1. Ba bangwana ba tikwa byang mo ba tshwanele ba bolabole le ba bangwana mo ba le tšhomong? (Lebelela le sethombhe.)

 RUNE malata ya Jehova re tšhomayelela batho ka taba la gore ga Papa wa rune wa ku legedimong re mo nyaka ka matla fote re nyaka go gelepa bayagelane ba rune gore ba mo tšibe ga Jehova. Batšhomayedi ba go tlala, mmereko wa go tšhomayela wa ba natefela. Mara ba bangwana wa ba thathafela. Ke ntaba mara? Ba bangwana ba ka ba ba hlupa ke dihlong fote ba sa titshepe. Ba bangwana ba kwa di sa ba duli gabutši go ya magayeng ya batho ba sa ba mema. Ba bangwana ba tšhoga taba ya gore ba ka sa ba yamogele. Ba bangwana ba ba tšhutisiye gore ba kganele kgole le taba ya go kwatisanya batho ba bangwana. Le mo magageru yawa ma mo nyaka ka matla ga Jehova mara ma kwa di roba go bolabola ditaba tsa go bafala le batho ba gore a ba ba tšibi. Mara, ba di tšiba gabutši gore mmereko wowa ke wo mogolo go segela kaye fote ba dula ba tshwaraganne ka go wo maka. Phela a re kamake gore Jehova o titeya sekguba ka bona!

2. Mo nkare di ya go thathafela go jabola mo o le tšhomong, ke ntaba di nyaka o sa nape o kgongwela ka matla?

² Ayitsano le wene di fela di go tlela tsa go kwa o sa jabolele tšhomo ka taba la go fo kwa o tšhaba? Mo nkare go ka mokgonone, o sa nape o kgongwela ka matla. Taba ya go kwa o sa titshepe yi ka fo ba yi šupetsa gore o tinyanafatsiye fote a wo kwane natso tsa gore batho ba lebelele wene le gore a wo nyake go ba gare ga batho ba gore baa phigisana. Fote aa šiyo motho wa gore o jabolela gore ba sa mo yamogele ka matlamatla mo a re o liketsa go makela ba bangwana tsa gabutši. Phela Papago wa ku legedimong o di kwisisa gabutši ka mokgo o tikwang fote wa di nyaka go go gelepa. (Jes. 41:13) Ga hlogotaba yowa, re nyoko petapeta ka kapheta ya dilo tsa gore di ka re  gelepa gore re hlule mokgwa wone le gore re ka maka byang gore re jabole mo re le tšhomong.

LISETSA LENTSU LA MODIMO LE GO TIYISE

3. King so se gelepiyeng Jeremiya wa go porofeta gore a tšhomayelele ba bangwana?

³ Le ku botala, molayetsa wa go tšwa ga Modimo o tiyisiye malata yage mo ma na le mmereko wa go thathafa wo ne di nyaka ba wo make. Tseya ka mošupetso wa Jeremiya wa go porofeta. O yye a tšhoga mo Jehova a mo neya mmereko wa go tšhomayela. Jeremiya o yitseri: “A ke di kgoni tsa go bolabola ka gore ke sa le mošomanyana.” (Jer. 1:6) Mara o yye a yi hlula byang taba ya go sa titshepi? O yye a tiyisa ke Lentsu la Modimo. O yitseri: “Ke mo le tshwana le mollo wa gore wo kutelanne ka teng ga mašapo yaka, fote ne ke tinwisiye ke go kgomolela ka lona.” (Jer. 20:​8, 9) Le mo yi le gore tšhomo yo Jeremiya ne a tshwanele a yi bereke ne yi thathafa mara molayetsa wo ba mo neyyeng wona gore a wo sabalatse wo makiye gore a tiyelele ke mokane a kene fase.

4. Go makega ying mo re bala Lentsu la Modimo re boya re ghayela ka lona? (Makolosi 1:​9, 10)

⁴ Makreste ma kraya matšhika ga molayetsa wa go tšwa ga Lentsu la Modimo. Mo Pawulo wa lepostola a ngwalela phutego ya ku Kolosi lengwalo o yitseri go tšiba mong yona nnete go nyoko hlohletsela magagabo gore ma “thogo maka tso Jehova a di nyakang” mo ma kene ma ya mahlong ma “yengwa diyengwa ga mmereko wo mongwana le wo mongwana wo le wo makang.” (Bala Makolosi 1:​9, 10.) Ye naa, phela ga mmereko wone wa gabutši go kena le go tšhomayela ditaba tsa go bafala. Byalo, mo re bala Lentsu la Modimo re boya re ghayela ka lona, tumelo ya rune ga Jehova ya tiyelela fote re napa re di bona gore go botsa batho ka molayetsa wa Mmušo ke mong selo se segolo.

5. Re ka maka byang gore di re berekele tsa go bala Bhayibele le go tšhuta?

⁵ Gore di thogo re berekela tsa go bala Lentsu la Modimo, di nyaka re kganele kgole le taba ya nkare ba ro re lelekisa mo re bala, re tšhuta le mo re ghayela. Sa jage. Mo o bala lengwalo ke mokane o sa le kwisisi gabutši o sa fetele mahlong. Mara berekisa Watch Tower Publications Index kela Tlhahlo ya go Dira Nyakišišo ya Dihlatse tša Jehofa gore o thogo kraya hlatollo ya temanyana yone. Mo o ka sa jage mo o tšhuta, phela o ka sa kamake gore tso Lentsu la Modimo le di hlayang ke mong yona nnete. (1 Mathes. 5:21) Ke nnete gore mo o ka sa kamake tso o di tšhutang, di ko go jabodisa gore o di botse ba bangwana.

LUKISELELA GABUTŠI MO O YE TŠHOMAYELENG

6. Ke ntaba di nyaka re lukiselele gabutši mo re ya tšhomong?

⁶ Mo o ka tilukiselela gabutši mo o ya tšhomong, o nyoko teya o tshwarelele mo o bolabola  le batho ba bangwana. Jeso o yye a gelepa malata yage ga taba ya go lukiselela mo a soko bane a ma roma gore ma ye tšhomayeleng. (Luk. 10:​1-11) Ka taba la gore malata ya Jeso ma yye ma di maka tso Jeso a ma tšhutisiyeng, ma yye ma di kgona go maka dilo tsa go tlala tsa gabutši fote tsotsone di yye dya maka gore ma jabole la go sa hlayisege.—Luk. 10:17.

7. Re ka lukiselela ka mokgo mang mo re ya tšhomong? (Lebelela le sethombhe.)

⁷ Re ka lukiselela ka mokgo mang mo re ya tšhomong? Di nyaka re nagane ka tso re nyakang go di bolabola ke mokane re bolabole ka mokgwa wa hlago wa gore wa kwala re boye re berekise le mantsu ya runebeng. Fote di ka re berekela mo re ka thomisa ka go nagana ka batho bo re nyoko bolabolang nabo gore ba ko titshwara byang mo re ba tšhomayelela le gore rune re ka fetolana nabo ka mokgo mang. Ke mokane mo re gahlana le batho re liketsa ka matla gore re kgibe, re ngwalangwale re boye re kenege.

8. Makreste ma tshwana ka mokgo mang le ditša tsa botsopa tsa gore ba bolabodiye ka tsona ga mošupetso wa Pawulo?

⁸ Pawulo wa lepostola o butsiye magagabo ya Makreste gore: “mmereko wo re wo tshwereng ke wa go hlawolega mara rune re fo tshwana le ditša tsa botsopa tsa gore di na le makolwane.” (2 Makor. 4:7) Anthe makolwane yane king? Ke mmereko wa go tšhomayela molayetsa wa Mmušo wa gore wo phonisa maphelo ya batho. (2 Makor. 4:1) Ditša tsa botsopa tsona king? Di yemela malata ya Modimo ya gore ma botsa ba bangwana ditaba tsa go bafala. Ka dinako tsa bo Pawulo bo ba go rekisa dilo ne ba berekisa lepotlela la gore ba le makiye ka botsopa gore ba thogo sipidisa dilo tsa gore di tseyediwa gedimo tsa go tshwana le tsa go ja, wayini le tšheleta. Go fo tshwana le ka mokgo Jehova a re tshepiyeng ga taba ya molayetsa wa go tseyediwa gedimo wa ditaba tsa go bafala. Mo re gelepa ke Jehova, a go jiki re nyoko ba le matšhika ya re ma hlokang gore re thogo sabalatsa molayetsa wa rune re kene re tshepegiye.

RAPELELA LEŠIŠI

9. Re ka maka byang gore re hlule taba ya go tšhaba batho kela ya go tšhaba gore ba ka sa re yamogele? (Lebelela le sethombhe.)

⁹ Ka dinako tse dingwana o ka kraya re tšhaba go phigisiwa ga mmereko wa rune wa go tšhomayela re boya re tšhaba le taba ya gore re ka sa theetsele ke motho. Re ka maka byang gore re hlule ntshitshire yone? Lebelela ka mokgo mapostola ma yyeng ma rapela ka gona nakwela ba ma botsa gore ma lisetse go tšhomayela. A sanka ma  hlagasedisa ke taba yone mara ma yye ma kgopela Jehova gore a ma gelepe “ma ye mahlong ma bolabola lentsu lage ma šišimele.” Jehova o yye a fetola thapelo ya wona ka nako yonone. (Meber. 4:​18, 29, 31) Mo nkare le rune tsa go tšhaba batho di fela di re vakašela, di nyaka re kgopele Jehova a re gelepe. Kgopela Jehova gore a go gelepe o tiyise taba ya gore batho o ba nyaka ka matla gore o sa tšhabe go ba botsa ka ditaba tsa go bafala.

10. Jehova o re gelepa ka mokgo mang gore re thogo maka mmereko wa rune wa go tšhomayela? (Jesaya 43:​10-12)

¹⁰ Phela Jehova o ro re kgeta gore re be Dihlatse tsage fote o re tshepisa gore o nyoko re gelepa gore re šišimale. (Bala Jesaya 43:​10-12.) Lebelela dilo ka dine tsa go šupetsa gore tsotsone o di makamaka byang. Sa thoko, Jeso o na le rune go gongwana le go gongwana mo re tšhomayelang ditaba tsa go bafala. (Mat. 28:​18-20) Sa mabedi, Jehova o kgetiye mangeloyi gore ma re gelepe. (Kut. 14:6) Sa kararo, Jehova o re neyye moya wage wa go hlawolega gore re thogo gopola tso re di tšhutiyeng. (Joh. 14:​25, 26) Sa kanne, Jehova o re neyye magageru gore ma re thege. Ye lune, phela mo re na le Jehova re boya re thega ke magageru ya lefaseng ka mokana ga lona a re hloke selo re nyoko phomelela.

TEMATEMA FOTE O TSEYE DILO GABUTŠI

11. O ka maka byang gore o kraye batho ba go tlala mo o le tšhomong? (Lebelela le sethombhe.)

¹¹ Ayitsano dya go kgongwetsa mo ba go tlala o sa ba kraye mo magaye? Ke ntaba o sa tiputsisi gore: ‘Anthe ba kaye batho ba ho tšhomong ya rune?’ (Meber. 16:13) ‘Ayitsano ba yye mmerekong kela ba yye ditolo?’ Mo nkare go ka mokgonone, ayitsano o ka sa kraye batho mo o ka fo ya we tšhomayela mo go fetang batho? Mogageru ye mongwana ye ba reng ke Joshua o yitseri, “Ke yye ka thulegela ke mašuba ya go tšhomayela ditolo le mo go tleleng batho.” Yene le mosadi wage ye ba reng ke Bridget, ba yye ba kraya batho ba go tlala mo magaye ka go ba vakašela mo le šele le kgwalala le ka Lesonto ka sethewo.—Maef. 5:​15, 16.

12. Re ka maka byang gore re thogo bona so batho ba se dumelang le gore ba hlupega ka ying?

¹² Mo nkare batho ba šupetsa ba sa nape ba jabolela molayetsa, liketsa go lebelela gore ba dumela ga ying ke mokane o hlupege ka taba yone. Joshua le Bridget ba yye ba berekisa putsiso ya gore yi nyarela ka ho mahlong ga sephephane mo ba thomisa ditaba. Mo re beyisa, mo ba berekisa sephephane sa gore O fo re King Nje ka Baebele? Ba re: “Batho ba bangwana ba tseya Bhayibele go le puku ya go tšwa ga Modimo hala ba bangwana ba  sa nape ba yi tseya ka mokgonone. Wene o yi bona byang?” Ga go tlala tsotsone di maka gore re thomise polabodisano.

13. Ke ntaba re re re phomelele mo re ya tšhomong le mo batho ba sa re theetsele? (Diyema 27:11)

¹³ Le mo batho ba sa re theetsele mo re tšhomayela so se šalang ke gore re segelele so ne re nyaka go se segelela. Ke ntaba re reyane? Ka taba la gore re makiye so Jehova le Morwayi wage ba nyakang re se make—re neyye bohlatse. (Meber. 10:42) Le mo re sa kraye motho wa go bolabola naye kela ba gana molayetsa wa rune, re ka jabola ka taba la gore re ya di tšiba gore re jabodisa Papa wa rune wa legedimong.—Bala Diyema 27:11.

14. Ke ntaba le rune re jabola mo motšhomayedi ye mongwana a kraya motho wa gore wa jabolela mo re le tšhomong?

¹⁴ Re ka jabola fote mo motšhomayedi ye mongwana a kraya motho wa gore wa jabolela mo re le tšhomong. Sewokamelo se tshwanisa mmereko wa rune le taba ya go nyakela ngwana wa gore o lahlegiye. Ba go tlala baa khitikana ga taba ya go nyakana naye ba sepela dipoleke tsowa ka mokana ga tsona. Mo ngwana yene a krayega a go jabole fela ye a mo krayyeng mara ka mokana ga bona bo ba tšhediyeng letsogo ga letsima la go nyakana naye ba jabola la go sa hlayisegi. Go fo tshwana le mmereko wa go maka malata a yi wa motho ka wwoši mara re ya tshwarisana. Di ya hlokega gore ka mokana ga rune re ye tšhomong re ye tšhomayelela batho fote ka mokana ga rune re ya jabola mo motho a thomisa go tla megahlanong.

HLUPEGA KA MATLA KA TABA YA GO NYAKA JEHOVA LE MOYAGELANE

15. Mo re ka berekisa Matewu 22:​37-39, tsotsone di ka re gelepa gore re ye mahlong re jabolela mmereko wa go tšhomayela ka mokgo mang? (Lebelela le sethombhe sa ka tawong.)

¹⁵ Re ka ya mahlong re jabolela mmereko wa go tšhomayela mo re ka sa yi takisi maahlo taba ya gore ga Jehova le moyagelane re ba nyaka ka matla. (Bala Matewu 22:​37-39.) O fo nagana gore Jehova o jabola go segela kaye mo a bona re maka mmereko wone le gore batho bona ba nyoko jabola go segela kaye mo ba thomisa go tšhuta Bhayibele! Le wene o sa lebale gore bo ba theetselang molayetsa wa rune ba boya ba kgeta go berekela Jehova ba ka phela go ya go yye.—Joh. 6:40; 1 Thim. 4:16.

16. Re ka maka byang gore re jabolele mmereko wa rune wa go tšhomayela le mo re sa kgone go tšwa ka gaye? Beyisa.

¹⁶ Ayitsano o šitega go tšwa ka gaye ka taba la se sengwana? Mo nkare go ka mokgonone, o sa takisi maahlo tso o ka di kgonang gore o šupetse Jehova le moyagelane wago gore o ba nyaka ka matla. Ka nako ya bolwele bya go sabalala bya COVID-19, Samuel le Dania ke mo ba sa kgone go  tšwa ka gaye. Mo nako yone ya go thathafa yi kene yi ya mahlong ke mo ba dula ba tšhomayela ba berekisa fowunu, ba ngwala mangwalo ba boya ba tšhutisa batho Bhayibele ba berekisa Zoom. Samuel ke mo a tšhomayelela bo ne a gahlana nabo tliniki mo ne a phaka maphilisi ya khensa gona. O yitseri: “Mo re gahlana le tsa go re ghula o ka kraya re šekela re boya re lelemela le tumelo ya rune yi ka thomisa go liketsega. Di nyaka re jabole mo re kene re berekela Jehova.” Mo tsotsone ka mokana ga tsona di kene di makega, Dania o yye a wa ke mokane a dula a le mpetong kararo ya dikgwedi. Byalo, ke mo di nyaka gore a berekise wheelchair kobodi ya dikgwedi. O re: “Ke yye ka liketsa go maka dilo ka mokana ga tsona tso seyemo saka se ndumelelang gore ke di make. Ke kgonne go tšhomayelela nesi yo ne yi re vakašela ka boya ka bolabola le bo ne ba tl’le khita dilo ho ntlong. Fote ke yye ka ba le polabodisano ya gabutši ke berekisa fowunu le mosadi ye mongwana wa gore o bereka ga khampani ya tsa go yalafa.” Samuel le Dania seyemo sa bona ne se ba kgerela ga tso ne ba nyaka go di maka mara ba yye ba maka tso ba ka di kgonang ke mokane tsotsone dya maka gore ba jabole.

17. Mo o ka fo berekisa dilo tso di leng ga hlogotaba yowa di ka go berekela go segela kaye?

¹⁷ Liketsa go berekisa kapheta ya dilo tsowa ka mokana ga tsona tso ba di hlayyeng ga hlogotaba yowa. Se sengwana le sengwana se tshwana le letheto la tso ba di tšhelatšhelang mo ba nyaka go yapega tsa go ja tsa go natefa. Mo dilo tsone ba di tšhelatšhelang ka mokana ga tsona ba di gahlanisiye gabutši, a go jiki maphomela go nyoko ba ya go ntsha tete. Mo re ka berekisa dilo tsowa ka mokana ga tsona, re nyoko ba re yemme go loka ga taba ya go hlula go nagana tsa gore a yi tsona fote re nyoko jabola la go sa hlayisegi mo re le tšhomong.