1-2. Matewu 5:11, yi re tso di re ghulang di nyaka re di tseya ka mokgo mang?

JESO o tshepisiye malata yage gore ma nyoko jabola tsa mannete. Fote a boya a pasopisa bo ba mo nyakang ka matla gore ba nyoko gahlana le tsa go ba ghula. (Mat. 10:22, 23; Luk. 6:20-23) Go ba malata ya Kreste di re jabodisa ka matla. Mara re ka tikwa byang mo di ka makega gore re phigise ke mašaga ya rune, re hlorisa ke ba mmušo kela mo bo re berekang nabo kela bo re kenang nabo sekolo ba re gapeletsa go maka tsa go sa loka? Dya kwisisega gore tsotsone di ka maka gore re šekele.

² Batho a ba tseyi taba ya go hlorisiwa go le selo so se ka makang gore motho a jabole. Mara sosone ke so Lentsu la Modimo le reng re se make. Mo re beyisa, Jakobo wa gore ke lelata o ngwadiye gore mo le gahlana le tsa go le ghula le sa nape le ro lelemela le jabole. (Jak. 1:2, 12) Fote Jeso o hlayye gore re dule re jabodiye le mo re kene re hlorisiwa. (Bala Matewu 5:11.) Re ka dula re jabodiye ka mokgo mang le mo re gahlana le tsa go re ghula? Re ka tšhuta tsa go tlala mo re ka lebelela ga tso Jakobo a di ngwaleleng Makreste ya ku botala. Sa mathomo, tla re lebeleleneng tso Makreste ya ku botala ma yyeng ma gahlana natso.

3. King so se yyeng sa makega ka nthago ga gore Jakobo go be lelata la Jeso?

³ Ka nthagonyana ga mo Jakobo bhuti wa Jeso go le lelata, Makreste ya ku Jerusalema ma yye ma hlorisiwa. (Meber. 1:14; 5:17, 18) Nakwela go bolayiwa lelata lo ba reng ke Stefano, Makreste ya go tlala ma yye ma tšhaba ke mokane ma ‘tlalagana dimitšaneng  tsa Judiya le tsa Samariya’ ma feleletsa ma le Siprase le Anthiyoko. (Meber. 7:58–8:1; 11:19) Nnete ke gore malata yawa ma yye ma gahlana le dintshitshire tsa go sa hlayisegi. Le mo go le ka mokgonone, ma yye ma ya mahlong ma tšhomayela ditaba tsa go bafala go gongwana le go gongwana mo ne ma sepela gona ke mokane gwa thomisa go ba le diphutego tsa go tlala. (1 Pet. 1:1) Mara ke mo go sa na le dintshitshire tsa go tlala tso ne di yemele Makreste ya ku botala.

4. Ke dintshitshire difeng tse dingwana tso Makreste ya ku botala ne di nyaka ma di tiyisela?

⁴ Makreste ya ku botala ne di nyaka ma tiyisela dintshitshire tsa mošagašaga. Mo re beyisa, gana hala ga 50 C.E., Ndhuna ya Roma ye ba reng ke Claudius o rakiye Majuda ka mokana ga wona gore ma tloge Roma. Majuda ya gore ke mo ma šele go le Makreste di yye dya nyaka gore ma šiye mitši ya wona ke mokane ma rurele go gongwana. (Meber. 18:1-3) Gana hala ga 61 C.E., Pawulo wa lepostola o yye a ngwala gore Makreste ma yye ma poyidiwa, ma fošediwa jele fote ba ma yetswela le dilo tsa wona. (Maheb. 10:32-34) Fote go fo tshwana le batho ka mokana ga bona, ne di nyaka gore Makreste le wona ma tiyisele go gayela tsa go ja le go sa titsose.—Mrm. 15:26; Mafil. 2:25-27.

5. Re nyoko fetola diputsiso difeng?

⁵ Nakwela Jakobo a ngwala lengwalo go soko segela mongwaga wa 62 C.E., ne a di tšiba gabutši tso magagabo ne ma gahlana natso. Jehova o hlohletsele Jakobo gore a ngwalele Makreste yane gore a thogo ma fahlolla ka tso di nyoko ma gelepang gore ma dule ma jabodiye. Tla re petapeteneng ka lengwalo lone la Jakobo ke mokane re fetole diputsiso ke tsowa: Ke mojabolo wofeng wo Jakobo ne a bolabola ka wona? King so se ka yamogang Mokreste mojabolo wone? Fote go ntsha maahlo dikwakweng, tumelo le go ba  le lešiši di ka re gelepa byang gore re dule re jabodiye le mo re kene re gahlana le dintshitshire?

6. Luka 6:22, 23, yi re king so se ka makang gore Mokreste a jabole le mo a gahlana le tsa go mo ghula?

⁶ Batho ba ka tseya gore mo motho a nyaka go jabola, di nyaka a be a philegiye, a na le sekwetše fote a kwane le ba mutši wage kela mašaga. Mojabolo wo Jakobo a bolabolang ka wona ke wo re wo krayang ka taba la moya wa Modimo wa go hlawolega fote le mo go ka makega ying a wo tšhentšhi. (Magal. 5:22) Mokreste o kraya mojabolo kela a ka tikwa a jabodiye ka matla mo a di tšiba tsa gore Jehova wa mo yamogela fote o latelela mošupetso wa Jeso. (Bala Luka 6:22, 23; Makol. 1:10, 11) Go fo tshwana le mollo wa gore wo tšhireletsegiye ka teng ga llampa, byalo le mojabolo wone wo dura ka teng ga pelo ya Mokreste. Byalo, le mo re ka lwala kela re ka patšeka mojabolo wone wo ka sa ro fela. Fote mojabolo wone a wo kwaritšele ka taba la mo ba go tšhelela maahlo ya batho kela mo o phigisa ke mašaga yago le ba bangwana. Le mo ba leketsa go re yamoga mojabolo wone, wo fo ya mahlong wo kene wo hluhlutela. Mo re kene re gahlana le tsa go re ghula ka taba la tumelo ya rune, di maka gore re sa kamake gore ke rune malata ya Kreste ya mannete. (Mat. 10:22; 24:9; Joh. 15:20) Di napa di kwala ka matla mo Jakobo a ngwadiye gore: “Magageru, tseyang dilo ka mokana ga tsona go le mojabolo mo le ghulana le tsa mošagašaga.”—Jak. 1:2.

7-8. Mo tumelo ya rune yi leketsiwa yi tiyelela ka mokgo mang?

⁷ Jakobo o di bonne gore ke ntaba Makreste ma tikemisele go tiyisela le mo ma gahlana le tsa go ma ghula. O yitseri: “Mo tumelo yago yi leketsiwa yi maka gore o tiyisele.” (Jak. 1:3) Dintshitshire di tshwanisiwa le mollo wo ba wo berekisang mo ba khanda segale sa tshipi. Mo tshipi yone ba yi tšhubelele, mo yi fodiye yi napa yi ro tiya ka matla. Go fo tshwana le mo re tiyisela tsa go re ghula, tumelo ya rune le yona yi napa yi tiyelela. Nka taba lo Jakobo a ngwadiyeng gore: “Maka gore go tiyisela go fetsise mmereko gore dilo ka mokana ga tsona tso o di makang di felegelele fote di sa be le selabi.” (Jak. 1:4) Mo re bona gore dintshitshire tso re gahlanang natso di maka gore tumelo ya rune yi tiye, re ko thogo tiyisela re jabodiye.

⁸ Ga lengwalo lo Jakobo a le ngwadiyeng o bolabodiye ka tse dingwana tso di ka re yamogang mojabolo. Dintshitshire tsone ke difeng fote re ka di hlula ka mokgo mang?

9. Ke ntaba di nyaka re hlalefe?

⁹ Ntshitshire: Go sa tšibi tso re tshwaneleng go di maka. Mo re gahlana le dintshitshire re nyaka gore Jehova a re gelepe re segelele dipheto tsa go jabodisa yene, tsa go gelepa magageru fote le  tsa go re gelepa gore re dule re tshepegiye gage. (Jer. 10:23) Go hlalefa ke so re se hlokang gore re thogo tšiba tso di nyakang re di maka le gore re ko fetola re re king ga bo ba re phigisang. Mo re sa tšibi ditaba tsa rune tsotsone di nyoko maka gore re kgongwele ke mokane tsa go jabola dya tšhipa.

10. Gore re thogo šupetsa gore re hlalefiye Jakobo 1:5 yi re di nyaka re make ying?

¹⁰ So re ka se makang: Kgopela Jehova a make gore re hlalefe. Mo nkare re nyaka go tiyisela dintshitshire re kene re jabodiye, di nyaka re thomise ka go kgopela Jehova ka thapelo a make gore re hlalefe gore re thogo segelela dipheto tsa gabutši. (Bala Jakobo 1:5.) Re ka maka byang mo re bona nkare Jehova aa yakgoswe a fetola merapelo ya rune? Jakobo o re, ‘re ye mahlong re kene re kgopela’ Modimo. Mo re dula re kgopela Jehova gore a make gore re hlalefe tsotsone a di mo tinwisi. A ka sa re tšebisi. Papa wa rune wa legedimong “aa konane” mo re kgopela gore a make gore re hlalefe re thogo tiyisela dintshitshire. (Pis. 25:12, 13) Wa di bona mo di re rulanya, o kwelana go baba fote o tikemisele go re gelepa. Phela tsotsone a yi go jabodisa ga tsona wa tšiba! Mara Jehova o maka gore re hlalefe ka mokgo mang?

11. Gore re thogo šupetsa gore re hlalefiye di nyaka re make ying se sengwana?

¹¹ Jehova o re gelepa gore re hlalefe a berekisa Lentsu lage Baebele. (Diy. 2:6) Gore re thogo šupetsa gore re hlalefiye di nyaka re tšhute Baebele le dikgatiso tsa rune. Mara mo re tšhuta a di nyake re fo wolela. Tso Modimo a re yetetsang ka tsona gore re thogo šupetsa gore re hlalefiye di nyaka re di berekise mo re kene re phela. Jakobo o ngwadiye gore: “Sa fo theetsela lentsu o boye o le make.” (Jak. 1:22) Mo re berekisa tso Modimo a re yetsetsang ka tsona re nyoko beba, ra tseya dilo gabutši fote ra kwelana go baba. (Jak. 3:17) Mekgwa yone yi nyoko re gelepa gore re tshwaragane le dintshitshire re kene re jabodiye.

12. Ke ntaba di nyaka gore Baebele re yi tšibe gabutši?

 ¹² Lentsu la Modimo le tshwana le seboki le re gelepa gore re tipombhole, re thogo lukisa mo re lukisang. (Jak. 1:23-25) Mo re beyisa, mo šele re tšhutiye Lentsu la Modimo re ka di bona tsa gore di nyaka mo re kwata re sa nape re ya ka matla. Mo Jehova a re gelepa re nyoko šinya re tšhuta gore mo ba re šuhlašuhla kela go na le tsa go re ghula re dule re kgibiye. Mo re kgibiye, re nyoko thogo tiyisela mo go na le tsa go re kgahleletsa. Re nyoko segelela dipheto tsa gabutši re sa tlonye ke selo. (Jak. 3:13) Go tšiba Baebele gabutši dya gelepa ye lune!

13. Ke ntaba di nyaka re kopisela mešupetso ya bo ba leng ka ho Baebeleng?

¹³ Ka dinako tse dingwana re tšhuta mo re šele re kekemisiye. Mara go tšhuta ka mokgonone a yi go baba ga tsona. Mokgwa wa gabutši wa go šupetsa gore re hlalefiye ke go tšhuta ga ba gore di ba sepelele gabutši le ga bo ba gore ba yye ba kekemisa. Nka taba lo Jakobo a re hlohletselang gore re lebelele mešupetso ya ka ho Baebeleng ya go tshwana le ya Abhrahama, Rahaba, Jobo le Eliya. (Jak. 2:21-26; 5:10, 11, 17, 18) Malata yane ya Jehova ma kgonne go tiyisela dintshitshire tso ne di ka ma yamoga mojabolo. Mešupetso ya bona ga taba ya go tiyisela yi šupetsa gore le rune re nyoko pasa mo re gelepa ke Jehova.

14-15. Ke ntaba di nyaka re lukise mo nkare re ya kamaka?

¹⁴ Ntshitshire: Mo re kamaka tso re di dumelang. Ka dinako tse dingwana go ka thathafa go kwisisa dilo tse dingwana ka Lentsung la Modimo. Kela di ka makega gore Jehova a sa fetole merapelo ya rune ka mokgo ne re naganne ka gona. Tsotsone di ka maka gore re kamake. Mo tsotsone re ka di takisa maahlo di nyoko kwaramollanya tumelo ya rune di boya di sinyanya senghana sa rune le Jehova. (Jak. 1:7, 8) Fote di ka maka gore tshepo yo re nang nayo ya ku mahlong yi psye.

¹⁵ Pawulo wa lepostola o tshwanisiye tshepo yo re nang nayo le tshipi yo yi gelepang sekepe gore se sa thogathoge. (Maheb. 6:19) Tshipi yone yi gelepa sekepe gore se sa thogathoge mo go na le sedingwana fote yi maka gore se sa khunghulege se rulanya matlapa. Mara tshipi yone yi nyoko gelepa mo nkare ketane ya yona a yi tlopoge. Go fo tshwana le rusi mo yi ja ketane ya go tshwara tshipi ya sekepe le rune mo re fo lesetsa re sa lukisi tso di makang gore re kamake, go fediye ka tumelo ya rune. Mo motho a phigisiwa fote go na le tso a di kamakang, tumelo yage ga taba ya gore Jehova o nyoko maka tso a di tshepisiyeng yi nyoko šehla. Mo šele go fediye ka tumelo ya rune, tshepo yona ayya! Jakobo o tshwanisiye motho wa go kamaka “le meetši ya lewatle ya gore ma tšukatšukisa ke moya.” (Jak. 1:6) Motho wa gore o ga seyemo sa mošaga wonone a ka sa ro jabola!

16. Mo nkare re ya kamaka, di nyaka re make ying?

¹⁶ So re ka se makang: Tlosa go kamaka; tiyisa tumelo yago. O sa jikajiki. Ka dinako tsa moporofeta Eliya, batho ba Jehova ba yye ba thomisa go kamaka so ba se dumelang. Eliya o ba butsiye gore: “Le nyoko ya mahlong go segela kaye le kene le gata ka ho le ka ho? Mo nkare Jehova ke Modimo wa mannete, latelelaneng yene; mara mo nkare ke Bhaali, latelelaneng yene!” (1 Mag. 18:21) Le rune lekgono, di nyaka re sa jikajiki. Di nyaka re nyakolle gore re sa kamake taba ya gore Jehova ke Modimo, Baebele ke Lentsu lage fote Dihlatse tsa Jehova ke batho bage. (1 Mathes. 5:21) Mo re ka maka tsotsone ka moka, re nyoko ba re tlosa go kamaka ga rune ra boya ra maka gore tumelo ya rune yi tiye. Mo nkare go na le so re se kamakang ga so re se dumelang, re ka kgopela bagolo gore ba re gelepe. Di nyaka re yakgoswe re make se sengwana gore re thogo ya mahlong re berekela Jehova!

17. Go nyoko makega ying mo re ka thomisa go sa sa ba le lešiši?

¹⁷ Ntshitshire: Go kgongwela. Lentsu la Modimo le re: “Mo o ka kgongwela ka matla ka dinako tsa mo go bifiye, matšhika yago ma nyoko  pomega.” (Diy. 24:10) Ka Seheberu mo go hlatolliwa lentsu “go kgongwela” go ka rela “go sa sa ba le lešiši.” Mo o sa sa ba le lešiši, tsa mojabolo di nyoko yakgoswa di fela.

18. Ba ra gore king mo ba re, go tiyisela?

¹⁸ So re ka se makang: Tshepela ga Jehova gore a go neye lešiši la gore o thogo tiyisela. Di nyaka re be le lešiši gore re thogo tiyisela dintshitshire. (Jak. 5:11) Lentsu lo Jakobo a le berekisiyeng la “go tiyisela” le maka gore re nagane ka motho wa gore o yemme a tsikiye mo a leng gona. Re ka fo nagana ka lesole la gore le yemme le šišimele le sa thogathoge mo lenaba le hlasela.

19. Re ka tšhuta ying ga mošupetso wo Pawulo wa lepostola a re beyiseleng wona?

¹⁹ Pawulo wa lepostola o re beyisele mošupetso wa gabutši ka matla wa go ba le lešiši le go tiyisela. Ka dinako tse dingwana ne a tikwa a lelemela. Mara o yye a kgona go tiyisela ka taba la gore ne a tshepela ga Jehova gore a mo neye matšhika ya ne a ma gayela. (2 Makor. 12:8-10; Mafil. 4:13) Re ka ba le matšhika yane le lešiši mo re ka bona gore nnete re ya di hloka gore Jehova a re gelepe.—Jak. 4:10.

20-21. King sa gore a re se kamake?

²⁰ A re kamake gore dintshitshire tso re gahlanang natso a di leye ke Jehova. Jakobo o re botsa gore: “Mo motho a na le tso di mo phiriketsang a sa re: ‘Modimo o mmaka lešidi.’ Ka taba la gore Modimo aa phiriketsane ka dilo tsa go befa, fote gabutšibutši aa makane lešidi.” (Jak. 1:13) Mo re ka sa kamake gore tsotsone ke nnete, re ba banghana ba bagolo le Papa wa rune wa go re nyaka ka matla wa ku legedimong.—Jak. 4:8.

²¹ Jehova “aa tšhentšhi.” (Jak. 1:17) O yye a thega Makreste ya ku botala nakwela ma gahlana le dintshitshire, fote le lekgono o nyoko gelepa ye mongwana le ye mongwana wa rune. Kgopela Jehova di go baba gore a go gelepe gore o hlalefe, o be le tumelo fote o be le lešiši. O nyoko fetola merapelo yago. Ke mokane o ka sa kamake gore o nyoko go gelepa gore o dule o jabodiye mo o kene o tiyisele dintshitshire!