Liu ya m’Baibo yakuti “moyo” yemasuliliwa kufumila ku liu ya Ciheberi yakuti neʹphesh na ku liu ya Cigiriki yakuti psy·kheʹ. Mu Ciheberi, liu iyi yutanthauza “cinthu cufuza,” ndipo mu Cigiriki yutanthauza cinthu camoyo. a Tetyo, moyo ni cinthu ciliconse camene cufuza, osati cinthu camene cunkhala mkati mwa munthu, camene cufumamo ngati wafwa. Onani zayulaŵila Baibo zamene zuonesha kuti moyo ni munthu wamene:

•   Yehova Mulungu pecilenga munalume woyambilila, Adamu, Baibo yukamba kuti “munthu uyo enkhala wamoyo.” (Genesis 2:7, King James Version) Tetyo, Adamu aliyopasiwe moyo koma enkhala munthu wamoyo.

•   Baibo yukamba kuti moyo ungaseŵenze, ungasakile vakulya, ungalye, ungamvwile malamulo, na kukata mtembo wa munthu. (Levitiko 5:2; 7:20; 23:30; Deuteronomo 12:20; Aroma 13:1) Izi niye zakucita munthu.

Kansi n’cendi kuti moyo ukufwa lini?

 Yai, moyo ukufwa. Mabaibo anyinji okamba kuti moyo ukufwa. Onani visanzo ivi:

•   “Moyo wamene ucimwa niye wati ukafwe.”​—Ezekieli 18:4, 20, King James Version.

•   Mu Isiraeli wakale, ngati munthu wacita cimo ikulu, enzopasiwa cilango cakuti “moyo wake upaiwe.” (Ekisodo 12:15, 19; Levitiko 7:20, 21, 27; 19:8, King James Version) Uyu munthu enzofunikila “kupaiwa.”​—Ekisodo 31:14, King James Version.

•   Ngati munthu wamwalila, mabaibo ayakine oita mtembo wake kuti “moyo wakufwa.” (Levitiko 21:11, Numeri 6:6) Olo kuti mabaibo anyinji oseŵenzesha mau akuti “muŵili wakufwa” kapena kuti “munthu wakufwa,” pa Malemba aŵa, liu ya Ciheberi yeciseŵenzesha poyambilila ni yakuti neʹphesh, olo “moyo.”

Liu yakuti “Moyo” yutanthauza “umoyo”

 Baibo yuseŵenzesha soti liu yakuti “moyo” ngati yukamba pa za “umoyo.” Mwacisanzo, pa Yobu 33:22 liu ya Ciheberi yamene yemasuliwa kuti “moyo” (neʹphesh) oiseŵenzesha pa liu yakuti “umoyo.” Molingana na izi, Baibo yuonesha kuti moyo wa munthu olo umoyo, ungankhale pa ngozi olo kuwonongeka.​—Ekisodo 4:19; Oweruza 9:17; Afilipi 2:30.

 Kaseŵenzeshedwe ka liu yakuti “moyo” kotiyavya kumvwisha mavesi amene okamba kuti moyo “ufuma.” (Genesis 35:18; King James Version) Izi zuonesha kuti ngati Baibo ikakamba kuti moyo wafuma, yutanthauza kuti munthu wafwa. Mabaibo ayakine emasulila mau ali pa Genesis 35:18 kuti “eleka kufuza.”​—Good News Translation; New Jerusalem Bible.

Kwecefumila ciphunziso cakuti moyo ukufwa lini

 Machechi acikhristu amene okhulupilila kuti moyo ukufwa lini, aliyotole ciphunziso ici m’Baibo, koma ecitola ku mafilosofi akale acigiriki. Buku yakuti Encyclopædia Britannica yukamba kuti: “Molingana na zayukamba Baibo, zuonesha kuti liu yakuti moyo yulingana na kufuza cifukwa cakuti moyo ni cinthu lini cingankhale ceka paliye muŵili. Ciphunziso ici ca machechi acikhristu cakuti muŵili na moyo vusiyana cefumila ku Cigiriki cakale”.

 Mulungu ofuna lini kuyavizhya viphunziso vake na va ŵanthu, monga ŵala okhulupilila kuti moyo ukufwa lini. M’malomwake, Baibo yuticenjeza kuti: “Samalani: mwina muyakine angakukateni monga ni nyama, mwa nzelu za ŵanthu na cinyengo catyalatyala molingana na miyambo ya ŵanthu.”​—Akolose 2:8.