1-2. Di re berekela ka mokgo mang gore Jehova o re makiye gore re jabodise ke go neya batho ba bangwana go phala mo ba neya rune?

 NAKWELA Jehova a maka batho, o ba makiye go le ba go jabolela go makela ba bangwana tsa gabutši. (Meber. 20:35) Ayitsano tsotsone di ra gore mo ba neya rune re fo pipegana a re jabole? Awwa barena. Re di tšiba gabutši gore mo ba re neya sa go re neya re jabola stereka. Mara, re jabola lela la go napa re sa timakisi mo re neya ba bangwana. Phela ke mong taba ya go bafala ka matla gore Jehova o re makiye ka mokgonowa. Ke ntaba mara?

² Ka taba la gore Jehova o re makiye ka mokgonowa, re ka timakela runebeng gore re fufume ka go jabola. Re ka maka gore go jabola ga rune go nape go ro teya mowalawala mo re ka nagana ka mekgwa ye mengwana ya go sa konane. Ayitsano taba ya gore Jehova o re makiye ka mokgonowa a yi jabodisi mara?—Pis. 139:14.

3. Ke ntaba Jehova ba re ke “Modimo wa gore o jabodiye”?

³ Ka taba la gore Bhayibele yi re botsa gore di jabodisa ka matla mo re neya ba bangwana, re napa re di kwisisa gore ke ntaba Jehova go le “Modimo wa gore o jabodiye.” (1 Thim. 1:11) Ke yene wa mathomo wa go sa konane fote a go na motho wa go Neyana go tshwana naye. Pawulo wa lepostola o hlayye gore, “re ya phela, re ya sepela fote re gona,” ka taba lage. (Meber. 17:28) Ke nnete gore, “dilo ka mokana ga tsona tsa gore di gabutši le tsa gore di felegelele” di tšwa ga Jehova.—Jak. 1:17.

4. King so se ka re gelepang gore re nape re jabola tsa nkare ke moka?

⁴ Ka mokana ga rune mo re yitsa, re ya di nyaka gore re jabole la go sa hlayisege ka taba la go sa konane. Phela taba yone ya go sa konane re ka yi kopisela ga Jehova. (Maef. 5:1) Mo re kene re maka ka mokgonone, tla re boneneng gore re ka maka byang mo re bona nkare go hloka le mong danki ga taba ya rune ya gore re ya neyana. Tsotsone di ko re gelepa gore re sa tinwi go neya ba bangwana fote di nyoko re bakela go jabola.

 YEKISELA JEHOVA, O SA KONANE

5. Ke dilo difeng tse dingwana tso Jehova a re neyang tsona?

⁵ Ke mekgwa yifeng yo Jehova a šupetsang ka yona gore aa konane? Lebelela mešupetso ke yowa. Jehova o re neya tso re di hlokang. Jehova a ka sa dule a maka gore lephelo la rune go be la mabešebeše mara re fo re hala go se ka yene, nke re le ba ga mang mara. Mo re beyisa, o makiye gore re be le tsa go ja, dikobo le ga go dula. (Pis. 4:8; Mat. 6:31-33; 1 Thim. 6:6-8) Ayitsano Jehova o re neya tso re di hlokang ka taba la gore di ya mo tlema gore a make ka mokgonone? Le ka gonyana! Byalo, ke ntaba Jehova a re makela dilo tsowa?

6. Re tšhuta ying ga Matewu 6:25, 26?

⁶ Phela Jehova o re neya dilo tso re di hlokang ka taba la gore o re nyaka ka matla. Lebelela mantsu ya Jeso ya gore ma ga Matewu 6:25, 26. (Bala.) Jeso o berekisa mošupetso wa dilo tso ba di makiyeng. Mo Jeso a bolabola ka dinonyane o re: “A di limi kela go buna, kela go hlekeletsa mabele ka teng ga seralo.” Mara, lebelela tso a di hlayang fote, mo a re: “Papa wa lune wa magedimong wa di pasopa.” Ke mokane Jeso a butsisa gore: “Ayitsano lune a ka sa le pasope go di phala?” Mara ke mo a nyaka re tšhute ying ga taba yowa? Jehova o tseyela malata yage ya go tshepega gedimo ka matla go phala diphoolwane. Byalo, mo nkare Jehova a di mo šiti go pasopa diphoolwane, a re kamake gore le ga rune o ko fo teya moroba! Go fo tshwana le papa wa gore aa nyake go kwa selo ka ba mutši wage, Jehova le yene o pasopa ba mutši wage ka taba la gore o ba nyaka ka matla.—Pis. 145:16; Mat. 6:32.

7. Ke mokgwa wofeng wo re ka wo kopiselang ga Jehova ga taba ya go sa konane? (Lebelela le sethombhe.)

⁷ Go fo tshwana le Jehova, le rune re ka neya ba bangwana tso ba di gayelang ka taba la gore re ba nyaka ka matla. Mo re beyisa, ayitsano go na le mogageru ye o mo tšibang wa gore o gayela tsa go ja kela tsa go yapara? Phela Jehova a ka berekisa wene gore o thogo mo gelepa a phetše ga nkare go ngobegiye. Batho ba Jehova ba tšibega ka gore baa yakgoswa mo di tla ga taba ya go gelepa mo go kutuluga kotsi ya hlago. Mo re beyisa, ka nako ya bolwele bya go sabalala bya COVID-19, magageru ma yye ma neyela ka tsa go ja, dikobo le ka dilo tse dingwana ga bo ba di hlokang. Ba go tlala ba yye ba šupetsa gore a ba konane ka go ntsha meneyelo ya go thega mmereko wa lefase ka moka. Taba yone ya go neyela ka sekwetše yi gelepiye ka go thega magageru lefaseng ka mokana ga lona ya gore ne ma hloka go gelepiwa ka taba la go wela ke kotsi ya hlago. Mantsu ya ma leng ga Maheberu 13:16 ba yye ba sa ma tseyi ka gonyana mo ma re: “Le sa lebale go maka tsa gabutši le go ngathelana tso le nang natso, ka taba la gore Modimo o jabodisa ke dihlabelo tsa mošaga wonone.”

8. Matšhika ya Jehova ma re berekela ka mekgwa yifeng? (Mafilipi 2:13)

 ⁸ Jehova o neyana matšhika. Jehova o na le matšhika ya go sa fele fote o jabolela go ma ngathela malata yage ya go tshepega. (Bala Mafilipi 2:13.) Ayitsano o yye wa rapelela matšhika ya gore o thogo hlula tsa go go woka kela matšhika ya go tiyisela dintshitshire tsa go robisa mohlolo? Di ka makega fote gore o yye wa rapelela matšhika ya gore o thogo maka tso o nyakang go di maka letšatši lolone. Mo o bona tso o di rapeleleng di makega o napa o yema le mantsu ya ma ngwadiyeng ke Pawulo wa lepostola ya gore: “Ke na le matšhika ga dilo ka mokana ga tsona ka taba la ye a nneyang matšhika.”—Mafil. 4:13.

9. Re ka mo yekisela ka mokgo mang ga Jehova ga taba ya go berekisa matšhika ya rune re gelepa ba bangwana? (Lebelela le sethombhe.)

⁹ Le mo re le batho ba gore a re ya yenela, re ka di kgona go yekisela mokgwa wa Jehova wa go berekisa matšhika yage gabutši. Re ka sa di kgone go pomela ba bangwana matšhika ya rune. Mara re ka berekisa matšhika ya rune gore re thogo gelepa ba bangwana. Mo re beyisa, re ka gelepa bo ba gore ba šele ba gudiye kela ba gore a ba titsose ka go ba yela ditolo re boya re ba makela mebereko ya ka ho gaye. Mo nkare seyemo sa rune se ya re dumelela re ka tšhela letsogo ga taba ya go yedisa Holo ya Mmušo re boya re yi pasopa. Phela mo re berekisa matšhika ya rune ka mokgonone, tsotsone di berekela ba bangwana ba gore ba rapela Jehova.

10. Mantsu ya re ma hlayang ma ka berekela ba bangwana ka mokgo mang?

¹⁰ O sa lebale gore o ka tiyisa ba bangwana ka mantsu yago. Ayitsano go na le ye o mo naganneng wa gore di ka mmerekela mo o mo thanaka ka tso a di makang? Ayitsano go na le ye o mo tšibang wa gore o nyaka go kgomoletsiwa? Mo nkare go ka mokgonone, ke ntaba o sa šupetse motho yene gore wa tihlupa ka yene? O ka vakašela motho yene, wa mo fowunela kela wa mo romela khate, imeyili kela wa mo romela molayetsa. O sa nape o šekedisa ke taba ya gore o nyoko re king mo o bolabola naye. Mantsunyana ya go sa hlupe le ya gore ma tšwa pelong di ka makega go be mong so mogagenu ne a se hloka gore a thogo napa a tiyelela le ga letšatši la ka motshwana kela a fo kwa nkare go rolegiye se sengwana ga seyemo so a leng ga sona.—Diy. 12:25; Maef. 4:29.

11. Jehova o neya ba bangwana go hlalefa ga gore go tšwa gage ka mokgo mang?

¹¹ Jehova wa hlalefisana. Jakobo wa lepostola o ngwadiye gore: “Mo nkare go na le wa gore wa gayela ga taba ya go hlalefa, a sa lisetse go kgopela Modimo, Modimo o nyoko maka gore a hlalefe ka taba la gore aa konane fote a ka sa mo sole.” (Jak. 1:5; setw.) Mantsu yawa ma šupetsa gabutši gore Jehova aa konane go hlalefa ga gore go tšwa gage. Mara o go neya ye mongwana le ye mongwana di sa mo kokone felo. Jakobo fote o hlayye gore mo Jehova a re hlalefisa, o nyoko fo maka ka mokgonone ‘a ka sa re kwatele,’ kela ‘a ka sa re sole.’ A  di nyake re tikwa nkare ga Jehova ra mo hlupa mo re kgopela gore a re yetetse. Gabutšibutši, o re hlohletsela gore re mo kgopele go hlalefa gone.—Diy. 2:1-6.

12. Re thulegele ke mašuba ya mošaga mang ya gore re thogo botsa ba bangwana ka tso re di tšibang?

¹² Rune gee? Ayitsano re ka yekisela Jehova ka go berekisa go hlalefa ga rune? (Pis. 32:8) Batho ba Jehova ba thulegele ke mašuba ya go tlala gore ba botse ba bangwana ka tso ba di tšhutiyeng. Mo re beyisa, ga go tlala re gelepa batšhomayedi ba nyuwane mo re le tšhomong. Bagolo ba lefisa pelo mo ba kene ba gelepa malata ya ka ho phutegong le magageru ya banna ya gore ma šele ma kolobetsiwwe gore ba thogo tshwaragana le mmereko wa bona wa ka ho phutegong. Fote magageru ya gore ma teya ma tshwarelele ga mmereko wa tsa go yaga le go yi pasopa, ma tšhutisa ba bangwana mmereko wone ga meyago ya gore ba yi berekisela go maka mmereko wa Jehova.

13. Ga Jehova re ka mo yekisela ka mokgo mang ga taba ya go neyana go hlalefa?

¹³ Liketsa go yekisela Jehova mo o tšhutisa ba bangwana mmereko. O sa yi lebale taba ya gore Jehova aa konane go hlalefa ga gore go tšwa gage. Byalo, le rune re ngathela bo ba gore ba sa tšhuta tso re di tšibang. A di nyake re ngamela dilo tso re tshwaneleng go tšhutisa ba bangwana re re re tshosa ke taba ya gore motho yene re mo tšhutisang a ka tla a re tseyela mmereko wa rune. Kela wa kraya re šele re nagana gore: ‘Phela le nna a ka tšhutisa ke motho! Le yene a bone gore o maka byang.’ Mokgwa wonone a wo nyakege le ka go nyana ga batho ba Jehova. Mara, re jabolela go botsa ba bangwana dilo ka mokana ga tsona tso re di tšibang re boya re maka so re ka se kgonang gore re ba tšhutise. (1 Mathes. 2:8) Re fo tshepa “gore le bona ba ka di kgona go tšhutisa ba bangwana.” (2 Thim. 2:1, 2) Mo ka mokana ga rune re sa be di ngame ka dilo tso re di tšibang, ka mokana ga rune re nyoko hlalefa mong go hlalefa re boya re jabola la go sa hlayisege.

MO BATHO BA SE NA DANKI

14. Batho ba go tlala ba maka ying mo re ba makela se sengwana?

¹⁴ Mo re sa konane ka matlamatla ga magageru, ma nyoko hlaya gore maa leboga. Ma ka fo go neya sephephane ma ngwadiye gore maa leboga kela ma ka fo go šupetsa ka mokgwa wo mongwana gore ma re danki. (Makol. 3:15) Mo ma re leboga, re jabola ka matla ka taba la gore re ba re ma makele se sengwana.

15. King sa gore a re ya tshwanela go se lebala mo batho ba bangwana ba se na danki?

¹⁵ Mara ka dinako tse dingwana, batho a ba na le mong danki ga dilo tso re ba makeleng tsona. Ka dinako tse dingwana re ka berekisa nako ya rune, matšhika ya rune kela dilo tso re nang natso mara ka nthago ra šala re tiputsisa gore ayitsano motho yenewa o na le taba le tso re mo makeleng tsona. Mo tsotsone di ka fo makega, re ka maka byang gore taba yone yi sa nape yi re kgongwetsa kela ya maka gore re sa sa jabola? O sa lebale mantsu ya ma leng ga Mebereko 20:35 go leng mantsu ya ma leng ga temanyana ya hlogotaba ya rune. Phela mojabolo wa rune wa gore re ya neyana, a wa tithega ka gore batho bo re ba neyang dilo tsone baa di leboga kela dho. Re ka di kgona go ya mahlong re jabodisa ke go neya le mo nkare batho ba bangwana a ba na danki. Re ka gelepa king mara? Tla re lebeleleneng mekgwa ye mengwana.

16. King selo sa gore a re ya tshwanela go se takisa maahlo mo re neya batho se sengwana?

¹⁶ Wene o fo ya mahlong o yekisela Jehova. Jehova o fo ya mahlong a neya batho dilo tsa gabutši le mo nkare ba di leboga kela dho. (Mat. 5:43-48) Jehova o re tshepisa gore mo le rune re neyana ‘re sa yemela gore ba re neye se sengwana,’ re“nyoko rufiwa.” (Luk. 6:35) “Se sengwana” se ka fo rela le taba ya go fo hlaya gore danki. Le mo ba sa hlaye gore danki, Jehova yene o nyoko fo ya mahlong a re rufa ka taba la gore re maka tsa gabutši mo re gelepa batho ba bangwana le gore ke rune ‘batho ba go neyela ba jabodiye.’—Diy. 19:17; 2 Makor. 9:7.

17. Ke selo sefeng se segolo so se makang gore re sa konane? (Luka 14:12-14)

 ¹⁷ Selo se sengwana so re ka se makang gore re thogo yekisela Jehova mo re neya, ke go berekisa tso Jeso a di hlayyeng mo ga Luka 14:12-14. (Bala.) Phela a go sinyegi selo mo re yamogela divakaši kela ra maka dilo tsa gabutši re makela motho wa gore wa tšiba gore ka motshwana o nyoko go makela sosone. Byalo, re re king mo nkare re bona gore mo re kene re neya ba bangwana dilo re makisa ke gore le rune re nyoko kraya se sengwana? Phela di ka ba gabutši ka matla mo re ka fo berekisa tso Jeso a bolabodiyeng ka tsona. Re ka maka dilo tsa gabutši re makela motho wa gore re ya di tšiba tsa gore a ka sa di kgone go re makela se sengwana. Re nyoko jabola ka taba la gore re ko ba re yekisela Jehova. Mokgwa wonone wo nyoko re gelepa gore re jabole le mo ba bangwana ba sa šupetse gore ba leboga dilo tso re ba makeleng tsona.

18. King selo sa gore a re ya tshwanela go se maka fote ke ntaba?

¹⁸ O sa tseye gore ba bangwana a ba na danki. (1 Makor. 13:7) Mo nkare batho ba bangwana a ba na danki, re ka tiputsisa gore: ‘Ayitsano batho bowa a ba leboge kela ba f’lo lebala go hlaya gore danki?’ Nakwenngwana di gona tso di makang gore le danki yela ya gore ne re yi yemele gore ba yi hlaye ba sa yi hlaye. Ba bangwana o kraya ba leboga ka matla tso o ba makeleng tsona mara di ba thathafela gore ba šupetse gore baa leboga. Di ka fo ba di ba tšebisa mo ba bangwana ba ba gelepa, ka matlamatla mo nkare ku botala ke mo go le bona ba gore ne ba tlwayele go gelepa ba bangwana. Mara mo nkare ga magageru re ma nyaka ka matla re ka sa ma naganele dilo tsa go sa yi ka tsela fote re nyoko fo ya mahlong re ba neya re kene re jabodiye.—Maef. 4:2.

19-20. Ke ntaba go lefisa pelo go ka re berekela mo re neya ba bangwana? (Lebelela le sethombhe.)

¹⁹ Lefisa pelo. Ga taba ya go sa konane Kgoši ya go hlalefa yo ba reng ke Solomoni, o ngwadiye gore: “Bošela sekgwa sago ka meetšing, ka taba la gore o nyoko boya o se kraya mo go šele go fitiye matšatši ya go tlala.” (Mmo. 11:1) Mantsu yawa ma šupetsa gabutši gore ba bangwana ba ka hlaya gore ba leboga tso re ba makeleng tsona—“mo go šele go fitiye matšatši ya go tlala.” Tsowa ke  tso di makeleng mogageru ye mongwana wa mosadi.

²⁰ Mengwaga ya go tlala ya go fela, mosadi wa mopotulugi o yye a ngwalela mogageru wa mosadi wa gore o sa tšwa go kolobetsiwa lengwalo, a mo hlohletsela gore a fo ya mahlong a kene a tshepega. Ka nthago ga gana hala ga mabala ya mengwaga mogageru yela o yye a mo fetola ka go mo ngwalela lengwalo, a re: “Taba yowa o ka fo ba o sa yi tšibi, mara ne ke fo nyaka go go botsa ka mokgo o yyeng wa n’gelepa ka gona mabala ya mengwaga ya go fela.” O tokegele ka gore: “[Borifi byago] ne bo tikisa, mara sa go napa se tikisa pelo yaka ka matla ke lengwalo la Bhayibele le o le ngwadiye ga borifi byone fote nka sa ro tsoga ke le libele.” a O yye a mmotsa ka tso a yyeng a ghulana natso ga mengwaga yone ke mokane o yye a re: “Ka dinako tse dingwana ne ke nyaka go lahla tewu fote ke nyaka go lisetsa go ba Hlatse. Mara ne ke dula ke nagana ka lengwalo lela la gore o nngwalele lona fote le yye la nneya matšhika ya gore ke dule ke tshepega.” O tokegele ka gore: “Ga mabala ya mengwaga yone, a se šiyo le mong selo ka ssoši sa gore se yye sa ntiyisa go phala borifi le lengwalo la Bhayibele la gore o yye wa nngwalela lona.” Phela o fo nagana gore mosadi wa mopotulugi o yye a jabola go segela kaye mo a kraya borifi byowa “mo go šele go fitiye matšatši ya go tlala”! Le ga rune di ka makega gore ba re leboge go šele go le mong botala fote re libele le gore re yye ra ba makela ying.

21. Ke ntaba o tikemisele go fo ya mahlong o yekisela Jehova ga taba ya go sa konane?

²¹ Re šele re bolabodiye gore nakwela Jehova a maka batho o ba makiye go le ba go jabolela go makela ba bangwana tsa gabutši. Le mo yi le gore re ya jabola mo ba re neya se sengwana mara re napa re jabola ka matla mo re neya batho ba bangwana. Phela re kwa dipelo tsowa di yediye mo re kgona go gelepa magageru. Fote re jabola ka matla mo ba šupetsa gore baa leboga. Le mo nkare motho yene re mo neyyeng se sengwana a šupetsa gore wa leboga kela dho, rune re nyoko jabola ka taba la gore re ya di tšiba tsa gore re makiye mong selo sa go bafala ka matla. O sa lebale gore tsotsone o neyanang ka tsona, “Jehova a ka sa šitege go go neya tsa go feta tsowa.” (2 Dikor. 25:9) Phela ga Jehova re ka sa mo phale ka go neyana! Fote mo Jehova a re rufa ke mong selo se segolo ka matla. Byalo, tla re tikemiseleng go ya mahlong re yekisela Papa wa rune wa gore aa konane wa ku legedimo.