Yai, vipembezo vonse vulingana lini. M’Baibo muli visanzo va vipembezo vamene vusangalasa lini Mulungu. Pali magulu yaŵili ya vipembezo.

Gulu yoyamba: Vipembezo vamene vulambila milungu yawenye

 Baibo yulaŵila kuti kulambila milungu yawenye ni ‘kwatyalatyala’ ndipo ‘kuliye phindu’ iliyonse. (Yeremiya 10:3-5; 16:19, 20) Yehova a Mulungu elamula mtundu wa Aisiraeli kuti: “Usankhale na milungu iyakine kupatulapo tyala neo.” (Ekisodo 20:3, 23; 23:24) Aisiraeli peciyamba kulambila milungu yawenye, “ukali wa Yehova weŵayakila.”​—Numeri 25:3; Levitiko 20:2; Oweruza 2:13, 14.

 Olo masiku ŵano, Yehova okhumudwa na ŵanthu amene olambila “milungu” yawenye. (1 Akorinto 8:5, 6; Agalatiya 4:8) Yove elamula ŵanthu amene ofuna kumulambila kuti ofunika kufuma m’cipembezo cawenye. Eciti: “Cokani pati pao, osakatizhyana nao.” (2 Akorinto 6:14-17) Kuti vipembezo vonse vulingana ndipo vuyavya ŵanthu kuziŵa Mulungu, sembe Yehova aliyopeleke lamulo iyi.

Gulu yaciŵili: Vipembezo vamene vulambila Mulungu wacendi m’njila yosavomelezhyeka

 Nthawi ziyakine, Aisiraeli enzolambila Mulungu poseŵenzesha zikhulupililo koma soti miyambo yofumili ku ŵanthu amene enzolambila milungu yawenye. Koma Yehova enzozonda kuyavikizhya kulambila kwacendi na kwawenye. (Ekisodo 32:8; Deuteronomo 12:2-4) Yesu ezuzula asogoleli acipembezo a m’nthawi yake cifukwa ca zeenzocita polambila Mulungu. Enzozioneshela kuti olambila Mulungu koma zenezene n’zakuti enze acinyengo. Ove ‘enzonyalanyaza zinthu zofunika za m’Cilamulo, monga cilungamo, cifundo na kukhululukila.’​—Mateyu 23:23.

 Olo masiku ŵano, cipembezo camene cuphunzisa cendi ndiye cingayavye ŵanthu kuziŵa Mulungu. Cendi cokhuza Mulungu cupezeka m’Baibo. (Yohane 4:24; 17:17; 2 Timoteyo 3:16, 17) Vipembezo vamene vuphunzisa vinthu vosiyana na zayulaŵila Baibo, vingayavye lini ŵanthu kuziŵa Mulungu. Viphunziso vinyinji vakuganiza ŵanthu kuti ni va m’Baibo, monga vakuti pali milungu itatu mwa mulungu umozi, munthu ali na mzimu wamene ukufwa lini na zakuti ŵanthu aipa oshokewa ku mulilo, vefumila ku ŵanthu amene enzolambila milungu yawenye. Vipembezo vamene vuphunzisa vinthu ivi, vuyavya lini ŵanthu cifukwa vuphunzisa miyambo ya ŵanthu m’malo mophunzisa zakufuna Mulungu.​—Maliko 7:7, 8.

 Mulungu ozonda kumulambila mwacinyengo. (Tito 1:16) Cipembezo cacendi cufunika kuyavya ŵanthu kunkhala pa ushamwali wotang’a na Mulungu, osati kukonkha miyambo yosakatizhyana na Malemba olo kungolambila Mulungu mwamwambo. Mwacisanzo, Baibo yulaŵila kuti: “Ngati munthu oziona kuti ni wopembeza koma olamulila lini lilimi yake, ndipo opitilizhya kunyempheka mtima wake, kupembeza kwa munthu woteti ni kwatyalatyala. Kupembeza kutuŵa koma soti kosaipishiwa kwa Mulungu koma soti Ausuwasu ni uku: Kusamalila ŵana amasiye na anakazi amasiye m’mavuto ŵao, nonkhala uliye ciŵanga ca calo.” (Yakobo 1:26, 27) Baibo ya King James Version yuseŵenzesha mau akuti “cipembezo cosadesewa” ponena za kulambila Mulungu mwacilungamo.