1. King so se ka re gelepang gore re thogo jabolela go tšhuta seporofeto sa Bhayibele?

 MOGAGERU ye mongwana ye ba reng ke Ben o re, “Ke kwana natso tsa go tšhuta seporofeto sa Bhayibele.” Ayitsano o yema naye? Kela o fo kwa di go thathafela go kwisisa seporofeto sa Bhayibele? Fote o ka fo kwa di go tshwatisa go tšhuta diporofeto tsa Bhayibele. Mara, mo o kene o tšhuta tsa go tlala ka taba ya gore ke ntaba Jehova a di tšhediye ka Lentsung lage o ka tšhentšha ka mokgo ne o di tseya ka gona.

2. Re nyoko petapeta ka ying ga hlogotaba yowa?

² Ga hlogotaba yowa, re nyoko petapeta ka gore ke ntaba re tshwanele re tšhute diporofeto tsa Bhayibele le gore re ka di tšhuta ka mokgo mang. Re nyoko lebelela diporofeto ka dipedi tso di leng ga puku ya Daniyele ke mokane re bone gore mo re di kwisisa di ka re gelepa ka mokgo mang gana byalo.

3. King so re tshwaneleng go se maka mo re nyaka go kwisisa seporofeto sa Bhayibele?

³ Mo re nyaka go kwisisa seporofeto sa Bhayibele di sa re tšebisi go kgopela gore ba re gelepe. Lebelela mošupetso ke wowa. O fo nagana o vakašela poleke ya gore a o yi tšibi mara monghanago ye o sepelang naye o yi tšiba gabutši poleke yone. O go tšiba gabutši mo o leng gona le gore pata ye nngwana le ye nngwana yi sobelela le lefeng. Wa tšiba, a re kamake gore taba ya gore monghanago o dumele go sepela nago yi nyoko go jabodisa ka matla! Phela Jehova o fo tshwana le monghana yenene wa gore wa gelepana, o tšiba tsa gabutši tso di re yemeleng ku mahlong. Byalo, gore re thogo kwisisa seporofeto sa Bhayibele di nyaka re tinyanafatse re kgopele Jehova gore a re gelepe.—Dan. 2:28; 2 Pet. 1:19, 20.

4. Ke ntaba Jehova a makiye gore diporofeto di ngwadiwe ka Lentsung lage? (Jeremiya 29:11) (Lebelela le sethombhe.)

⁴ Go fo tshwana le mmelegi ye mongwana le ye mongwana wa gabutši,  Jehova o nyaka bana bage ba jabolele tsa ku mahlong. (Bala Jeremiya 29:11.) Mara Jehova o fapana kgole le babelegi ka taba la gore o re botsa tsa ku mahlong fote aa pumutsi. O makiye gore diporofeto di ngwadiwe ka Lentsung lage gore re thogo tšiba tsa ku mahlong di soko makega. (Jes. 46:10) Diporofeto tsa Bhayibele ke dilo tsa gabutši tso re di neyyeng ke Papa wa rune wa ku legedimong. Mara king so se makang gore o sa kamake gore tso Bhayibele yi di hlayyeng di nyoko makega tsa mannete?

5. Tso Max a gahlanneng natso di ka tšhutisa bo ba gore ba sa gola ying?

⁵ Ga go tlala bo ba gore ba sa gola ku sekolong ba gahlana le ba gore a ba yisi felo ka Bhayibele kela le mong go yi hlompa. Ka nakwenngwana tso ba di hlayang le tso ba di makang di ka maka gore Dihlatse tsa gore di sa gola di thomise go kamaka tumelo ya tsona. Lebelela tso mogageru ye ba reng ke Max a yyeng a gahlana natso. O re, “Mo ke sa gola ke thomisiye go kamaka tso babelegi baka ba ntšhutisiyeng tsona ka morapelo wa mannete le gore Bhayibele yi hlohletsele ke Modimo.” Mara babelegi bage ba yye ba maka byang? O re, “Ba f’lo kgiba le mo ne ke di tšiba gore di ya ba kokona.” Babelegi ba Max ba yye ba fetola diputsiso tsage ba berekisa Bhayibele. Max le yene o makiye se sengwana. O re, “Ke tšhutiye seporofeto sa Bhayibele ka nnabeng ka boya ka bolabola tso ke di tšhutiyeng le ba bangwana ba gore ba sa gola.” Tsotsone di yye dya felela kaye? Max o re, “Ka nthago ga gana hone ke yye ka sa sa kamaka gore Bhayibele yi hlohletsele ke Modimo!”

6. Di nyaka o make ying mo nkare o hlupa ke taba ya go kamaka fote ke ntaba?

⁶ Mo nkare le wene o thomisa go kamaka nnete ya Bhayibele go fo tshwana le Max, di sa go tšebisi. Mara di nyaka o yakgoswe o make se sengwana. Phela go kamaka go tshwana le rusi. Mo o ka fo yi takisa maahlo, ka gonyana ka gonyana yi ka thomisa go sinya dilo tsa go tseyediwa gedimo. Gore o thogo tlosa “rusi” gore yi sa sinyi tumelo yago, di nyaka o tiputsise gore, ‘Ayitsano ke ya di tshepa tso Bhayibele yi di hlayang ga tso di nyoko makegang ku mahlong?’ Mo nkare o fo kwa o sa di tshepi, di nyaka o tšhute ka diporofeto tsa Bhayibele tsa gore di šele di makegiye. O ka di maka byang tsotsone?

7. Daniyele o re beyisele ka mokgo mang ga taba ya go tšhuta seporofeto? (Daniyele 12:10) (Lebelela le sethombhe.)

⁷ Daniyele o beyye mošupetso wa gabutši ga taba ya go tšhuta seporofeto. Phela mo Daniyele a tšhuta ka diporofeto ne a sa makele moyano mara ne a nyaka go tšiba nnete. Fote Daniyele ke mo a tinyanafatsiye, ke mo a di tšiba gore Jehova o nyoko mo gelepa gore a kwisise diporofeto mo nkare o dula a mamarelanne naye a boya a mo theetsela. (Dan. 2:27, 28; bala Daniyele 12:10.) Daniyele o šupetsiye gabutši gore o tinyanafatsiye ka go tshepela ga Jehova gore a mo gelepe. (Dan. 2:18) Daniyele ne a sa wokole. O yye a nyakolla ga Mangwalo ya gore ne ma le gona ka dinako tsa bona. (Jer. 25:11, 12; Dan. 9:2) O ka mo yekisela byang ga Daniyele?

8. Ke ntaba ba bangwana ba ganana le gore diporofeto tsa Bhayibele di makegiye mara king so re ka se makang?

⁸ O tšhofa king gore o tšhute diporofeto tsa Bhayibele? Ayitsano mo o tšhuta ka seporofeto sa Bhayibele o tšhofiye ke gore wa di nyaka go tšiba  nnete? Mo nkare go ka mokgonone, Jehova o nago. (Joh. 4:23, 24; 14:16, 17) King se sengwana so se makang gore motho a tšhute seporofeto? Ba bangwana ba maka ka mokgonone ba tseya gore ba nyoko kraya se sengwana sa go šupetsa gore Bhayibele a ya hlohletsela ke Modimo. Ba nagana gore mo nkare Bhayibele a yi tšwi ga Modimo ba ka tikgetela sa gabutši gore ke sefeng le sa gore a se gabutši. Mara mo re tšhuta di nyaka re tšhofe ke se sengwana sa gore se gabutši. Go tokegela gana hone, di nyaka re be le mokgwa wa gabutši gore re thogo kwisisa seporofeto sa Bhayibele.

9. Ke mokgwa wofeng wo di nyakang re ba nawo gore re thogo kwisisa seporofeto sa Bhayibele? Hlatolla.

⁹ Tinyanafatse. Jehova o tshepisa go gelepa bo ba gore ba tinyanafatsiye. (Jak. 4:6) Byalo, di nyaka re rapele gore a thogo re gelepa re kwisise seporofeto sa Bhayibele. Fote mo nkare re tinyanafatsiye re nyoko yamogela mo re gelepa ke lelata la go tshepega la gore Jehova o berekisa lona gore a neye tso tsa Modimo ka nako ya gona. (Luk. 12:42) Jehova ke Modimo wa go maka dilo ka letheto, byalo di ya kwagala mo a berekisa lelata lone go re gelepa gore re thogo kwisisa nnete yo yi leng ka Lentsung lage.—1 Makor. 14:33; Maef. 4:4-6.

10. King so o se tšhutang ga tso di makegeleng Esther?

¹⁰ O sa wokole. O fo kgeta seporofeto so se go jabodisang ke mokane o nyakolle ka sona. Tsotsone di makiye ke mogageru wa mosadi ye ba reng ke Esther. Ne a jabodisa ke diporofeto tsa gore di bolabola ka Mesiya wa gore o sa tla. O re, “Nakwela ke sa na le 15 ya mengwaga ke yye ka thomisa go nyakana le sa go šupetsa gore diporofeto tsowa ba di ngwadiye mo Jeso a soko bane a tla ho lefaseng.” Tso a di tšhutiyeng mo a bala Mangwalo ya go Phutiwa ya Lewatle la go Kgwa di makiye gore a sa kamake. O yitseri “Ya mangwana ya wona ba ma ngwadiye mo Kreste a soko bane a segela, byalo diporofeto tsone di tšwa ga Modimo.” Esther o re, “Mo ke bala selo ne di nyaka ke se bale gatleletlele gore ke thogo se kwisisa.” Mara o jabodiye la go sa hlayisege ka taba la gore o yye a karakara ka matla. Ka nthago ga mo a šele a tšhutiye diporofeto tsa go tlala tsa Bhayibele o hlaya gore, “Phela ke ro di bona gabutši gore tso Bhayibele yi di bolabolang go ro ba yona nnete!”

11. Di nyoko re berekela ka mokgo mang mo re sa kamake gore Bhayibele yi bolabola nnete?

¹¹ Mo re bona diporofeto tse dingwana tsa gore di šele di makegiye ka Lentsung la Modimo, re thomisa go mo tshepa ka matla ga Jehova re boya re tshepa le ka mokgo a re yetetsang. Go tokegela gana hone, diporofeto tsa Bhayibele di re gelepa gore re gotetse tshepo yo re nang nayo ya tsa ku mahlong le mo re ka tlela ke dintshitshire tsa mošaga mang gana byalo. Tla re lebeleleneng ka gonyana diporofeto ka dipedi tso di ngwadiyeng ke Daniyele tsa gore gana byalo di šele di makegiye. Mo re ka di kwisisa di nyoko re gelepa gore re thogo segelela dipheto tsa gabutši.

12. Mawoto ya gore ba “gahlanisiye le tshipi le botsopa” ma yemela ying? (Daniyele 2:41-43)

¹² Bala Daniyele 2:41-43. Ga moloro wo Daniyele a hlatolleleng kgoši Nebhukhadhinezara, mawoto yaa kgoši a ma bonneng ga sethombhe  ba “gahlanisiye tshipi le botsopa.” Mo re lebelela seporofeto sowa le tse dingwana ga puku ya Daniyele le ya Kutullo re ka fetsa ka gore mawoto ma yemela senghana so mmušo wa lefase wa Makgowa le Maamerikha wo nang naso, phela mmušo wone go lawola wona lekgono. Mo Daniyele a bolabola ka matšhika yane o re “mmušo wone go gongwana wo nyoko tiya fote go gongwana wo ka sa tiyi.” Ke ntaba wo ka sa tiyi? Ka taba la gore batho ba ba tshwanisiye le botsopa ga mmušo wone a ba tshepe gore bo nyoko tiya go tshwana le tshipi. b

13. Ke nnete yifeng yo re yi tšhutang ga seporofeto?

¹³ Tso Daniyele a di hlatollang ga sethombhe sa gore se ro loriwa ka matlamatla ga mawoto ya sona re ka tšhuta tsa go tlala. Sa thoko, Mmušo wa Lefase wa Makgowa le Maamerikha wo šupetsiye matšhika ya wona ka mokgwa wo mongwana. Mo re beyisa, mmušo wone wo yye wa hlula Ntwa ya Mathomo ya Lefase le Ntwa ya Bobedi ya Lefase. Mara, mmušo wone wa lefase wa gore wo na le matšhika wo šepiye fote wo nyoko fo ya mahlong wo kene wo šepa ka taba la gore wo lwa ka bowona beng. Sa mabedi, mmušo wone wa lefase wa Makgowa le Maamerikha go nyoko ba wona mmušo wa mafelelo wa go lawola ho lefaseng go soko segela Mmušo wa Modimo wa gore wo nyoko fetsa ka memmušo ka mokana ga yona ya batho. Le mo ditšhaba tse dingwana di ka šuhlašuhla mmušo wa Lefase wa Makgowa le Maamerikha di ka sa wo ketule. Re ya di tšiba tsa gore “letlapa” le yemela Mmušo wa Modimo wa gore wo nyoko psyitlanya mawoto go leng sekopa sa sethombhe sa gore se yemela mmušo wa Makgowa le Maamerikha.—Dan. 2:34, 35, 44, 45.

14. Mo re kwisisa seporofeto sa mawoto ya tshipi le botsopa tsotsone di ka re gelepa ka mokgo mang gore re thogo segelela dipheto tsa gabutši?

¹⁴ Ayitsano a o kamake gore seporofeto sa Daniyele sa go bolabola ka mawoto ya tshipi le botsopa ke nnete? Mo nkare go ka mokgonone, phela tsotsone di ko yama ka mokgo o phelang ka gona. O ka sa nyakane le lephelo la mabešebeše ga lefase la gore go se botala go nyoko fela ka lona. (Luk. 12:16-21; 1 Joh. 2:15-17) Fote mo o kwisisa seporofeto sowa di nyoko go gelepa gore o tseyele gedimo mmereko wa go tšhomayela le wa go tšhutisa. (Mat. 6:33; 28:18-20) Ka nthago ga mo o tšhutiye seporofeto sowa, ke ntaba o sa tiputsisi putsiso yowa, ‘Ayitsano dipheto tso ke di segelelang di šupetsa gabutši gore ke ya yi tshepa taba ya gore go se botala Mmušo wa Modimo wo nyoko fetsa ka memmušo ka mokana ga yona ya batho?’

15. Anthe ke bomang “kgoši ya lebowa” le “kgoši ya borwa” lekgono? (Daniyele 11:40)

¹⁵ Bala Daniyele 11:40. Daniyele tema 11 yi bolabola ka magoši ka mabedi kela memmušo ya dipolotiki ya lefase ya gore ya kikirisana. Mo re ka lebelela seporofeto sowa le tse dingwana ka ho Bhayibeleng re ka kgona go di bona gabutši gore “kgoši ya lebowa” ke Russia le bo yi berekisang nabo fote “kgoši ya borwa” ke mmušo wa Lefase wa Makgowa le Maamerikha. c

16. Bo ba lawolang ke mmušo wa “kgoši ya lebowa” ba gahlana le dintshitshire tsa mošaga mang?

¹⁶ Batho ba Jehova ba gore ba lawola ke “kgoši ya lebowa” ba tiyisela go hlorisa ke kgoši yone ka boyona beng. Wa tšiba Dihlatse tse dingwana ba yye ba di tula go baba ba boya ba di bošela jele ka taba la tumelo ya tsona. Magageru a sanka ma tshosa ke tso “kgoši ya lebowa” yi di makiyeng mara tsotsone di tiyisiye tumelo ya wona. Ke ntaba mara? Ka taba la gore magageru maa di tšiba gore mo batho ba Modimo ba hlorisiwa go  makega seporofeto so Daniyele a se hlayyeng. d (Dan. 11:41) Go tšiba tsotsone di nyoko re gelepa gore re dule re na le tshepo ya go tiya fote re tshepega ga Jehova.

17. Ke dintshitshire tsa mošaga mang tso batho ba Modimo ba gore ba lawola ke “kgoši ya borwa” ba gahlanneng natso?

¹⁷ Ku botala, “kgoši ya borwa” le yona yi yye ya hlorisa batho ba Jehova ka boyona beng. Mo re beyisa, magageru ya go tlala ku botala ba yye ba ma hlahlela jele fote bana ba Dihlatse ba yye ba ba raka sekolong ka taba la gore a ba kenakene tsa dipolotiki. Ga mengwaganyana ya go fela, taba ya go tshepega ga batho ba Jehova ba gore ba lawola ke kgoši ya borwa yi yye ya liketsiwa ka mekgwa ye mongwana. Mo re beyisa, ka nako ya go vowuta Mokreste a ka liketsega gore a thege mokgahlo wa dipolotiki kela a be se sengwana ga wona. Le mo a ka sa vowuti mara di ka makega gore go na le mokgahlo wo a yemang nawo ka monagano le ka pelo. Phela di ko ba di le gabutši ka matla gore ka mokgo re makang dilo ka gona, re naganang le ka mokgo re tikwang re sa kene  felo le ka go twii ga tsa dipolotiki!—Joh. 15:18, 19; 18:36.

18. Re maka ying mo “kgoši ya lebowa” le bo yi phigisanang nabo ba kikirisana? (Lebelela le sethombhe.)

¹⁸ Bo ba gore a ba tshepe seporofeto sa Bhayibele ba ka tšhoga ka matla mo ba bona “kgoši ya borwa” yi “rulana” le “kgoši ya lebowa.” (Dan. 11:40) Magoši yawa ka mabedi ma na le digale tsa go tlala ka matla tsa gore di ka fetsa ka se sengwana le sengwana so se phelang ho lefaseng. Mara re di tšiba gabutši gore Jehova a ka sa di dumelele tsotsone gore di makege. (Jes. 45:18) Byalo, a re tshosanyi ke tso di nyoko makegang ku mahlong mara go ngwapanana ga “kgoši ya lebowa” le “kgoši ya borwa” di tiyisa tumelo ya rune. Di fo šupetsa gore tsa lefase lowa di thina le go šaša.

19. King sa gore a re se gane mo di tla ga seporofeto sa Bhayibele?

¹⁹ Phela a re di tšibi gore tse dingwana tsa diporofeto tsa Bhayibele di nyoko makega ka mokgo mang. Le mong moporofeta Daniyele ke mo a sa kwisisi se sengwana le se sengwana so ne a se ngwala. (Dan. 12:8, 9) Mara mo re sa kwisisi ka mokgo seporofeto se nyoko makegang ka gona tsotsone a di rele gore se ka sa makege. A re kamake gore Jehova o nyoko re gelepa ka nako ya gona gore re kwisise tso re tshwaneleng re di tšibe go fo tshwana le mo a makiye ku nthago.—Amo 3:7.

20. Ke diporofeto difeng tsa Bhayibele tsa gore go se botala re nyoko di bona di makega fote re tshwanele re sa lisetsi go maka ying?

²⁰ Go nyoko sabalatsiwa taba ya gore “go bebiye fote go tšhireletsegiye.” (1 Mathes. 5:3) Go se botala bo ba mmušo wa lefase ba nyoko jikela bo ba dikereke tsa matsaka ke mokane ba fetsa ka bona. (Kut. 17:16, 17) Ke mokane ba nyoko hlorisa batho ba Modimo. (Hezek. 38:18, 19) Tsotsone di nyoko maka gore ntwa ya Aremaghedoni yi thomise byalo. (Kut. 16:14, 16) A re kamake gore tsotsone di nyoko makega go se botala. Mo tsotsone di soko bane di makega, koriyeneng mahlong re šupetsa gore re leboga Papa wa rune wa ku legedimong ka go sa takisi maahlo seporofeto sa Bhayibele re boya re gelepa ba bangwana gore ba make ka mokgonone.