1-2. Pisalema 40:5 yi re ke dilo difeng tso Jehova a re neyyeng tsona fote ke ntaba di nyaka gore re bolabole ka tsona?

JEHOVA ke Modimo wa gore aa konane. O fo nagana nje ka dilo tso a re neyyeng tsona: lefase lo la gore ke legaye la rune la go bafala ka matla la gore fote a le tshwane le selo se sengwana; byoko bya rune bya gore bo makiwwe ka tsela ya go makatsa; le Lentsu lage, Baebele. Mo Jehova a re neya dilo tsowa ka ditharo, o makiye gore re be le poleke ya go dula ga yona, re di kgone tsa go nagana fote re thogo bolabodisana le ba bangwana, a boya a fetola diputsiso tse dikgolo tso ne re ka nyaka go tšiba diphetolo tsa tsona.—Bala Pisalema 40:5.

² Ga hlogotaba yowa, re nyoko bolabola ka gonyana ka dilo tsone ka ditharo tso Jehova a re neyyeng tsona. Mo re kene re ghayela ka tsona, sosone se nyoko re tšhofa gore re tikwe re leboga Jehova ka matla fote re kwe re nyaka go mo jabodisa, yene ye a re makiyeng wa gore o re nyaka ka matla. (Kut. 4:11) Re ko ba re maka gabutši mo re gelepa bo ba gore ba ba tshokannye ka matsaka ya gore dilo di f’lo timakegela.

3. Ke ntaba lefase lo re dulang ga lona le sa tshwane le dipolanete tse dingwana?

³ Di napa di ro yela gabutši gore Modimo o hlalefiye mo o lebelela ka mokgo a makiyeng lefase lo re dulang ga lona. (Mrm. 1:20; Maheb. 3:4) Polanete ya rune a yi yona yi ntoši ya gore yi dukulugela letšatši, mara lefase lo re dulang ga lona le ya jabodisa ka taba la gore ke lona le ntoši la gore dilo di ka kgona go phela ga lona.

4. Ke ntaba re re lefase lo re dulang ga lona le phala sekepe so se makiyeng ke batho?

⁴ Re ka fo re lefase le tshwana le sekepe sa gore se phaphamele gedimo ga lewatle. Mara sekepe sa gore se tlele ka batho, go na le tso  se ka sa tshwaneng le lefase ka tsona. Mo re beyisa, o nagana gore hala bo ba leng ka ho sekepeng ba timakela moya wa bona wo ba nyoko wo wonang, tsa go ja, meetši fote ba sa kgone go lahla dithila, ne ba nyoko phela go segela kaye? Nnete ke gore batho ba hone sekepeng ne ba ka sa phele go ya kaye. Lefase a le tshwane le sekepe ka taba la gore le na le dibhiliyoni tsa dilo tso di phelang. Le maka gore re kraye moya wo re wo wonang, tsa go ja, meetši ya gore re ya ma hloka fote dilo tsone a di fele. Dithila tsa lona a di ntshiwi ke mokane dya lahliwa go gongwana, mara le fo dula le bafele fote re kgona go dula ga lona. Di kgonega byang tsotsone? Jehova o makiye lefase gore le kgone go berekisa dilo ga tleletlele. Re nyoko lebelela dilo ka dipedi tsa gore o di makiye ka mokgo mongwana wa gore a wo hlayisege, go leng modukulugo wa moya wo re wo wonang le modukulugo wa meetši.

5. Modukulugo wa moya wo re wo wonang king, fote wo napa wo šihlela taba yifeng?

⁵ Moya wo re wo wonang wo maka gore lephelo le ye maahlong ga dilo tso di phelang le ga rune beng. Ba re dilo tso di phelang di berekisa makgolo ya dibhiliyoni tsa moya wo re wo wonang ka mongwaga ka wwoši. Dilo tsone di phelang di ntsha moya wa dithila. Mara dilo tsone a di berekisi moya wo re wo wonang ka mokana ga wona, fote sebakabaka se ka sa tsoge se tlele ka moya wa go sa yela le wa dithila. Ke ntaba mara? Ka taba la gore Jehova o makiye dilo tsa go phela—go thoma ga dihlare tse dikgolo go segela ga tse dinyananyana go tshwana le bolele—tsa gore tsona di tseya moya wa dithila ke mokane dya ntsha moya wo re wo wonang. Mo re šele re yi beya gabutši, modukulugo wa moya wo re wo wonang wo napa wo šihlela mantsu ya ma leng ga Mebereko 17:24, 25 ya ma reng: “Modimo . . . o neya batho ka mokana ga bona lephelo le mowono.”

6. Modukulugo wa meetši king fote wo šupetsa ying? (Lebelela le lebhokisi la gore “ Jehova o re Neyye Meetši.”)

⁶ Go tloga mo lefase le leng gona go ya mo letšatši le leng gona, ke sekgala sa gabutši ka matla ka taba la gore se gelepa gore meetši ma dule ma le gona. Hala letšatši le šutele thina nyana, meetši ka mokana ga wona ke mo ma nyoko tshwehla ke mokane maa fela, gwa fo šala go fisa fote go womme go f’lo re khwaša, go sa phele selo. Hala lefase le le kgolenyana le letšatši, meetši ka mokana ga wona nke ma nyoko gahla, ke mokane lefase la ba bholi ye kgolo ya meetši ya go gahla. Jehova o beyye lefase ga poleke ya gabutši, tsotsone di maka gore modukulugo wa meetši wo thogo maka gore lephelo le ye maahlong. Letšatši le tšhuba meetši ya ku lewatle le ya ma leng gona ho fase ke mokane tsotsone dya maka gore go be le maru. Mongwaga wo mongwana le wo mongwana, letšatši le moyafatsa meetši ya go tlala ka matla. Meetši yane ma fo dula ku sebakabakeng ka lesome la matšatši mo ma soko bane ma ba pula kela sebera. Meetši yane ma feleletsa ma boyele ku mawatleng kela dinokeng ke mokane ma thomisa modukulugo wonola fote. Modukulugo wowa wa go makega ka letheto wo fo šupetsa gabutši gore Jehova o hlalefiye fote o na le matšhika ya magolo.—Job. 36:27, 28; Mmo. 1:7.

7. Re ka maka ying tse dingwana go šupetsa gore re leboga so Modimo a re neyyeng sona so go bolabodiwang ka sona mo ga Pisalema 115:16?

⁷ Re ka šupetsa ka ying gore lefase lowa re le jabolela ka matla le dilo ka mokana ga tsona tso di leng mo ga lona? (Bala Pisalema 115:16.) Se sengwana so re ka se makang ke gore re ghayele ka dilo tso Jehova a di makiyeng. Sosone se nyoko re tšhofa gore re leboge Jehova tšatši le lengwana le le lengwana ka taba la dilo tsa gabutši tso a re neyang tsona. Fote re šupetsa gore re jabolela lefase lo, mo re maka ka mokgo re ka kgonang gore re yedise mo re dulang gona.

8. Ke ntaba re ka re byoko bya rune ke mong mohlolo?

⁸ Byoko bya motho ke mong mohlolo. Nakwela o sa le ka mpeng ya mmane wago, byoko byago bo yye bya makega go ya ka mokgo ne bo tshwanele bo be ka gona ke mokane diketekete tsa disele tsa nyuwane tsa go maka byoko ke mo di makega ka minete ye nngwana le nngwana! Bo ba go nyakolla dilo ba naganela gore byoko bya motho wa gore o  gudiye bo na le gana hala ga bo 100 ya dibhiliyoni ya disele tsa go hlawolega tso ba reng ke dinyuroni. Disele tsone di mamarelanne gabutši tsa gore o ka sa ro di yahloganya, di kala gana hala ga bo 1.5 ya dikhiloghremo. Lebelela dilo tse dingwana tsa go makatsa tso byoko bo kgonang go di maka.

9. King so se napang se maka gore o tshepe gore taba ya gore re kgona go bolabola ke selo so re neyyeng ke Modimo?

⁹ Taba ya gore re kgona go bolabola le yona ke mong mohlolo. Nagana ka dilo tso di makegang gore motho a thogo bolabola. Lentsu le lengwana le le lengwana lo o le bolabolang, di nyaka gore byoko byago bo lawole ditšhika tsa go teya gana hala ga 100 tsa lleme lago, mogolo, molomo, mohlagare le sekguba. Mešifa yone ka mokana ga yona yi tshwanele go sepela ka nako yo go leng yona gore so motho a se bolabolang se thogo kwagala gabutši. Ga taba ya go kgona go bolabola mebolabolo ya go sa tshwane, ka 2019 go yye gwa tšwa taba ye nngwana ya gore bana ba gore ba sa tšwa go belegiwa ba kgona go fapanyisa mantsu ya ba ma kwang. Tsotsone di napa di ro kikitela taba yo yi tshepang ke batho ba go tlala ba go nyakolla, ya gore re belegiwwe re kgona go kwisisa le go tšhuta mebolabolo ye mengwana. Di fo ba lekgwaying gore taba ya gore re kgona go bolabola, ke selo sa go bafala so re neyyeng ke Modimo.—Ek. 4:11.

10. Re ka šupetsa ka ying gore re leboga gore Modimo o makiye gore re kgone bolabola?

¹⁰ Se sengwana so re ka se makang go šupetsa gore re leboga taba ya gore re kgona go bolabola ke go hlatollela batho ka Modimo, ka matlamatla bo ba gore a ba kwisisi gore ke ntaba re sa dumele ga taba ya gore dilo di f’lo timakegela. (Pis. 9:1; 1 Pet. 3:15) Bobone ba go tšhutisa gore dilo di ro timakegela ba nyaka gore re tshepe gore lefase lo le dilo ka mokana ga tsona tso di phelang ga lona di f’lo makega. Mo re berekisa Baebele le dilo tse dingwana tso re bolabodiyeng ka tsona ga hlogotaba yowa, re ka di kgona go yemelela Papa wa rune wa legedimong ra boya ra hlatollela bo ba nyakang go theetsela gore ke ntaba re sa kamake gore Jehova ke yene ye a makiyeng legedimo le lefase.—Pis. 102:25; Jes. 40:25, 26.

11. Byoko bya rune bo makatsa ka taba la selo sefeng se sengwana?

¹¹ Taba ya gore re kgona go gopola dilo tsa go tlala ka matla yi ro re šiya re yahlamme. Ku botala, ye mongwana wa go ngwala dipuku o yye a re byoko bya motho bo kgona go gopola dilo tsa gore di segela gana hala ga dilo tso di ngwadiwweng ga dipuku tsa go teya ga 20 ya dimiliyoni. Mara gana byalo ba nagana gore re kgona go gopola dilo tsa go tlala ka matla go feta tsotsone. Ke selo sefeng sa gore batho ke bona ba le ntoši ba kgonang go se maka?

12. Taba ya gore re kgona go titshwara yi maka gore re sa tshwane le diphoolwane ka mokgo mang?

¹² Ga dilo ka mokana ga tsona tso di phelang ho lefaseng, ke batho ba ntoši bo ba kgonang go tšhuta go titshwara ka go gopola dilo, le go pombhola gabutši tso di makegiyeng botala. Byalo, re kgona go tšhuta mekgwa ya gabutši le go kgona go tšhentšha ka mokgo re naganang ka gona le maphelelo ya rune. (1 Makor. 6:9-11; Makol. 3:9, 10) Gabutšibutši, re kgona le go tšhutisa makwalo ya rune go gopola gore sa go loka ke sefeng le gore sa go sa loka ke sefeng. (Maheb. 5:14) Re ka tšhuta go šupetsa ba bangwana gore re ba nyaka ka matla,  re ya ba naganela fote re ba kwela go baba. Se sengwana ke gore re kgona go di bona mo motho a makiwa lešidi.

13. Mo re lebelele so Pisalema 77:11, 12 yi se hlayang, taba yowa ya gore re kgona go gopola dilo re ka yi berekisa ka mokgo mang?

¹³ Mokgwa wo mongwana wo re ka šupetsang ka wona gore re leboga Modimo mo a re makiye gore re kgone go gopola dilo, ke mo re hlawola go gopola dinako ka mokana ga tsona tso Jehova a yyeng a re gelepa ga tsona a boya a re kgomoletsa. Sosone se nyoko maka gore re sa kamake gore o sa nyoko re gelepa le ku maahlong. (Bala Pisalema 77:11, 12; 78:4, 7) Wo mongwana mokgwa wo re ka šupetsang gore re ya leboga, ke ka go sa lebale dilo tsa gabutši tso ba bangwana ba yyeng ba re makela tsona ra boya ra šupetsa gore re leboga ka matla. Bo ba go nyakolla ba krayye taba ya gore ga go tlala motho wa go kwana le go leboga o dula a jabodiye. Ga tso Jehova a hlawolang go di lebala, re ko ba re sa yi lahla mo le rune re maka ka mokgonone. Mo re beyisa, Jehova a yi motho wa go lebala dilo, mara mo re tisola, o hlawola go re tshwarela a boya a lebala dilo tsa go kekema tso re di makiyeng. (Pis. 25:7; 130:3, 4) Fote o nyaka gore le rune re make tsotsone ga ba bangwana mo ba tisola ga tsa go kekema tso ba re kwisiyeng go baba ka tsona.—Mat. 6:14; Luk. 17:3, 4.

14. Re ka šupetsa ka ying gore re leboga gore Modimo o re neyye byoko?

¹⁴ Mo re berekisa byoko bya rune gore re thogo thanaka ye a re neyyeng byona, tsotsone di šupetsa gabutši gore re ya leboga. Ba bangwana ba hlawola go berekisa byoko ga tsa go tšiba ke bona beng, ba timakela melawo ga taba ya gore sa go loka kela sa go sa loka ke sefeng. Mara ka taba la gore Jehova ke yene a re makiyeng, di kwala ka matla gore melawo yage yi phala melawo ka mokana ga yona yo re ka timakelang yona. (Mrm. 12:1, 2) Mo re phela ka melawo yage, re dula re bebiye. (Jes. 48:17, 18) Fote re nyoko di tšiba gore re phelela ying, re phelela go thanaka Papa wa rune ye a re makiyeng fote re maka gore a titeye sekguba ka rune.—Diy. 27:11.

15. Baebele yo Jehova a yi neyyeng batho yi šupetsa ka mokgo mang gore o ba nyaka ka matla?

¹⁵ Baebele ke so Modimo a re neyyeng sona go šupetsa gore o re nyaka ka matla. Papa wa rune wa  magedimong o hlohletsele batho gore ba yi ngwale ka taba la gore o tihlupa ka matla ka bana bage ba ho lefaseng. Jehova o berekisa Baebele go fetola mong tsona diputsiso tso re ka tiputsisang tsona tsa go tshwana le tsa gore: Gabutšibutši re tšwa kaye? Re phelela ying? Lephelo le nyoko ba byang ku maahlong? Jehova o nyaka gore go fetolege diputsiso tsa bana bage ka mokana ga bona, byalo go tlugisela ku botala ne a kene a hlohletsela batho gore ba hlatolle Baebele ka mebolabolo ya go tlala. Lekgono, Baebele ka mokana ga yona kela sekopa sa yona yi gona ka mebolabolo ya go teya ka ku ga 3 000! Baebele ke yona ya go hlatolliwa le go sabalatsiwa go feta dipuku ka mokana ga tsona go tlugisela botala. A go na taba gore batho ba dula kaye kela ba bolabola mmolabolo wofeng, so se šalang ke gore ba go tlala ba kraya molayetsa wa Baebele ka mmolabolo wa bona beng.—Lebelela lebhokisi la gore “ Go Hlatolla Baebele ka Mebolabolo ya Afrikha.”

16. Mo re lebelele so se hlayang ke Matewu 28:19, 20, re ka šupetsa ka ying gore Baebele re yi tseyela gedimo?

¹⁶ Re ka šupetsa gore Baebele re yi tseyela gedimo mo re yi bala ka moka matšatši, re ghayela ka tso yi di tšhutisang re boya re karakara gore re thogo di berekisa. Go tokegela gana hone, re šupetsa gore ga Modimo re ya mo leboga mo re maka ka mokgo re ka kgonang go botsa batho ba go tlala molayetsa wa Baebele.—Pis. 1:1-3; Mat. 24:14; bala Matewu 28:19, 20.

17. Ga hlogotaba yowa re petapetiye ka dilo difeng tso Modimo a re neyyeng tsona fote re nyoko petapeta ka ying ga hlogotaba ya go latela?

¹⁷ Go segela gana byalo, re petapetiye ka dilo tsa go tlala tso Modimo a re neyyeng tsona tsa go tshwana le lefase lo re dulang ga lona, byoko bya rune bya go makatsa, le Baebele ya gore o berekisiye batho gore ba yi ngwale. Mara go na le dilo tse dingwana tso Jehova a re neyyeng tsona tsa gore a re kgone go di bona. Dilo tsone re nyoko petapeta ka tsona ga hlogotaba ya go latela.