Eee, Maleŵania aliko ndipo niye “wolamulila calo.” Yove ni mngelo muipa wamene epondokela Mulungu. (Yohane 14:30; Aefeso 6:11, 12) Baibo yuonesha zocita za Maleŵania kupitila m’matanthauzo a mazina ŵake aŵa:

•   Satana, kutanthauza “Wosusha.”​—Yobu 1:6.

•   Maleŵania, kutanthauza “Woneneza.”​—Chivumbulutso 12:9.

•   Njoka, zina yamene m’Baibo yuseŵenzeshewa potanthauza “Wacinyengo.”​—2 Akorinto 11:3.

•   Woyesa.​—Mateyu 4:3.

•   Wawenye.​—Yohane 8:44.

Maleŵania ni ucimo lini unkhala mumtima mwa munthu

 Ŵanthu ayakine oganiza kuti Maleŵania ni nkhalidwe yaucimo yamene yunkhala mumtima mwa munthu. Koma Baibo yulaŵila kuti pa nthawi iyakine Mulungu elaŵila na Satana. Mulungu aliye ucimo. Tetyo, zingakwanishike lini kuti alaŵile na ucimo wamene wenze mumtima mwake. (Deuteronomo 32:4; Yobu 2:1-6) Kuyangizhyila apo, Satana eyesa Yesu, wamene aliye ucimo. (Mateyu 4:8-10; 1 Yohane 3:5) Tetyo, Baibo yuonesha kuti Maleŵania aliko cendi ndipo ni ucimo lini wamene unkhala mumtima mwa munthu.

 Lomba kansi tufunika kudabwa tikaona kuti ŵanthu anyinji okhulupilila kuti kuliye Maleŵania? Yai, cifukwa Baibo yulaŵila kuti Satana oseŵenzesha njila zacinyengo kuti akwanilishe zolinga zake. (2 Atesalonika 2:9, 10) Njila ikulu yakuseŵenzesha Satana kuti apusishe ŵanthu ni kuŵapangisha kukhulupilila kuti yove aliko lini.​—2 Akorinto 4:4.

  Maganizo olakwika: Zina iyakine ya Maleŵania ni Lusifala.

 Mfundo yacendi: Mau aciheberi amene m’mabaibo ayakine oyamasulila kuti “Lusifala” otanthauza “wonyezimila.” (Yesaya 14:12) Nkhani yamene ili m’capita ici yuonesha kuti mau aŵa otanthauza mafumu a Babulo amene Mulungu elaŵila kuti akaŵacitishe nsoni cifukwa ca kuzikuzhya kwao. (Yesaya 14:4, 13-20) Mau akuti “wonyezimila” yeseŵenzeshewa m’njila yoseka mafumu a Babulo pecigonjesewa.

  Maganizo olakwika: Mulungu oseŵenzesha Satana pofuna kulanga ŵanthu.

 Mfundo yacendi: Maleŵania ni mdani wa Mulungu, osati mtumiki wake. Satana Maleŵania onzunza koma soti kuneneza atumiki a Mulungu.​—1 Petulo 5:8; Chivumbulutso 12:10.