1. King so monna wa gore ke Mokreste a tshwaneleng a se make gore a phomelele?

 KGOŠI Dafita o butsiye Solomoni gore: “Tiyelela o tišupetse gore ke wene monna.” (1 Mag. 2:​1-3) Banna ka moka ba gore ke Makreste lekgono ba maka gabutši mo ba berekisa mayele yane. Gore ba thogo phomelela, di nyaka ba theetsele melawo ya Modimo fote ba berekise ditšhiko tsa Bhayibele ga selo se sengwana le se sengwana mo ba kene ba phela. (Luk. 2:52) Ke ntaba go le selo se segolo gore magageru ya gore go sa le masogana ma be banna ba gore ke Makreste ya gore ma butšwiye?

2-3. Ke ntaba go le selo se segolo gore mogageru wa gore o sa gola a be Mokreste wa gore o butšwiye?

² Monna wa gore ke Mokreste o na le mmereko wo mogolo ka mutšing le ka phutegong. Lune magageru ya gore ma sa gola, a re kamake gore le šele le naganne ka mebereko yo le ka yi makang ku mahlong. O ka fo ba o nyaka go ba mošupatsela wa nako ka moka, lelata la ka ho phutegong ke mokane ka nthago o be mogolo wa phutego. Fote o ka fo ba o nyaka go šadha o boye o be le bana. (Maef. 6:4; 1 Thim. 3:1) Gore o thogo segelela dilo tsowa fote o phomelele, di nyaka o be Mokreste wa gore o butšwiye. b

³ O ka gelepa king gore o be Mokreste wa gore o butšwiye? Go na le dilo tse dikgolo tso o tshwaneleng o di tšhute fote o be segele ga tsona. Byalo, king so o ka se makang gana byalo gore o tilukiselele o boye o phomelele ga mmereko wo mongwana le wo mongwana wo o ka wo makang ku mahlong?

4. O ka yi kraya kaye mešupetso ya gabutši yo o ka yi kopiselang? (Lebelela le sethombhe.)

⁴ Kgeta mešupetso ya gabutši ya gore o ka yi kopisela. Bhayibele yi tlele ka mešupetso ya gabutši ya masogana ya o ka ma kopiselang.  Masogana yane ya ku botala ke mo ma mo nyaka ka matla ga Jehova fote ne ma pasopa batho ba Modimo ka mekgwa ya mehlobohlobo. Fote o ka kraya mešupetso ya gabutši ga banna ba gore ke Makreste ya gore ma butšwiye ka mutšing wa genu le ka phutegong ya genu. (Maheb. 13:7) Fote o na le mošupetso wa Jeso Kreste wa gore wo yi phala ka moka. (1 Pet. 2:21) Mo o kene o tšhuta ka mešupetso yowa, nagana ka tsa gabutši tso banna bowa ba tšibegang ka tsona tsa gore di ya go jabodisa. (Maheb. 12:​1, 2) Ke mokane o fetse ka gore banna bowa o nyoko ba kopisela ka mokgo mang.

5. O ka maka byang gore o tšhute go nagana gabutši fote ke ntaba yowa go le taba ye kgolo? (Pisalema 119:9)

⁵ Karakara o boye o “tšhireletse . . . ka mokgo o tseyang dilo.” (Diy. 3:21) Monna wa gore o tseya dilo gabutši aa phophorogi, mara o thomisa ka go nagana a soko bane a segelela sepheto. Byalo, le wene di nyaka o karakare gore o make dilo ka mokgonone le gore o ye mahlong o kene o di maka. Ke ntaba? Ka taba la gore lekgono masogana ya go tlala ho lefaseng ma segelela dipheto go ya ka mokgo ma naganang kela ka mokgo ma tikwang. (Diy. 7:7; 29:11) Se sengwana ke gore TV, dimuvi, Inthanete le tso tsa go bolabodisana ka Inthanete di ka yama ka mokgo o naganang kela ka mokgo o makang dilo. Mara o ka tšhuta byang taba ya go nagana gabutši? Thomisa ka go tšhuta ditšhiko tsa Bhayibele o boye o ghayele ka gore ke ntaba di ka go berekela. Ke mokane o berekise ditšhiko tsone gore di go gelepe o thogo segelela dipheto tsa gore di jabodisa Jehova. (Bala Pisalema 119:9.) Phela mo o ka tšhuta go tseya dilo ka mokgo, di nyoko go gelepa ka matla gore o thogo ba monna wa Mokreste wa gore o butšwiye. (Diy. 2:​11, 12; Maheb. 5:14) Lebelela ka mokgo go kgona go nagana gabutši go ka go berekelang ga dilo tsowa ka dipedi: (1) ka mokgo o titshwarang mo o na le magageru ya basadi le (2) ga dikobo tso o di yaparang le ka mokgo o lebelelegang.

6. Taba ya go nagana gabutši yi ka gelepa mogageru wa gore o sa gola ka mokgo mang gore a thogo šupetsa magageru ya basadi gore wa ma hlompa?

⁶ Monna wa gore o tšhutiye ka mokgo Jehova a tseyang dilo, o nyoko hlompa basadi. Phela a go sinyegi selo mo mogageru wa gore o sa gola a jabolela mogageru wa mosadi wa gore o sa gola a nyaka go kgetisana naye. Le mo go le ka mokgonone, mosogana wa gore o nagana gabutši a ka sa hlaye, a ngwala kela a maka dilo tsa go šupetsa gore o nyaka go kgetisana le mogageru wa mosadi, mo nkare aa tikemisela go šadha naye. (1 Thim. 5:​1, 2) Mo nkare go na le mogageru wa mosadi ye a kgetisanang naye, a ka sa mo sinyi lebitso ka go fo dula  naye a ntoši ga gore ba fo ba ba le ka babedi go se na ye a ba sepelang naye.—1 Makor. 6:18.

7. Go nagana gabutši go nyoko gelepa mogageru wa gore o sa gola ka mokgo mang ga taba ya go kgeta dikobo le ka mokgo a lebelelegang?

⁷ Mokgwa wo mongwana wa go šupetsa gore mosogana o tšhutiye ka mokgo Jehova a tseyang dilo, ke mo a hlawola gabutši mošaga wa dikobo tso a di yaparang le mokgwa wa gabutši wa go maka moriri. Ga go tlala, batho bo ba makang dikobo tsa gore di kenne fešening ba boya ba di sabalatsa, a ba mo hlompi ga Jehova kela ba phela maphelo ya go sa hlamatsega. Byalo, dikobo tso ba di makang o kraya go le tsa gore di ba manya ka matla kela di maka gore banna ba bonale nkare ke basadi. Mo mosogana wa gore o tšhuta go ba Mokreste wa gore o butšwiye a kgeta dikobo tso a nyoko di yaparang, o nyoko yetetsa ke ditšhiko tsa Bhayibele le mešupetso ya gabutši ya ka phutegong. A ka tiputsisa gore: ‘Nje dilo tso ke di hlawolang di šupetsa gore ke nagana gabutši fote ke naganela ba bangwana? Ayitsano mokgwa waka wa go yapara wo maka gore di be lula ga ba bangwana gore ba thogo di bona gore nnete ke lelata la Modimo?’ (1 Makor. 10:​31-33; Tito 2:6) Mosogana wa gore o nagana gabutši a ka sa hlompi ke magageru fela, mara o nyoko boya a hlompa ke Papage wa ku legedimong.

8. Mogageru wa gore o sa gola a ka tšhuta byang go tshepega?

⁸ Tshepega. Mosogana wa gore wa tshepega o maka mmereko wage ka mokana ga wona gabutši. (Luk. 16:10) Lebelela mošupetso wa gabutši ka matla wa Jeso. Ke mo a sa fo tseya dilo moroba. Mara o yye a maka mebereko ka mokana ga yona yo Jehova a mo neyyeng, le mo ne di sa mo fefogele go wo maka. Ke mo a kwana le batho—ka matlamatla malata yage—fote o neyele ka lephelo lage a sa tšhofe ke motho a makela bona. (Joh. 13:1) Byalo, le wene kopisela ga Jeso, o bereke di go baba ga mmereko wo mongwana le wo mongwana wo ba go neyang wona. Mo nkare a o soko napa o tšiba gore o ka di maka byang tsotsone, tinyanafatse ke mokane o kgopele magageru gore ma go gelepe. O sa tsoge o makiye tse dinyananyana. (Marom. 12:11) Mara, maka mmereko wo ba go neyyeng wona o boye o wo fetse, o kene o gopola gore o “makela Jehova, a [o] makele batho.” (Makol. 3:23) Ke nnete gore a wa yenela, byalo di nyaka o tinyanafatse fote o yamogele mo o kekemisiye go gongwana.—Diy. 11:2.

9. Ke ntaba mogageru wa gore o sa gola di nyaka a tšhute dilo tsa gore di nyoko mo gelepa mo a kene a phela?

⁹ Gore o thogo ba monna wa Mokreste wa gore o butšwiye, di nyaka o tšhute dilo tsa gore di nyoko go gelepa mo o kene o phela. Dilo tsowa di nyoko go gelepa gore o thogo yamogela mebereko ya ka phutegong, o sa lahlegele ke mmereko wa gore o thogo tipasopa kela o pasope mutši wago fote o be le senghana sa gabutši le ba bangwana. Lebelela tse dingwana tsa tsona.

10-11. Taba ya gore mogageru wa gore o sa gola a tšhute go bala le go ngwala gabutši yi ka berekela yene le phutego ka mokgo mang? (Pisalema 1:​1-3) (Lebelela le sethombhe.)

¹⁰ Tšhuta go bala le go ngwala gabutši. Bhayibele yi re monna wa gore o jabodiye wa gore fote o phomelele o bala Lentsu la Modimo letšatši le lengwana le le lengwana a boya a ghayela ka lona.  (Bala Pisalema 1:​1-3.) Mo a bala Bhayibele ka moka matšatši, o nyoko tšiba ka mokgo Jehova a tseyang dilo fote tsotsone di nyoko mo gelepa gore a nagane gabutši le go tšhuta go berekisa Mangwalo gabutši. (Diy. 1:​3, 4) Banna ba mošaga wonone, baa hlokega ka phutegong. Ke ntaba?

¹¹ Magageru ma nyaka go gelepa ke banna ba gore ba thogo ma tšhutisa ba boya ba ma neya mayele ya ka ho Bhayibeleng. (Tito 1:9) Mo o kgona go bala le go ngwala gabutši, o ko thogo lukiselela dipolabolo le diphetolo tsa gore di gelepa ba bangwana fote dya tiyisa le tumelo ya bona. Fote o ko thogo ngwala fase ditaba tsa gore di nyoko go gelepa mo o kene o tšhuta le mo o theetsele dipolabolo megahlanong ya phutego, megahlanong ye mogolonyana le ye megolo. Ditaba tso o di ngwadiyeng fase di nyoko go gelepa gore o be le tumelo ya go tiya fote o tiyise le ba bangwana.

12. O ka gelepa king gore o thogo bolabola gabutši?

¹² Tšhuta go bolabola le ba bangwana gabutši. Monna wa gore ke Mokreste di nyaka a tšhute go bolabola gabutši. Tsotsone di rela gore di nyaka a theetsele a boye a kwisise ka mokgo ba bangwana ba naganang le ka mokgo ba tikwang. (Diy. 20:5) A ka kgona go kwa ka mokgo motho ye mongwana a bolabolang, a mmona le ho sefahlegong le ka mokgo a minikanang ka gona. Mara tsotsone o ka sa di tšhuti mo nkare a o fetse nako o na le batho ba bangwana. Mo nkare o dula o berekisa dithulusi tsa elekthroniki gore o bolabole le ba bangwana, tsa go tshwana le imeyili kela go romela melayetsa ka fowunu, tsotsone di ka maka gore di go thathafele gore o bolabodisane le ba bangwana mo le lebeletsanne ka difahlego. Byalo, liketsa go kraya mekgwa yo o ka bolabodisanang le ba bangwana le lebeletsanne ka difahlego.—2 Joh. 12.

13. King se sengwana so mosogana a tshwaneleng a se tšhute? (1 Thimothi 5:8) (Lebelela le sethombhe.)

¹³ Tšhuta go tiyemayemela. Monna wa gore ke Mokreste wa gore o butšwiye o tshwanele a tiyemayemele a boye a pasope le mutši wage. (Bala 1 Thimothi 5:8.) Ga dinaga tse dingwana, magageru ya gore ma sa gola ma tšhuta go maka mmereko ga bopapa ba wona kela ga mašaga. Ga dinaga tse dingwana tsona, mosogana a ka tšhuta go maka mmereko a sa le sekolong. Di gabutši ka matla go tšhuta go maka mmereko wa gore wo nyoko go gelepa gore o thogo kraya sekoropo. (Meber. 18:​2, 3; 20:34; Maef. 4:28) Bereka ka matla fote o dule o fetsa mmereko wo o wo thommeng ke mokane ba bangwana ba ko yi boneng taba yone fote ba nyoko tseyela mmereko wago gedimo ka matla. Mo o ka maka ka mokgonone, o nyoko kraya mmereko fote wa dula o le nawo. Mekgwa yowa ya gabutši le dilo tso di ka go gelepang mo o kene o phela tso re bolabodiyeng ka tsona ke tse dikgolo ka matla ga monna wa gore ke Mokreste, ka taba la gore di nyoko mo gelepa gore a thogo maka mebereko ye mengwana ya ku mahlong. Tla re lebeleleneng ye mengwana ya yona mebereko yowa.

14. Mogageru wa gore o sa gola a ka tilukiselela ka mokgo mang gore a be lelata la mmereko wa nako ka moka?

¹⁴ Lelata la nako ka moka. Banna ba go tlala ba gore ke Makreste ya gore ma butšwiye ba thomisiye go berekela Jehova nako ka moka go sa le ba banyana. Mmereko wa go ba mošupatsela wo gelepa mogageru wa gore o sa gola gore a thogo berekisana gabutši le batho ba gore a ba tshwane. Fote wo mo gelepa gore a thogo tšhuta go berekisa tšheleta gabutši fote a thogo phela ka yona. (Mafil. 4:​11-13) Mokgwa wa gabutši wa go thomisa mmereko wa nako ka moka ke go ba mošupatsela wa go gelepa. Ba go tlala ba thomisa ka go ba mašupatsela ya go gelepa tsa gana byalo ke mokane di ba lukiselela gore ba thogo kena ga mmereko wa mašupatsela ya nako ka moka. Go ba mošupatsela go ka go thulela mašuba ya go maka mebereko ye mengwana ya nako ka moka, gana hone go kena le go ba lelata la mmereko wa tsa go yaga kela o bereke Bethele.

15-16. King so se ka gelepang mogageru wa gore o sa gola gore a be lelata la ka phutegong kela mogolo?

¹⁵ Lelata la ka ho phutegong kela mogolo. Magageru ka moka di nyaka ma liketse ka matla gore ma tshwanelege ma boye ma šupetse mekgwa ya gabutši yo yi nyakegang gore ma tle ma bereke go le bagolo ba phutego. Bhayibele yi re banna ba gore ba nyaka go maka mmereko wowa, ba ba “[ba] nabela dilo tsa gabutši.” (1 Thim. 3:1) Mo mogageru a soko bane a ba mogolo, di nyaka a thomise a tshwanelege go bereka go le lelata la ka ho phutegong. Malata ya ka ho phutegong ma gelepa bagolo ka dilo tsa go tlala. Bagolo le malata ya ka ho phutegong ba berekela magageru ba kene ba tinyanafatsiye fote ba tšhela letsogo ga mmereko wa go tšhomayela ka matšato. Magageru ya gore ma sa gola ma ka tshwanelega gore ma bereke go le malata ya ka phutegong le mo ba kene ba sa gola. Fote lelata la gore le ya tshwanelega la gore le na le gana hala ga bo 20 ya mengwaga ba ka le kgeta gore le be mogolo.

¹⁶ O ka maka byang gore o tshwanelege go maka mebereko yowa? Bhayibele yi re neya letheto la mekgwa ya gabutši yo o tshwaneleng go ba nayo. Le mo go le ka mokgonone, mekgwa yowa ka mokana ga yona yi tšwa ka ho Bhayibeleng fote le ga taba ya gore ga Jehova o mo nyaka ka matla, o nyaka ba mutši wago ka matla le phutego. (1 Thim. 3:​1-13; Tito 1:​6-9; 1 Pet. 5:​2, 3) Karakara ka matla gore o kwisise mokgwa wo mongwana le wo mongwana wa gabutši. Rapela Jehova gore a go gelepe o thogo ba le mekgwa yowa ya gabutši. c

17. Mogageru wa gore o sa gola a ka tilukiselela ka mokgo mang gore a thogo ba monna le hlogo ya mutši? (Lebelela le sethombhe.)

¹⁷ Monna le hlogo ya mutši. Jeso o šele a hlayye gore banna ba bangwana ba gore ke Makreste ya gore ma butšwiye ba kgeta go fo dula ba sa šadha. (Mat. 19:12) Mara, mo o ka kgeta go šadha, o nyoko  tokegela mmereko wo mongwana wa go ba monna le hlogo ya mutši. (1 Makor. 11:3) Jehova o yemele gore monna a nyake mosadi wage ka matla fote a mo pasope ga tso a di gayelang, ka mokgo a tikwang le ga tso tsa Modimo. (Maef. 5:​28, 29) Mekgwa yela ya gabutši le dilo tso di ka go gelepang mo o kene o phela tso re šeleng re bolabodiye ka tsona ga hlogotaba yowa, tsa go tshwana le go nagana gabutši, go hlompa basadi le go tshepega, di nyoko go gelepa gore o thogo ba monna wa gabutši. O ko ba o šele o tilukiselele gore o thogo maka mmereko wago gabutši wa go ba monna le hlogo ya mutši.

18. Mogageru wa gore o sa gola a ka tilukiselela byang gore a be papa?

¹⁸ Papa. Ka nthago ga mo o šadhiye, di ka makega gore o be papa. O ka tšhuta ying ga Jehova ga taba ya go ba papa wa gabutši? Go na le tsa go tlala tso o ka di tšhutang. (Maef. 6:4) Jehova a sanka a tšebisa ke go botsa Morwayi wage Jeso gore o mo nyaka ka matla fote wa mo yamogela. (Mat. 3:17) Mo di ka makega gore o be papa, di nyaka o dule o botsa bana bago le go ba šupetsa gore o ba nyaka ka matla. Dula o ba thanaka ga dilo tsa gabutši tso ba di makiyeng. Bopapa ba gore ba kopisela mošupetso wa Jehova ba gelepa bana ba bona gore ba thogo ba banna le basadi ba Makreste ya gore ma butšwiye. O ka thomisa go tilukiselela gana byalo gore o be papa wa gabutši ka go šupetsa ba genu le ba ka ho phutegong gore o ba nyaka ka matla o boya o ba pasopa. Fote o tšhute le go ba botsa gore o ba nyaka ka matla le ka mokgo o ba tseyelang gedimo. (Joh. 15:9) Tsotsone di nyoko go gelepa gore o be monna wa gabutši le papa wa gabutši ku mahlong. Mara tsa gana byalo, o nyoko ba thulusi ye kgolo ka matla ga Jehova, ga genu le ka phutegong.

19-20. King tso di ka gelepang magageru ya gore ma sa gola gore ma be banna ba Makreste ya gore ma butšwiye? (Lebelela sethombhe sa ka tawong.)

¹⁹ Lune magageru ya gore ma sa gola, phela di ka sa makege ka mohlolo gore le be banna ba Makreste ya gore ma butšwiye. Di nyaka o kgete mešupetso ya gabutši yo o ka yi kopiselang, o tšhute go nagana gabutši, o tshepege, o tšhute dilo tsa gore di ka go gelepa mo o kene o phela fote o tilukiselele go maka mebereko ya ku mahlong.

²⁰ Mo o nagana ka dilo tso o tshwaneleng o berekele ga tsona, o ka fo kwa nkare ke mong letogo ho gago. Mara o ka phomelela. O sa lebale gore Jehova o dula a tikemisele go go gelepa. (Jes. 41:​10, 13) Eya, le magageru ya ka ho phutegong le wona ma ko go gelepeng. Mo o šele o gadikegiye o le mong monna wa Mokreste wa gore o butšwiye, lephelo lago le nyoko jabodisa ka matla la boya le kgotsofatsa. Re le nyaka ka matla lune magageru ya gore ma sa gola! Nkare Jehova a ka le rufa la go sa hlayisege mo gana byalo le kene le karakara gore le be banna ba Makreste ya gore ma butšwiye.—Diy. 22:4.