1-2. Ye mongwana wa go ngwala o yye a re king, fote ga hlogotaba yowa re nyoko bolabola ka ying?

BA TLELE ka matla ba gore ba ro hlaya gore bona ba dumela ga Jeso, mara a ba kwane le tso a di tšhutisiyeng. (2 Thim. 4:3, 4) Gabutšibutši, ye mongwana wa go ngwala o yye a re: “Mo go ka fo ba le ‘Jeso’ ye mongwana lekgono wa gore o hlaya dilo tso di hlayyeng ke Jeso yela wa ku botala . . . , nje re nyoko mo phigisa go tshwana le ka mokgo re phigisiyeng yela wa dikete ka dipedi tsa mengwaga ya go feta? . . . Ga go tlala batho ba fetola ka gore: Eya.”

² Ku botala, ba go tlala ba kwile Jeso mo a tšhutisa ba boya ba ro mmona mo a maka mehlolo, mara a baa dumela gage. Ke ntaba? Ga hlogotaba yela ya go feta, re bolabodiye ka dilo ka dine tso di makiyeng gore batho ba kwatise ke tso Jeso a di hlayyeng le go di maka. Tla re bolaboleneng ka dilo tse dingwana ka dine. Mo re kene re di tobollwa, re ko boneng gore ke ntaba lekgono batho ba phigisa bo ba latelelang Jeso le gore re ka maka byang gore re sa phiriketsege.

3. King so Jeso a se makiyeng sa gore se kwatisiye ba bangwana?

³ Nakwela Jeso a bolabola le batho ho lefaseng, ke mo a sa yi ka gore motho ke wa mohlobo mang. Ke mo a ja le dinghamula le banna ba go lawola, mara nako yage ya go tlala ke mo a yi fetsa le bo ba go tihlupegela le ba gore ba šekedisa ke tsa lephelo. Go tokegela gana hone, ke mo a ba kwela go baba bo ba gore batho ne ba ba tseya go le “ba go sinya.” Ba bangwana ba gore ne ba titseya ba lukiye ba yye ba kwatisa ke tso Jeso a di makiyeng. Ba butsisiye malata yage gore: “Ke ntaba le ja fote le nwa le bo ba go sinya le  ba go patedisa mothelo?” Mo Jeso a ba fetola o yitseri: “Bo ba gore ba philegiye a ba nyake togotela, mara yi nyaka ke bo ba go lwala. A ke ya tlela go bitsa ba go loka, mara ke tlele go bitsa bo ba gore baa sinya gore ba sokologe.”—Luka 5:29-32.

4. Moporofeta Jesaya o yitseri Majuda ma ka fo ba ma yemele gore go makege ying ka Mesiya?

⁴ Mangwalo ma re king? Mo Mesiya a soko segela ho lefaseng, moporofeta Jesaya o ro napa a di yedisa tsa gore batho ba ka sa mo yamogele. Seporofeto se hlayye gore: “Batho ke mo ba mo nyenya fote ba sa nyake go ba thina naye . . . Ne nkare ba wutametsiye sefahlego sage gore re sa mmone. Ke mo re mo nyenya fote re mo tseya go se selo.” (Jes. 53:3) “Batho” ne ba ka sa kwane le Mesiya, byalo Majuda ya ku botala ne ma ka fo ba ma yemele gore Jeso ba mo phigise.

5. Batho ba go tlala lekgono ba tseya malata ya Jeso ka mokgo mang?

⁵ Ayitsano le lekgono di sa na di makega? Eya. Baruti ba go tlala ba jabola ka matla mo dikereke tsa bona di tlala ka batho ba gore baa tšibega, dinghamula le ba gore lefase le ba tseya ba hlalefiye. Ba maka tsotsone le mo nkare maphelelo ya batho bo ba tlang dikerekeng tsa bona a ma sipidisane le melawo ya Modimo. Baruti bone ba ma tseyela fase malata ya Jehova ya gore ma na le matšato, ya gore fote ma titshwere gabutši ka taba la gore batho ba go tlala ba ma tseya go le batho ba go sa re selo. Go fo tshwana le mo Pawulo a hlayye gore, Modimo o kgetiye bo ba gore ba ba “tseyela fase.” (1 Makor. 1:26-29) Mara Jehova o ma tseyela hlogong malata yage ka mokana ga wona ya gore maa tshepega.

6. Tso Matewu 11:25, 26 yi di bolabolang ka Jeso re ka di yekisela byang?

⁶ King so se ka makang gore tumelo ya rune yi sa šehle? (Bala Matewu 11:25, 26.) O sa fokole nka mokgo batho ba lefase lowa ba tseyang batho ba Modimo. O sa lebale gore Jehova o berekisa batho ba gore ba tinyanafatsiye gore a make tso a di nyakang. (Pis. 138:6) Fote o nagane le ka tso Modimo a di segeleleng a berekisa bo ba gore lefase le ba tseya ba sa hlalefa.

7. Ke ntaba Jeso a butsiye Mafaraseyi gore maa timakisa fote ma yye ma maka ying?

⁷ Jeso ke mo a sa tšhabe selo mo a wolola baruti ba go timakisa bo ne ba phela ka dinako tsage. Mo re beyisa, o thuletsele Mafaraseyi gore maa timakisa ka taba la gore ne ma hlupega ka matla ka gore ma hlapa matsogo ya wona byang mara ma se na taba le go pasopa babelegi ba bona. (Mat. 15:1-11) Tso Jeso a di hlayyeng di ka fo ba di makatsiye malata yage. Gabutšibutši ma mmutsisiye gore: “Nje wa di tšiba tsa gore Mafaraseyi ma kwatisiye ke tso o di hlayyeng?” Mo Jeso a fetola o yitseri: “Sehlare se sengwana le se sengwana sa gore a se ya gaša ke Papa se nyoko tomudiwa. Ba lisetseneng ba kwate. Ba yetetsa ba bangwana ba kene ba popele maahlo. Mo motho wa go popela maahlo a yetetsa motho ye mongwana wa go popela maahlo, ba nyoko goromela sekoting ba le ka babedi.” (Mat. 15:12-14) Jeso ke mo a sa phiphetsi nnete le mo a na a di tšiba tsa gore baruti ba ka fo tuba.

8. Jeso o šupetsiye byang gore Modimo aa yamogele madumedi ka moka?

⁸ Jeso o šupetsiye gore dilo tse dingwana tso di tšhutisang ke madumedi ke matsaka. Aa hlaya gore Modimo o yamogela madumedi ka mokana ga wona. Mara o bolabodiye gore ba go tlala ba nyoko ba ga tsela ya gore yi yahlamme ya gore yi yisana ga go tšhatšhamela, mara ga setselanyana sa gore ba ro pitegetsana sa go yisana lephelong go nyoko ba go se na ba go tlala. (Mat. 7:13, 14) O di beyye lekgwaying gore ba bangwana ba nyoko ba ba timakisa mo ba re ba rapela Modimo. O yitseri: “Le pasopeneng baporofeta ba matsaka ba gore ba tla ga lune ba yapere mokgopa wa nku, mara ka ho teng ba fo tshwana le dimpsya tsa hlaga tsa gore di kwa tlala. Le nyoko ba bona ka tso ba di makang.”—Mat. 7:15-20.

9. Ke matsaka mafeng ya gore Jeso o ma beyye lekgwaying ya ne ma tšhutisa ke dikereke?

 ⁹ Mangwalo ma re king? Seporofeto sa Bhayibele se hlayye di soko makega gore Mesiya o nyoko šupetsa gore aa nyake go kwa selo ka ntlo ya Jehova. (Pis. 69:9; Joh. 2:14-17) Matšato yane ma tšhofiye Jeso gore a yatlale matsaka ya ma tšhutisang ke dikereke. Mo re beyisa, Mafaraseyi ke mo ma tšhutisa gore moya a wo kgwe; Jeso o tšhutisiye gore bo ba hlokofeleng ba yetsele. (Joh. 11:11) Masadutseyi ke mo ma re batho bo ba hlokofeleng ba ka sa tsoge; Jeso o tsusiye monghanage Lazaro. (Joh. 11:43, 44; Meber. 23:8) Mafaraseyi ne ma tšhutisa gore go na le matšhika ya gore a ma bonale ya gore ma re yetetsa ga dilo ka moka kela gore Modimo ke yene a re polanelang gore re nyoko makegela king; Jeso o tšhutisiye gore batho ba ka tikgetela gore ba nyoko berekela Modimo kela awwa.—Mat. 11:28.

10. Ke ntaba ba go tlala ba kwatisa ke tso re di tšhutisang?

¹⁰ Ayitsano le lekgono di sa na di makega? Eya. Batho ba go tlala ba kwatisa ke gore re berekisa Bhayibele go šupetsa gore tso madumedi ya mangwana ma di tšhutisang ke matsaka. Baruti ba tšhutisa batho ba bona taba ya gore Modimo o tšhubelela batho ba dipelo tse diphifadu diheleng. Ba berekisa matsaka yane gore ba lawole batho ba bona. Malata ya Jehova ya gore ma rapela Modimo wa go re šupetsa gore o re nyaka ka matla, ma gelepa batho gore ba bone gore baa ba tshokanya ka tso ba ba tšhutisang. Baruti ba tšhutisa le gore moya a wo kgwe. Mo nkare dilo tsone ke nnete, di ra gore a go na motho ye ne a nyoko tsusiwa. Re tšhutisa gore dilo tsone a di šiyo ka Bhayibeleng. Le mo nkare madumedi ya go tlala ma tšhutisa gore Modimo wa re polanela gore re nyoko makegela king kela gore go na le matšhika ya gore a ma bonale ya gore ma re yetetsa ga dilo ka moka, rune re tšhutisa gore batho ba kgona go tikgetela fote ba ka tikgetela gore ba nyaka go berekela Modimo. Baruti ba maka ying mo re ba šiya ba pawogiye ka dilo tsa matsaka tso ba di tšhutisang? Ga go tlala baa fufulela!

11. Mantsu ya ma hlayyeng ke Jeso ga Johane 8:45-47 ma re Modimo o nyaka gore batho bage ba make ying?

¹¹ King so se ka makang gore tumelo ya rune yi sa šehle? Di nyaka re yamogele tso Modimo a  re botsang tsona mo nkare re kwana le nnete. (Bala Johane 8:45-47.) Rune re ngangarela nnete, a re tshwane le Sathane Diyabolo. A re nyake go maka selo sa gore se phigisana le tso re di dumelang. (Joh. 8:44) Modimo o nyaka gore batho bage ba ‘nyenye tsa go befa’ ke mokane ‘ba ngangarele ga tsa go loka’ go fo tshwana le Jeso.—Mrm. 12:9; Maheb. 1:9.

12. Mokgwa wo Jeso a yyeng a kgwa ka wona wo yye wa phiriketsa Majuda ya go tlala, ke ntaba?

¹² King se sengwana so se phiriketsiyeng Majuda ka dinako tsa Jeso? Pawulo o yitseri: “Re tšhomayela ka Kreste wa gore ba mo kokotele phateng, tsotsone di phiriketsa Majuda.” (1 Makor. 1:23) Ke ntaba Majuda ya go tlala ne ma sa kwisisi ka mokgo Jeso a kgwileng ka gona? Ne ba bona Jeso a kgwile go tshwana le sekgohlane fote go le motho wa go sinya, ba sa mmone go le Mesiya.—Dot. 21:22, 23.

13. Bo ba gore ne ba phiriketsa ke Jeso ba tlonnye king?

¹³ Bo ba gore ne ba na le Majuda ya gore ma yye ma phiriketsa ke Jeso di ba tlonyannye, ba sa bone gore aa na molato, ba mo hlayela matsaka fote ne ba mo maka lešidi. Batho ba gore ne ba sekisa Jeso ne ba fo kekemisa ba kene ba lebelele. Bo ba gore ne ba yahlula ba khota ye kgolo ya Juda ba yakgoswiye ba gahlana gore ba yahlule Jeso fote a baa latelela molawo wa tsa go yahlula. (Luk. 22:54; Joh. 18:24) Bo ba go yahlula a baa mo yahlula gabutši ga Jeso nakwela ba theetsela ba go mo hlayela matsaka, fote le bona ba liketsiye go nyakana le “so ba ka mo tanyang ka sona [ga Jeso] gore ba thogo mmolaya.” Mo ba bona nkare go fo swa go tima, moprista ye mogolo o yye a liketsa gore Jeso a titantele. Molawo ke mo wo sa kwane natso tsotsone. (Mat. 26:59; Mar. 14:55-64) Le ka nthago ga mo Jeso a tsugiye ga bo ba kgwileng, bo ba go yahlula ba dipelo tse diphifadu ba patele masole ya Roma ya gore ke mo go le bomatšinghelane ba lebitla “tšheleta ya go tlala ya silva” gore ma sabalatse matsaka ya gore ke ntaba lebitla lone le f’lo re nghee.—Mat. 28:11-15.

14. Mangwalo ma hlayye gore go nyoko tla go makega ying ka likgu la Mesiya?

¹⁴ Mangwalo ma re king? Le mo nkare Majuda ya go tlala ka dinako tsa Jeso ne ma sa nagane gore Mesiya o nyoko kgwa, seporofeto so se  hlayyeng ke Mangwalo se yitseri: “O berekisiye lephelo lage gwa šinya go segela le mo a kgwang fote le yene ne ba mmala le bo ba go sinya; ke mo a rwalele ba go tlala tso ba di sinnyeng, fote a phophothelela bo ba go sinya.” (Jes. 53:12) Byalo, Majuda ne ma sa tshwanela gore ma phiriketsege nakwela batho ba bolaya Jeso go tshwana le motho wa go sinya.

15. Dihlatse tsa Jehova ba di lebela ka dilo difeng tsa gore di makiye gore ba bangwana ba phiriketsege?

¹⁵ Ayitsano le lekgono di sa na di makega? Eya! Jeso ba mo hlayele matsaka ba boya ba re o sinnye, fote Dihlatse tsa Jehova ba sa na ba di maka lešidi le lekgono. Yema re fo beyisa ka ditaba ke tsowa. Gana hala ga mengwaga ya bo-1930 le bo-1940 ku United States, ke mo ba fo šuhlašuhla mokgwa wa rune wa go rapela Modimo. Ba bangwana ga bo ba go yahlula ke mo ba sa re tshware gabutši, fote ke mo ba sa tšebe le go tšeba. Ku Quebec ya hala Canada, ba dikereke le ba mmušo ke mo ba tshwarisanne, ba phigisa mmereko wa rune. Ba go tlala ba gore ne ba tšhomayela ba yye ba yisiwa jele ka taba la gore ke mo ba botsa bayagelane ba bona ka Mmušo wa Modimo. Ku Nazi ya hala Jeremane, bo ba mmušo ba gore a ba yisi felo ka Modimo ba bolayye magageru ya go tlala ya go tshepega ya gore ma sa gola. Fote ga mengwaga yo re leng ga yona, ba yye ba re magageru ya go tlala ya ku Russia ma na le molato fote ba ma kwalela jele ka taba la gore ke mo ma bolabola ka Bhayibele, tsotsone ke dilo tsa gore ba mmušo ba di tseya go le “dilo tsa go ro napa di fetelela.” Bhayibele ya New World Translation of the Holy Scriptures ya Serussia yona a ba nyake le go bona mo yi fitiyeng gona, fote ba re “yi napa yi ya ka matla” ka taba la gore yi berekisa lebitso la Jehova.

16. Johane wa Mathomo 4:1 yi re ke ntaba re sa tshepe matsaka ya batho ba ma bolabolang ka batho ba Jehova?

¹⁶ King so se ka makang gore tumelo ya rune yi sa šehle? Tšiba ditaba ka mokana ga tsona. Nakwela Jeso a tšhutisa ku Thabeng, o pasopisiye bo ne ba mo theetsele gore ba bangwana ba nyoko ‘bolabola mehlobo ka mokana ga yona ya dilo tsa go befa’ ka bona. (Mat. 5:11) Matsaka yawa ma tšwa ga Sathane. O kutšetsela bo ba go phigisa gore ba sabalatse matsaka ka bo ba gore ba kwana ka matla le nnete. (Kut. 12:9, 10) Di nyaka re sa theetsele matsaka ya ma hlayang ke bo ba go re phigisa. A di nyake re lisetsa matsaka yane ma re maka gore re kamake kela ma re maka gore so re se dumelang re se tseyele fase.—Bala 1 Johane 4:1.

17. Dilo tso di makegiyeng mo Jeso a soko kgwa di ka fo ba di phiriketsiye ba bangwana ka mokgo mang?

¹⁷ Mo Jeso a soko kgwa, o rekisiye ke ye mongwana wa mapostola yage 12 ya wona. Lepostola le lengwana le phigiye Jeso gararo, fote mapostola yage ka mokana ga wona ma yye ma mo šiya ka malobana ya mo a nyoko kgwa ka motshwana wa gona. (Mat. 26:14-16, 47, 56, 75) A di ya mo makatsa ga Jeso. Ke mo a hlayye di soko makega gore di ko segeleng. (Joh. 6:64; 13:21, 26, 38; 16:32) Mo batho ba di bona, ne di nyoko ba phiriketsa, ba bangwana ba re, ‘Mo nkare mapostola ya Jeso ma titshwara ka mokgo, le sa sa mpotsa selo ka mogoba wone!’

18. Ke diporofeto difeng tsa gore di makegiye mo Jeso a soko kgwa?

¹⁸ Mangwalo ma re king? Mengwaga ya go tlala mo Jeso a soko tla mo lefaseng, Jehova o hlayye ka Lentsung lage gore Mesiya ba nyoko mo rekisa ka 30 ya dikwetše tsa silva. (Zak. 11:12, 13) Jeso ke mo a nyoko rekisa ke monghanage ye mogolo. (Pis. 41:9) Moporofeta Zakariya le yene o ngwadiye gore: “Teya yewa wa go disa, ke mokane o lisetse morape wo palakane.” (Zak. 13:7) Tumelo ya bo ba gore baa tshepega ne yi nyoko tiya mo ba bona diporofeto tsowa tsa go bolabola ka Jeso di makega, fote tsotsone ne di nyoko ba gelepa gore ba sa phiriketsege.

19. King sa gore bo ba gore baa tshepega baa se tšiba?

 ¹⁹ Ayitsano le lekgono di sa na di makega? Eya. Ga dinako tso re phelang ga tsona, Dihlatse tsa Jehova tse dingwana tsa gore di ya tšibega di lisetsiye nnete, dya kgeloga, fote di liketsiye go ntsha le ba bangwana pateng. Ba sabalatsiye ditaba tsa gore a yi tsona, tsa gore a yi nape yi ro ba mong nnete, fote ba hlaya matsaka ka Dihlatse tsa Jehova dikuranteng, wayileseng, ga TV le ga inthanete. Mara bo ba gore baa tshepega a ba phiriketsege. Baa di tšiba gore Bhayibele yi na yi hlayye gore dilo tsowa di nyoko makega.—Mat. 24:24; 2 Pet. 2:18-22.

20. Re ka maka byang gore re sa phiriketse ke bo ba gore ba tšwile nneteng? (2 Thimothi 4:4, 5)

²⁰ King so se ka makang gore tumelo ya rune yi sa šehle? Di nyaka re maka gore tumelo ya rune yi dule yi tiyye ka go dula re titšhutisa, go dula re rapela, le go dula re maka mmereko wo Jehova a re neyyeng wona. (Bala 2 Thimothi 4:4, 5.) Mo re na le tumelo, re ka sa tšhoge mo re kwa ditaba tsa gore a yi tsona ka Dihlatse tsa Jehova. (Jes. 28:16) Mo nkare ga Jehova re mo nyaka ka matla, re kwana le Lentsu lage, fote re kwana ka matla le magageru, re ka sa phiriketse ke bo ba gore ba lisetsiye nnete.

21. Le mo nkare batho ba go tlala lekgono a ba theetsele molayetsa wa rune, king sa gore a re ya tshwanela go se kamaka?

²¹ Ku botala batho ba go tlala ba yye ba phiriketsega, ke mokane ba phiga Jeso. Mara ba go tlala ba yye ba mo dumela. Gana hone go kena le ka wwoši wa go tšwa ga mogoba wa Sanhendrini ya Majuda le “mogoba wo mogolo wa maprista.” (Meber. 6:7; Mat. 27:57-60; Mar. 15:43) Le lekgono, batho ba go tlala a ba phiriketsege. Ke ntaba? Ka taba la gore ba tšiba nnete ya ka Mangwalong fote ba kwana nayo ka matla. Lentsu la Modimo le re: “Bo ba go kwana le molawo wago ka matla ba nyoko beba; a se šiyo sa gore se nyoko ba phiriketsa.”—Pis. 119:165.