1-2. (a) Ke ntaba bo ba gore a yi botala ba šadhiye di nyaka ba tshepela ga Jehova? (Pisalema 37:3, 4) (b) Re nyoko bolabola ka ying ga hlogotaba yowa?

AYITSANO o thina le go šadha kela a yi botala o šadhiye? Mo nkare go ka mokgonone, a re kamake gore o jagele go jabolela lephelo le motho wago wa gore o mo nyaka ka matla. Nnete ke gore mošadho le wona wo na le tsa wona fote di nyaka motho a segelele dipheto tse dikgolo. Tso le di makang mo le gahlana le dintshitshire le dipheto tso le di segelelang, ke tsona tso di ko šupetsang gore ayitsano le ko jaboleng ku mahlong. Mo le tshepela ga Jehova, le nyoko maka dipheto tsa go šupetsa gore le hlalefiye, mošadho wa lune wo nyoko fo ya wo tiyelela fote le nyoko jabola tsa nkare ke moka. Mo o ka sa mo theetsele ga Modimo mo a go yetetsa, a go jiki o nyoko gahlana le dintshitshire tsa go sa fele tsa gore di nyoko maka gore mošadho wago wo go šigamise.—Bala Pisalema 37:3, 4.

² Le mo yi le gore hlogotaba yowa yi bolabola ka bo ba gore a yi botala ba šadhiye, yi nyoko bolabola ka dintshitshire tso ka mokana ga bona bo ba šadhiyeng ba ka gahlanang natso. Yi nyoko napa yi šihlela tso re ka di tšhutang ga mešupetso ya banna le basadi ba go tshepega ba ka ho Bhayibeleng. Mešupetso yowa ya ka Bhayibeleng yi re tšhutisa dilo tso re ka di berekisang mo re kene re phela re ra le mong ga taba ya mošadho. Fote re nyoko tšhuta gore ga dinako tso tsa rune, bo ba šadhiyeng ba gahlana le tsa mošaga mang.

3-4. Bo ba gore a yi botala ba šadhiye ba ka gahlana le dintshitshire tsa mošaga mang?

³ Ba bangwana ba ka kutšetsela bo ba gore a yi botala ba šadhiye gore ba phele ka mokgo batho ba phelang. Mo re beyisa, babelegi le mašaga ba ka gapeletsa bo ba gore ba tseyanne gore ba yakgoswe ba kraye bana. Kela banghana ba gore ba ba nyakela tse di butši le ba ka mitšing ya bona ba ka ba hlohletsela gore ba tirekele ntlo ke mokane ba yi tlatse ka dilo tsa majabajaba.

⁴ Mo bo ba tseyananneng ba ka sa pasope, ba ka tikraya ba segelele dipheto tsa gore di ka ba kgamisa ka dikoloto. Byalo, ba le ka babedi monna le mosadi di ka nyaka gore ba bereke diawara tsa go lefa gore ba thogo patela dikoloto tsone. Mmereko wone wo ka poma nako yo ba tshwaneleng ba yi berekisele go titšhutisa Bhayibele, morapelo wa mutši le go ya tšhomong. Bo ba tseyanneng ba ka thomisa go lofa megahlano ba liketsa go yeketsa nako ga mmereko wa bona gore ba thogo kraya tšheleta ya go hlalefa kela ba timakele lebitso meberekong ya bona. Tsotsone di ka maka gore ba feleletse ba phuka ke mašuba ya go yeketsa mmereko wa bona ga Jehova.

5. King so o se tšhutang ga mošupetso wa Klaus le Marisa?

⁵ Re šele re di bonne gore mo o ka lelekisana le dilo tsa majabajaba, o ka sa ro jabola. Lebelela gore Klaus le Marisa ba gore ba šadhiye ba yye ba tšhuta ying ga taba yowa. * Mo ba sa tšwa go šadha, ka babedi ga bona ke mo ba bereka gore ba thogo phela mothebenene. Le mo go le ka mokgonone, ke mo ba tikwa gore a baa kgotsofala. Klaus o yitseri: “Ke mo re na le dilo tsa go tlala mara ga tso tsa Modimo ke mo re sa tšibi tso re nyakang go di segelela. Go bolabola nnete, lephelo ke mo le tlemananne le boya le gakga.” Di ka makega gore le wene o di bonne gore go lelekisana le dilo tsa majabajaba a sanka gwa go leyela go kgotsofala. Mo nkare go ka mokgonone, o sa nape o kgongwela ka matla. Go lebelela mešupetso ya gabutši ya ba bangwana go ka go gelepa ga taba yowa. Tla re thomiseneng ka go lebelela so banna ba ka se tšhutang ga mošupetso wa Kgoši Jehošafate.

6. Kgoši Jehošafate o di makiye byang tso di hlayang ke Diyema 3:5, 6 mo a gahlana le dintshitshire tse dikgolo?

⁶ Lune banna, ayitsano le fela le kwa di le roba go maka mmereko wo le tshwaneleng le wo make? Mo nkare go ka mokgonone, le ka tšhuta ga mošupetso wa Kgoši Jehošafate. Ka taba la gore Jehošafate ne go le Kgoši, ke mo a na le mmereko wa go pasopa setšhaba ka moka! O di kgonne byang go tshwaragana le mmereko wone wa go roba? Jehošafate o makiye so a ka se kgonang gore a pasope batho bage. O makiye gore mutši wa Juda wo tšhireletsege a boya a kgobaketsa masole ya go teya ka ku ga 1 160 000. (2 Dikor. 17:12-19) Ka nthago, Jehošafate o yye lebana le  ntshitshire ye kgolo. Masole ya go tladisa mohlolo ya Maamoni, Mamowaba le banna ba go tšwa dithabeng tsa Seyire ba yye ba tshosetsa yene, ba mutši wage le setšhaba sage. (2 Dikor. 20:1, 2) Jehošafate o yye a maka ying? O yye a kgopela Jehova gore a mo gelepe a boye a mo tiyise. Tso a di makiyeng ke mo di yelana le tso di hlayang ke Diyema 3:5, 6. (Bala.) Thapelo ya Jehošafate ya go tinyanafatsa ya gore yi nyarela ga 2 Dikoronika 20:5-12, yi šupetsa gore ke mo a tshepele ka matla ga Papage wa ku legedimong. Jehova o yi fetodiye byang thapelo ya Jehošafate?

7. Jehova o yi fetodiye byang thapelo ya Jehošafate?

⁷ Jehova o bolabodiye le Jehošafate a berekisa Jahaziyele wa Lelifi. Jehova o yitseri: “Yema o sa thogathoge, ke mokane o bone mo Jehova a go phonisa.” (2 Dikor. 20:13-17) Wone a yi mokgwa wa gore ne wo tlwayelegiye wa go lwa ntwa! Mara tso ne ba re a di make ke mo di sa tšwe ga motho; ke mo di tšwa ga Jehova. Ka taba la gore Jehošafate ne a tshepa Modimo, o yye a fo maka ka mokgo ba mmotsang. Mo a ye gahlana le manaba yage, a sanka a beya masole ya gore ke digele ku mahlong, mara o yye a beya ba go yepelela. Jehova a sanka a tšebisa Jehošafate; O yye a hlula manaba yage.—2 Dikor. 20:18-23.

8. King so banna ba ka se tšhutang ga mošupetso wa Jehošafate?

⁸ Lune banna, le ka tšhuta ga mošupetso wa Jehošafate. Ke mmereko wa lune gore le bone gore ba mitši ya lune ba pasopegiye, byalo di nyaka le karakare gore le yi tšhireletse. Mo le gahlana le dintshitshire, le ka bona nkare lune beng le ko di kgoneng tsa go tshwaragana natso. Mara di nyaka ye mongwana le ye mongwana a kganele kgole le taba yonone ya go titshepa ka matla. So o ka se makang ke gore mo o le ntoši o rapele Jehova gore a go gelepe. Go tokegela gana hone, rapela di go baba o na le mosadi wago. Kgopela Jehova gore a go yetetse ka go bala Bhayibele le dikgatiso tsa mokgahlo wa Modimo o boye o berekise tso a go yetetsang ka tsona. Di ka makega gore ba bangwana ba sa kwane le dipheto tso o di segeleleng o berekisa Bhayibele fote ba ka hlaya gore tso o di makang ke bophokophoko. Ba ka boya ba re so o se nyakang gore o thogo pasopa ba mutši wago ke tšheleta le dilo tso o ka kgonang go di reka. Mara gopola mošupetso wa Jehošafate. O šupetsiye gore o tshepela ga Jehova ka tso a di makang. Jehova a sanka a lahla monna yene wa go tshepega, le wene a ka sa go lahle. (Pis. 37:28; Maheb. 13:5) Bo ba tseyanneng ba ka maka byang gore ba jabolele lephelo ba le ggoši?

9. King so re se tšibang ka moporofeta Jesaya le mosadi wage?

⁹ So moporofeta Jesaya le mosadi wage ne ba se yetisa mahlong mo ba kene ba phela, ke go berekela Jehova. Jesaya ke mo go le moporofeta fote di ka makega gore mosadi wage ne a na le mmereko wo a wo makang wa go yelana le go porofeta, nka taba lo ba reng ke “moporofeta wa mosadi.” (Jes. 8:1-4) Ba le ka babedi, Jesaya le mosadi wage ke mo ba yetisa mahlong taba ya go rapela Jehova. Ke mošupetso wa gabutši wa bo ba gore ba šadhiye!

10. Go tšhuta ka diporofeto tsa Bhayibele di ka gelepa bo ba gore ba šadhiye ka mokgo mang gore ba karakare ka matla mo ba berekela Jehova?

¹⁰ Bo ba gore ba šadhiye ba ka maka so ba ka se kgonang gore ba dule ba berekela Jehova. Ba ka tiyisa taba ya go tshepela ga Jehova ka go tšhuta ka diporofeto tsa ka Bhayibeleng ba le ggoši fote ba bone gore di dula di makega ka mokgo mang. * (Tito 1:2) Ba ka lebelela gore le  bona ba ka tšhela letsogo byang ga taba ya gore diporofeto tse dingwana tsa Bhayibele di makege. Mo re beyisa, ba ka gelepa ga taba ya gore go makege seporofeto sa Jeso sa gore ditaba tsa go bafala ba nyoko di tšhomayela lefaseng ka mokana ga lona nako ya gore go fele ka lona yi soko segela. (Mat. 24:14) Mo bo ba gore ba šadhiye ba bona gore seporofeto sa Bhayibele se ya makega, ba nyoko napa ba karakara ka matla mo ba berekela Jehova.

11. King tso Phrisilla le Akhwila ba kgonneng go di maka fote ke ntaba?

¹¹ Bo ba gore a yi botala ba šadhiye ba ka tšhuta ga Phrisilla le Akhwila, monna le mosadi ba Majuda ba gore ne ba dula Roma. Ba kwile ditaba tsa go bafala ka Jeso ke mokane ba tšhentšha ba ba Makreste. A re kamake gore lephelo la bona ke mo le ba kgotsofatsa. Mara mo Ndhuna yo ba reng ke Tlelodiyase yi botsa Majuda ka mokana ga wona gore ma tloge Roma, lephelo la bona le yye la tšhentšha. Lebelela gore tsotsone ne di nyaka gore Akhwila le Phrisilla ba make ying. Ke mo di nyaka ba rura ga poleke yo ba yi tlwayeleng, ba thomise mutši wa nyuwane fote ba thomise bhizinisi ya bona ya go maka matente ga poleke ya nyuwane. Ayitsano tsotsone di nyoko maka gore ba nape ba di ragela ku nthago tso tsa Mmušo? Phetolo ya putsiso yowa re tshepa gore wa yi tšiba. Ga mutši wa bona wa nyuwane wa ku Korente, Akhwila le Phrisilla ne ba berekisana le phutego ya thina le mo ba dulang ba tshwarisanne le Pawulo wa lepostola gore ba tiyise magagabo ya gana hone. Mo goya-goya, ba rurela ga ditoropo tse dingwana tsa gore ke mo di gayela batšhomayedi. (Meber. 18:18-21; Marom. 16:3-5) Wa tšiba ba yye ba jabolela lephelo ba le ka babedi!

12. Ke ntaba bo ba šadhiyeng di nyaka ba tšibe tso ba nyakang go di segelela ga tso tsa Modimo?

¹² Bo ba šadhiyeng ga dinako tso tsa rune ba ka yekisela Phrisilla le Akhwila ka go yetisa tsa Mmušo wa Modimo mahlong. Nako ya gabutši ya gore monna le mosadi ba bolabodisane ka tso ba nyakang go di segelela ke ya mo ba sa kgetisana. Mo monna le mosadi ba segelela dipheto ba le ggoši ba boya ba karakara ka matla gore ba kwane ka tso ba di segeleleng ga tso tsa Modimo, ba nyoko thulegela ke lešuba gore ba  bone mo moya wa go hlawolega wa Jehova wo ba berekela. (Mmo. 4:9, 12) Lebelela tso di makegeleng Russell le Elizabeth. Russell o re, “Mo re sa kgetisana, so ne re dula re bolabola ka sona ke tso ne re nyaka go di segelela ga tso tsa Modimo.” Elizabeth o re, “Re bolabodiye ka taba yone gore mo di nyaka re segelela dipheto tse dingwana ku mahlong di sa tle di re šitisa go segelela tso re di polanneng.” Seyemo sa Russell le Elizabeth se ba dumelele gore ba rurele Micronesia go ye gelepa mo go gayelang batšhomayedi.

13. Pisalema 28:7 yi re re nyoko kraya ying mo ga Jehova re mo tshepa?

¹³ Go fo tshwana le Russell le Elizabeth, ba go tlala bo ba šadhiyeng ba segelele sepheto sa gore ba tikone tse dingwana gore ba thogo yeketsa nako ya go maka mmereko wa go tšhomayela le wa go tšhutisa. Mo bo ba gore ba šadhiye ba tšiba gore ba nyoko segelela ying ga taba ya go berekela Jehova ba boya ba tshwarisana gore ba thogo di segelela, ba nyoko ba rufa tsa nkare ke moka. Ba nyoko di bona gore Jehova wa ba pasopa, tsa go mo tshepa di nyoko fo ya di hluhlutela ba boya ba jabola tsa mannete.​—Bala Pisalema 28:7.

14. Petro le mosadi wage ba šupetsiye ka mokgo mang gore baa di tshepa tso di leng ga Matewu 6:25, 31-34?

¹⁴ Bo ba šadhiyeng ba ka tšhuta le ga mošupetso wa Petro wa lepostola le mosadi wage. Mo go šele go fitiye gana hala ga kobodi ya dikgwedi kela mongwaga Petro wa lepostola a gahlanne le Jeso, ne go na le sepheto se segolo so di nyakang a se segelela. Mmereko wa Petro ne go le wa go loba dihlapi. Byalo, mo Jeso a bitsa Petro gore a mo šale nthago, ne di nyaka Petro a thomise ka go nagana ka seyemo sa mutši wage. (Luk. 5:1-11) Petro o kgetiye go ye tšhomayela le Jeso. O kgetiye gabutši wa tšiba! Fote re ko ba re sa yi lahla mo re ka re mosadi wage o a yye thega sepheto so a se segeleleng. Bhayibele yi šupetsa gore ka nthago ga mo Jeso ba mo tsusiye, Petro ne a fela a sepela le mosadi wage. (1 Makor. 9:5) A re kamake gore mosadi wa Petro ne go le Mokreste wa gabutši, nka taba lo Petro ne a sa titšhoge mo a wolola banna le basadi ba Makreste. (1 Pet. 3:1-7) Di fo ba lekgwaying gore Petro le mosadi wage ne ba tshepa tso Jehova a di tshepisiyeng tsa gore O nyoko ba pasopa mo ba ka yetisa tsa Mmušo mahlong.—Bala Matewu 6:25, 31-34.

15. O tšhuta ying ga mošupetso wa Tiago le Esther?

¹⁵ Mo nkare go šele go fitiye mengwaganyana le šadhiye, le ka maka byang gore le ye mahlong le nabela go yeketsa ga mmereko wa go tšhomayela? Se sengwana so le ka se makang ke gore le lebelele ba bangwana bo ba šadhiyeng gore ba gahlanne le tsa mošaga mang. Mo re beyisa, le ka bala dihlogotaba tsa go lategetsana tsa gore, “Ba Yye ba Berekela Modimo ba sa Tšhofe ke Motho.” Dihlogotaba tsa mošaga wonone di gelepiye Tiago le Esther, monna le mosadi ba gore ba tšwa Brazil, gore ba nabele go ye tšhomayela mo go gayelang batšhomayedi. Tiago o re: “Mo re bala ka tso Jehova a yyeng a di maka mo a gelepa malata yage ya dinako tso tsa rune, le rune ne re nyaka go kwa gore di byang go yetetsa ke Jehova a boya a re pasopa.” Mo nako yi kene yi ya ba yye ba rurela Paraguay, ga gore ne ba bereka ga tšhomo ya mmolabolo wa Sepotokisi go tlugisela ka 2014. Esther o yitseri: “Temanyana yo re kwanang nayo ka matla ke ya Maefeso 3:20. Ke gatleletlele re bona mantsu ya ma leng ga temanyana yowa ma makega mo re kene re berekela Jehova.” Ga lengwalo lo Pawulo a le ngwaleleng Maefeso, o tshepisiye gore Jehova o nyoko re neya tsa go feta tso re di kgopelang. Ye lune, di fo ba ka mokgonone!

16. Bo ba gore a yi botala ba šadhiye ba ka kgopela bomang gore ba ba yeletse mo go na le tso ba nyakang go di segelela?

 ¹⁶ Bo ba gore a yi botala ba šadhiye ba ka tšhuta go tshepela ga Jehova ba kopisela ga ba bangwana ba gore ke botala ba kene ba tshepela ga Jehova. Ba bangwana ba gore ba šadhiye ba fetsiye mengwagangwaga ba maka mmereko wa go tšhomayela wa nako ka moka. Ke ntaba o sa ba kgopele ba go yeletsa mo o na le tso o nyakang go di segelela? Yowa ke tsela ye nngwana ya go šupetsa gore o tshepela ga Jehova. (Diy. 22:17, 19) Bagolo ba ka gelepa bo ba gore a yi botala ba šadhiye gore ba tšibe tso ba nyakang go di segelela ga tso tsa Modimo ba boye ba karakare ka matla gore ba di segelele.

17. King so se yyeng sa makegela Klaus le Marisa fote re ka tšhuta ying ga mošupetso wa bona?

¹⁷ Ka dinako tse dingwana, dipheto tso re di segeleleng tsa go nyaka go yeketsa ga mmereko wo re wo makang, a di makege ka mokgo re nyakang. Tseya ka mošupetso wa Klaus le Marisa, bo go bolabodiwweng ka bona ka ho kgakala. Mo go šele go fitiye kararo ya mengwaga ba šadhiye, ba yye ba rurela kgole le gaye ke mokane ba bereka ga mmereko wa go yaga ka go tinyakela ga lekala la Finland. Mara ba yye ba kwelela tsa gore ba ka sa ba dumelele gore ba dule go šinye go fela kobodi ya dikgwedi. Tsotsone di yye dya thomisa ka go ba kgongwetsa. Mara ka nthagonyana, ba yye ba ba kgopela gore ba tle ba tšhute mmolabolo wa Searabho fote gana byalo ba jabolela go tšhomayela ga poleke ya mmolabolo wa Searabho. Marisa o yitseri: “A di lula go tloga ga poleke yo o yi tlwayeleng ke mokane o lisetsa dilo ka mokana ga tsona matsogong ya Jehova. Mara ke šele ke di bonne gore Jehova o dula a re gelepa ka mokgwa wa gore ne re sa wo nagane. Mo ke šele ke di bonne ka maahlo ke yye ka napa ke tikokotlela ka Jehova ka matla.” Ga mošupetso wowa, o napa o di bona gore mo o ka tshepela ga Jehova o nyoko dula a go rufa.

18. Bo ba gore ba šadhiye ba ka maka ying gore ba dule ba tshepela ga Jehova?

¹⁸ Mošadho re ro wo neya ke Jehova. (Mat. 19:5, 6) O nyaka gore bo ba gore ba šadhiye ba jabolele mošadho wo a ba neyyeng wona. (Diy. 5:18) Lune ba gore a yi botala le šadhiye, ke ntaba le sa pombhole gore king so le tshwaraganneng ka sona ho lephelong? Ayitsano le karakara ka matla go šupetsa Jehova gore le tseyela gedimo so a le neyyeng sona? Bolabolaneng le Jehova ka thapelo. Nyakolla ka Bhayibeleng gore o thogo kraya ditšhiko tso di ka go berekelang ga seyemo so o leng ga sona. O make tso Jehova a go yetetsang ka tsona. Mo nkare ga mošadho wa lune le beyye Jehova ku mahlong le nyoko tlela ke tsa go bafala le boya le jabolela lephelo!