Kansi Ufumu wa Mulungu Uli Mumtima Mwanu?
Yankho ya m’Baibo
Yai. Ufumu wa Mulungu unkhala lini mumtima mwa Mkhristu. a Baibo yulaŵila malo kwaunkhala Ufumu uyu cifukwa yuutomola soti kuti “Ufumu wakululu.” (Mateyu 4:17, Buku Lopatulika Ndilo Mau a Mulungu) Onani mwayuoneshela Baibo kuti Ufumu wa Mulungu ni boma yeneyene yamene yulamulila, pa mfundo zili pansi apa.
Ufumu wa Mulungu uli na olamulila, ŵanthu amene olamuliliwa koma soti uli na colinga cakuti cifunilo ca Mulungu cicitike pacalo monga ni kululu.—Mateyu 6:10; Chivumbulutso 5:10.
Boma ya Mulungu, kapena kuti Ufumu wa Mulungu, ikalamulile ‘ŵanthu a mitundu yosiyanasiyana koma soti olaŵila vilaŵilo vosiyanasiyana’ pacalo conse. (Danieli 7:13, 14) Mphamvu za olamulila a Ufumu wamene uyu zucokela kuli Mulungu osati ku ŵanthu olamuliliwa.—Salimo 2:4-6; Yesaya 9:7.
Yesu euzhya atumwi ŵake kuti ‘akankhale m’mipando yacifumu’ pamozi na yove mu Ufumu wakululu.—Luka 22:28, 30.
Ufumu uyu ukaononge adani ŵake onse.—Salimo 2:1, 2, 8, 9; 110:1, 2; 1 Akorinto 15:25, 26.
Baibo yuphunzisa lini kuti Ufumu wa Mulungu uli mumtima mwanu, olo kuti ulamulila mumtima mwa munthu. Koma yuonesha kuti “mau a ufumu” olo ‘uthenga wabwino wa ufumu,’ ungacinje mtima wa munthu. Ndipo pali ŵanthu amene ekwanisha kucinja.—Mateyu 13:19; 24:14.
Kansi mau akuti “Ufumu wa Mulungu uli mkati mwanu” otanthauzanji?
Ŵanthu akaŵelenga Mabaibo ayakine pa Luka 17:21, osokonezeka pa nkhani ya malo amene kuli Ufumu wa Mulungu. Mwacisanzo, Baibo ya Buku Lopatulika Ndilo Mau a Mulungu, yulaŵila kuti “Ufumu wa Mulungu uli mkati mwanu.” Koma tufunika kuona mavesi ayakine amene ali pafupi na vesi iyi kuti timvwishe nkhani iyi.
Ufumu wa Mulungu wenze lini mumtima mwa Afarisi amene enzosusha Yesu koma soti amene ekonza ciwembu cakuti amupaye
Apa Yesu enzolaŵila na Afarisi, amene enze gulu ya asogoleli acipembezo amene enzomususha ndipo ekonza ciwembu cakuti amupaye. (Mateyu 12:14; Luka 17:20) Kansi muona kuti zingankhale zomvwika kulaŵila kuti Ufumu wa Mulungu wenze mumtima wa ŵanthu ankhanza amene aŵa? Yesu eŵauzhya kuti: “Mkati mwanu mwazula cinyengo na kusamvwila malamulo.”—Mateyu 23:27, 28.
Mabaibo ayakine omasulila momvwika bwino mau opezeka pa Luka 17:21 kuti: “Mulungu onkhazikisha Ufumu wake pakati panu.”(Ni seo tafipisha ngako mau akuti “pakati”; Chipangano Chatsopano cholembedwa m’Chichewa chamakono) “Ufumu wa Mulungu uli pakati panu.” (Baibulo la Dziko Latsopano la Malemba Opatulika) Apa Yesu enzolaŵila mau oonesha kuti ufumu wa kululu wenze “pakati” pa Afarisi cifukwa yove niye esankhiwa na Mulungu kunkhala Mfumu ndipo enze pakati pao.—Luka 1:32, 33.
a Vipembezo vacikhristu vinyinji vuphunzisa kuti Ufumu wa Mulungu uli mu mtima wa munthu. Mwacisanzo, pa msonkhano ukulu wecicita a cipembezo ca Baptist ku United States, elaŵila kuti Ufumu wa Mulungu uli “mu mtima wa munthu aliyense.” Molingana na izi, m’buku yakuti Jesus of Nazareth, Papa Benedict XVI elaŵila kuti “Ufumu wa Mulungu unkhala mwa munthu ngati munthu wamene uyo ali na mtima womvwila.”
Ziyakine Zamungakonde
ESSENTIAL BIBLE TEACHINGS
Kansi Ufumu wa Mulungu n’Cinji?
Penzocita ulaliki wake pacalo, Yesu ephunzisa ngako za Ufumu wa Mulungu kupambana nkhani iliyonse. Kwa vyaka vinyinji, okonkha ŵake ankhala opemphela kuti Ufumu wa Mulungu uwele.