Papa ke mo go le mogolo wa kereke ya United Church of Canada ga poleke yo re dulang, byalo beke ye nngwana le ye nngwana ka Lesonto ne a yisa nna le sesi waka ga kereke ya ka bošego ya dibananyana, ke mokane ka 11:00 ka bošego re ya naye kerekeng. Ke mokane ka sethewo, re yye le mmane Holong ya Mmušo. Ke mo di le lula gore re thogo bona gore madumedi yane ka mabedi a ma tshwane.

Mmane o yye a hlatollela banghana bage ba gabutši ka matla go leng Bob, Marion Hutcheson ka tumelo yage ya nyuwane ke mokane le bona ba yye ba ba Dihlatse Tsa Jehova. Ka 1958 mogageru Hutcheson le mosadi wage, ba yye le nna le kararo ya barwayi ba bona ga Mogahlano wo Mogolo wa gore wo tseya mabala ya matšatši wa gore, Divine Will International Assembly ku New York City. Mo ke lebelela nthago, ke ya di bona tsa gore ne go se lula ga bona gore ba ye le nna, mara mogahlano wone wo mogolonyana nka sa ro tsoga ke wo lebele ho lephelong laka.

Mo ke sa gula ne re dula polaseng ga gore ne ke jabolela go pasopa diphoolwane. Ke yye ka nagana ka taba ya gore ke tšhutele go ba togotela ya diphoolwane. Mmane waka o yye a botsa mogolo ka phutegong ka taba yone. Mogolo yene o yye a n’gopotsa taba ya gore re phela ga ‘dinako tsa mafelelo’ fote o yye a butsisa ka mokgo go ya yunivesithi mengwaga ya go tlala go ka yamang senghana saka le Jehova. (2 Thim. 3:1) Ke yye ka segelela sepheto sa gore nka sa ro le beya yunivesithi.

 Mara ne ke tiputsisa gore ke nyoko maka ying ka nthago ga ho ke fetsiye sekolo. Le mo yi le gore ne ke ya tšhomong beke ye nngwana le ye nngwana, ne yi sa njabodisi fote ne ke sa lore gore nka tsoga ke le mošupatsela. Ka nako yone, papa le malome waka ba gore a yi Dihlatse Tsa Jehova ne ba nhlohletsela gore ke bereke ga khamphani ye kgolo ya tsa inšorense ku Toronto. Malome ne a na le setulo sa mayemo ga khamphani yone byalo le nna ke yye ka yamogela mmereko wone.

Ku Toronto, ne ke fetsa nako yaka ya go tlala ke bereka fote ke nghanelana le batho ba gore a yi Dihlatse, tsotsone ne di mparaka gore ke sa kgone go ya megahlanong le go dula ke tšhomayela. Ke yye ka thomisa ka go dula le kokwane waka wa monna wa gore a yi Hlatse mara ka nthago ga mo a hlokofele ne ke nyakana le poleke ye nngwana ya gore nka dula gona.

Ba ga Hutcheson, ba gore ba yye ba ya le nna ga mogahlano wo mogolo ka 1958 ne ke ba tseya go le mong babelegi baka. Ba yye ba mmema gore ke tl’le dula nabo ka mutšing wa bona fote ba n’gelepiye gore ke tiyise senghana saka le Jehova. Ka 1960, nna le morwayi wa bona John re yye ra kolobetsiwa. John o yye a thomisa go ba mošupatsela, sosone se yye sa nhlohletsela gore ke ro napa ke ro tšhomayela go phala mathomisong. Magageru ya ka ho phutegong ma di bonne tsa gore ke yeketsa ga mmereko wo ke wo makelang Modimo ke mokane ba yye ba feleletsa ba nkgeta gore ke be lelata la Sekolo sa Bodiredi sa Pušo ya Modimo. a

Ka 1966, ke šadhiye le Randi Berge mošupatsela wa gore o na le matšato wa gore ne a tikemisele go ya mo go gayelang batšhomayedi. Mopotulugi wa rune ke mo a re jabolela ka matla, o yye a re hlohletsela gore re ye gelepa phutego ya ku Orillia, Ontario. Byalo re yye ra paka dijumbha tsa rune ke mokane ra sepela.

Mo re segela Orillia, ke yye ka ba mošupatsela wa nako ka moka go tshwana le Randi. Ye lune, phela ne ke jabodiye go fo tshwana naye! Ka nthago ga mo ke karakariye ka matla gore ke thogo ba mošupatsela wa gabutši, ke yye ka thomisa go kwa manatefelo ya go berekisa Bhayibele le go jabodisa ke ho ke bona batho ba yi kwisisa. Phela ke mo di jabodisa ka matla go gelepa monna le mosadi ba gore ba šadhiye ku Orillia gore ba tšhentšhe maphelelo ya bona ke mokane go be malata ya Jehova.

Nakwela re vakašela Toronto, ke yye ka gahlana le Arnold MacNamara, wa gore ne go le yene ye ne a yeta Bethele mahlong. O yye a mputsisa gore ayitsano re ka jabolela go ba mašupatsela ya go hlawolega. Ke yye ka mo fetola ka go yakgoswa ka re: “Eya! Re ka ya go gongwana le go gongwana mara go seng Quebec!” Ne ke kutšetsela ke batho ba go bolabola Sekgowa ba Canada gore ke tikwe ka mokgwa wa gore a yi wona ka batho ba phrovensi ya Quebec ga gore ba bolabola mmolabolo wa Sefrench. Ka nako yonone batho ne ba toyatoyela mmušo, ba nyaka gore phrovensi ya Quebec yi tikemele ga naga ka mokana ga yona ya Canada.

Arnold o yitseri, “Gana byalo Quebec ke yona yi ntoši ya gore ofisi ya lekala yi romela mašupatsela ya go hlawolega.” Ka go yakgoswa ke yye ka dumela go ya. Ne ke di tšiba tsa gore Randi ke mo a nyaka go ye tšhomayela gana hone. Ye lune, phela ka nthago ke yye ka di bona tsa gore sowa ke mong sepheto sa gabutši so re se segeleleng!

Ka nthago ga mo re tšhutiye mmolabolo wa Sefrench kapheta ya mabeke, nna le Randi le monna ye mongwana le mosadi wage re yye ku Rimouski ga gore ke gana hala ga 540 ya dikhilomitha ya gore ke lebowabohlabela bya Montreal. Ne go sa na le tsa go tlala tso re tshwaneleng go di tšhuta, ke di bonne gabutši mogahlanong nakwela ke bala tse dingwana ga tso ba tshwaneleng ba di tšibe. Ne ke tshwanele ke hlaye gore divakaši di tšwa nageng ya Austria, mara ke thelele ke lleme ka berekisa lentsu la go kwagala nkare divakaši tsone go nyoko ba dinonyane tse dikgolo.”

Ku Rimouski, kanne ya rune re yye ra tlatsisa ke kanne ya magageru ya basadi ya gore a maa šadha fote ma na le matšato le mogageru Huberdeau le mosadi wage fote le barwediya ba bona ka babedi. Mogageru Huberdeau le mosadi wage ne ba hirisiye ga ntlo ye kgolo fote mašupatsela ka mokana ga wona ya gore ne ma dula gana hone ne ma gelepa ka go patela rente. Ntlo yone ke mo re re ke White House ka taba la gore ka ho mahlong ga yona ke mo yi le ye tšhwewu fote yi na le dikholomo ka dipedi tse ditšhwewu. Ga go tlala, gana hone ne re dula re le 12 kela 14. Ka taba la gore nna le Randi ke mo re le mašupatsela ya go hlawolega ne re tšhomayela ka bošego, motshegare le ka sethewo byalo re yi leboga ka matla taba ya gore ne go dula go na le motho wa gore o tšwa le rune tšhomo—le mong marega ka malobana, mo se pshyaya sa phefo.

Re napiye re mamarelana le mašupatsela yane ya go tshepega la go šinya re kwa nkare re ro ba mong bana ba motho. Ka dinako tse dingwana re dula re le ka moka mollong kela re ba le letšatši lo re yapegang ggoši. Mogageru ye mongwana ke mo a di kgona tsa go yepelela, byalo ka lesonto ka malobana ga go tlala ke mo re yepelela fote re bina.

Phela batho ba go tlala ku Rimouski ne ba jabolela go tšhuta Bhayibele! Mo go soko fela kapheta ya mengwaga, re yye ra jabola mo re bona batho bo re ba tšhutisang Bhayibele ba kolobetsiwa. Phutego yone yi yeketsegiye ka 35 ya batšhomayedi.

Ku Quebec, ba re lokotšiye gabutši gore re be baenbangedi. Re bonne ka mokgo Jehova a re gelepiyeng ka gona ga mmereko wa rune wa go tšhomayela le ka dilo tso re di nyakang gore re thogo phela. Go tokegela ga hone, re tšhutiye le go kwana ka matla le mmolabolo wa Sefrench, batho bo ba se bolabolang le setšo sa bona​—tsotsone di yye dya maka gore re kwane le ditšo tsa batho ba bangwana.​—2 Makor. 6:13.

Wa tšiba, ne re sa nagana mo ofisi ya lekala yi re kgopela gore re rurele ga toropo ya Tracadie, ga gore ke bohlabela bya leropho la New Brunswick. Tsone di yye dya maka gore go be ntshitshire ka taba la gore ne re sayinne lephephe la go hirisa ntlo fote ne ke sa krayye sekoroponyana sa go tšhutisa. Go tokegela gana hone, batho bo ne re ba tšhutisa Bhayibele ba bangwana ne go se botala ba thomisiye go ba batšhomayedi fote ne re sa tshwaraganne ka go yaga Holo ya Mmušo.

Re fetsiye Mokibela le Lesonto re kene re rapela ka taba yone ya gore re nyoko rura ke mokane ra vakašela  Tracadie, ya gore a yi tshwane le Rimouski. Mara re yye ra fetsa ka gore re ye ka taba la gore Jehova o re nyaka gana hone. Re yye ra mo liketsa ga Jehova fote re mmonne mo a tlosa ntshitshire ye nngwana le ye nngwana. (Mal. 3:10) Ka taba la gore Randi ne a na le senghana sa go tiya ka matla le Jehova, ke mo a sa tinaganele a ntoši fote a kwana le go jowuka kela go kgana, tsotsone di makiye gore taba ya go rura yi be moroba.

Robert Ross ne go le mogolo ka wweši ga phutego ya rune ya nyuwane. Yene le mosadi wage Linda ke mo go le mašupatsela gana hone ke mokane ba yye ba segelela sepheto sa gore ba dule hone ka nthago ga ho ngwana bona wa mošomanyana a belegiwwe. Le mo yi le gore ne ba gudisa ngwana, mara ba yye ba re hlohletsela ka matla nna le Randi ka taba la gore ne ba yamogela divakaši fote ba maka mmereko wa go tšhomayela ka matšato.

Ka nthago ga gore re be mašupatsela ku Tracadie mengwaga ka mmedi, re yye ra makegela ke selo se sengwana fote re sa nagana​—ba re mema gore re ye maka mmereko wa go vakašela diphutego. Re yye ra potuluga ga diphutego tsa Sekgowa kašupa ya mengwaga, ka nthago ba re romele ga diphutego tsa Sefrench ku Quebec. Léonce Crépeault wa gore ne a wokamela modukulugo wa rune ku Quebec ne a kwana le go nthanaka ka dipolabolo tso ke di beyyeng. Mara ka nthago ke mo a fo dula a butsisa gore, “O ka maka byang gore di ba tšhofe gore ba make se sengwana?” b Taba yone yi n’gelepiye gore mo ke tšhutisa ke sa jikajiki taba, fote ke make gore yi kwisisege lula.

Mmereko wa gore nka sa ro tsoga ke wo libele ke wo ke wo makiyeng ka 1978 ga Mogahlano wo Mogolo wa Batho ba Mafaseng ya Mohlobohlobo ku Montreal wa hlogotaba ya gore, “Victorious Faith”. Ne ke bereka go yapega tsa go ja. Ne re yemele 80 000 ya batho fote ne re tshwanele go ba yapegela tsa go ja ka mokgwa wa go sa tshwane le wo ne re yapega ka wona botala. Dilo ka moka ne di tšhentšhiye: tso ne re di berekisa mo re yapega, tsa go ja tso ne re di yapega le ka mokgo ne re di yapega ka gona. Ne re na le gana hala ga 20 ya difuriji tse dikgolo, mara ka dinako tse dingwana ne di sa bereke. Mo letšatši la mathomo le soko segela, ne re sa kgone go kena stediyamo go segela go ba gare ga bošego ka taba la gore ka tšatši lolone ne go na le mokgano. Fote ke mo re tshwanele re layite dionto mo letšatši le soko hlaba gore re thogo maka tsa go ja tsa ka bošego! Ne re tinnwe ka matla, mara ke tšhutiye ga bo ne ke bereka nabo ba gore ne ba tikemisele go bereka ka matla, ba butšwiye mabyokong fote ba kwana le go jowuka. Ye lune, le lekgono lowa re sa fo ba banghana. Phela di ro jabodisa ka matla go ba gona mogahlanong wo mogolo wa go tseyediwa gedimo ka matla ku Quebec, go leng phrovensi ya gore ne ba hlorisa batho gana hala ga bo 1940 le 1960!

 Ke tšhutiye tsa go tlala ga bapotulugi bo ne ke bereka nabo nakwela re le megahlanong ye megolo ya Montreal. Mongwaga wo mongwana, David Splane, wa gore gana byalo ke ye mongwana wa bo ba Mogoba wa go Lawola ne go le yene wa gore o wokamele mogahlano wone wo mogolo. Ga mogahlano wo mongwana wo mogolo mo ba nkgopela gore ke make mmereko wone, David o n’gelepiye ka matla.

Ka 2011, ka nthago ga mo re tikwisiye ka go maka mmereko wa go vakašela diphutego ka 36 ya mengwaga, ba yye ba mmema gore ke tl’le ba thitšere ga Sekolo sa Bagolo ba Phutego. Nna le Randi re yye ra yetsela ga 75 ya mepeto ya go sa tshwane ka mengwaga ka mmedi, mara tsotsone ka mokana ga tsona ne go sa fo ba tsa mahala. Mafelelong ga beke ye nngwana le ye nngwana, bagolo ne ba dula ba jabodiye ka taba la gore ba bonne ka mokgo bo ba Mogoba wa go Lawola ne ba tseyela gedimo senghana sa bona le Jehova.

Ka nthago ke yye ka tšhutisa ga sekolo sa Batšhomayedi ba Mmušo. Bo ne ke ba tšhutisa ga go tlala ne ba dula ba tinnwe fote ne ba šekela ka taba la gore ne ba dula ba tshwaraganne ka matla: ne ba dula ka tlelaseng gana hala ga kašupa ya diawara ka letšatši, ba maka mmereko wa sekolo wa gore ba tshwanele ba wo make gaye kararo ya diawara ka malobana wo mongwana le wo mongwana fote ba maka kanne kela kapheta ya mmereko wo ba tshwaneleng go wo maka beke ye nngwana le ye nngwana. Nna le thitšere ye nngwana re yye ra ba hlatollela gore nke ba sa di kgona hala ba sa gelepa ke Jehova. Ne ke fo dula ke gopola ka mokgo bo ne ke ba tšhutisa ne ba makatsa ke taba ya gore mo ba tisamela ka Jehova, ba yye ba kgona go phomelela le ga dilo tsa gore ne ba sa nagane gore di ka kgonega.

Taba ya gore mmane waka ne a kwana le batho, yi gelepiye batho bo ne a tšhuta Bhayibele nabo gore ba ye mahlong ga tso tsa Modimo fote yi gelepiye le papaka gore a tšhentšhe ka mokgo ne a tseya nnete ka gona. Ka nthago ga mo go fitiye matšatši kararo ya wona mmane a hlokofele, papa o re makatsiye ka matla ho re mmona Holong ya Mmušo a tl’le theetsela polabolo ya batho ka moka, fote o yye mahlong a tla megahlanong 26 ya mengwaga ya go latela. Le mo yi le gore papa a sanka a kolobetsiwa, bagolo ne ba mpotsa gore ne go fo dula go le yene wa mathomo wa go segela megahlanong beke ye nngwana le ye nngwana.

Mmane ne go le mošupetso wa gabutši ho gaka le ga bosesi. Bosesi baka kararo ya bona le banna ba bona ba berekela Jehova ba kene ba tshepega. Ka babedi ba bereka ga diofisi tsa lekala​—ka wweši o ga ofisi ya lekala la Portugal ke mokane ye mongwana o hala Haiti.

Gana byalo nna le Randi re mašupatsela ya go hlawolega ku Hamilton, Ontario. Nakwela re sa maka mmereko wa go vakašela diphutego, re jabolele go felegetsa ba bangwana ga batho bo ba boyelang ga bona le bo ba tšhutang nabo Bhayibele. Mara gana byalo re jabodisa ke go bona ditšhuto tsa rune di thomisa go nyaka Jehova ka matla. Fote mo re fetsa nako ya go tlala le magageru ya ka phutegong ya rune ya nyuwane, re fo kwa di re tiyisa ho re bona ka mokgo Jehova a ma thegang ka gona ka dinako tsa gabutši le ka dinako tsa mo go thathafa.

Ho re lebelela ku nthago, re yi leboga re sa fetsi taba ya gore batho ba go tlala ba re šupetsiye gore ba ro kwana le rune ka matla. Le rune, re liketsiye ka matla go šupetsa ba bangwana gore re “hlupega” ka matla ka bona, re ba hlohletsele gore ba berekele Jehova ka mokgo ba ka kgonang ka gona. (2 Makor. 7:6, 7) Mo re beyisa, ka mutšing wo mongwana mmane, morwayi le morwediya ba ga mmereko wa nako ka moka. Ke yye ka butsisa papa wa hone mutšing gore a sanka a nagana ka taba ya go ba mošupatsela. O yitseri yene o thega mašupatsela yane kararo ya wona. Byalo, ke yye ka mmutsisa gore, “Ayitsano o ka ma thega go phala Jehova?” Ke yye ka mo hlohletsela ka gore a tikwise ka so le bona ne ba tikwisa ka sona. Ka nthago, o yye a ba mošupatsela go soko fela kobodi ya dikgwedi.

Nna le Randi re nyoko fo ya mahlong re “botsa leloko lo le tlang” ka “dilo tsa go bafala” tso Jehova a di makiyeng fote re fo tshepa gore ba nyoko jabolela go berekela Jehova go fo tshwana le rune.​—Pis. 71:17, 18.