Kansi Mulungu Aliko?

MVWISHILANI

Yankho ya m’Baibo

Eee, Baibo yupeleka umboni wodalilika woonesha kuti Mulungu aliko cendi. Yutilimbikisha kukulisha cikhulupililo mwa Mulungu, osati kungokhulupilila tyala cipembezo ciliconse mosaziŵa, koma mwa kuseŵenzesha “mphamvu zoganiza” na “nzelu.” (Aroma 12:1; 1 Yohane 5:20) Onani umboni wosimikizhyilika wozikiwa m’Baibo:

Kunkhalapo kwa cilengedwe cooneka bwino camene cucilikiza moyo, ni umboni wakuti kuli Nyamalenga. Baibo yukamba kuti: “N’cendi kuti ng’anda iliyonse yemangiwa na munthu muyakine, koma epanga vinthu vonse ni Mulungu.” (Aheberi 3:4) Olo kuti mfundo iyi ni yosavuta kumvwa, ŵanthu anyinji ophunzila ngako oiona kuti ni mfundo yapalulu ngako. a
Mwacibadwa, seo teŵanthu tufuna kuziŵa colinga ca moyo. Ndipo tunkhala na njala yofuna kuziŵa zinyinji olo kuti zosoŵa zasu zamuŵili zakwanilishiwa. Zosoŵa izi niye zayukamba Baibo kuti ‘zosoŵa zasu zauzimu,’ zamene zuyangizhyilapo kufuna kuziŵa Mulungu nomulambila. (Mateyu 5:3; Chivumbulutso 4:11) Zosoŵa izi zauzimu zutipasa lini tyala cidalilo cakuti Mulungu aliko cendi, koma zutionesha soti kuti ni Nyamalenga wacikondi wamene ofuna kukhutilisha zosoŵa zasu.—Mateyu 4:4.
Maulosi a m’Baibo elembewa vyaka vinyinji ngako kuvuli, koma zonse zelembewa m’maulosi aŵa zecizokwanilishiwa ndendende molingana na mwezelembewela. Kulondola kwake koma soti ndondomeko yake zuoneshelatu kuti zefumila cendi kwa Mulungu.—2 Petulo 1:21.
Olemba Baibo enzofotokoza zinthu zokhuza sayansi zamene ove enzozimvwisha lini. Mwacisanzo, m’nthawi zakale ngako ŵanthu anyinji enzokhulupilila kuti calo cenkhala pa nyama, monga njovu, nkhumba zam’sanga, olo pa ng’ombe zikulu-zikulu. Mosiyana na izi, Baibo yukamba kuti “ekoloŵeka calo m’malele.” (Yobu 26:7) Molingana na izi, Baibo yufotokoza zolondola zokhuza mwacilili calo. Ikuti ni “calaundi.” (Yesaya 40:22, mau amnyansi; Douay Version) Ŵanthu anyinji oona kuti Mulungu ndiye angafotokoze bwino ngako za nkhani iyi, cifukwa ndiye eyavya ŵanthu kuti azilembe m’Baibo.
Baibo yuyankha makonsho anyinji amene ooneka kuti ni ovuta, ndipo yupeleka mayankho okhutilisa pa makonsho yakukonsha ŵanthu asakhulupilila kuti Mulungu aliko. Mwacisanzo: Ngati Mulungu ni wacikondi koma soti wamphamvuzonse, ndaŵa yanji pacalo pali mavuto? Ndaŵa yanji cipembezo culimbikisha ŵanthu kucita vinthu viipa m’malo mocita vabwino?—Tito 1:16.

a Mwacisanzo, ponena za volengewa va m’mululu, kaswili muyakine woona za m’mululu wa zina yakuti Allan Sandage, elaŵila kuti: “N’zosamvwika kuti cilengedwe cingankhalepo mwangozi. Pofunika kunkhala munthu ecipanga. Neo, nukhulupilila lini kuti Mulungu aliko, koma nikaona vinthu vodabwisa vili m’cilengedwe, nuzikonsha kuti, ‘Nanga ivi vinthu venkhalako tyani?’”