheberi, yamene kanyinji yoitiwa kuti Cipangano Cakale. Koma mfundo yakuti akufwa akauke, yupezeka m’Malemba amene aŵa. Mwacisanzo, kupitila mwa mneneli Hoseya, Mulungu elonjeza kuti: “Nikaŵaombole ku Manda koma soti ku imfwa.”​—Hoseya 13:14; Yobu 14:13-15; Yesaya 26:19; Danieli 12:2, 13.

 Kansi ŵanthu ati akaukishiwe akankhale kuni? Ŵanthu ayakine akaukishiwa, oluta kululu kuti akalamulile monga mafumu pamozi na Khristu. (2 Akorinto 5:1; Chivumbulutso 5:9, 10) Baibo yulaŵila kuti kuuka uku ni “kuuka koyamba” kapena kuti “kuuka koyambilila.” Ndipo mau yonse yaŵili yoonesha kuti kukankhale kuuka kuyakine. (Chivumbulutso 20:6; Afilipi 3:11) Ŵanthu ati akaukishiwe pa kuuka kuyakine akankhale anyinji ngako ndipo akasangalale na moyo wosasila pacalo.​—Salimo 37:29.

 Kansi ŵanthu akaukishiwe tyani? Mulungu epasa Yesu mphamvu zoukisha akufwa. (Yohane 11:25) Yesu akaukishe ‘onse amene ali m’manda acikumbuso,’ ndipo aliyense akankhale monga ni mweenzele akaliyomwalila. (Yohane 5:28, 29) Ŵanthu amene oukishiwa kuti alute kululu, oukishiwa na muŵili wauzimu. Koma ŵala ati akaukishiwe kuti ankhale pacalo, akauke na muŵili wathanzi, uliye matenda koma soti uliye cilema ciliconse.​—Yesaya 33:24; 35:5, 6; 1 Akorinto 15:42-44, 50.

 Kansi ni ŵanthu otyani ati akaukishiwe? Baibo yulaŵila kuti “kukankhale kuuka kwa olungama na osalungama.” (Machitidwe 24:15) M’gulu ya ŵanthu olungama, muli ŵanthu monga Nowa, Sara koma soti Abulahamu. (Genesis 6:9; Aheberi 11:11; Yakobo 2:21) M’gulu ya ŵanthu osalungama, muli ŵanthu amene enzokonkha lini mfundo za Mulungu cifukwa enzeve mwai wophunzila Mau a Mulungu.

 Koma ŵanthu amene ocita vinthu viipa ngako ndipo ofuna lini kucinja, akaukishiwe lini. Ŵanthu oteti akamwalila, oyembekezela lini kuti akankhale soti na moyo.​—Mateyu 23:33; Aheberi 10:26, 27.

 Kansi ni lini pati akaukishiwe akufwa? Baibo yelosela kuti ŵanthu amene ali na ciyembekezo cakuya kululu akayambe kuukishiwa m’nthawi ya kunkhalapo kwa Khristu. Nthawi iyi yeyamba mu 1914. (1 Akorinto 15:21-23) Koma ŵanthu ati akaukishiwe kuti akankhale pacalo, akayambe kuukishiwa mu Ulamulilo wa Vyaka 1,000 wa Yesu Khristu. Mu ulamulilo uyu, calo cikakonzewe soti nonkhala paladaiso.​—Luka 23:43; Chivumbulutso 20:6, 12, 13.

 Ndaŵa yanji n’zomvwika kukhulupilila kuti akufwa akauke? M’Baibo muli nkhani za ŵanthu 9 amene eukishiwa, ndipo nkhani iliyonse yuonesha kuti penze ŵanthu eonako peenzoukishiwa ŵanthu amene aŵa. (1 Mafumu 17:17-24; 2 Mafumu 4:32-37; 13:20, 21; Luka 7:11-17; 8:40-56; Yohane 11:38-44; Machitidwe 9:36-42; Machitidwe 20:7-12; 1 Akorinto 15:3-6) Mwacisanzo, nkhani ya Lazaro, wamene eukishiwa na Yesu, ni yocitisha cidwi. Talaŵila teti cifukwa pepita masiku 4 kufumila pecimwalila Lazaro kufwika pa siku yecimuukisha Yesu ndipo ŵanthu anyinji emuona. (Yohane 11:39, 42) Olo ŵanthu amene enzosusha Yesu, aliyosushe kuti Lazaro eukishiwa. M’malomwake, ekonza ciwembu cakuti apaye Yesu na Lazaro.​—Yohane 11:47, 53; 12:9-11.

 Baibo yuonesha kuti Mulungu ali na mphamvu zoukisha akufwa ndipo ocitolakalaka kuŵaukisha. Paliye caangaluŵe ndipo okumbukila ciliconse cokhuza munthu aliyense wamene emwalila. Tetyo, akaseŵenzeshe mphamvu zake ziliye malile poukisha akufwa. (Yobu 37:23; Mateyu 10:30; Luka 20:37, 38) Monga ni mwataonela, Mulungu ali na mphamvu zoukisha akufwa ndipo ni wofunishisha kuŵaukisha. Posimikizhyila kuti akufwa akauke msogolo, Baibo yulaŵila kuti Mulungu ‘akalakelake nchito ya manja ŵake.’​—Yobu 14:15.

Maganizo olakwika pa nkhani ya ciukililo

 Maganizo olakwika: Mau akuti ciukililo otanthauza kukatizhyana soti kwa muŵili na mzimu.

 Mfundo yacendi: Baibo yuphunzisa kuti mzimu, kapena kuti moyo, ni munthu wenewene osati cinthu ciyakine camene cunkhala m’munthu ndipo upitilizhya lini kunkhala na moyo pavuli pakuti wamwalila. (Genesis 2:7; Ezekieli 18:4) Munthu akaukishiwa, zutanthauza lini kuti muŵili na mzimu wake zakatizhyana soti. M’malomwake, munthu wamene uyo onkhala kuti walengewa soti.

 Maganizo olakwika: Ŵanthu ayakine oukishiwa noonongewa nthawi yamene iyo.

 Mfundo yacendi: Baibo yulaŵila kuti ŵanthu “amene enzocita viipa akauke kuti aweluziwe.” (Yohane 5:29) Koma ŵanthu aŵa akaweluziwe kulingana na zati akacite akayoukishiwa, osati zeenzocita akaliyomwalila. Yesu elaŵila kuti: “Akufwa akamvwe mau a Mwana wa Mulungu, ndipo ati akamvwile akankhale na moyo.” (Yohane 5:25) Ŵanthu ati akamvwile nokonkha zinthu zati akaphunzisiwe akayoukishiwa, mazina yao yakalembewe mu “mpukutu wa moyo.”​—Chivumbulutso 20:12, 13.

 Maganizo olakwika: Munthu akaukishiwe na muŵili weenze nao akaliyomwalila.

 Mfundo yacendi: Munthu akamwalila, muŵili wake uonongeka nosanduka lito.​—Mlaliki 3:19, 20.