Baibo yulaŵila za matatuu kamozi tyala pa lemba ya Levitiko 19:28 yamene ikuti: “Osati mukozilemba zizindikilo.” Mulungu epeleka lamulo iyi ku mtundu wa Aisiraeli na colinga cakuti akosiyana na ŵanthu a mitundu yoŵazungulila amene enzozilemba mazina na zizindikilo za milungu yao pa miŵili yao. (Deuteronomo 14:2) Olo kuti masiku ŵano Akhristu okonkha lini Cilamulo camene Mulungu epasa Aisiraeli, mfundo ya mu lamulo iyi ni yofunika kuiganizila.

Kansi n’cololeka Mkhristu kuzilemba matatuu?

 Malemba okonkhapo angakuyavyeni kuiganizila mozama nkhani iyi:

•   Anakazi akozikongolesha . . . mwaulemu.” (1 Timoteyo 2:9) Mfundo iyi yukhuza onse, anakazi pamozi na analume. Tufunika kuganizila mwamene zocita zasu zingakhuzile ŵanthu ayakine m’malo mongocita tyala zinthu zatuona kuti zutikondwelesha.

•   Ŵanthu ayakine ozilemba matatuu na colinga cofuna tyala kuchuka pamene ayakine ongofuna kuonesha kuti muŵili ni wao. Koma Baibo yulimbikisha Akhristu kuti: “Mupeleke miŵili yanu monga nsembe yamoyo, ituŵa na yovomelezhyeka kwa Mulungu, yamene ni utumiki wopatulika mwa kuseŵenzesha luso ya kuganiza.” (Aroma 12:1) Tetyo, mukoseŵenzesha “luso ya kuganiza” kuti muone cifukwa cake mufuna kuzilemba matatuu. Ngati mungofuna tyala kuchuka kapena kuonesha kuti muli m’gulu iyakine, kumbukilani kuti m’kuluta kwa nthawi maganizo amene aŵa akasile koma matatuu yemwezilemba yakaŵepo mphela. Kuganizila mofasa colinga canu kungakuyavyeni kuti musankhe zocita mwanzelu.​—Miyambo 4:7.

•   “Zolinga za munthu wakhama zumupindulila, koma aliyense wopupuluma, akasauke.” (Miyambo 21:5) Munthu akafuna kuzilemba tatuu, nthawi zinyinji zunkhala kuti aliyoganizile mofasa kuti matatuu yawazilemba, akopangisha kuti akovutika kupeza ŵanthu otandala nao na nchito. Koma soti matatuu oŵaŵa poyacosa ndipo pofunika ndalama zinyinji. Ŵanthu ocita kafukufuku na ŵala amene ocita malonda yocosa ŵanthu matatuu, elaŵila kuti ŵanthu anyinji amene ezilemba matatuu oziimba mlandu ndipo onena kuti sembe aliyezilembe tyala.