Samuwele wa Bobedi 3:1-39
3 Ba mutši wa Sawulo le ba mutši wa Dafita ba f’lo ya mahlong ba kene ba lwa; fote Dafita a fo ya a kene a ba le matšhika, mara ba mutši wa Sawulo ba fo ya ba lelemela.
2 Ka nako yone, Dafita ke mo ba mmelegela barwayi ku Hebhrone. Letšibula lage ke mo go le Amononi wa gore o mmelegele ke Ahinowamo wa Jeziriyele.
3 Gwa latela Khiliyabho wa gore o mmelegele ke Abhigheyili wa gore ne go le mosadi wa Nabhale wa Lekharamele; wa kararo (3) ke mo go le Abhsalomo morwayi wa Mayakha, morwediya wa Thalimayi kgoši ya Ghešuri.
4 Wa kanne (4) ke mo go le Adonija morwayi wa Haghithi, wa kapheta (5) ke mo go le Šefataya morwayi wa Abhitale.
5 Wa kobodi (6) ke mo go le Ithariyamo wa gore Dafita o mmelegele ke mosadi wage Eghla. Bowa ke bana ba Dafita ba gore ba mmelegele bona ku Hebhrone.
6 Mo ba mutši wa Sawulo le ba mutši wa Dafita ba kene ba lwa, Abhonere ke mo a karakara gore a tseyediwe gedimo ka mutšing wa Sawulo.
7 Byalo, Sawulo ke mo a na le motlabo ye ba reng ke Rizpa morwediya wa Ayiya. Ka nthago, Iši-bhošethe a re ga Abhonere: “Ke ntaba o yetsele le motlabo wa papa?”
8 Mantsu ya ma hlayyeng ke Iši-bhošethe ma kwatisa Abhonere ka matla, ke mokane a re: “Ke gore wene mo o ntibelele o fo bona mpsya ya go tšwa Juda akere? Go segela lekgono lowa, ke mo nkene ke šupetsa ba mutši wa papago Sawulo, bobhuti bage le banghana bage gore ke ba nyaka ka matla, fote a ke ya go rekisa ga Dafita; mara wene lekgono o nsekisa ka taba la mosadi, o re ke sinnye.
9 Nkare Modimo a ka wolola Abhonere a boya a yeketsa mo nka sa make gore dilo di makegele Dafita ka mokgo Jehova a mo tshepisiyeng:
10 o mo tshepisiye gore mmušo wa ntlo ya Sawulo go nyoko ba wage, le gore Israyele le Juda di nyoko lawola ke Dafita, go tlugisela ka Dani go segela Bhere-šeba.”
11 Iši-bhošethe aa hlwa a sa bolabola selo le Abhonere, ka taba la gore ne a mo tšhaba.
12 Abhonere a napa a romela batho ga Dafita, a re: “Naga yowa ke ya mang?” A tokegela ka gore: “Maka kwano le nna, ke nyoko maka so nka se kgonang gore Maisrayele ka moka ma be ka nthoko yago.”
13 Mo a reyane, Dafita a re: “Go lukiye! Ke nyoko maka kwano nago. Mara ke kgopela o sa tle mo gaka mo o ka sa thomisi o tla le Mikhala morwediya wa Sawulo.”
14 Ke mokane Dafita a romela batho ga Iši-bhošethe morwayi wa Sawulo, a re: “Nneye mosadi waka Mikhala, wa gore ke leyye bohlatse* bya gore ke bolayye 100 ya Mafilisita gore ke thogo mo kraya.”
15 Byalo, Iši-bhošethe a re ba late Mikhala ga monnage Palitiyele morwayi wa Layiši.
16 Mara monnage ke mo a kene a sepela naye a mo llela, a mo latelela go segela Bhahurimi. Ke mokane Abhonere a re gage: “Jika!” Mo a reyane, Palitiyele a jika.
17 Ka nako yone, Abhonere a romela molayetsa ga banna ba bagolo ba Israyele, a re: “Ke botala le nyaka gore Dafita go be kgoši ya lune.
18 Byalo, makaneng se sengwana ka gore Jehova o butsiye Dafita gore: ‘Ke nyoko maka gore lelata laka Dafita le phonise batho baka ba Israyele ga Mafilisita le manaba ya bona ka mokana ga wona.’”
19 Abhonere a bolabola le batho ba Bhenjamini. Fote a ya a bolabola le Dafita ka makhukhung ku Hebhrone, a mmotsa gore Maisrayele le ba mutši wa Bhenjamini ka mokana ga wona ba segelele sepheto sefeng.
20 Mo Abhonere a segela ga Dafita ku Hebhrone a na le banna 20 ya bona, Dafita a makela Abhonere le banna bo ne a le nabo monyanya.
21 Ke mokane Abhonere a re ga Dafita: “Kgoši morenaka, yema ke ye hlekeletsa Maisrayele ka mokana ga wona gore ma be ka nthoko yago, gore ba make kwano nago fote wene o nyoko ba kgoši ya setšhaba sa Israyele ka mokana ga sona.” Byalo Dafita a re Abhonere a sepele, ke mokane a sepela.
22 Gwa napa go nyarela malata ya Dafita ma na le Jowabho ma tšwa go ye hlaseleng, ma tlile ma tshwere dilo tsa go tlala ka matla. Abhonere ke mo a šele a tlugiye ga Dafita ku Hebhrone, ka gore Dafita ke mo a yitseri a sepele.
23 Mo Jowabho le masole ka mokana ga wona ya ne ma le naye ba segela, ba mmotsa gore: “Abhonere morwayi wa Nere ke mo a tlile ga kgoši, fote kgoši yi yitseri a sepele, Abhonere a sepela.”
24 Byalo Jowabho a ya ga kgoši, a re: “O makiye ying? Abhonere ke mo a tlile gago. Ke ntaba o yitseri a sepele? Gana byalo o tšhabiye.
25 Wa mo tšiba Abhonere morwayi wa Nere! O tlile mowa gore a go make sephokophoko, o nyaka go tšiba dipolane tsago le dilo ka moka tso o di makang.”
26 Byalo Jowabho a tloga ga Dafita a roma batho gore ba late Abhonere, ba tlile naye ba tšwa sedibeng sa Sira; mara Dafita ke mo a sa tšibi selo ka taba yowa.
27 Mo Abhonere a segela Hebhrone, Jowabho a mmitsela ka thoko ka teng ga digheyiti tsa mutši gore a thogo bolabola naye. Mara mo ba le gana hone, a hlaba Abhonere mo mpeng ke mokane a kgwa; ke mo a patedisa ka taba la gore o bolayye bhuti wage Asahele.
28 Mo Dafita a di kwelela ka nthago, a re: “Nna le mmušo waka re nyoko fo dula re se na molato mahlong ga Jehova ka taba la likgu la Abhonere morwayi wa Nere.
29 Nkare molato wone go ka ba wa Jowabho le ba mutši wa papage ka mokana ga bona. Nkare mutšing wa Jowabho go ka fo dula go na le monna wa go ba le bolwele bya go tšwa dithila ka ho fase kela wa go ba le bolwele bya go jega dinama byo ba reng ke lephera kela wa gore ke segole* kela wa gore ba mmolaya ka sabola kela wa gore o gayela tsa go ja!”
30 Byalo, Jowabho le Abhišayi ba bolaya Abhonere ka taba la gore o bolayye Asahele bhuti wa bona ntweng ku Ghibhiyoni.
31 Byalo, Dafita a botsa Jowabho le batho ka mokana ga bona bo ne a le nabo gore: “Tlerolaneng dikobo tsa lune, le yapare masaka, le llele Abhonere.” Kgoši Dafita ke mo a ba šele nthago bo ne ba rwele setopo sa Abhonere mo ba ya go ye mmolokeng.
32 Abhonere ba mmolokele Hebhrone; kgoši ya lla ka matla ku lebitleng la Abhonere, fote batho ka mokana ga bona ba lla.
33 Kgoši ya yepelela yi llela Abhonere ya re:
“Nje Abhonere a ka fo napa a kgwa nkare ke motho wa go sa re selo?
34 Matsogo yago ke mo ba sa ma tlema,Fote mawoto yago ke mo ma sa tlemiwa ka diketane.
O kgwile nkare ke wene motho wa go bolaya ke dikgohlane.”
Mo a reyane, batho ka mokana ga bona ba mo llela fote.
35 Ka nthago, batho ka mokana ga bona ba tla ba tl’le neya Dafita sekgwa sa go mo kgomoletsa, ke mo go sa le motshegare, mara Dafita a tshepisa a re: “Nkare Modimo a ka n’wolola ka matla mo nka ja sekgwa kela ka ja se sengwana mo le soko kgwalala!”
36 Batho ka mokana ga bona ba di bona, fote tsotsone dya ba jabodisa. Dilo ka mokana ga tsona tso kgoši ne yi di maka, di jabodisiye batho ka mokana ga bona.
37 Byalo, batho ka mokana ga bona le Israyele ka mokana ga yona ba di tšiba ka letšatši lone gore kgoši ke mo yi sa tšibi selo ka go bolayiwa ga Abhonere morwayi wa Nere.
38 Kgoši ya bolabola le malata ya yona ya re: “Anthe a le di tšibi gore go kgwile ndhuna le motho wa go tseyediwa gedimo ku Israyele ka letšatši lowa?
39 Ke ya lelemela lekgono le mo ba ntlotsiye gore ke be kgoši, banna bowa ba gore ke barwayi ba Zeruya ba na le dipelo tse diphifadu. Nkare Jehova a ka patedisa ga ye a makang dilo tsa go sa loka.”
Ditwaba
^ Gabutšibutši ke “nama yo yi leng ka mahlong ga selo sa ka fase sa bonna.”
^ Ke monna wa gore o fo kgona go maka mmereko wa basadi, a ka sa kgone go ya ntweng kela go maka mebereko ye mengwana ya gore yi maka ke bana.
