Aramagedo ni nkhondo yosilizhyila yamene ikacitike pakati pa maboma a ŵanthu na Mulungu. Olo masiku ŵano, maboma aŵa, kuyangizhyilapo nzika zao, osushana na Mulungu cifukwa okana kugonjela ulamulilo wake. (Salimo 2:2) Koma nkhondo ya Aramagedo ikasilizhye maboma onse a ŵanthu.​—Danieli 2:44.

 Mau akuti “Aramagedo” opezeka tyala kamozi m’Baibo pa lemba ya Chivumbulutso 16:16. Ulosi wa m’buku ya Chivumbulutso uonesha kuti “mafumu a pacalo” akasonkhanishiwe “pamozi ku malo amene m’Ciheberi oitiwa kuti Aramagedo,” yamene ni “nkhondo ya siku ikulu ya Mulungu Wamphamvuzonse.”​—Chivumbulutso 16:14.

 Ni ŵani ati akasogolele pa nkhondo ya Aramagedo? Yesu Khristu niye wati akasogolele gulu ya nkhondo yakululu pogonjesa adani a Mulungu. (Chivumbulutso 19:11-16, 19-21) Adani aŵa ni ŵanthu amene osusha ulamulilo wa Mulungu ndipo omulemekeza lini.​—Ezekieli 39:7.

 Kansi nkhondo ya Aramagedo ikacitike ku vyalo va ku Middle East tyala? Yai. Nkhondo ya Aramagedo ikacitike lini tyala ku dela imozi. M’malomwake, nkhondo iyi ikacitike pacalo conse.​—Yeremiya 25:32-34; Ezekieli 39:17-20.

 Mau akuti Aramagedo, amene nthawi ziyakine olembewa kuti “Haramagedo” (m’Cihebeli Har Meghiddohnʹ), otanthauza “Lupili ya Megido.” Vyaka vinyinji kuvuli, Megido wenze mzinda ku Isiraeli. Mbili yuonesha kuti nkhondo zikulu-zikulu zenzocitikila ku dela yamene iyi. Ndipo nkhondo ziyakine zamene zecitikila ku dela iyi zetomolewa m’Baibo. (Oweruza 5:19, 20; 2 Mafumu 9:27; 23:29) Koma mau yakuti Aramagedo yotanthauza lini malo yeneyene yamene yali pafupi na mzinda wakale woitiwa kuti Megido. Ku dela iyi kuliye lupili ikulu yamene adani onse a Mulungu angakwane, olo tingayapamikizhye na malo onse ali m’cigwa ca Yezereeli. M’malomwake, mau akuti Aramagedo otanthauza zati zikacitike pacalo conse msogolo. Pa nthawi iyi, ŵanthu a mitundu yonse akasonkhane pamozi pofuna kulimbana na ulamulilo wa Mulungu.

 Kansi n’cinji cati cikacitike pa nkhondo ya Aramagedo? Tuziŵa lini kuti Mulungu akaseŵenzeshe tyani mphamvu zake poononga adani ŵake. Koma mwina angayoseŵenzesha njila zeciseŵenzeshapo kale m’nthawi zakuvuli monga matalala, vivomezi, mvula, mulilo, kaleza na milili. (Yobu 38:22, 23; Ezekieli 38:19, 22; Habakuku 3:10, 11; Zekariya 14:12) Tuziŵa soti kuti adani ayakine a Mulungu akayambe kupayana ŵeka-ŵeka cifukwa cosokonezeka. Koma posilizhyila pake akaziŵe kuti Mulungu niye wati akaŵacitishe kucita zinthu izi.​—Ezekieli 38:21, 23; Zekariya 14:13.

 Kansi calo cikasile pa Aramagedo? Nkhondo ya Aramagedo ikaononge lini olo kusilizhya calo. Takamba tetyo cifukwa Mulungu elenga calo na colinga cakuti ŵanthu akonkhalamo mpaka kale-kale. (Salimo 37:29; 96:10; Mlaliki 1:4) Ndipo nkhondo ya Aramagedo ikaononge lini ŵanthu onse, koma ikacitishe kuti ŵanthu ayakine akapulumuke. Baibo yuonesha kuti “gulu ikulu” ya atumiki a Mulungu ikapulumuke.​—Chivumbulutso 7:9, 14; Salimo 37:34.

 M’Baibo, nthawi zinyinji mau akuti “calo” otanthauza calo cenecene. Koma nthawi ziyakine mau aŵa otanthauza ŵanthu osamvwila Mulungu amene ocita vinthu viipa. (1 Yohane 2:15-17) Tetyo, tingakambe kuti nkhondo ya Aramagedo “ikasilizhye calo” kutatanthauza kuti ŵanthu amene ocita vinthu viipa akapaiwe ndipo akankhaleko lini soti.​—Mateyu 24:3, King James Version.

 Kansi ni lini pati ikacitike nkhondo ya Aramagedo? Pofotokoza za “cisauso cikulu” cati cikacitike nkhondo ya Aramagedo ikaliyoyamba, Yesu elaŵila kuti: “Ponena za siku iyi na ola yake, paliye oziŵa, olo angelo akululu kapena Mwana, koma Atata.” (Mateyu 24:21, 36) Koma Baibo yuonesha kuti nkhondo ya Aramagedo ikacitike pa nthawi yakuti Yesu ali pa mpando wacifumu, koma ŵanthu akokwanisha lini kumuona. Nthawi iyi yeyamba mu 1914.​—Mateyu 24:37-39.