1. Jehova o tšhutisiye Abhrahama taba yifeng ya gore ya kgomoletsa?

 YOWA ke polabodisano ya gore Abhrahama a ka sa tsoge a yi libele. Modimo o berekisiye lengeloyi go botsa Abhrahama gore O nyoko fetsa ka mitši ya Sodoma le Ghomora. Morene wa go ba le tumelo ne yi mo hlupa taba yowa. O yye a butsisa gore: “Ayitsano mo o fetsa ka bo ba dipelo tse diphifadu o nyoko fetsa le ka bo ba go loka? . . . Ayitsano ye wa go yahlula lefase ka mokana ga lona a ka sa make tsa gabutši?” Jehova ke mo a lefisiye pelo mo a kene a tšhutisa monghanage wa gore o mo nyaka ka matla taba ye nngwana ya gore ka mokana ga rune ya re berekela fote ya re kgomoletsa, ya gore: Modimo a ka sa tsoge a fetsiye ka batho ba go loka.—Gen. 18:23-33.

2. Re tšiba byang gore mo Jehova a yahlula batho o yahlula ka go loka fote a kene a šupetsa gore o kwelana go baba?

² Re tšiba byang gore mo Jehova a yahlula batho o yahlula ka go loka fote a kene a šupetsa gore o kwelana go baba? Ka taba la gore re ya di tšiba gore “Jehova o bona tsa ka pelong.” (1 Sam. 16:7) Gabutšibutši, o tšiba “sa ka pelong ya motho [ye mongwana le ye mongwana].” (1 Mag. 8:39; 1 Dikor. 28:9) Phela yone ke mong nnete ya go makatsa. Jehova o re teya kgole ka go hlalefa, byalo re ka sa nape re di kwisisa gabutši gore king so se makiyeng gore Jehova a segelele dipheto tse dingwana. Pawulo wa lepostola mo a bolabola ka Jehova Modimo o yitseri: “Ka mokgo a yahlulang ka gona re ka sa di kwisisi!”—Marom. 11:33.

3-4. Re ka tiputsisa ying ka dinako tse dingwana, fote re nyoko petapeta ka ying ga hlogotaba yowa? (Johane 5:28, 29)

³ Le mo re na re di tšiba tsa gore Jehova o dula a maka tsa gabutši, re ka fo ba le diputsiso tso Abhrahama a yyeng a ba natso. Re  ka tiputsisa gore: ‘Ayitsano di ka makega gore batho bo Jehova a yyeng a fetsa ka bona ba Sodoma le Ghomora ba tle ba phele fote? Ayitsano di ka makega gore ba bangwana ba bona ba ba ‘tsose le ba gore a baa loka’?’—Meber. 24:15.

⁴ Tla re lebeleleneng tso re di kwisisang ka taba ya tsogo. A yi botalanyana ba re yedisele ka mokgo re kwisisang taba ya go ‘tsosa batho gore ba phele’ le ya gore ba ba ‘tsose gore ba yahludiwe.’ a (Bala Johane 5:28, 29.) Taba yo ba yi yedisiyeng yi napiye yi maka gore go lukisiwe tse dingwana tsa gore re nyoko petapeta ka tsona ga hlogotaba yowa le ya go latela. Ga taba ya gore Jehova o yahlula ka go loka, re nyoko thomisa ka go lebelela tsa gore a re di tšibi ke mokane ra ya ga tsa gore re ya di tšiba.

TSA GORE A RE DI TŠIBI

5. Ku botala, dikgatiso tsa rune ne di hlaya gore king ka bo ba gore ba yye ba fetsa ka bona ku Sodoma le Ghomora?

⁵ Ku botala, dikgatiso tsa rune ne di bolabola ka putsiso ya gore go makega ying ka bo ba gore Jehova o ba yahlula go le ba go sa loka. Re hlayye gore batho ba gore Jehova o yye a fetsa ka bona ba go tshwana le bala ba gore ne ba le Sodoma le Ghomora ba ka sa ba tsose. Mara ka nthago ga go tšhuta re kenelela le go rapela ka taba yowa, di fo ba lekgwaying gore re ka sa nape re reyane. Ke ntaba?

6. Ke mešupetso yifeng ye mengwana yo Jehova a yyeng a yahlula batho ba go sa loka fote king sa gore a re se tšibi?

⁶ Lebelela diputsiso tse dingwana tsa gore di yelana le taba yowa. Go na le ditaba tsa go tlala ka ho Bhayibeleng tsa gore di re botsa ka Jehova mo a yahlula batho ba go sa loka. Mo re beyisa, Jehova o yye a fetsa ka batho ka mokana ga bona ka Mogogola mara gwa fo phona Nnowa le ba mutši wage. Fote o yye a berekisa Maisrayele gore ma fetse ka kašupa ya ditšhaba tsa batho ba gore ne ba dula ga Naga yo ba ba Tshepisiyeng. A boya a berekisa lengeloyi gore le gagare 185 000 ya masole ya Maasiriya ka letšatši ka lloši go le bošego. (Gen. 7:23; Dot. 7: 1-3; Jes. 37:36, 37) Ga ditaba tsowa ka moka, ayitsano Bhayibele yi napa yi re thuletsela gore Jehova o segelele sepheto sa gore ye mongwana le ye mongwana ga batho bone go napa go fediye ka bona fote a ka sa sa ba tsosa? Awwa, a yi hlayi. Ke ntaba re ka reyane?

7. King sa gore a re se tšibi ka batho bo ba yyeng ba fetsa ka bona ka Mogogola kela bo ba yyeng ba fetsa ka bona nakwela Maisrayele ma hlula naga ya Kanana? (Lebelela sa ka tawong.)

⁷ Ga mešupetso yo re bolabodiyeng ka yona, a re tšibi ka mokgo Jehova a yyeng a yahlula ye mongwana le ye mongwana wa batho bone. Fote a re di tšibi tsa gore batho bo ba yyeng ba fetsa ka bona ba yye ba thulegela ke lešuba la gore ba tšhute ka Jehova le gore ba sokologe. Mo Bhayibele yi bolabola ka dinako tsa Mogogola, yi hlaya gore Nnowa ke mo go le “wa go tšhomayela ka go loka.” (2 Pet. 2:5) Mara a yi hlayi gore mo a kene a yaga areka ye kgolo ka matla, ne a liketsa go tšhomayelela motho ye mongwana le ye mongwana ho lefaseng. Go fo tshwana le ka batho ba dipelo tse di phifadu ba gore ne ba dula Kanana, a re di tšibi tsa gore ba yye ba thulegela ke lešuba la gore ba tšhute ka Jehova le gore ba tšhentšhe maphelelo.

8. King sa gore a re se tšibi ka batho ba Sodoma le Ghomora?

⁸ Re re king mara ka batho bo ba yyeng ba kgwa nakwela Jehova a psyitlanya Sodoma le Ghomora? Phela monna wa go loka ye ba reng ke Llota, ne a dula nabo batho bane. Mara ayitsano re ya di tšiba tsa gore o yye a tšhomayelela ka mokana ga bona? Dho. Ke nnete gore ne go le batho ba dipelo tse di phifadu, mara ayitsano ye mongwana le ye mongwana wa bona ne a tšiba sa gore se lukiye le sa go sa loka? O sa lebale gore go yye gwa ba le mogoba wa banna ga mutši wone wa gore ne wo nyaka go reyipa divakaši tsa Llota. Bhayibele yi re ga mogoba wone, ne go na le banna ba “go tlugisela ga ba banyana go segela ga ba bagolo.” (Gen. 19:4; 2 Pet. 2:7) Ayitsano re napa re  di tšiba gabutši gore Jehova, Modimo wa go kwelana go baba, o napiye a fetsa ka gore a go na le ka wweši ga batho bowa ye a nyoko mo tsosang? Phela Jehova o yye a botsa Abhrahama gore a go na le mong lesome la batho ba gore ba lukiye ga mutši wone. (Gen. 18:32) Byalo, ke mo ba sa loka fote Jehova ke mo a maka gabutši mo a fetsa ka bona. Mara ayitsano re ka bolabola re sa kamake gore a go na le ka wweši wa bona wa gore o nyoko tsoga mo ba “tsosa . . . le ba go sa loka”? Awwa, re ka sa nape re reyane!

9. King sa gore a re se tšibi ka Solomoni?

⁹ Go na le ditaba ka ho Bhayibeleng tsa go bolabola ka batho ba gore ne ba lukiye ke mokane ba tšhentšha ba ba ba go sa loka. Mo re beyisa, tseya ka Kgoši Solomoni. Ke mo a mo tšiba gabutši ga Jehova, a tšiba le ka mokgo a tshwaneleng a mo rapele ka gona fote Jehova o yye a mo rufa ka matla. Mara ka nthago, Solomoni o yye a thomisa go rapela medimo ya matsaka. Tsotsone di yye dya kwatisa Jehova ka matla ke mokane dya leya tsa go sasamela tsa gore di tsere makgolokgolo ya mengwaga. Bhayibele yi re mo Solomoni a kgwa, “o yye a bolokiwa le bokokwane wage,” go tokegela le banna ba go tshepega ba go tshwana le Kgoši Dafita. (1 Mag. 11:5-9, 43; 2 Mag. 23:13) Mara ayitsano mokgwa wo ba mmulukiyeng ka wona wo rela gore a go jiki ba nyoko mo tsosa? Awwa, Bhayibele a yi hlayi. Ba bangwana ba ka tseya gore Solomoni ba nyoko mo tsosa ka taba la gore Bhayibele yi re, “motho wa gore o kgwile o tshwarediwwe ga tso a di sinnyeng.” (Marom. 6:7) Eya, taba yone ke nnete mara a yi rele gore ka moka batho bo ba hlokofeleng ba nyoko ba tsosa, tsa nkare di ro ba tshwanela gore ba kraye lephelo la nyuwane. Taba ya tsogo re ro yi neya ke Modimo wa rune wa gore wa nyakanana. O yi neya bo a nyakang gore ba thulegele ke lešuba la gore ba mmerekele go ya go yye. (Jobo 14:13, 14; Joh. 6:44) Ayitsano Solomoni yene ba nyoko mo tsosa? Jehova ke yene a tšibang phetolo ya putsiso yowa; rune aritši. Mara so re se tšibang ke gore Jehova o nyoko maka tsa gabutši.

TSA GORE RE YA DI TŠIBA

10. Jehova o tikwa byang ka go fetsa ka batho? (Hezekiyele 33:11) (Lebelela le sethombhe.)

¹⁰ Bala Hezekiyele 33:11. Jehova o re botsa ka mokgo a tikwang mo a yahlula batho. Petro wa lepostola ba yye ba mo hlohletsela gore a hlaye mantsu ya go tshwana le ya Hezekiyele wa go porofeta mo a re “Jehova . . . aa nyake gore go kgwe le motho ka wwoši.” (2 Pet. 3:9) Mantsu yawa maa re kgomoletsa. Re ya di tšiba gore Jehova a ka sa fetse ka batho go ya go yye go se na sa gore se mo tšhofiye gore a make ka mokgonone. O kwelana go baba ka matla fote o dula a šupetsa go kwelana go baba mo di kgonega.

11. Ke bomang ba gore ba ka sa ba tsose, fote re di tšiba byang tsotsone?

¹¹ King sa gore re ya se tšiba ka batho ba gore ba ka sa ba tsose? Bhayibele yi bolabola ka mešupetso ya go tlalanyana. b Jeso o hlayye gore Judase Iskariyoti ba ka sa mo tsose. (Mar. 14:21; lebelela le Johane 17:12) c Judase ke mo a di tšiba gabutši gore tso a di makang ne di tšhayisana le tso Jehova le Morwayi Wage ba di nyakang. Mara ke yenela o f’lo rwala hlogo a ye di makeng. (Lebelela Mareka 3:29, o lebelele fote le hlogotaba ya gore “Sebe Seo se ka se Lebalelwego ke sa Mohuta Mang?” ga jw.org.) Go fo tshwana le ka mokgo Jeso a hlayyeng gore ba bangwana ba gore ba yeta tsa sedumedi mahlong ba gore ne ba mo phigisa ba nyoko kgwa fote ba ka sa be le tshepo ya gore ba nyoko ba tsosa. (Mat. 23:33) Fote Pawulo wa lepostola o pasopisiye ka gore bo ba go kgeloga ba gore a ba sokologe ba ka sa ba tsose.—Maheb. 6:4-8; 10:29.

12. King so re se tšibang ga taba ya gore Jehova o kwelana go baba? Beyisa.

¹² King so re se tšibang ka taba ya gore Jehova o kwelana go baba? O šupetsiye ka mokgo mang  gore “aa nyake gore go kgwe le motho ka wwoši”? Lebelela ka mokgo a šupetsang gore o kwelana go baba ga batho ba bangwana ba gore ba sinnye ka matla. Kgoši Dafita o yye a sinya ka matla, gana hone go kena le go maka bonghwahla a boya a ro bolaya. Ke nnete gore, Dafita o yye a tisola ke mokane Jehova a mo kwela go baba ka go mo tshwarela. (2 Sam. 12:1-13) Kgoši Manase o yye a maka dilo tsa go befa ka matla tsa gore di tshosa le go di lebelela. Mara, le ga taba yonone ya gore ke ye kgolo ka matla, Jehova o šupetsiye Manase wa gore wa tisola gore o mo kwela go baba ka go mo tshwarela a sa kokole. (2 Dikor. 33:9-16) Mešupetso yowa yi fo re gopotsa taba ya gore Jehova o šupetsa gore o kwelana go baba mo a di bona gore di ya tshwanela gore a make ka mokgonone. O nyoko ba tsosa batho ba mošaga wonone ka taba la gore ba di bonne ka bo bonabeng gore ba sinnye ka matla ke mokane ba tisolela tsotsone ba di makiyeng.

13. (a) Ke ntaba Jehova a yye a šupetsa Maninive gore o ma kwela go baba? (b) Ka nthago Jeso yene o yitseri king ka Maninive?

¹³ Phela le rune re ya di tšiba gore Jehova o yye a kwela Maninive go baba. Modimo o butsiye Jona gore: “Go sinya ga bona go segele ho gage.” Mara Jehova o yye a ba kwela go baba ke mokane a ba tshwarela ka taba la gore ba yye ba sokologa ga tso ba di sinnyeng. O yye a šupetsa gore o kwelana go baba go phala Jona kgole. Ne di nyaka gore Modimo a gopotse moporofeta yewa wage wa gore o kwatiye ka matla gore Maninive yane ne ma sa “tšibi sa go loka le sa go sa loka.” (Jona 1:1, 2; 3:10; 4:9-11) Ka nthago, Jeso o yye a berekisa mošupetso wone gore a tšhutise taba ya gore Jehova o lukiye fote o kwelana go baba. Jeso o yitseri Maninive ya gore maa tisola “mo Modimo a yahlula batho ka mokana ga bona, … [ma] nyoko tsoga.”—Mat. 12:41. [NWT]

14. Taba ya gore Maninive ma “tsusiwa gore ba yahludiwe” yi ra gore king ga wona?

¹⁴ Mara taba yowa ya gore Maninive ‘ma nyoko tsoga mo Modimo a yahlula batho ka mokana ga bona’ yi rela ying? Jeso o tšhutisiye ka taba ya gore ku mahlong ba nyoko “tsusiwa gore ba yahludiwe.” (Joh. 5:29) Ke mo a rela ga Sekete sa Mengwaga mo a Lawola, ka nako ya mo “ba go loka le ba go sa loka” ba tsusiwa. (Meber. 24:15) Bo ba gore a baa loka ba “tsusiwa gore ba yahludiwe.” Tsotsone di rela gore mo ba šele ba ba tsusiye, Jehova le Jeso ba nyoko lebelela gore ayitsano baa theetsela ba boya ba maka tso ba di tšhutiyeng kela awwa. Mo nkare Maninive ya gore ba ma tsusiye a ma nyake go berekela Jehova ga morapelo wa go yela, a ka sa ma lisetsi ma phela  o nyoko fetsa ka wona. (Jes. 65:20) Mara ka mokana ga bona bo ba kgetang go berekela Jehova ba kene ba tshepega, ba nyoko thulegela ke lešuba la gore ba phele go ya go yye!—Dan. 12:2.

15. (a) Ke ntaba di nyaka re kganela kgole le go hlaya gore ga bo ba yye ba fetsa ka bona ku Sodoma le Ghomora a go na le ka wweši wa gore o nyoko tsusiwa? (b) Mantsu ya ma leng ga Juda 7 re ka ma kwisisa ka mokgo mang? (Lebelela lebhokisi la gore, “ Anthe Juda ne a ra gore King?”)

¹⁵ Mo Jeso a bolabola ka Sodoma le Ghomora o yitseri, ka “Letšatši la go Yahlula” di nyoko ba lula ga bona go phala ga batho ba gore ba yye ba ganana le tsage ba boya ba sa theetsele tso a di tšhutisang. (Mat. 10:14, 15; 11:23, 24; Luk. 10:12) Anthe ke mo a ra gore king? Re ka fetsa ka gore Jeso ke mo a fo titšhelela tsa go natifisa ga taba yowa. Mara gabutšibutši ne go sa nape go ba taba ye kgolo ka matla ya gore yi fapana le yo ne a bolabola ka yona ga Maninive. Di fo ba lekgwaying gore Jeso ke mo a sa kamake tso ne a di hlaya. Mo a bolabola ka “Letšatši la go Yahlula” howa, ne yi fo tshwana le taba ya go yahlula yo ne a bolabola ka yona ga Maninive. Go fo tshwana le Maninive, batho ba Sodoma le Ghomora ba makiye dilo tsa go befa ka matla. Mara Maninive ma yye ma thulegela ke lešuba la gore ma sokologe. Go tokegela gana hone, o sa lebale tso Jeso a di hlayyeng ga taba ya go “tsusiwa gore ba yahludiwe.” Gana hone go nyoko kena le “bo ba makiyeng dilo tsa go sa loka.” (Joh. 5:29) Byalo, di šupa nkare ga batho ba Sodoma le Ghomora ba bangwana ba gona di ka makega gore ba be le tshepo. Phela di ya kgonega gore ba bangwana ga batho bone ba tsusiwe fote di ka makega gore re thulegele ke lešuba la go ba tšhutisa ka Jehova le Jeso Kreste.

16. King so re se tšibang ga taba ya gore ke mang ye Jehova a nyoko mo tsosang kela dho? (Jeremiya 17:10)

¹⁶ Bala Jeremiya 17:10. Temanyana yowa yi re gelepa gore re thogo bona tsa gore re ya di tšiba ga mokgwa wo Jehova a yahlulang ka wona: Phela Jehova ke yene ye a dulang a ‘pombhola pelo, a boya a nyakolla so motho a se naganang.’ Mo re tla ga taba ya go tsosa batho ku mahlong, o nyoko fo maka ka mokgo a tlwayeleng a “neya ye mongwana le ye mongwana go ya ka tso a di makiyeng.” Jehova a ka sa thogathoge mo di hlokega gore a make ka mokgonone mara o nyoko kwelana go baba mo go kgonega. Byalo, tla re kganeleneng kgole le taba ya go hlaya gore motho a ka sa tsusiwi kela byang mara aritši mo nkare re tšiba se sengwana, yone ke taba ye nngwana!

 “YE WA GO YAHLULA LEFASE KA MOKANA GA LONA” O NYOKO ‘MAKA TSA GABUTŠI’

17. King so se nyoko makegang ku mahlong ga batho ba gore ba kgwile?

¹⁷ Go tlugisela mo Adamo le Efa ba yema le Sathane ke mokane ba jikela Jehova Modimo, go šele go kgwile batho ba dimiliyoni. Phela “lenaba … lo ba reng ke likgu” le ro hlagela! (1 Makor. 15:26) Mara king so se nyoko makegang ku mahlong ga batho bone ka mokana ga bona? Paranyana ya ba 144 000 ya bo ba latelelang Kreste ba go tshepega ba nyoko tsusiwa gore ba phele ba sa sa kgwa ku legedimong. (Kut. 14:1) Banna le basadi ba go tladisa mohlolo ba gore ga Jehova ba mo nyaka ka matla ba nyoko ba ga bo ba gore ba ba “tsosa [le] batho . . . ba go loka,” fote ba nyoko phela go ya go yye ho lefaseng mo ba ka fo dula ba lukiye ga Sekete sa Mengwaga mo go Lawola Kreste le mo ba ba liketsa la mafelelo. (Dan. 12:13; Maheb. 12:1) Fote ka Sekete sa Mengwaga, “ba go sa loka”—re ra le bo ba gore a sanka ba berekela Jehova kela “bo ba makiyeng dilo tsa go sa loka”—ba nyoko thulegela ke lešuba la go tšhentšha ka mokgo ne ba maka dilo ka gona ke mokane ba ba malata ya Jehova ya go tshepega. (Luk. 23:42, 43) Mara, ba bangwana ne ba fifele dipelo ka matla ba tikemisele go sinyela Jehova le go šašisa tso a nyakang go di segelela la go šinya a fetsa ka gore ka mokana ga bona ba ka sa tsusiwi.—Luk. 12:4, 5.

18-19. (a) Ke ntaba re sa kamake mokgwa wo Jehova a nyoko yahlulang bo ba kgwileng? (Jesaya 55:8, 9) (b) Re nyoko petapeta ka ying ga hlogotaba ya go latela?

¹⁸ Ayitsano re ka fetsa ka gore ka moka nako mo Jehova a yahlula batho o dula a sa pumutsi? Eya! Go fo tshwana le ka mokgo Abhrahama ne a kwisisa ka gona gore Jehova o felegelele, o hlalefiye mong go hlalefa, o kwelana go baba fote ke “wa go yahlula lefase ka mokana ga lona.” O tšhutisiye Morwayi wage fote o mo neyye mmereko wa go yahlula ye mongwana le ye mongwana. (Joh. 5:22) Ka mokana ga bona Papa le Morwayi ba kgona go bona so se leng ka pelong ya motho. (Mat. 9:4) Byalo, mo ba yahlula ba ko di kgoneng go ‘maka tsa gabutši’!

¹⁹ Tla re tikemiseleneng go tshepela ga Jehova le dipheto tso a di segelelang. Re di tšiba gabutši gore rune a di re tshwanele gore re yahlule—mara yene wa tshwanelega! (Bala Jesaya 55:8, 9.) Nka taba lo re tshepang Jehova le Morwayi wage gore go be bona bo ba yahlulang ga dilo ka moka. Fote re ya di tšiba gore Kgoši ya rune Jeso o nyoko kopisela Papage gabutši mo di tla ga taba ya go maka dilo ka go loka le go kwelana go baba. (Jes. 11:3, 4) Byalo, re re king ka taba ya ka mokgo Jehova le Jeso ba nyoko yahlulang batho ka nako ya motšhatšhamelo wo mogolo? King tsa gore a re di tšibi? Fote king tsa gore re ya di tšiba? Hlogotaba ya rune ya go latela yi nyoko fetola diputsiso tsone.