1. Re yemele ke dilo difeng tsa go jabodisa ga Sekete sa Mengwaga mo go Lawola Jeso?

 GO KO ba go sa jabodisi lona mo ba thomisa go tsosa batho ho lefaseng ga Sekete sa Mengwaga mo go Lawola Kreste! Ka mokana ga bona ba gore ba yye ba loba mašaga ba hlologele go ma bona. Jehova le yene o tikwa ka mokgonone. (Job 14:15) O fo nagana gore batho lefaseng ka mokana ga lona ba ko ba ba jabodiye byang mo ba gahlana fote. Re tšhutiye ga hlogotaba ya go fela gore, “ba go loka,” ba gore mabitso ya bona ba ma ngwadiye ka pukung ya lephelo ba nyoko “tsusiwa gore ba phele.” (Meber. 24:15; Joh. 5:29) Di ka makega gore mašaga yago ya go tlala ma be ga mogoba wo wo tsusiwang la mathomo ho lefaseng. * Go tokegela gana hone, “ba go sa loka” go leng ba gore a baa kraya lešuba la gore ba mo tšibe ga Jehova kela ba gore a sanka ba mmerekela nakwela ba soko kgwa ba nyoko “tsusiwa gore ba yahludiwe.”

2-3. (a) Jesaya 11:9, 10, yi re ke mmereko wofeng wo mogolo wa go tšhutisa wa gore a wo šiyo wa go lekana nawo? (b) Re nyoko petapeta ka ying ga hlogotaba yowa?

² Ka mokana ga bona ba gore ba ko ba ba tsusiye di nyaka ba tšhutisiwe. (Jes. 26:9; 61:11) Byalo, di nyaka go makiwe mmereko wo mogolo wa go tšhutisa wa gore a wo šiyo wa go lekana nawo. (Bala Jesaya 11:9, 10.) Ke ntaba mara? Nka taba la gore ba go sa loka ba gore ba ko ba ba tsusiye di nyaka ba tšhuta ka Jeso Kreste, ba tšhute ka Mmušo wa Modimo, ka sehlabelo sa  Jeso ba boye ba di tšibe tsa gore lebitso la Jehova ke le legolo go segela kaye fote ke ntaba di mo tshwanela tsa gore go lawole yene. Le bo ba go loka di nyaka ba di tšibe tsa gore Jehova o tikemisele go maka ying ka lefase lowa. Ba bangwana ba go tshepega ba kgwile nakwela lentsu la Jehova go leng Bhayibele le soko bane le ngwadiwa. Byalo megoba yowa ka mmedi di ba tlalele tso di nyakang ba di tšhuta.

³ Ga hlogotaba yowa, re nyoko lebelela diputsiso tsowa: Mmereko wo mogolo wa go tšhutisa batho wo nyoko makiwa ka mokgo mang? Mmereko wowa wo nyoko gelepa ka mokgo mang ga taba ya go šupetsa gore ayitsano lebitso la motho le ya šihlediwa ka pukung ya lephelo kela dho? Di nyaka re sa lisetse go nyakana le diphetolo tsa diputsiso tsowa go segela re di kraya. Re ko di boneng gore diporofeto tse dingwana tsa go jabodisa tso di leng ga puku ya Daniyele le ya Kutullo di nyoko re gelepa gore re thogo kwisisa gore go nyoko makega ying mo ba tsosa bo ba kgwileng. Mara tla re thomiseneng ka go lebelela gore ke dilo difeng tsa go jabodisa tsa gore ba di hlayye botala ga seporofeto sa Daniyele 12:1, 2.

4-5. Daniyele 12:1 yi re wunyullela gore go nyoko ba go makega ying ka nako ya mafelelo?

⁴ Bala Daniyele 12:1. Puku ya Daniyele yi re wunyullela ka mokgo dilo tsa go jabodisa di nyoko makegang ka go lategetsana ka dinako tso tsa mafelelo. Mo re beyisa, Daniyele 12:1 yi re wunyullela gore Mayikhele go leng Jeso Kreste o nyoko “tlogamela a yemelela batho [ba Modimo].” Sekopa sa seporofeto sone se thomisiye go makega ka 1914 mo Jeso ba mmeya gore go be Kgoši ga Mmušo wa Modimo ku legedimong.

⁵ Le mo go le ka mokgonone, Daniyele ba mmutsiye gore Jeso o nyoko “tlogamela” ka “nako ya go sasamela ya gore a yi soko bane yi makega go tlugisela lefase le le gona go segela ka nako yonone.” Mo re bolabola ka “nako ya go sasamela” ke ya “motšhatšhamelo wo mogolo” wo ba bolabolang ka wona ga Matewu 24:21. Jeso o nyoko tlogamela ke mokane a maka se sengwana gore a thogo lwela batho ba Modimo, mo nako yone ya go sasamela yi segela mafelelong ke moka ke nako ya Aremaghedoni. Puku ya Kutullo mo yi bolabola ka bobone ba “mogoba wo mogolo yi re ke ba gore ba tšwa ga motšhatšhamelo wo mogolo.”—Kut. 7:9, 14.

6. Go nyoko makega ying ka nthago ga mo mogoba wo mogolo wo phonne motšhatšhamelo wo mogolo? Hlatolla. (Mo o nyaka go kwa tsa go tlala ga taba ya mo batho ba tsusiwa gore ba tl’le phela ho lefaseng, lebelela hlogotaba ya “Diputsiso Tsa bo ba Šeleng ba Badiye.”)

⁶ Bala Daniyele 12:2. Go nyoko makega ying ka nthago ga mo mogoba wo mogolo wo phonne nako ya go sasamela? Seporofeto sowa a se ka mokgo ne re se kwisisa ku botala, ne re tseya gore taba yo ya gore go nyoko tsusiwa malata ya Modimo ya gore ma kgwile botala ya gore yi makega ga dinako tsa mafelelo yi fo ba ya go tshwanisela. * Mara mantsu yawa, ma rela go tsusiwa ga bo ba kgwileng ga gore go nyoko makega ga lefase la nyuwane. Ke ntaba re napa re yi fetsa ka mokgonone? Lentsu la gore “lerole” la gore fote ba le berekisiye ga Jobo 17:16 le yelana le la gore “Lebitla.” Taba yonone yi napa yi šupetsa gore Daniyele 12:2 yi bolabola ka taba ya gore batho ba nyoko tsusiwa tsa mannete mo go šele go le mafelelong ya dinako tsa mafelelo ka nthago ga ntwa ya Aremaghedoni.

7. (a) Ba ra ka mokgo mang mo ba re ba bangwana mo ba tsusiwa ba nyoko kraya “lephelo la go ya go yye”? (b) Ke ntaba ba re ba nyoko “tsusiwa gore ba phele lephelo la gabutši”?

⁷ Daniyele 12:2 yi ra gore king mo yi re ba bangwana ba gore ba nyoko tsusiwa ba nyoko  kraya “lephelo la go ya go yye”? Yi rela gore mo bo ba gore ba ba tsusiye ba ya mahlong ba tšhuta ba boya ba theetsela Jehova le Jeso, ga 1 000 sa mengwaga ba nyoko feleletsa ba le krayye lephelo la go ya go yye. (Joh. 17:3) Bowa ba nyoko “tsusiwa gore ba phele lephelo la gabutši” go phala bala ba gore ba yye ba ba tsosa gore ba phele ku nthago. (Maheb. 11:35) Ke ntaba re reyane? Phela bala ba gore ne ba sa yenela ba feleletsiye ba kgwile fote.

8. Ba bangwana ba nyoko ba tsusa gore “ba poyidiwe le go nyemudiwa go ya go yye” ka mokgo mang?

⁸ Mara a yi batho ka mokana ga bona bo ba ba tsusiyeng ba gore ba nyoko yamogela mo Jehova a ba tšhutisa. Seporofeto sa Daniyele se re ba bangwana ba nyoko ba tsusa gore “ba poyidiwe le go nyemudiwa go ya go yye.” Ka taba la gore ba ko ba ba tiwomisa dihlogo mabitso ya bona ma ka sa ngwadiwe ga puku ya lephelo fote lephelo la go ya go yye ba ka sa le kraye. Mara so ba nyoko se krayang ke “go nyemudiwa go ya go yye” kela go psyitlanyiwa. Byalo, Daniyele 12:2 yi re botsa gore tso di nyoko makegelang bo ba ba tsusiyeng di nyoko ya ka tso ba di makang ka nthago ga mo ba ba tsusiye. * (Kut. 20:12) Ba bangwana ba nyoko le kraya lephelo la go ya go yye mara ba bangwana ba nyoko pumutsa.

9-10. King se sengwana sa gore se nyoko makega ka nthago ga motšhatšhamelo wo mogolo fote ke bomang ba gore ba “nyoko khanya go tshwana le dinanedi tsa legedimo”?

⁹ Bala Daniyele 12:3. King se sengwana sa gore se nyoko makega ka nthago ga “nako ya go sasamela”? Go tokegela ga Daniyele 12:2, temanyana 3 yi bolabola ka selo se sengwana sa gore se nyoko makega ka nthago ga motšhatšhamelo wo mogolo.

¹⁰ Ke bomang ba gore ba “nyoko khanya go tshwana le dinanedi tsa legedimo”? Mantsu ya Jeso a ma hlayyeng ga Matewu 13:43 ma re gelepa gore re kraye diphetolo mo ma re: “Ka nako yonone ba go loka ba nyoko gadima go tshwana le letšatši Mmušong wa Papa wa bona wa ku magedimong.” Jeso mo a hlaya mantsu yawa ke mo a bolabola ka “barwayi ba Mmušo,” go leng bo bhuti bage ba go tlotsiwa ba gore ba nyoko bereka naye ga Mmušo wa ku legedimong. (Mat. 13:38) Byalo, tsotsone di rela gore Daniyele 12:3 yi bolabola ka bo ba go tlotsiwa le mmereko wo ba ko bang ba wo maka ga Sekete sa Mengwaga mo go Lawola Jeso.

11-12. Bo ba 144 000 ba nyoko ba ba tshwaraganne le mmereko wofeng ga 1 000 ya mengwaga?

¹¹ Bo ba go tlotsiwa ba nyoko maka byang gore “ba go tlala ba make tsa go loka”? Phela bo ba go tlotsiwa ba ko ba ba tshwarisanne le Jeso Kreste ka go yetetsa mmereko wa go tšhutisa wa gore wo ko ba wo makiwa ho lefaseng ga 1 000 ya mengwaga. Bo ba 144 000 ba nyoko lawola go le magoši ba boya ba bereka go le maprista. (Kut. 1:6; 5:10; 20:6) Tsotsone di rela gore ba nyoko gelepa ga taba “ya go yalafa ditšhaba”—ka gonyana ka gonyana batho ka mokana ga bona ba nyoko feleletsa ba yenele. (Kut. 22:1, 2; Hezek. 47:12) Ye lune, phela bo ba go tlotsiwa ba nyoko šala ba jabodiye tsa nkare ke moka!

¹² Go nyoko ba go na le bomang fote ga bo “ba go tlala” ba gore ba nyoko ba ba ba tšhutisiye gore ba make tsa go loka? Go nyoko ba go na le ba gore ba ba tsusiye le ba gore ba phonne Aremaghedoni le bananyana ba gore ba ba belegiye ga lefase la nyuwane. Mo go fela 1 000 ya mengwaga batho ka mokana ga bona ho lefaseng ba ko ba ba yenele. Byalo ke leng mo mabitso ya bona ba nyoko ma šihlelang ka enke ka pukung ya lephelo?

13-14. King so batho ka mokana ga bona ba gore ba nyoko ba ba yenele ho lefaseng di nyakang ba se maka gore ba thogo kraya lephelo la go ya go yye?

¹³ Di nyaka re sa lebale gore mo motho a yenele tsone a di rele gore o šele o le krayye lephelo la go ya go yye. Lebelela tso di makegiyeng ka Adamo le Efa. Ke mo ba yenele mara ne di nyaka ba šupetsa gore baa mo theetsela ga Jehova Modimo gore a thogo ba neya lephelo la go ye go yye. Mara sa go kwisa go baba ke gore di ba šitiye tsa go mo theetsela.—Marom. 5:12.

¹⁴ Mara lephelo le ko ba le le ka mokgo mang ho lefaseng mo go fela 1 000 ya mengwaga? Batho ka mokana ga bona ba nyoko ba ba yenele. Ayitsano batho ka mokana ga bona bo ba gore ba ko ba ba yenele ba nyoko yi thega go ya go yye taba ya gore Jehova ke yene ye a lawolang? Kela ba bangwana ba nyoko tshwana le Adamo le Efa ba gore le mo yi le gore ne ba yenele di ba šitiye tsa go tshepega? Di nyaka re kraya diphetolo tsa diputsiso tsowa, re nyoko di kraya byang mara?

15-16. (a) Batho ka mokana ga bona ba nyoko le kraya leng lešuba la go šupetsa gore ba tshepegela Jehova? (b) Go nyoko makega ying mo batho ba liketsiwa la mafelelo?

¹⁵ Sathane ba nyoko mo kwalela 1 000 ya mengwaga. Ka nako yonone a ka sa di kgone tsa go fukula le mong motho ka wwoši. Mara mo go fela 1 000 ya mengwaga ba nyoko mmulela. Ke mokane o nyoko liketsa go fukula batho ba gore  ba yenele. Mo a kene a ba liketsa batho bo ba gore ba ko ba ba yenele ho lefaseng ba nyoko thulegela ke lešuba la gore ba šupetse gore ba yemme kaye ga taba ya gore lebitso la Modimo di nyaka le tseyediwe gedimo le gore ke yene ye di mo tshwanelang tsa go lawola. (Kut. 20:7-10) Tso ba nyoko di kgetang mo Sathane a kene a karakara a ba liketsa ke tsona tso di nyoko hlayang gore ayitsano mabitso ya bona di nyaka ma šihlediwa ka pukung ya lephelo kela dho.

¹⁶ Ba bangwana ba gore nombhoro ya bona a yi tšibegi ba nyoko kopisela Adamo le Efa ga taba ya go gana go lawola ke Jehova. Go nyoko makega ying ka bona? Kutullo 20:15 yi re: “Ye mongwana le ye mongwana wa gore lebitso lage a le ya ngwadiwa ka pukung ya lephelo, o bošediwwe ledhamong la mollo.” Eya, bo ba go tiwomisa dihlogo ba nyoko ba psyitlanya go napa go fela ka bona. Mara batho ba go tlala ba gore ba nyoko ba ba yenele ba nyoko pasa mo ba liketsiwa la mafelelo. Ke mokane mabitso ya bona ma nyoko šihlediwa ka pukung ya lephelo.

17. Daniyele ba mmutsiye gore go nyoko makega ying ka dinako tsa rune? (Daniyele 12:4, 8-10)

¹⁷ A yi go jabodisa ga tsona go fo nagana ka tso di nyoko makegang ku mahlong! Mara lengeloyi le butsiye Daniyele tse dingwana tsa go yelana le nako yo ya rune go leng “dinako tsa  mafelelo.” (Bala Daniyele 12:4, 8-10; 2 Thim. 3:1-5) Lengeloyi le butsiye Daniyele gore: “Go tšiba nnete go nyoko sabalala.” Eya, mantsu yawa ya seporofeto ya gore ma ka pukung yage ma nyoko kwisisa gabutši ke batho ba Modimo. Lengeloyi le tokegele ka gore ka nako yonone “ba dipelo tse diphifadu ba [nyoko] maka tsa go befa ke mokane a go na le ka wwoši wa pelo ye phifadu wa gore o [nyoko] kwisisa.”

18. Go se botala go nyoko makega ying ka bo ba dipelo tse diphifadu?

¹⁸ Lekgono di ka šupa nkare ba dipelo tse diphifadu di ba sepelela gabutši le mo ba kene ba maka dilo tsa go befa. (Mal. 3:14, 15) Mara go se botala Jeso o nyoko yahlula ba go tshwana le dipudi fote a ba hlawola ga bo ba gore ba tshwana le dinku. (Mat. 25:31-33) Bo ba dipelo tse diphifadu ba ka sa ro phona ga motšhatšhamelo wo mogolo fote ba ka sa ba tsose gore ba tl’le phela ga lefase la nyuwane. Mabitso ya bona ma nyoko ba ma se šiyo ga “puku ya segopotso” yo ba bolabolang ka yona ga Malaki 3:16.

19. Gana byalo ke nako ya gore re make ying fote ke ntaba? (Malaki 3:16-18)

¹⁹ Gana byalo ke nako ya gore re šupetse gore a re ga bo ba dipelo tse diphifadu. (Bala Malaki 3:16-18.) Phela Jehova o tshwaraganne ka mmereko wa go hlekeletsa bo a ba tseyang go le “phahlo ya go hlawolega.” A re kamake gore le rune re ya di nyaka tsa gore re be gana hone ga bo a ba hlekeletsang.

20. King sa mafelelo sa gore ke mo ba se tshepisiye Daniyele fote ke ntaba o litiye ka maahlo ya makhubedu go bona tso ba di tshepisiyeng di makega?

²⁰ Nnete ke gore re phela ga dinako tsa go jabodisa ka matla. Mara sa go napa se jabodisa ka matla ke dilo tso di nyoko makegang go se botala. Fote go se botala re nyoko bona bo ba dipelo tse diphifadu ba ba psyitlanya. Ka nthago ga mone re nyoko bona mo go makega tso Jehova a di tshepisiyeng Daniyele mo a re: “O nyoko tlogamela o tla o kraya patela yago mo go fela dinako tsa mafelelo.” (Dan. 12:13) Ayitsano o di litiye ka maahlo ya ma khubedu go bona mo Daniyele le mašaga yago ma “tlogamela” fote? Mo nkare go ka mokgonone di nyaka o karakara ka matla go šupetsa gore wa tshepega fote tsotsone di nyoko maka gore o sa kamake gore lebitso lago le nyoko dula le ngwadiwwe ka pukung ya Jehova ya lephelo.