1. Re ka tiputsisa putsiso yifeng?

AYITSANO o fela o šekedisa ke dilo tso di re yemeleng ku mahlong​—go psyitlanyiwa ga dikereke tsa matsaka, go kutulugela ke Ghogho le Maghogho le ntwa ya Aremaghedoni? Ayitsano o fela o tiputsisa gore, ‘Nje nko dula ke tshepega mo dilo tsowa tsa go tshosa di kene di kgahlampana?’ Mo nkare o yye wa nagana ka tsona, go petapeta ka mantsu ya Jeso ya ma leng ga temanyana yo yi leng ga hlogotaba ya rune di ka gelepa ka matla. Jeso o butsiye malata yage gore: “Le sa šekele. Le dumele.” (Joh. 14:1) Mo tumelo ya rune yi tiyye, re nyoko tiyisela tsa ku mahlong re sa hlagasedisi ke selo.

2. Re ka tiyisa tumelo ya rune ka mokgo mang fote ga hlogotaba yowa re nyoko petapeta ka ying?

² Re ka tiyisa tumelo ya rune gore re thogo tiyisela tsa ku mahlong ka go pombhola gore re tshwaragana byang le dintshitshire tso di liketsang tumelo ya rune gana byalo. Mo re ka sa takisi maahlo taba ya gore re titshwara byang mo go na le tsa go re liketsa, re nyoko di tšiba gore ke kaye mo di nyakang re tiyise tumelo ya rune. Mo re hlula tso di re liketsang, tumelo ya rune yi napa tiya tsa nkare ke moka. Tsotsone di nyoko re gelepa gore re teye re feta ga tso di re yemeleng ku mahlong. Ga hlogotaba yowa, re nyoko bolabola ka dilo ka dine tso malata ya Jeso ma gahlanneng natso tsa gore di šupetsa gore ne di nyaka ma be le tumelo ya go tiya. Ke mokane re nyoko lebelela gore mo re gahlana natso gana byalo re nyoko leba ka kaye le go re lukiselela gore ku mahlong re tshwaragane natso byang.

3. Ga Matewu 6:30, 33, Jeso o hlatolliye taba yifeng ya go yelana le tumelo?

³ A di makatse mo monna wa gore ke hlogo ya mutši a nyaka go pasopa mosadi wage le bana bage ka tsa go ja, dikobo le ga go dula. Go maka ka mokgonone a di lula ga dinako tso tsa go thathafa.  O ka kraya magageru ma felela ke mmereko, fote ma karakara ka matla gore ma kraye mmereko mara go fo re tsho. Ba bangwana ba ganne mmereko wa gore a wo tshwanele Makreste. Ga dilo tso ka mokana ga tsona, di nyaka re be le tumelo ya go tiya gore re sa kamake taba ya gore Jehova o nyoko re neya tso re di gayelang. Jeso o yi beyye lekgwaying taba yowa nakwela a Tšhutisa malata yage a le ku Thabeng. (Bala Matewu 6:30, 33.) Mo re sa kamake le ka gonyana gore Jehova a ka sa tsoge a re lahliye, maahlo ya rune ma ka sa talakanye ga taba ya go yetisa tsa Mmušo wa Modimo mahlong. Mo re di bona gore Jehova o re gelepa ka mokgo mang ka tso re di gayelang, re nyoko napa re šutela thina ka matla naye fote tumelo ya rune yi nyoko tiyelela.

4-5. King so se gelepiyeng mutši wo mongwana gore wo thogo hlula go šekedisa ke tso wo di gayelang?

⁴ Lebelela ka mokgo ba mutši wo mongwana ku Venezuela ba di bonneng mo Jehova a ba gelepa mo ba šekedisa ke tso ba di gayelang. Ba ga Castro ke mo ba kraya tšheleta ya go ba yenetsa nakwela ba sa bereka polaseng ya bona. Ke mokane dikgohlane tsa gore di tshwere dithunya di yye dya ba tseyela polase ya bona ka tšhinghi dya boya dya ba raka. Papa gona ye ba reng ke Miguel, o re: “Gana byalo re phela ka tso re di krayang ga tšhomo ye nyana ya gore ba ro re yadima. Mo bo sile ke thomisa ka go kgopela Jehova gore a re neye tso re di gayelang letšatši lolone.” Lephelo la mutši wowa le ya gakga, mara ka taba la gore ba tshepele ka matla ga Papa wa rune wa gore wa di kgona go re pasopa ga tso re di gayelang, ba mutši wa ga Castro a ba lofe megahlanong fote ba dula ba tšhela letsogo ga mmereko wa go tšhomayela. Tso tsa Mmušo wa Modimo ba di yetisa mahlong fote Jehova o ba neya tso ba di gayelang.

⁵ Ga dintshitshire ka mokana ga tsona tso ba gahlanneng natso, Miguel le mosadi wage ye ba reng ke Yurai, ne ba sa yi takisi maahlo taba ya gore Jehova ke mo a dula a ba pasopiye. Ka dinako tse dingwana, Jehova ne a berekisa magageru ya mangwana gore ma ba neye tso ba di gayela kela ma gelepe Miguel gore a kraye mmereko wa gabutši. Go gongwana Jehova ne a berekisa ofisi ya lekala gore a ba pasope ka tso ba di gayelang. Jehova a sanka a ba lahla. Ka taba la tsotsone, ba bonne tumelo ya ba mutši wa bona yi gula. Mo ba hlatolla tso di makegiyeng mo Jehova a ba gelepa, morwediya wa bona ye mogolo ye ba reng ke Yoselin, o re: “Go bona gore Jehova o re gelepa ka mokgo mang, di re tikisa pelo. Ke mo tseya go le monghana ye nka tisamelang ka yene lephelo laka ka mokana ga lona.” O tokegela ka gore: “Tso re di hludiyeng re le mutši di re lukiselela gore re thogo tiyisela ga tsa go thathafa tso di re yemeleng ku mahlong.”

6. O ka tiyisa tumelo yago byang mo o roba ke tsa lephelo?

⁶ Ayitsano o roba ke tsa lephelo? Mo nkare go ka mokgonone, di ra gore o tshwaraganne le bothatha. Le mo di go pategetsiye la go šitega go wona, tseya sosone go le lešuba la go tiyisa tumelo yago. Rapela Jehova, o bale mantsu ya Jeso ya ma leng ga Matewu 6:25-34  o boye o ghayele. Lebelela tso di makegeleng ba bangwana ga dinako tso tsa rune, go šupetsa gore Jehova o pasopa bo ba tshwaraganneng le mmereko wage. (1 Makor. 15:58) Mo o ka maka ka mokgonone, o ka sa kamake gore Papago wa legedimong o nyoko go gelepa go fo tshwana le ka mokgo a gelepiyeng ba bangwana. O tšiba tso o di gayelang fote wa di tšiba gore o nyoko go neya byang. Mo o bona Jehova a go gelepa, tumelo yago yi nyoko ya mahlong yi tiyelela gore o thogo tiyisela dintshitshire tso di go yemeleng ku mahlong.​—Habak. 3:17, 18.

7. Matewu 8:23-26 yi re “moya wa go tšutla” wo liketsiye tumelo ya malata ya Jeso ka mokgo mang?

⁷ Nakwela Jeso a na le malata yage ba le ku lewatle go na le moya wa go tšutla, Jeso o yye a napa a ba šupetsa gore ke kaye di nyakang ba tiyisa tumelo ya bona. (Bala Matewu 8:23-26.) Mo moya wa go tšutla wo kene wo tšukatšukisa sekepe, Jeso ke mo a tiketselele. Mo malata yage ya gore ma tšhugiye ma mo šiginya ma boya ma mo kgopela gore a ma phonise, Morena o yye a ma wolola a bebiye a re: “Ke ntaba le tšhoga, lune ba tumelo ye nyana?” Malata yawa ya gore ne ma tšhugiye ka matla ne ma tshwanele ma sa kamake gore Jehova a ka di kgona go tšhireletsa Jeso le bo a nang nabo. Mara wa yi bona gore taba yowa yi ka re berekela ka mokgo mang? Tumelo ya go tiya yi ka re gelepa gore re make gore “moya wa go tšutla” wo kgibe, go ka ba go le wa mannete kela wa mošupetso.

8-9. Ke tsa mošaga mang tso di yyeng dya liketsa tumelo ya Anel fote o gelepiye king?

⁸ Nagana ka mokgo mogageru wa mosadi wa gore aa soko šadha wa go tšwa Puerto Rico ye ba reng ke Anel, a yyeng a ba le tumelo ya go tiya ka nthago ga go tiyisela mo go na le tsa go mo liketsa. Yene ne a gahlanne le “moya wa go tšutla” wa gore ke wa mannete. O thomisiye go tlela ke tsa go baba ka 2017 mo Sedingwana so ba reng ke Maria se hlafolanya mutši wage. O yye a felela ke mmereko ka taba la sedingwana sone. Anel o re, “Ka dinako tsone tsa go thathafa, ke yye ka šekela ka matla mara ke yye ka tšhuta go tshepela ga Jehova ka go rapela gore mošekelo wo sa nape wo nkwetla.”

⁹ Anel o hlayye so se mo gelepiyeng go tiyisela ntshitshire yo ne a tshwaraganne nayo​—go theetsela. O re: “Go theetsela tso mokgahlo wo re yetetsang ka tsona go n’gelepiye gore ke dule ke kgibiye. Wa tšiba ke di bonne mo Jehova a ntiyisa a boya a nneya tso ke di gayelang a berekisa magageru.” O tokegele ka gore: “Jehova o nneye tsa go feta tso ne ke di kgopele fote tumelo yaka yi napa yi tiyelela.”

10. O ka maka byang mo o hlasele ke “moya wa go tšutla”?

¹⁰ Ayitsano le wene o hlasele ke “moya wa go tšutla”? Di makega gore o wele ke mathatha ya gore ma makiye ke kotsi ya hlago. Kela go ka fo ba go le moya wa go tshwanisela, wa go tshwana le go lwala ka matla la go šala o tapegiye matšhika fote o sa sa tšiba gore o ka kena ka kaye. Ka dinako tse dingwana go ka ba le tsa go go šekedisa, mara o sa lisetse mošekelo wo go lisisa go  tshepa Jehova. Šutela thina naye ka thapelo. Tiyisa tumelo yago ka go ghayela ka dilo tso Jehova a yyeng a go gelepa ga tsona ku botala. (Pis. 77:11, 12) O ka tshepa o tiyisiye gore a ka sa tsoge a go lahliye le ka tšatši la mohlolo.

11. Ke ntaba di nyaka re tikemesele go theetsela bo ba re yetang mahlong?

¹¹ King se sengwana so se ka go gelepang gore o tiyisele tsa go go ghula? Anel o hlayye gore, ke go theetsela. Di nyaka o tshepa bo Jehova le Jeso ba ba tshepang. Ka dinako tse dingwana, bo ba ba kgetiyeng gore ba re yete mahlong ba ka re botsa gore re make dilo tsa gore a re di kwisisi. Mara re ya di tšiba gore Jehova o rufa ba gore baa theetsela. Taba ya gore go theetsela gwa phonisa, re yi tšhutiye ka Lentsung lage fote re ya di bona di makega ga malata ya go tshepega. (Ek. 14:1-4; 2 Dikor. 20:17) Ghayela ka mešupetso ya mošaga wonone. Mo o maka ka mokgonone, o ko ba o tilukiselela gore o thege dilo ka mokana ga tsona tso mokgahlo wo di makang gana byalo le ku mahlong. (Maheb. 13:17) O ka sa hlagasedisi ke moya wo wo tšutlang wa gore wo nyoko thomisa go se botala.​—Diy. 3:25.

12. Luka 18:1-8 yi re tumelo yi kena kaye ga taba ya go tiyisela mo ba go tshwara bošidi?

¹² Jeso ne a tšiba gore tumelo ya malata yage yi nyoko šiginya ke mo ba ma tshwara bošidi. Gore ma thogo tiyisela mo ba ma tshwara bošidi, o ma beyisele ka mošupetso wo wo leng ga puku ya Luka. Jeso o bolabodiye ka taba ya mosadi wa gore o kgwele ke monna wa gore ne a llela wa go yahlula gore a yahlule ka go loka. Ne a sa kamake gore mo a ka kgopela a sa fetsi ba ko šinya ba mo gelepa. Ke mokane wa go yahlula a šinya a maka se sengwana. Re tšhuta ying? Jehova aa hlawolane. Jeso yene o yitseri: “Byalo, ayitsano Modimo a ka sa ba kwele go baba . . . ba gore ba mo llela bošego le motshegare?” (Bala Luka 18:1-8.) A boya a tokegela ka gore: “Nje Morwayi wa motho mo a boya mo lefaseng o nyoko kraya go sa na le tumelo?” Mo ba re tshwara bošidi, di nyaka re tiyisele re boye re lefise pelo go šupetsa gore re na le tumelo ya go tiya go tshwana le mosadi yela wa gore o kgwele ke monna. Mo re na le tumelo ya mošaga wonone, re ka sa kamake gore Jehova o nyoko re makela se sengwana. Fote di nyaka taba ya go rapela re sa yi tseyele fase. Ka nakwenngwana, mo re rapela re ka bona go makega dilo tsa gore a re ya di nagana.

13. Go rapela go ba gelepiye ka mokgo mang ba mutši wo mongwana ba gore ne ba ba tshwere bošidi?

¹³ Lebelela mošupetso wa mogageru wa mosadi wa gore o dula ku Democratic Republic of the Congo ye ba reng ke Vero. Ne di nyaka gore Vero, monna wage wa gore a yi Hlatse le morwediya wa bona wa gore o na le 15 ya mengwaga ba tšhabe ga poleke yo ne ba dula ga yona ka taba la gore ne yi kutulugele ke mogoba wa masole. Mo ba kene ba sepela ba yye ba segela mo masole ma thibiyeng tsela, ke mokane ba ba ganela go feta fote ba ba tshosetsa ka gore ba nyoko ba bolaya. Mo Vero a thomisa go lla, morwediya  wage o yye a rapelela gedimo a kene a boyelela-boyelela lebitso la Jehova a kgopela gore a gelepe mmane wage gore a kgibe. Mo a fetsa go rapela, ndhuna ya mogoba wa masole yi yye ya mmutsisa gore, “Ye sesinyana, o tšhutisiye ke mang go rapela?” O yitseri, “Ke tšhutisiye ke mmane waka, a berekisa mantsu ya ma leng ga Matewu 6:9-13.” Ndhuna yone ya re, “Sesi, ariyeneng gabutši fote nkare Modimo wa lune Jehova, a ka le tšhireletsa!”

14. King so se ka liketsang tumelo ya rune fote re ka gelepa king gore re tiyisele?

¹⁴ Ditaba tsa mošaga wonowa di re tšhutisa gore re sa di tseyele fase tsa go rapela. Mara o nyoko re king mo nkare tso o di rapelelang a ba di fetole ka go yakgoswa kela a di nape di bonala mo di makega? Go fo tshwana le mosadi yela Jeso a bolabodiyeng ka yene wa go kgwela ke monna, o sa lisetse go rapela fote o dule o tshepa gore Modimo a ka sa tsoge a go lahliye, o ko fetola merapelo yago. Ariye mahlong o kgopela moya wa go hlawolega wa Jehova. (Mafil. 4:13) O sa lebale gore go se botala Jehova o nyoko go rufa la go šinya o lebala mohlupego wo o fitiyeng ga wona. Mo Jehova a go gelepa gore o tiyisele dintshitshire o kene o tshepega, le tso di tlang ku mahlong o nyoko di tiyela.—1 Pet. 1:6, 7.

15. Matewu 17:19, 20 yi re malata ya Jeso ma gahlanne le ntshitshire ya mošaga mang?

¹⁵ Jeso o tšhutisiye malata yage gore tumelo yi ka ma gelepa go hlula dintshitshire. (Bala Matewu 17:19, 20.) Tšatši le lengwana ma yye ma šitega go raka ledimona, le gore nengneng ma yye ma di kgona. Ke mo le ma tshwarisiye yifeng? Jeso o ma butsiye gore di nyaka ma yeketse tumelo. O ma hlayisele gore mo tumelo ya wona yi sa gayele, ma ka di kgona go hlula dintshitshire tse dikgolo tsa nkare ke thaba! Le rune lekgono, re ka gahlana le dintshitshire tse dikgolo tsa nkare ke thaba.

16. Tumelo yi mo gelepiye byang ga Geydi gore a thogo hlula tsa go sasamela?

¹⁶ Tseya ka mošupetso wa mogageru wa mosadi wa go tšwa Guatemala ye ba reng ke Geydi. Monnage ye ba reng ke Edi, ba yye ba mmolaya mo ba ya gaye ba tšwa mogahlanong. Tumelo ya Geydi yi mo gelepiye byang gore a tiyisele tsa go baba ka mokgo? O yitseri: “Go rapela go n’gelepiye gore ke bošele tso di nrobang ga Jehova, ke mokane dya maka gore ke tikwe ke bebiye. Ke ya di bona gore Jehova o mpasopa a berekisa ba mutši waka le banghana baka ba ka ho phutegong. Go dula ke tshwaraganne ka mmereko wa Jehova, go maka gore ke sa kwe go baba ka matla fote ke sa tihlupe ka go llela tsa ka motshwana. Mo ke šele ke fitiye ga seyemo sowa, ke tšhutiye gore le mo go ka nyarela tsa go sasamela tsa mošaga mang ku mahlong, nko hluleng mo ke gelepa ke Jehova, Jeso le mokgahlo wage.”

17. Re ka maka byang mo re hlasela ke dintshitshire tse dikgolo tsa nkare yi ro ba thaba?

¹⁷ Ayitsano o sa kwisiye go baba ke taba ya gore lešaga lago le hlokofele? Tipeyele nako ya go tšhuta ka ditaba tsa batho ba ka ho Bhayibeleng  ba gore ba yye ba ba tsosa bakgung gore o thogo tiyisa tumelo yago ga taba ya tsogo. Ayitsano o kwisa go baba ke taba ya gore ye mongwana ka mutšing wago ba mo ntshiye ka phutegong? Tšhuta gore o sa yi kamake taba ya gore mokgwa wa Modimo wa go wolola ke mong wona wa kawone ka matla. Ntshitshire ye nngwana le ye nngwana yo yi go tlelang, yi tseye go le lešuba la go tiyisa tumelo yago. Kgotolela Jehova so se leng ka pelong. O sa kwane le go dula o ntoši, mara o dule o na le magageru. (Diy. 18:1) Tshwaragana ka dilo tsa gore di nyoko go gelepa gore o tiyisele, le mo tsa go go thonoga di ka sa go lisetse. (Pis. 126:5, 6) O sa lisetse letheto lago la go ya megahlanong, tšhomong le go bala Bhayibele ka moka matšatši. Fote o sa takisi maahlo dilo tsa go bafala tso Modimo a nyakang go go rufa ka tsona ku mahlong. Mo o bona ka mokgo Jehova a go gelepang, tumelo yago gage yi nyoko napa yi tiya.

18. Mo o kwa nkare go na le so se kgwelakgwehlang ga tumelo yago, king so se ka go gelepang?

¹⁸ Mo nkare dintshitshire tso o gahlanneng natso ku botala kela tsa gana byalo di go šupetsiye gore tumelo yago ya gayela, o sa nape o kgongwela ka matla. Tseya taba yone go le lešuba la gore o tiyise tumelo yago. Kgopela go tshwana le ka mokgo mapostola ya Jeso ma yyeng ma kgopela ma re: “Re yeketsele tumelo.” (Luk. 17:5) Fote nagana ka mešupetso yo re petapetiyeng ka yona ga hlogotaba yowa. Go tshwana le Miguel le Yurai, gopola dilo ka mokana ga tsona tso Jehova a go makeleng tsona. Kopisela ga morwediya wa Vero le ga Anel, rapela Jehova di go baba ka matlamatla mo o gahlana le tsa go go ghula. Fote tshwana le Geydi, o di bone mo Jehova a go gelepa a berekisa ba mutši wago kela banghana bago. Mo o lisetsa Jehova gore a go gelepe ga tso o gahlanang natso gana byalo, o nyoko di tshepa tsa gore o ko go gelepeng le mo o gahlana le tsa go thathafa ku mahlong.

19. King so Jeso ne a sa se kamake fote king sa gore wene a o se kamake?

¹⁹ Jeso o hlayye gore tumelo ya malata yage yi gayela mo di tla kaye, mara ne a sa kamake gore mo Jehova a ka ma gelepa, ga dintshitshire tsa ku mahlong ma nyoko teya ma tshwarelele. (Joh. 14:1; 16:33) Ne a di tšiba gore go ba le tumelo ya go tiya go nyoko gelepa bo ba mogoba wo mogolo gore ba phone ga motšhatšhamelo wo mogolo. (Kut. 7:9, 14) Nje le wene o ko ba o le nabo? Mo Jehova a ka go gelepa o ko ba nabo, mo nkare o berekisa lešuba lo o le krayang gana byalo gore o tiyise tumelo yago!—Maheb. 10:39.