1. Mafilipi 2:3 yi re mo re le batho ba go tinyanafatsa, sosone se ka re gelepa byang gore re be le senghana sa gabutši le ba bangwana?

RE ŠUPETSA gore re tinyanafatsiye mo re berekisa melawo ya Jehova mo re kene re phela fote re di tšiba gabutši gore ke yene ye a tšibang so se re tshwaneleng. (Maef. 4:22-24) Go tinyanafatsa go re tšhofa gore re yetise mahlong tso Jehova a di nyakang, le go tseya ba bangwana gore baa re phala. Ka mokgonone, re jabolela senghana sa rune le Jehova le magageru.—Bala Mafilipi 2:3.

2. King so Pawulo wa lepostola ne a se tšiba, fote re nyoko bolabola ka ying ga hlogotaba yowa?

² Mo re ka sa pasope, re ka kutšetsela ke batho ba lefase lowa la Sathane ba gore ba na le magetla fote ba tinaganela ba ntoši. * Mayemo ya mošaga wonone ya gore ke mo ma le kotsi ke mo ma le gona ka dinako tsa mapostola, nka taba lo Pawulo wa lepostola a yyeng a ngwalela Maroma gore: “Ye mongwana le ye mongwana mone ga lune, a sa nagane ka matla ka yene mong go feta ka mokgo a tshwaneleng go nagana ka gona, mara a nagane gabutši di šupetse gore o butšwiye mabyokong.” (Mrm. 12:3) Pawulo ke mo a di tšiba tsa gore di ya nyakega gore re tinaganele. Mara go tinyanafatsa go nyoko re gelepa gore re lekanisele ka mokgo re titseyang ka gona. Ga hlogotaba yowa, re nyoko bolabola ka mayemo ka mararo ya gore go tinyanafatsa go ka re gelepa gore re sa titseye gore rune ke rune. Mayemo yane ke (1) mo o šadhiye, (2) mebereko yo re neyiwweng yona ga tso tsa Modimo fote (3) le mo re berekisa Inthanete.

3. Ke ntaba ka dinako tse dingwana batho bo ba tseyanneng ba sa kwane fote ba bangwana ba maka ying mo ba sa kwane?

³ Jehova o makiye mošadho gore monna le mosadi ba dule ba jabodiye. A ra felegelela, byalo ka dinako tse dingwana re na le go sa kwane. Gabutšibutši Pawulo o ngwadiye gore bo ba šadhang ba ko hlakana le dintshitshiri tsa go sa fele. (1 Makor. 7:28) Ba bangwana ba dula ba lwa le bo ba tseyanneng nabo fote ba ka feleletsa ka go nagana gore a ba tshwanelane. Mo nkare ba kutšetsele ke lefase lowa, ba ka yakgoswa ba nagana gore go kawone ba hlalane. Ba ka feleletsa ka gore selo se segolo ke go maka so se kgotsofatsang bona.

4. Di nyaka re kganele kgole le ying?

⁴ Di nyaka re kganele kgole le taba ya go tikraya re sa sa kgotsofatsa ke mešado ya rune. Re di tšiba gabutši gore Baebele yi re selo so se ka makang gore monna le mosadi ba hlalane, ke mo ye mongwana a makiye bonghwahla. (Mat. 5:32) Byalo, mo re hlakana le dintshitshiri tso Pawulo a ngwadiyeng ka tsona, re ka sa lesetse go ba le magetla go maka gore re thome go tiputsisa gore: ‘Ayitsano mošado wo wo mmakela tso ke di nyakang? Ayitsano ke nyakiwa ka mokgo ke nyakang gore ke nyakiwe ka gona? Ayitsano nka jabola tsa mannete mo nka tseyana le motho ye mongwana?’ Diputsiso tsone di fo šupetsa gore motho yewa o naganne ka yene a ntoši. Batho bo lefase le ba tseyang gore ba hlalefiye ba ka go botsa gore, theetsela pelo yago fote o make so se nyoko jabodisang wene, le mo nkare di rela gore o hlalane le motho ye o tseyanneng naye. Mahlalefelo ya Modimo wona ma re o tshwanele ‘o nyakane le tso di ka jabodisang ba bangwana, o sa nyake tso di jabodisang wene o ntoši.’ (Mafil. 2:4) Jehova aa nyake gore o lesetse motho ye o tseyanneng naye. (Mat. 19:6) O nyaka gore o thomise ka go nagana ka yene go seng ka wene.

5. Maefeso 5:33 yi re monna le mosadi ba tshwanele ba tshwarane byang?

⁵ Monna le mosadi ba tshwanele ba tshwarane  ka tsela ya go šupetsa gore baa nyakanana fote baa hlompana. (Bala Maefeso 5:33.) Baebele yi re tšhutisa gore re neyane re sa fo yageletsa. (Meber. 20:35) Ke mokgwa wofeng wo wo nyoko gelepang bo ba tseyanneng gore ba šupetsane gore baa nyakanana fote baa hlompana? Phetolo ya putsiso yone, ke go tinyanafatsa. Banna le basadi ba gore ba tinyanafatsiye ba ka sa fo lebelela selo sa gore se jabodisa motho ka wweši, mara ‘ba nyoko lebelela le tso di jabodisang ye mongwana.’—1 Makor. 10:24.

6. O tšhuta ying ga so se bolabolang ke Steven le Stephanie?

⁶ Go tinyanafatsa go gelepiye Makreste ya go tlala gore ma thogo jabola ga mošadho ya wona. Mo re beyisa, monna ye mongwana wa gore o šadhiye ye ba reng ke Steven o re: “Mo nkare le selo ka ssoši le nyoko tshwarisana, ka matlamatla mo go na le mathatha. O ka sa re ‘king so se ka jabodisang nna?’ mara o nyoko re ‘king so se ka jabodisang rune?’” Mosadi wage ye ba reng ke Stephanie le yene o tikwa ka mokgonone. O re, “A go na ye a nyakang go dula le motho wa go kwana le go lwa. Mo re sa kwane, re pombhola selo so se makang gore re sa kwane. Ke mokane re ya rapela, re ya nyakolla fote re bolabola ka sona. A re hlaselane, mara re hlasela bothatha byone.” Mo banna le basadi ba gore ba tseyanne ba se na magetla, sosone se nyoko ba berekela.

7. Ke mokgwa wofeng wo mogageru a tshwaneleng a be nawo mo a kraya mebereko ya go hlawolega ga tso tsa Modimo?

⁷ Mebereko ka mokana ga yona yo yi leng gona ga tso tsa Modimo, re yi tseyela gedimo ka matla. (Pis. 27:4; 84:10) Mo mogageru a maka gore a krayege gore a kgone go maka mmereko wa ka ho phutegong wa go hlawolega, tsa go thanakiwa dya mo tshwanela. Gabutšibutši Baebele yi re: “Mo monna a karakarela go ba mowokamedi, o nabela mmereko wa go bafala.” (1 Thim. 3:1) Mara, mo a ka kraya mmereko ka ho phutegong, a sa thome go ba le magetla. (Luk. 17:7-10) Selo so a tshwaneleng a tikemisele go se segelela, ke go berekela ba bangwana a tinyanafatsiye.—2 Makor. 12:15.

8. Re tšhuta ying ga mošupetso wa Diyotrefese, Uziya le Absalomo?

⁸ Baebele yi na le mešupetso ya go re pasopisa, ya gore yi bolabola ka batho ba gore ba yye ba thoma go ba le magetla. Diyotrefese o yye a šitega go tinyanafatsa, sosone se makiye gore a nyake go ba le mayemo ka ho phutegong. (3 Joh. 9) Ka taba la go ba le magetla, Uziya o yye a maka mmereko wa gore Jehova ke mo a sa mo roma gore a wo make. (2 Dikor. 26:16-21) Absalomo o yye a berekisa bošakašakane gore batho ba mo thege ka taba la gore ke mo a nyaka go ba kgoši. (2 Sam. 15:2-6) Mešupetso yone ya ka ho Baebeleng yi fo šupetsa gabutši gore Jehova aa kwane le batho ba magetla. (Diy. 25:27) Mo go-ya-go-ya, go ba le magetla le go nyaka dilo tsa gore a di ya go lebana go ka go potlometsa marageng.—Diy. 16:18.

9. Jeso o re beyela mošupetso wofeng?

⁹ Jeso ke mo a sa tshwane le batho bo re sa tšwang go bolabola ka bona ka taba la gore ‘yene le mo ne a tshwana le Modimo mara a sanka a nagana go maka batho gore ba rapele yene, go leng go nyaka go tilekanisa le Modimo.’ (Mafil. 2:6) Jeso, wa gore o tla ka nthago ga Jehova ka go lawola, aa nagane gore yene ke yene. O yye a botsa malata yage gore: “Ye a titseyang go le ye monyana ga lune ka moka, ke yene ye mogolo wa gona.” (Luk. 9:48) Ayi go jabodisa ga tsona go bereka le mašupatsela, malata ya phutego, bagolo le bapotulugi ba gore ba yekisela ka mokgo Jeso ne a tinyanafatsiye ka gona! Malata ya Jehova ya go tinyanafatsa ma tšhela letsogo ga taba ya go nyakanana ya gore mokgahlo wa Modimo wo tšibega ka yona.—Joh. 13:35.

10. O tshwanele o make ying mo o kwa nkare mathatha ya ka ho phutegong a ma lukisiwa gabutši?

¹⁰ Byalo, mo nkare go na le mathatha ka ho  phutegong fote o kwa nkare a ma lukisiwi gabutši gee? O ka šupetsa gore o tinyanafatsiye ka go thega bo ba le yetiyeng mahlong o sa kokole. (Maheb. 13:17) Gore o thokgo maka ka mokgonone, tiputsise gore: ‘Ayitsano mathatha ya ke ma bonang ke ya magolo tsa gore ma nyaka go lukisiwa? Ayitsano ke nako ya gabutši ya gore ma lukisiwe? Ayitsano ke nna ye a tshwaneleng go ma lukisa? Mo re fo yi beya nje, ayitsano ke maka so nka se kgonang gore re dule re le ngata ka yyoši kela ke dulela go yetisa tsaka mahlong?’

11. Maefeso 4:2, 3, yi re go nyoko makega ying mo re berekela Jehova re tinyanafatsiye?

¹¹ Jehova o tseyela gedimo ka matla go tinyanafatsa go feta dilo tso re kgonang go di maka fote o tseyela taba ya go ba selo ka ssoši gedimo go feta go maka dilo gabutši. Byalo, maka so o ka se kgonang gore o berekele Jehova o tinyanafatsiye. Mo o maka tsotsone o ko ba o maka gore phutego yi hlohlotele ga taba ya go ba selo ka ssoši. (Bala Maefeso 4:2, 3.) O be le matšato tšhomong. Nagana ka so o ka se makang go gelepa ba bangwana. Yamogela batho ka mokana ga bona le mong bo ba gore a ba na tsa go tlala tso ba di makang ka ho phutegong. (Mat. 6:1-4; Luk. 14:12-14) Mo o kene o bereka o tinyanafatsiye le phutego, ba bangwana ba ka sa bone dilo tsa gabutši fela tso o di makang mara ba nyoko bona le gore o tinyanafatsiye.

12. Ayitsano Baebele yi re hlohletsela gore re be le banghana? Hlatolla.

¹² Jehova o makiye gore re jabolele senghana le ba bangwana le ba mutši wa rune. (Pis. 133:1) Jeso ke mo a na le banghana ba gabutši. (Joh. 15:15) Baebele yi hlatholla ka mokgo go ba le banghana ba mannete go ka re berekelang. (Diy. 17:17; 18:24) Fote yi re botsa le gore a di gabutši go dula o le ntoši. (Diy. 18:1) Ba go tlala ba re go  berekisa Inthanete ke tsela ya gabutši ya go ba le banghana ba go tlala fote yi ba gelepa gore ba sa tikwe ba le ntoši. Byalo, di nyaka re ntshe maahlo dikwakweng mo re bolabola le ba bangwana re berekisa Inthanete.

13. Ke ntaba go ga go tlala bo ba gore ba berekisa Inthanete mo ba bolabola le ba bangwana ba kwa nkare a go na wa go tihlupa ka bona ba boya ba kgongwela?

¹³ Go krayiwwe gore batho ba go fetsa nako ya go tlala ba le ga Inthanete ba nyaka go bona gore ba bangwana ba beyye dinepe tsa mošaga mang, ba ka fo feleletsa ba kwa nkare a go na wa go tihlupa ka bona ba boya ba kgahleletsa ke mešekelo. Ke ntaba? Se sengwana so se makang tsotsone ke gore batho ba tšhela dinepe tsa bona ga Inthanete tsa gore di šupetsa dilo tso ba di segeleleng lephelong, dinepe tsa bona, tsa banghana ba bona le tsa dipoleke tso ba yyeng ba ya ga tsona tsa go jabodisa. Motho ye a lebelelang dinepe tsone, a ka feleletsa a tseya nkare lephelo lage le ya tshwatisa, le fo re tlo. Mogageru ye mongwana wa mosadi wa gore o na le 19 ya mengwaga o re: “Mo ke bona dilo tso batho ba di makang tsa go jabodisa ka Mokibela le Lesonto mara nna ke duli gaye, ke yye ka thomisa go sa sa kgotsofatsa ke lephelo laka.”

14. So se bolabolang ke Petro wa Mathomo 3:8, se ka re gelepa byang ga taba ya go berekisa Inthanete?

¹⁴ Nnete ke gore Inthanete yi ka berekisiwa go maka dilo tsa gabutši, mo re beyisa yi ka re gelepa gore re thogo bolabola le ba mutši wa rune le banghana ba rune. Ayitsano o šele o di bonne tsa gore dilo tso batho ba di tšhelang ga Inthanete di makiwwe gore re dule re naganne ka bona? Gabutšibutši so ba nyakang go re botsa sona ke gore “Lebelela nna.” Ba bangwana ba phara melayetsa ya go hlaba kela ya go sa bolabolegi ga dinepe tsa bona beng kela ga tsa ba bangwana. Tsotsone a di yelane le go tinyanafatsa fote a di sipidisane le dilo tso Makreste ma tšhutisiwang tsona gore ma di make.—Bala 1 Petro 3:8.

15. Baebele yi ka re gelepa byang gore re sa make gore batho ba dule ba nagana ka rune?

¹⁵ Mo nkare o berekisa Inthanete tiputsise gore: ‘Ayitsano dilo tso ke di bolabolang, dinepe kela dividiyo tso ke di tšhelang di šupetsa batho gore ke kganyisa dilo tso ke nang natso? Ayitsano nka maka ba bangwana gore ba thomise go njelasela?’ Baebele yi re: “Dilo tse dingwana le tse dingwana tsa ho lefaseng, “tsa go nabela ke nama le tsa go nabela ke maahlo le go kganyisa  tso motho a nang natso, a di tšwe ga Papa mara ke tsa lefase.” (1 Joh. 2:16) Baebele ye nngwana mo yi beya taba yo ya gore “go kganyisa tso motho a tiphidisang ka tsona” yi yi beya go le ‘go nyaka go tseyediwa gedimo go phala ba bangwana.’ Makreste a ma kwane natso tsa gore ma make gore batho ba ma tseyele gedimo. Ma latelela so se bolabolang ke Baebele sa gore: “Tla re sa thomise go ba le magetla, re sa hlohletsele taba ya go phadisana le ba bangwana, re sa nyake gore dilo ka mokana ga tsona go be tsa rune.” (Magal. 5:26) Go tinyanafatsa go re gelepa gore re sa tikraye re logele ga mokgwa wa lefase wa go nyaka go tseyediwa gedimo.

16. Ke ntaba di nyaka re kganele kgole le taba ya go ba le magetla?

¹⁶ Di nyaka re karakare ka matla gore re tinyanafatse ka taba la gore batho ba go ba le magetla a baa ‘butšwa mabyokong.’ (Mrm. 12:3) Bo ba gore ba na le magetla a ba nyake go butsiwa selo fote ba nagana gore bona ke bona. Tso ba di naganang le tso ba di makang a di kwaletsi bona ba ntoši, di kwaletsa le ba bangwana. Mo ba ka sa tšhentšhi ka mokgo ba naganang ka gona, ba nyoko ba letshwifing fote Sathane o nyoko ba fokola. (2 Makor. 4:4; 11:3) Mara, motho wa go tinyanafatsa o butšwiye mabyokong. Aa na magetla fote o tseya gore ba bangwana baa mo phala ka tse dingwana. (Mafil. 2:3) Fote wa di tšiba tsa gore ‘ba go ba le magetla Modimo aa kwane nabo, mara o šupetsa bo ba go tinyanafatsa gore o ba kwela go baba.’ (1 Pet. 5:5) Bo ba gore ba butšwiye mabyokong ba nyaka gore Jehova a dule a ba nyaka ka matla.

17. King so re tshwaneleng re se make gore re dule re tinyanafatsiye?

¹⁷ Gore re thogo tinyanafatsa, di nyaka gore re berekise so Baebele yi se bolabolang mo yi re re “yapole motho wa botala le mekgwa yage ya botala ke mokane re tiyapese motho wa nyuwane.” Tsotsone di nyaka gore re karakare ka matla. Di nyaka re tšhute ga tso Jeso a yyeng a di maka fote re leketse ka matla go mo yekisela. (Makol. 3:9, 10; 1 Pet. 2:21) Sosone se nyoko re berekela. Mo re kene re karakara ka matla gore re tinyanafatse, re ko thogo phidisana gabutši le ba mutši wa rune, ra maka gore phutego yi dule yi le selo ka ssoši fote re nyoko di tšiba gore re ka kganela kgole byang le go berekisa Inthanete ka mokgwa wa gore a yi wona. Ga dilo tsone ka mokana ga tsona, Jehova o nyoko re rufa fote o nyoko dula a re nyaka ka matla