HLOGOTABA YA GO TŠHUTIWA 43
KOŠA 90 Tiyisananeng
Tso o ka di Makang mo o Kamaka
“Le nyakolleneng gore dilo ka mokana ga tsona ke nnete.”—1 MATHES. 5:21.
MONG TŠHIKO
Ka mokgo re ka lukisang dilo tso re di kamakang tsa gore di ka yama mmereko wo re wo makelang Jehova.
1-2. (a) Malata ya Jehova ma ka kamaka dilo tsa mošaga mang? (b) Re nyoko petapeta ka ying ga hlogotaba yowa?
BATHO ba mengwaga ya go sa tshwana ba fela ba kamaka. a Mo re beyisa, nagana ka Hlatse ya gore yi sa gola ya gore yi ka fo ba yi tiputsisa gore nje Jehova o yi tseyela hlogong. A ka fo ba a kamaka mo di tla ga taba ya go kolobetsiwa. Kela a nagana ka mogageru wa gore nakwela a sa le ye monyana o yye a kgeta go berekela Jehova sekaleng sa go yi tipa ka masaka. Gana byalo o šele a gudiye fote o fo ba le tšheleta ya go lekana tso ba mutši wage ba di gayelang, a ka fo ba a tiputsisa gore ayitsano o segelele sepheto sa gabutši nakwela a sa gola. Nagana ka mogageru wa mosadi wa gore o tsofele wa gore aa sa na matšhika le matšato. A ka fo tikwa a kgongwele ka taba la gore aa sa kgona go maka tso ne a kgona go di maka. Nje wene o yye wa tiputsisa diputsiso tsa go tshwana le tsowa: ‘Ayitsano Modimo wa di bona tso ke di makang? Nje tso ke tikonneng tsona ka taba la Jehova a ke ya di makela mahala? Nje Jehova o sa na a nyoko go mperekisa?’
2 Mo re ka fo lisetsa diputsiso tsowa di sa fetodiwa, di ka maka gore re sa sa tshepa Jehova ke mokane ra lisetsa go mo rapela. Ga hlogotaba yowa, re nyoko bona gore go berekisa ditšhiko tsa Bhayibele go ka re gelepa ka mokgo mang mo re kamaka (1) gore Jehova wa tihlupa ka rune, (2) gore dipheto tso re di segeleleng ku botala ne di le gabutši, kela (3) gore Jehova o sa na a nyoko re berekisa.
TSO O KA DI MAKANG MO O KAMAKA
3. King so re ka se makang mo re na le diputsiso tsa gore di maka gore re šale re kgongwele?
3 Mo re na le diputsiso, di gabutši gore re nyakele diphetolo ka ho Bhayibeleng. Mo re ka maka ka mokgonone, re nyoko šala re tiyelele, ra tlalela ka matla ga tso tsa Modimo fote ra thogo maka gore ‘tumelo ya rune yi sa tekateke.’—1 Makor. 16:13.
4. Re ka gelepa king go bona gore ‘dilo ka mokana ga tsona ke nnete’? (1 Mathesalonika 5:21)
4 Bala 1 Mathesalonika 5:21. Lebelela gore Bhayibele yi re hlohletsela gore re ‘nyakolle gore dilo ka mokana ga tsona ke nnete.’ Re ka di maka byang mara? Mo re sa nape re di tshepa gore tso re di dumelang ke nnete, di nyaka gore re nyakolle gore Bhayibele yi re king ka taba yone. Mo re beyisa, tseya ka taba ya ye wa gore o sa gola wa gore wa yi kamaka taba ya gore Jehova o mo tseyela hlogong. Ayitsano di nyaka a fo dumela gore tso a di naganang ke nnete? Dho, di nyaka a ‘nyakolle gore ayitsano tso a di naganang ke nnete’ ka go bala Bhayibele, gore a thogo tšhuta gore gabutšibutši Jehova o tikwa byang ka yene.
5. Re ka maka ying gore re thogo “kwa” mo Jehova a fetola diputsiso tsa rune?
5 Mo re kene re bala Lentsu la Modimo, re “kwa” Jehova a bolabola le rune. Mara di nyaka re sa fo kgotsofatsa ke go bala Bhayibele mo nkare re nyoko bona gore Jehova o re fetola ka mokgo mang. Mo re bala Bhayibele, di nyaka re napa re kenelela ga taba ya gore re nyaka phetolo ya yona. Re ka nyakolla ka taba yone, re berekisa dithulusi tsa go nyakolla tsa gore mokgahlo wa Jehova wo re neyye tsona. (Diy. 2:3-6) Re ka rapela re kgopela gore Jehova a re yetetse mo re kene re nyakolla fote a re gelepe re thogo di bona gore o nagana ying ka tso re tiputsisang tsona. Ke mokane re ka lebelela ditšhiko tsa Bhayibele le tse dingwana tsa gore di ka re berekela ga taba yo yi re hlupang. Fote di ka re gelepa mo re ka lebelela ditaba tsa ka ho Bhayibeleng tsa batho ba gore ba yye ba ba ga seyemo sa go tshwana le sa rune.
6. Megahlano yi re gelepa byang gore re sa sa kamaka?
6 Taba ye nngwana ke gore, re “kwa” Jehova a bolabola le rune mo re le megahlanong. Mo re dula re ya megahlanong, re ka kwa se sengwana ga polabolo kela mo ye mongwana a fetola sa gore se fetola putsiso ya gore ya re hlupa. (Diy. 27:17) Gana byalo re nyoko fo re handahanda ka tso di ka re gelepang gore re kraye diphetolo.
MO O KAMAKA GORE JEHOVA WA TIHLUPA KA WENE
7. Ba bangwana ba ka tiputsisa diputsiso difeng?
7 Nje o yye wa tiputsisa gore, ‘Ayitsano Modimo wa mpona?’ Mo nkare o kwa nkare a yi wene wa selo, taba ya go nghanelana le ye a Makiyeng dilo ka moka di ka fo šupetsa nkare ke moloro, selo sa gore re ka sa tsoge re kgonne go se segelela. Kgoši Dafita a ka fo ba a yye a tikwa ka mokgonone. Ke mo a nagana gore ke selo sa go makatsa ka matla gore Jehova ne a tihlupa ka batho ke mokane a butsisa gore: “Barena Jehova, motho king mara tsa go šinya o mo tseyela hlogong, morwayi wa motho king mara tsa gore o šinya o tihlupa ka yene?” (Pis. 144:3) O ka ya kaye gore o thogo kraya phetolo ya putsiso yowa?
8. Samuwele wa mathomo 16:6, 7, 10-12 yi re Jehova o bona ying ga batho?
8 Bhayibele yi re tšhutisa gore Jehova o bona le dilo tsa gore ba bangwana ba ka fo di tseya di sa re selo. Mo re beyisa, Jehova o romele Samuwele ntlong ya Jese gore a tlotse ye mongwana wa barwayi bage gore go be kgoši ya Israyele ku mahlong. Jese ke mo a na le mabala ya barwayi, o bitsiye kašupa ya bona mara Dafita wa gore ne go le lekotwane lage ne a se šiyo hone ga bona. b Mara Jehova o hlawodiye Dafita. (Bala 1 Samuwele 16:6, 7, 10-12.) Jehova o bonne gore Dafita ne go le motho wa mošaga mang—ke mo a di bona gore mosogana yewa ne a mo nyaka ka matla.
9. Ke ntaba o ka di tshepa gore Jehova wa tihlupa ka wene? (Lebelela le sethombhe.)
9 Nagana ka tso Jehova a šeleng a di makiye go go šupetsa gore o go tseyela hlogong. O go neya mayele ya gore ma nyoko go berekela ga bothatha byago. (Pis. 32:8) A ka di maka byang tsotsone mo nkare aa go tšibi gabutši? (Pis. 139:1) Mo o berekisa tso Jehova a go yetetsang ka tsona fote o di bona gore di go gelepa byang, o ka sa sa kamaka gore Jehova wa tihlupa ka wene. (1 Dikor. 28:9; Meber. 17:26, 27) Jehova wa di bona mo o karakara. O bona tsa gabutši tso o di makang fote o nyaka go nghanelana nago. (Jer. 17:10) Fote o nyoko ro hlakela mo o nghanelana naye.—1 Joh. 4:19.
“Mo o ka nyakela [Jehova], yene o nyoko maka gore o mo kraye.”—1 Dikor. 28:9 (Lebelela serele 9) c
MO O KAMAKA GORE AYITSANO DIPHETO TSO O DI SEGELELENG KU BOTALA NE GO LE TSA GABUTŠI
10. Mo re nagana ka dipheto tso re di segeleleng ku botala, re ka tiputsisa diputsiso difeng?
10 Ka dinako tse dingwana, ba bangwana ba fela ba nagana ka dipheto tso ba di segeleleng ku botala ke mokane ba kamaka taba ya gore ba segelele dipheto tsa gabutši. Di ka fo makega gore ba lisetsiye mmereko wa go golela ka masaka kela ba yye ba fetsa ka gore ba sa buli bhizinisi gore ba thogo berekela Jehova. Mara gana byalo go šele go fitiye mengwaga ya go tlala. Ba ka fo ba ba bona batho bo ba ba tšibang ba gore ba kgetiye go maka tse dingwana, gana byalo ba šupetsa nkare ke dinghamola fote ba phela lephelo la mabešebeše. Tsotsone di ka maka gore ba tiputsise gore: ‘Ayitsano tso ke tikonneng tsona, ke re ke makela Jehova, ke di makele mahala? Kela nke ke yye ka berekanyana gore ke thogo ba le sa gaka?’
11. King sa gore ne se hlupa ye a ngwadiyeng Pisalema 73?
11 Mo nkare le wene o tiputsisa diputsiso tsa mošaga wowa, lebelela ka mokgo ye a ngwadiyeng Pisalema 73 a yyeng a tikwa ka gona. O bonne ba bangwana ba gore a ba berekele Jehova ba philegiye, ba ghannye fote di šupetsa nkare a ba na mathatha. (Pis. 73:3-5, 12) Mo a kene a bona gore dilo di ba sepelela gabutši, tsotsone di makiye gore a bone nkare tsa go berekela Jehova a di mo gelepe ka selo. Ke mo a “kgongwela letšatši ka moka” ka taba la tso ne a di nagana. (Pis. 73:13, 14) O makiye byang gore a sa sa tikwa ka mokgo?
12. Mo re bala Pisalema 73:16-18, king so se gelepiyeng mopisalema yene gore a sa sa kgongwela?
12 Bala Pisalema 73:16-18. Mopisalema o yye tempeleng ya Jehova. Gana hone, monagano o yye wa boya. O di bonne gore le mo nkare ba bangwana di ka fo šupetsa nkare di ba sepelela gabutši, ke mo ba se na tshepo ya tsa ku mahlong. Byalo, tsa go kgongwela ke mo di fediye fote aa sa kamaka gore go berekela Jehova ke mong sepheto sa gabutši ka matla. Fote ke mo a tikemisele gore a ye mahlong a berekela Jehova.—Pis. 73:23-28.
13. King so o ka se makang mo nkare wa tisola ka dipheto tse dingwana tso o di segeleleng ku botala? (Lebelela le sethombhe.)
13 Le wene o ka šala o bebiye mo o gelepa ke Lentsu la Modimo. Byang? Nagana ka dilo tso o nang natso—gana hone go kena le tso Jehova a go rufiyeng ka tsona—fote o sa lebale taba ya gore Jehova a ka sa gelepe bo ba gore a ba yi kene yage. Ga bo ba gore a ba yi kene ya Jehova, go ba le lephelo la masithisithi ke selo sa gore ba se tseyela gedimo ka matla ka taba la gore a ba na tshepo ga tsa ku mahlong. Mara wene, Jehova o tshepisa gore o nyoko go rufa la go sa hlayisege. (Pis. 145:16) Fote nagana ka sowa: O ka sa nape o di tšiba gore lephelo lago ne le nyoko ba le le byang lekgono hala o segelele sepheto se sengwana. Selo sa gore a wa tshwanela go se kamaka ke sowa: Bo ba gore ba segelela dipheto ka taba la gore ga Modimo ba mo nyaka ka matla le gore fote ba kwana le bayagelane, ba nyoko fo dula ba na le dilo tsa go maka gore ba jabole.
Dula o nagana ka dilo tso Jehova a tshepisiyeng gore o nyoko go rufa ka tsona (Lebelela serele 13) d
MO O KAMAKA GORE JEHOVA O SA NA A NYOKO GO BEREKISA
14. Ba bangwana ba ga seyemo sa mošaga mang fote ba ka tiputsisa putsiso ya mošaga mang?
14 Malata ya Jehova ya mangwana a ma sa kgona go maka tsa go tlala ka taba la gore ma tsofele, a ma sa philegiye gabutši kela ma golofele. Tsotsone di ka maka gore ba kamake taba ya gore Modimo o ba tseyela hlogong. Ba ka butsisa gore, ‘Nje Jehova o sa na a nyoko mperekisa?’
15. King sa gore ye a ngwadiyeng Pisalema 71 ne a sa se kamake?
15 Ye a ngwadiyeng Pisalema 71 ne a tikwa ka mokgonone. O rapele ka gore: “Barena, o sa nlahle mo matšhika yaka ma fela.” (Pis. 71:9, 18) Mara, mopisalema ke mo a sa kamake taba ya gore mo nkare o berekela Jehova a kene a tshepega, Jehova o nyoko mo yetetsa a boya a mo gelepa. Mopisalema o tšhutiye gore Jehova o jabodisa ke bo ba gore ba karakara ka matla gore ba thogo mmerekela le mo nkare go na le tsa gore di ya ba kgerela.—Pis. 37:23-25.
16. Jehova o ba berekisa ka mokgo mang bo ba gore ba tsofele? (Pisalema 92:12-15)
16 Lune ba gore le šele gudiye, titseyeneng ka mokgo Jehova a le tseyang ka gona. A ka le gelepa gore le ye mahlong le mmerekela le kene le tshepega le mo go kene go na le tsa go le kgerela. (Bala Pisalema 92:12-15.) Le sa nagane ka matla ka dilo tsa gore a le sa kgona go di maka, mara le nagane ka tso le ka kgonang go di maka. Mo re beyisa, o ka tiyisa ba bangwana ka go ya mahlong o tshepega fote o ba šupetsa gore o ba tseyela hlogong. O ka ba botsa ka mokgo go fediyeng mengwaga Jehova a kene a go gelepa le ka mokgo o di yemeleng ka maahlo ya makhubedu dilo tsa ku mahlong tso Jehova a re tshepisang tsona. Fote o sa yi tseyele fase taba ya gore merapelo yago yi ka gelepa ba bangwana. (1 Pet. 3:12) Le mo re ka ghulana le ying, ka mokana ga rune re ka makela Jehova le ba bangwana se sengwana.
17. Ke ntaba di se gabutši gore re titshwanise le ba bangwana?
17 Mo nkare taba ya gore a o sa kgona go makela Jehova tsa go tlala yi maka gore o šale o hlakahlakanne, di tšibe gore tso o kgonang go di maka, yene o di tseyela gedimo. O ka tikraya o nyaka go tshwanisa tso o di makang le tso ba bangwana ba kgonang go di segelela. O sa yi make taba yone! Ke ntaba? Ka taba la gore Jehova aa di make tsotsone. (Magal. 6:4) Mo re beyisa, Mariya o neyye Jeso makgura ya go nkgela ya go tura. (Joh. 12:3-5) Mara, mosadi yela wa go hlupega wa gore o kgwele ke monna hala tempeleng o neyele ka ditšheleta ka dipedi tsa tshipi tsa go sa re selo. (Luk. 21:1-4) Mara Jeso o yitseri tso ba di makiyeng di šupetsa gore ba na le tumelo. Papage, Jehova, o tseyela gedimo se sengwana le se sengwana so o se makang sa go šupetsa gore o tineyele gage fote o mo nyaka ka matla, le mo wene o ka se tseya go le se senyana.
18. King so se ka re gelepang gore re sa sa kamaka? (Lebelela lebhokisi la gore “ Lentsu la Jehova le ka go Gelepa Gore o sa sa Kamaka.”)
18 Ka mokana ga rune re fela re kamaka. Mara, re šele re bonne gore Bhayibele yi ka re gelepa gore re hlule. Byalo, maka so o ka se kgonang gore o thogo kraya diphetolo tsa dilo tso di go hlupang, ke mokane taba ya go kamaka yi ko ba yi psyile. Phela Jehova o go tšiba mong go go tšiba. O leboga ka matla dilo tso o tikonang tsona gore a thogo yeta mahlong lephelong lago fote o nyoko maka so a se tshepisiyeng nakwela a re o nyoko go rufa. Di tshepe tsa gore Jehova o kwana le malata yage ka mokana ga wona fote wa ma pasopa.
KOŠA 111 Tso di re Jabodisang
a HLATOLLO YA LENTSU: Ga hlogotaba yowa, re bolabola ka go kamaka ga gore go maka gore re sa nape re di tshepa tsa gore Jehova o re tseyela gedimo kela re segelele dipheto tsa go šupetsa gore re hlalefiye. Mowa a re bolabole ka go kamaka ga gore Bhayibele yi go hlatolla go le selo sa go šupetsa gore motho o gayela tumelo ga Jehova le tso a di tshepisiyeng.
b Le mo nkare Bhayibele a yi nape yi thuletsa gore Dafita ne a na le mengwaga ka mekaye nakwela Jehova a mo hlawola, di ka makega gore ne a sa gola.—Lebelela Sewokamelo sa September 1, 2011, leph. 29, ser. 2.
