1-2. Di nyaka re maka ying mo re sa yemele lefase la nyuwane?

 RE YI tseyela gedimo taba yo Jehova a yi tshepisiyeng ya gore o nyoko fetsa ka lefase lowa ke mokane a maka gore go be le lefase la nyuwane la go loka. (2 Pet. 3:13) Le mo re sa di tšibi gore lefase lone la nyuwane le nyoko segela leng, tso re di bonang di fo šupetsa gabutši gore yi tšhayye.—Mat. 24:32-34, 36; Meber. 1:7.

² Ka mokana ga rune di nyaka re dula re tiyisa tumelo ya rune ga taba yone ba re tshepisiyeng, le mo yi le gore ke botala re kene re ngangarele nnete. Ke ntaba re reyane? Ka taba la gore le mo tumelo yi tiyelele, yi ka šepa. Gabutšibutši, Pawulo wa lepostola o yitseri go gayela tumelo ke “senyama sa gore se fo re tantetsa lula.” (Maheb. 12:1) Mo re nyaka gore tumelo ya rune yi sa šepe, re sa lisetse go dula re nagana ka dilo tso di šupetsang gore go nyoko ba le lefase la nyuwane go se botala.—Maheb. 11:1.

3. Re nyoko petapeta ka ying ga hlogotaba yowa?

³ Ga hlogotaba yowa, re nyoko petapeta ka kararo ya dilo tsa gore re ka tiyisa tumelo ya rune ka taba yo Jehova a yi tshepisiyeng ya lefase la nyuwane, ke tsowa: (1) go ghayela ka sehlabelo sa Jeso, (2) go ghayela ka matšhika ya Jehova le (3) go maka dilo tsa gore di re šutetsa thina le Jehova. Ke mokane re nyoko petapeta le ka mokgo molayetsa wo Jehova a wo butsiyeng Habakuku wo re tiyisang tumelo lekgono. Sa thoko, tla re lebeleleneng tse dingwana tsa gore di ka makega gore re gahlana natso gana byalo, tsa gore di nyaka tumelo ya go tiya ga tshepo yo re nang nayo ya lefase la nyuwane la gore le sa tla.

 SEYEMO SA GORE SE NYAKA TUMELO YA GO TIYA

4. Ke dipheto tsa mošaga mang tso di nyakang tumelo ya go tiya?

⁴ Ka moka matšatši re segelela dipheto tsa gore di nyaka tumelo ya go tiya. Mo re beyisa, re segelela dipheto tsa gore go kena le taba ya go kgeta banghana, tsa go tijabodisa, go tšhutega, go šadha, go ba le bana le ga mmereko wa go tipasopa. Re ko ba re maka gabutši mo re tiputsisa gore: ‘Ayitsano tso ke di kgetang di šupetsa gore a ke kamake gore go nyoko fela ka lefase lowa ke mokane go se botala go nyoko ba le lefase la nyuwane la Modimo? Kela ke kgeta go maka dilo tsa go tshwana le tsa bo ba gore a ba di tshepi tsa gore ba ka phela go ya go yye?’ (Mat. 6:19, 20; Luk. 12:16-21) Mo re ka tiyisa tumelo ya rune ga taba ya gore lefase la nyuwane le gana ho thina, re nyoko ba re segelele sepheto sa go di phala ka moka.

5-6. Ke ntaba di nyaka gore re be le tumelo ya go tiya ka dinako tsowa tsa go sasamela? Beyisa.

⁵ Dintshitshire tso re gahlanang natso di nyaka tumelo ya go tiya. Re ka gahlana le taba ya go hlorisiwa, bolwele bya gore a bo fole kela tse dingwana tsa gore di ka re šiya re kgongwele. Re ka thomisa ka go bona nkare re ka sa yi kwi ntshitshire yo re lebanneng nayo. Mara dintshitshire tsa mošaga wowa ga go tlala di tseya nako, byalo re nyoko hloka tumelo ya go tiya gore re tiyisele fote re ye mahlong re berekela Jehova re jabodiye.—Marom. 12:12; 1 Pet. 1:6, 7.

⁶ Mo re sa kikirisana le ntshitshire, re ka kwa nkare lefase la nyuwane la Jehova le ka sa sa tla. Ayitsano tsotsone di ra gore tumelo ya rune ya kgwelakgwehla? Le ka gonyana. Tseya ka mošupetso ke wowa. Mo go le marega re gora, o ka kraya re sa tshepe gore go sa nyoko ba le selemo. Mara selemo sa fo re palakata. Go fo tshwana le mo re kgongwele ka matla, re ka kwa nkare lefase la nyuwane le ka sa sa tla. Mo nkare tumelo ya rune yi tiyelele, re ya di tšiba gore tso Modimo a di tshepisiyeng di nyoko makega. (Pis. 94:3, 14, 15; Maheb. 6:17-19) Mo re sa yi kamake taba yone, re ka di kgona go yi yetisa ku mahlong taba ya go berekela Jehova mo re kene re phela.

7. Di nyaka re kganele kgole le mokgwa wofeng?

⁷ Lebelela gore ke kaye go gongwana mo di nyakang re ba le tumelo ya go tiya—ke mo re maka mmereko wa go tšhomayela. Batho ba go tlala bo re ba tšhomayelelang ba bona nkare “ditaba tso tsa go bafala” tsa go bolabola ka lefase la nyuwane la Modimo la gore le sa tla ke mong setori. (Mat. 24:14; Hezek. 33:32) Byalo, di nyaka re sa yikele mokgwa wa bona wa go kamaka nnete wo re kena. Re dule re tiyisa tumelo ya rune gore o sa kraye mokgwa wone wo re tsatsakela. Tla re lebeleleneng kararo ya dilo tso re ka di makang.

GHAYELA KA SEHLABELO SA JESO

8-9. Mo re ghayela ka sehlabelo sa Jeso, tsotsone di ka tiyisa tumelo ya rune ka mokgo mang?

⁸ Mokgwa wo mongwana wa gore re ka tiyisa tumelo ya rune ke gore re ghayele ka sehlabelo sa Jeso. Go lepolliwa ke se sengwana so re tshwarelelang ga sona gore nnete tso Modimo a di tshepisiyeng di nyoko makega. Mo re ka fo yi lebelela gabutši taba yowa ya gore ke ntaba Jehova a makiye gore go be le sehlabelo le gore o tikonne tsa go tlala go segela kaye, re maka gore tumelo ya rune tiye ga taba ya gore lephelo la go ya go yye lo Modimo a le tshepisang ga lefase la gore le kawone, a go jiki le nyoko ba gona. Ke ntaba re reyane?

⁹ Ga sehlabelo sa Jeso, go kena le taba yifeng? Jehova o romme Morwayi wage wa gore o mo nyaka ka matla wa gore fote ke monghanage ye mogolo gore a tloge ku legedimong gore a tle a belegiwe ho lefaseng go le motho wa go yenela. Nakwela Jeso a le ho lefaseng o yye a tiyisela  mehlobo ka mokana ga yona ya go kwisiwa go baba. O yye a hlupegisiwa ka matla a boya a ro kgwisa lešidi. Phela ke mong patela ye kgolo yo Jehova a yi ntshiyeng! Modimo wa rune wa gore o nyakanana ka matla ne a ka sa lisetse Morwayi wage gore a hlupege a boye a kgwe, go fo re re kraye lephelo la kawone mara go le tsa senakonyana. (Joh. 3:16; 1 Pet. 1:18, 19) Ka taba la gore Jehova o re neyye Morwayi wage gore a tle a re gelepe, o nyoko di maka tsa gore re kraye lephelo la go ya go yye ga lefase la nyuwane.

GHAYELA KA MATŠHIKA YA JEHOVA

10. Maefeso 3:20 yi re Jehova o kgona go maka ying?

¹⁰ Mokgwa wa mabedi wa go tiyisa tumelo ya rune ke go ghayela ka matšhika ya Jehova. O na le matšhika ya go maka dilo ka mokana ga tsona tso a di tshepisang. Ke nnete gore batho ba go tlala ba nagana gore taba ya go phela go ya go yye lefaseng la nyuwane yi ka sa kgonege. Mara Jehova o dula a tshepisa dilo tsa gore batho ba ka sa tsoge ba kgonne go di maka. Phela ke Modimo wa Matšhika ka Moka. (Jobo 42:2; Mar. 10:27) Ayitsano re ka yemela gore a re tshepise dilo tsa gore re di tlwayele?—Bala Maefeso 3:20.

11. Re beyisele ka selo ka ssoši sa go makatsa so Modimo a se tshepisang. (Lebelela lebhokisi la gore, “ Tse Dingwana Tsa go Makatsa Tso a di Tshepisiyeng Tsa Gore di Šele di Makegiye.”)

¹¹ Lebelela tse dingwana tsa dilo tso Jehova a di tshepisiyeng batho ba ku botala tsa gore ne di šupetsa nkare di ka sa kgonege. O butsiye Abhrahama le Sara gore ba nyoko ba le morwayi le mo ba šele ba tsofele. (Gen. 17:15-17) A boya a botsa Abhrahama gore ditlogolwane tsage di ko kraya naga ya Kanana. Nakwela ditlogolwane tsa Abhrahama go leng Maisrayele, di le mabhantiti mengwaga ya go tlala ku Egepita, ke mo di ka fo bonala nkare tso ba di tshepisiyeng tsona ne di ka sa makege. Mara di makegiye. Ka nthagonyana, Jehova o hlayye gore Elizabheta o nyoko ba le ngwana le mo a kene a tsofele. Fote a botsa le Mariya, wa gore ne go sa le kgareba, gore o nyoko belega Morwayi wage fote tsotsone ne di nyoko maka gore tso Jehova a di tshepisiyeng dikitikiti tsa mengwaga ku tšhomong ya Edeni di makege!—Gen. 3:15

12. Jošuwa 23:14 le Jesaya 55:10, 11 di maka gore re sa kamake ying ka matšhika ya Jehova?

¹² Re tiyisa tumelo ya rune ga taba ya gore Jehova o na le matšhika ya go leya lefase la nyuwane ka go nagana ka tso a di tshepisiyeng a boya a di maka. (Bala Jošuwa 23:14; Jesaya 55:10, 11.) Tsotsone di maka gore re dule re tilukiselele go gelepa ba bangwana gore ba thogo bona gore lefase la nyuwane lo ba re tshepisiyeng a yi fo ba moloro kela setori. Jehova o hlayye ka boyene ka taba ya magedimo ya nyuwane le lefase la nyuwane, mo a re: “Ke nnete fote di ya tshepega.”—Kut. 21:1, 5.

MAKA DILO TSA GORE DI GO ŠUTETSA THINA LE JEHOVA

13. Megahlano ya phutego yi ka tiyisa tumelo ya rune ka mokgo mang? Hlatolla.

¹³ Mokgwa wa boraro wo re ka tiyisang tumelo ya rune ka wona ke go fetsa nako re maka dilo tsa gore di re šutetsa thina le Jehova. Mo re beyisa, lebelela ka mokgo megahlano ya phutego yi ka re berekelang. Anna, wa gore o fetsiye mengwagangwaga a maka dilo tsa mohlobohlobo ga mmereko wa tšhomo wa nako ka moka, o re: “Megahlano yi n’gelepa gore ke dule ke tiyisa tumelo yaka. Le mo motho ye a tšhutisang a sa nape a di kgona tsa go tšhutisa kela a sa hlaye selo sa gore a ke se tšibi, ga go tlala ke kwa se sengwana sa gore se n’gelepa gore ke nape ke kwisisa Bhayibele gabutši fote tsotsone di tiyisa tumelo yaka.” b Fote tumelo ya rune yi ka tiyelela mo re theetsela tso magageru ma di hlayang mo ma fetola megahlanong.—Marom. 1:11, 12; 10:17.

14. Tšhomo yi tiyisa tumelo ya rune ka mokgo mang?

 ¹⁴ Re tiyisa tumelo ya rune mo re ba gona tšhomong. (Maheb. 10:23) Barbara, wa gore o na le mengwaga ya go teya ka ku ga 70 a kene a berekela Jehova, o re: “Mmereko wa go tšhomayela ne wo dula wo maka gore tumelo yaka yi tiyelele. Mo nkene ke ya mahlong ke bolabola le ba bangwana ka tso Jehova a di tshepisang, tumelo yaka yi napa yi ro tiyelela.”

15. Go tšhuta Bhayibele re le ntoši go tiyisa tumelo ya rune ka mokgo mang? (Lebelela dithombhe.)

¹⁵ Go na le se sengwana sa gore se tiyisa tumelo ya rune: go tšhuta Bhayibele o le ntoši. Susan di mo gelepa ka matla go ba le letheto la gore o nyoko tšhuta leng. O re: “Ka Lesonto, ke tšhuta Setšhuto sa Sewokamelo sa beke ya go latela. Ka Mosopologo le Labobedi, ke lukiselela mogahlano wa gare ga beke. Ke mokane matšatši ya ma šeleng, ke tšhuta Bhayibele ke le ntoši.” Ka taba la gore Susan o dula a latelela letheto lo a le makiyeng, tumelo yage yi fo ya mahlong yi hluhlutela. Irene, wa gore berekiye mengwagangwaga ntlong ye kgolo ya lefase, o re go tšhuta ka diporofeto tsa Bhayibele go tiyisa tumelo yage. O re: “Di mmakatsa ka matla gore Jehova o makiye dilo tso a di tshepisiyeng le mong tse dinyananyana.” c

“WO KA SA ŠITISI KE SELO GORE WO MAKEGE”

16. Ke ntaba tso Jehova a di tshepisiyeng Habakuku di bolabola se sengwana ho ga rune lekgono? (Maheberu 10:36, 37)

¹⁶ Malata ya mangwana ya Jehova ke botala ma kene ma yemele gore go fele ka lefase lowa. Ba bangwana ba nagana gore nako ya gore go fele ka lefase lowa ya diyega. Jehova o bolabodiye ka taba yone mo a tshepisa moporofeta Habakuku gore: “Ka taba la gore mmono wo yemele nako ya gona, fote wo yakgoswele go ya mafelelong, fote wo ka sa hlaye matsaka. Le mo wo ka diyega, dula o wo yemele! Ka taba la gore wo ka sa šitisi ke selo gore wo makege. Wo ka sa diyege!” (Habak. 2:3) Ayitsano taba yo Modimo  a yi tshepisiyeng, ne yi le ya go berekela Habakuku a ntoši? Kela ayitsano mantsu Yage ma rela se sengwana ga rune lekgono? Pawulo wa lepostola o hlohletsele ke moya wa go hlawolega gore a berekise mantsu yawa ga Makreste ya gore ma yemele lefase la nyuwane ka maahlo ya makhubedu. (Bala Maheberu 10:36, 37.) Byalo, re ka tshepa re tiyisiye gore le mo taba yo Jehova a re tshepisang ya gore o nyoko re phonisa yi bonala nkare ya diyega, ‘yi ka sa šitisi ke selo gore yi makege. Yi ka sa diyege!’

17. Mogageru ye mongwana wa mosadi o ma berekisiye byang mayele ya Jehova a ma neyyeng Habakuku?

¹⁷ Malata ya Jehova ya go tlala ma berekisiye mayele yawa ya gore ma ‘dule ma di yemele’—le mo di ka tseya mengwagangwaga. Mo re beyisa, Louise o thomisiye go berekela Jehova ka 1939. O re: “Ka nako yonone, ne ke nagana gore Aremaghedoni yi nyoko segela ke soko bane ke fetsa sekolo. Mara a dya makega. Mo mengwaga yi kene yi ya, ke gelepiye ke go bala tso nna ke reng ke ‘ditaba tsa go bolabola ka go yemenyana’—go leng ditaba tsa ka ho Bhayibeleng tsa go bolabola ka Nnowa, Abhrahama, Josefa le ba bangwana ba gore ne di nyaka ba yeme nako ya go lefa gore Jehova a ba makele tso a ba tshepisiyeng. Go dula ke tshepa taba ya gore tso ba re tshepisang tsona di nyoko makega, go gelepiye nna le ba bangwana gore re sa kamake gore lefase la nyuwane le šele le le thina.” Ba go tlala ba gore ba berekele Jehova nako ya go lefa baa yi dumela taba yowa!

18. Go lebelela hlago go ka tiyisa tumelo ya rune ka mokgo mang ga lefase la nyuwane la gore le sa tla?

¹⁸ Ke nnete gore, lefase la nyuwane a le soko bane le segela. Le mo go le ka mokgonone, nagana ka dilo tsa gore di šele di le gona tsa go tshwana le dinanedi, mehlare, diphoolwane le batho. A go na le ka wweši wa gore a ka kamaka gore dilo tsowa ke tsa mannete, le mo yi le gore go yye gwa ba le nako ya gore ne di se šiyo. Gana byalo di gona ka taba la gore Jehova o ro di maka. (Gen. 1:1, 26, 27) Modimo wa rune o tshepisiye gore o nyoko maka lefase la nyuwane. O nyoko di maka tso a di tshepisiyeng. Ga lefase la nyuwane, batho ba nyoko tikwisa ka lephelo go ya go yye fote philegiye gabutši. A re kamake gore lefase la nyuwane le nyoko segela ka nako yo Modimo a yi beyyeng.—Jes. 65:17; Kut. 21:3, 4.

19. O ka tiyisa tumelo yago ka mokgo mang?

¹⁹ Mo o kene o sa yemme, maka so o ka se kgonang gore o tiyise tumelo yago. Dula o leboga sehlabelo sa Jeso. O ghayele ka matšhika ya Jehova. O make dilo tsa gore di go šutetsa thina le Jehova. Mo o maka ka mokgonone, o nyoko ba gare ga “bo ba gore ba nyoko kraya tso di tshepisiwweng ka taba la gore ba na le tumelo fote ba lefisiye dipelo.”—Maheb. 6:11, 12; Marom. 5:5.