1. Mo ba re go berekisa monagano wa rune ba ra go king? (2 Thimothi 4:5)

 MO RE gahlana le tsa go re kgongwetsa, taba ya go tshepega ga Jehova le ga mokgahlo wage yi ka liketsiwa. Re ka di hlula byang dintshitshire tsa mošaga wonone? Di nyaka re ye mahlong re berekisa monagano wa rune, re sa kobole fote re dule re maka gore tumelo ya rune yi sa tekateki. (Bala 2 Thimothi 4:5.) Re ba re berekisa monagano wa rune mo re dula re kgibiye, re nagana gabutši re boya re liketsa go tseya dilo ka mokgo Jehova a di tseyang. Mo re ka maka ka mokgonone, re ka sa fo lla go tseyatseyega re makisa nka mokgo re tikwang.

2. Re nyoko petapeta ka ying ga hlogotaba yowa?

² Ga hlogotaba ya go fela, re petapetiye ka kararo ya dintshitshire tsa gore re ka gahlana natso mara di sa tšwe ka ho phutegong. Ga hlogotaba yowa, re nyoko petapeta ka kararo ya dintshitshire tsa gore di tšwa ka ho phutegong fote di ka liketsa taba ya gore re ya tshepega ga Jehova. Ke tsowa, (1) mo mogageru a sa re tshware gabutši, (2) mo ba re wolola, le (3) mo re thathafela ke go yamogela tso mokgahlo wo di tšhentšhang. Re ka berekisa monagano wa rune ka mokgo mang re boya re tshepega ga Jehova le ga mokgahlo wage mo re kene re lebanne le dintshitshire tsa mošaga wonone?

3. Di nyaka re titshware ka mokgo mang mo re kwa nkare mogageru kela mogageru wa mosadi aa re tshwara gabutši?

³ Ayitsano o yye wa kwa nkare mogageru wa gore ke mogolo kela mogageru wa mosadi wa gore ke se sengwana ka ho phutegong aa go tshware gabutši? Di ka makega gore mogageru ke mo a sa tikemisela  go go kwisa go baba. (Marom. 3:23; Jak. 3:2) Mara, tso a di makiyeng di ka fo ba di go thunugiye. Di ka makega gore a o bopate mo o nagana ka taba yone. O ka boya o tiputsisa le gore, ‘Mo nkare mogageru o kgona go maka dilo tsa mošaga wowa, nje a re titshokanye re re ke mokgahlo wa Modimo wonowa?’ Mo re ka nagana ka mokgonone, ke gona mo Sathane a re nyakang gona. (2 Makor. 2:11) Dilo tsa mošaga wonone di ka maka gore re tikraye re yahluganne le Jehova le mokgahlo wage. Byalo, mo re kwa nkare mogageru kela mogageru wa mosadi aa re tshwara gabutši, re ka berekisa monagano wa rune ka mokgo mang gore re thogo kganela kgole le taba ya go nagana dilo tsa gore di ka re kwaletsa?

4. Josefa o yye a berekisa monagano wage ka mokgo mang mo ba sa mo tshware gabutši, fote re ka tšhuta ying ga mošupetso wage? (Genesi 50:19-21)

⁴ O sa kwate ka matla. Mo Josefa a sa gola, bobhuti bage ba yye ba sa mo tshware gabutši. Ke mo ba mo hloyye la gore ba bangwana ba bona ke mo ba nyaka le go mmolaya. (Gen. 37:4, 18-22) Mo goya-goya, ba yye ba mo rekisa gore a be lebhantiti. Tsotsone di makiye gore Josefa a gahlane le dintshitshire tsa go sa fele tsa gore di yye dya fetsa gana hala ga 13 ya mengwaga. Di ka makega gore Josefa o yye a tiputsisa gore ayitsano Jehova wa mo nyaka kela dho. Fote di ka makega gore o yye a tiputsisa gore ayitsano Jehova o mo lahliye ka nako ya gore wa mo hloka. Josefa a sanka a dulela go fo kokomosa dikana. Mara o yye mahlong a berekisa monagano wage gabutši ke mokane a dula a kgibiye. Mo a thulegela ke lešuba la gore a busetse ga bobhuti bage tso ba mo makiyeng tsona, a sanka a maka ka mokgonone mara o ba šupetsiye gore o ba nyaka ka matla a boya a ba tshwarela. (Gen. 45:4, 5) Josefa o makiye ka mokgonone ka taba la gore ke mo a di kgona tsa go nagana gabutši. A sanka a dulela go nagana ka mathatha yage mara ke mo a sa lisetse go nagana ka tso Jehova a di nyakang. (Bala Genesi 50:19-21.) Re tšhuta ying mara? Mo nkare o tshwariwa bošidi, o sa kwatele Jehova kela wa nagana gore o go lahliye. Mara, lebelela ka mokgo a go gelepang gore tiyisele ntshitshire yone. Go tokegela gana hone, mo ba bangwana ba sa go tshware gabutši liketsa go kogela tso ba di kekemisang ka go ba šupetsa gore o ba nyaka ka matla.—1 Pet. 4:8.

5. Miqueas o yye a berekisa monagano wage ka mokgo mang mo a kwa nkare a baa mo tshwara gabutši?

⁵ Lebelela mošupetso wa dinako tsa rune wa mogolo ye mongwana ye ba reng ke Miqueas wa gore o tšwa Borwa bya Amerikha. b O gopola ka mokgo a yyeng a tshwariwa bošidi ke magageru ya mangwana ya gore ma maka mmereko wo mogolo ka ho mokgahlong wa Jehova. O yitseri: “Ke ro thoma go gahlana le tsa go nkgahleletsa ka mokgo. Ne ke šekela ka matla. Ke sa bopate boroko fote ke lla ke llisa ke gore ne go se na so nka se makang.” Mara, Miqueas o yye a berekisa monagano wage ke mokane a lwela gore pelo yage yi kgibe. Ke mo a rapela a sa fetsi, a kgopela Jehova gore a mo neye moya wage wa go hlawolega le matšhika ya gore a tiyisele. Fote o yye a lebelela tso di ka mo gelepang ga dikgatiso tsa rune. Re tšhuta ying mara? Mo o kwa nkare mogageru wa monna kela wa mosadi aa go tshwara gabutši, dula o kgibiye fote o kganele kgole le go nagana dilo tsa gore a yi tsona. O ka sa tšibi gore motho yene o tšhofiye king gore a šinye a bolabole kela a make dilo ka mokgo a makiyeng. Byalo, bolabola le Jehova ka thapelo o mo kgopele a go gelepe gore o lebelele dilo ka mokgo motho yene a di lebelelang. Mo o ka maka ka mokgonone, di nyoko go gelepa gore o tseye magageru go le batho ba gore ba ka sa tsoge ba go makiye bošidi fote di nyoko ba lula gore o ba tshwarele. (Diy. 19:11) O sa lebale gore Jehova wa di bona tso o kikirisanang natso fote o nyoko go neya matšhika ya o ma hlokang gore o tiyisele.—2 Dikor. 16:9; Mmo. 5:8.

6. Ke ntaba di le gabutši ka matla go kwisisa taba ya gore mo Jehova a re wolola o šupetsa gore o re nyaka ka matla? (Maheberu 12:5, 6, 11)

⁶ Di ya baba go wolodiwa. Fote mo re ka fo dulela go nagana ka tsa gore go wolodiwa di baba go segela kaye, re ka sa yamogele mo ba re wolola fote  re nyoko tseya nkare ba re wolodiye ba kene ba totometsa kela ba sa re kwele go baba. Tsotsone di ka maka gore re sa kwisisi taba ye kgolo ya gore mo Jehova a re wolola o ba a šupetsa gore o re nyaka ka matla. (Bala Maheberu 12:5, 6, 11.) Fote mo re ka dulela go nagana gore di re kgongwetsiye go segela kaye mo ba re wolola, re nyoko yikela Sathane gore a re kenele. O nyaka gore re phage letsogo mo ba re wolola, re lisetse go berekela Jehova fote re ngalele le phutego. Mo nkare ba yye ba go wolola, o ka berekisa monagano wago ka mokgo mang? 

7. (a) Mo ga sethombhe sowa, Jehova o yye a berekisa Petro gore a make ying ka nthago ga mo a yamogele mo ba mo wolola? (b) Mošupetso wa Petro wo re tšhutisa ying?

⁷ Yamogela mo ba go wolola fote o potolle mo di nyakang o potolla gona. Jeso o yye a wolola Petro ga go tlala mapostola ya mangwana ma kene ma le gona. (Mar. 8:33; Luk. 22:31-34) Di ka makega gore tsotsone di yye dya mo tšebisa ka matla ga Petro! Mara, Petro o yye a fo dula a tshepega ga Jeso. O yye a yamogela mo ba mo wolola a boya a tšhuta ga tso a di kekemisiyeng. Byalo, taba ya gore Petro ke mo a tshepega yi yye ya maka gore Jehova a mo rufe, a boya a mo neya mmereko wo mogolo ka ho phutegong. (Joh. 21:15-17; Meber. 10:24-33; 1 Pet. 1:1) Mošupetso wa Petro wo re tšhutisa ying? Mo re sa dulele go nagana ka gore go wolodiwa di tšebisa go segela kaye, re yamogela mo ba re wolola re boya re potolla mo di nyakang re potolla gona, tsotsone di nyoko re berekela di boya di berekela ba bangwana. Mo re ka maka ka mokgonone, re pomela Jehova le magageru mmereko wa gore ba sa kamake mo di nyaka ba re berekise.

8-9. Ka nthago ga mo Bernardo ba mo wolodiye o yye a tikwa ka mokgo mang, fote o gelepiye king gore a potolle ka mokgo a naganang?

⁸ Lebelela so se yyeng sa makegela mogageru ye ba reng ke Bernardo wa ku Mozambique. Ba yye ba mo ntsha a sa sa ba mogolo. O yye a tikwa byang mara? O re, “Ne ke kwatiye ka matla ka taba la gore ne ke sa kwane le tso ba n’wololang ka tsona.” Ke mo a hlupa ke taba ya gore ba bangwana ka ho phutegong ba nyoko mo tseya byang. O yitseri, “Di ntsere dikgwedinyana gore ke yamogele gore ba n’wolodiye ka mokgwa wa gabutši le gore ke tshepe Jehova le mokgahlo wage fote.” Bernardo o yye a gelepa king gore a tšhentšhe ka mokgo a bonang dilo?

⁹ Bernardo o yye a potolla ka mokgo a naganang. Mo a hlatolla taba yage o re: “Nakwela ke sa le mogolo, ne ke berekisa Maheberu 12:7 gore ke thogo gelepa ba bangwana gore ba yi tseye gabutši taba ya mo Jehova a re wolola. Gana byalo ke tiputsisa gore, ‘Anthe ke mang ye a tshwaneleng a berekise mantsu ya ma leng ho lengwalong?’ Ye mongwana  le ye mongwana ye go leng lelata la Jehova—le nna ke gana hone.” Ke mokane Bernardo o yye a maka se sengwana gore a boyele a tshepe Jehova le mokgahlo Wage. O yye a bala Bhayibele ka matla a boya a tineya nako ya go ghayela ka tso a di balang. Le mo yi le gore yi sa mo hlupa taba ya gore magagabo ne ma mo tseya byang, o yye a fo bereka nabo tšhomo a boya a fetola mo a le megahlanong. Mo nako yi kene yi ya, Bernardo ba yye ba mo kgeta fote gore a be mogolo. Mo nkare le wene o tshwana le Bernardo ba yye ba go wolola, lisetsa go nagana ka matla ka taba ya gore o yye wa tšeba go segela kaye, yamogela mo ba go wolola o boye o potolle mo di nyakang o potolla gona. c (Diy. 8:33; 22:4) Mo o maka ka mokgonone, o ka sa kamake gore Jehova o nyoko go rufa ka taba la gore o yye wa dula o mo mamarele o kene o tshepega gage o boya o tshepega le ga mokgahlo wage. 

10. King tsa gore di yye dya tšhentšha tsa gore di ka fo ba di yye dya liketsa taba ya go tshepega ga banna ba bangwana ba Maisrayele?

¹⁰ Tso mokgahlo wo di tšhentšhang di ka liketsa taba ya rune ya gore re ya tshepega. Mo re ka sa pasope, o ka kraya re šele re di yikela gore di re yahluganye le Jehova. Mo re beyisa, nagana ka mokgo dilo di yyeng dya tšhentšha ga Maisrayele. Mo Jehova a soko bane a ba neya Molawo, dihlogo tsa mitši ke mo di maka mmereko wa maprista. Ke mo ba yaga dialetare ba boya ba yemela ba mitši ya bona ka go makela Jehova dihlabelo. (Gen. 8:20, 21; 12:7; 26:25; 35:1, 6, 7; Jobo 1:5) Mara mo go šele go beyiwe Molawo, dihlogo tsa mutši ke mo ba sa sa ba dumelela gore ba make dilo tsone. Jehova o yye a kgeta maprista ga ba mutši wa Aroni gore go be bona ba makang dihlabelo. Go tlugisela ka nako yonone go ya mahlong, mo ba ka kraya hlogo ya mutši ya gore a yi wele ga ba mutši wa Aroni yi maka tso di tshwaneleng di make ke moprista, le go bolayiwa a ka bolayiwa. d (Lef. 17:3-6, 8, 9) Ayitsano go ka fo ba go le tso di yyeng dya maka gore Kora, Dathani, Abhiramo le 250 ya bo ne ba yema naye ba phigisane le Moše le Aroni? (Dip. 16:1-3) Aritši. Mara so se šalang ke gore Kora le bo ne a gobagoba nabo di yye dya ba šita go tshepegela Jehova. Mo nkare tso mokgahlo wo di tšhentšhang di liketsa taba yago ya gore wa tshepega, o ka maka ying mara?

11. Re tšhuta ying ga mošupetso wa ba bangwana ba gore ke Malifi ya Makohathi?

¹¹ Thega tso mokgahlo o di tšhentšhang. Mo Makohathi ma kene ma sepela ku mašahleng ne ma na le mmereko wa go hlawolega wo ne ma tshwanele ma wo make. Ka moka nako mo Maisrayele ma tloga, Makohathi ya mangwana ne ma rwadisana areka ya go kwanisanya mahlong ga batho ka mokana ga bona. (Dip. 3:29, 31; 10:33; Još. 3:2-4) Phela yane go ro ba mong mayemo! Mara, dilo di yye dya tšhentšha mo Maisrayele ma ye dula ga Naga yo ne ma Tshepisiwwe yona. Ke mo di sa sa nyaka gore ba dule ba rurisa Areka yone. Byalo, mo Solomoni a šele a lawola go le kgoši, Makohathi ya mangwana ba yye ba ma neya mmereko wa go yepelela, ya mangwana go le bomatšinghelane ke mokane ya mangwana ma pasopa diralo. (1 Dikor. 6:31-33; 26:1, 24) A go na mo re kwileng ba re Makohathi ma yye ma kokola kela ma re ma nyaka mmereko wa mayemo ya gedimo ka taba la gore ma yye ma bereka mmereko wa go hlawolega. Re tšhuta ying ga taba yowa? Di nyaka re thega tso mokgahlo wa Jehova wo di tšhentšhang ka dipelo tsa rune ka mokana ga tsona, le mo go ka ba tsa gore di tšhentšha mmereko wo o wo makang. Jabolela mmereko wo mongwana le wo mongwana wo o wo makang. O sa lebale gore mmereko wago a yi wona wo wo makang gore Jehova a go tseyele gedimo kela dho. Jehova o tseyela gedimo taba ya gore wa theetsela go phala mmereko le mo go ka ba wofeng.—1 Sam. 15:22.

12. Zaina o yye a tikwa ka mokgo mang mo tsa go bereka Bethele di tšhentšha?

 ¹² Lebelela mošupetso wa mogageru ye mongwana wa mosadi ye ba reng ke Zaina wa gore ba yye ba mo tšhentšha ga mmereko wo ne a wo maka. Ba yye ba re a ye a bereke ga mmereko wa go tšhomayela ka nthago ga mo a fetsiye mengwaga ya go teya ka ku ga 23 a bereka Bethele. O yitseri: “Taba ya gore mmereko waka wo tšhentšhiye ne yi ntshusiye ka matla. Ne ke kwa nkare ke lephephe la go fo rwalagana ka moya fote ke dula ke tiputsisa gore, ‘Ke šitegiye mo di tla kaye?’” Sa go napa se ro thonoga ke gore, magageru ya mangwana ka ho phutegong ma napiye ma totometsa ka go mmotsa gore: “Mola yi le gore ne o karakara, nke o sa le Bethele le gana byalo.” Taba yowa ya go kgongwetsa Zaina yi mo tsere nako la go šinya bošego byo bongwana le byo bongwana a fo dulela go lla. Mara o yitseri: “A sanka ka yikela selo se maka gore ke sa tshepe mokgahlo kela ke kamaka taba ya gore Jehova o nnyaka ka matla.” Zaina o di kgonne byang gore a berekise monagano wage gabutši?

13. Zaina o yye a wo hlula ka mokgo mang mokgwa wa gore a yi wona ga taba ya ka mokgo a tikwang?

¹³ Zaina o yye a hlula mokgwa wa gore a yi wona ga taba ya ka mokgo a tikwang. Ka mokgo mang? O yye a bala dihlogotaba tsa gore di ga dikgatiso tsa rune, tsa gore di bolabola ka taba yo a lebanne nayo dya boya dya mo gelepa gore a tiyisele. Mo re beyisa, o krayye hlogotaba ya gore yi hlatolla tso di yyeng dya makegela Mareka wa gore o ngwadiye Bhayibele tsa gore di ka makega gore le yene di yye dya mo hlupa mo ba mo tšhentšha ga mmereko wage. Zaina o re, “Mošupetso wa Mareka ke mo go le mong tsona tso ne ke di hloka gore ke thogo hlula tsa go nkgongwetsa.” Fote Zaina o yye a dula a mamarelanne le banghana bage. A sanka a tihlawolanya kela go tikwela go baba. O di bonne gore moya wa go hlawolega ke wona wo yetetsang mokgahlo wa Modimo gore wo segelele dipheto fote bo ba yetang mahlong ba hlupega ka matla ka yene. Fote o di bonne gore di nyaka mokgahlo wa Modimo wo make se sengwana gore mmereko wo thogo ya mahlong.

14. Vlado ke mo a hlupa ke ying ga taba ya tso mokgahlo wo di tšhentšhiyeng, fote o gelepiye king?

¹⁴ Mogolo ye mongwana wa go ba le 73 ya mengwaga ye ba reng ke Vlado wa ku Slovenia, di yye dya mo hlupa ka matla mo phutego yo ne a le ga yona ba yi gahlanisa le ye nngwana, ke mokane ba kwala Holo ya Mmušo yo ne ba gahlanela ga yona. O yitseri: “A ke kwisisi gore ke ntaba Holo ya go bafala sowa yi tshwanele yi kwadiwe. Ke kwile go baba ka taba la gore ne go se botala re yi lukisiye holo yone. Ka gore ke nna wa go betla, go na le tse  dingwana tso ke di betliyeng tsa gore di sa le nyuwane. Fote taba ya gore ba re gahlanise le ba bangwana ke mmereko wo mogolo wa gore ne wo se lula ga rune batšhomayedi ba gore re šele re tsofele.” Vlado o gelepiye king gore a thege mokgahlo? O re: “Mo re yamogela tso mokgahlo wa Jehova wo di tšhentšhang, ga go tlala re rufiwa la go sa hlayisege. Taba yone yi re lukiselela gore le mo ku mahlong go ka tšhentšha se sengwana re ko ba re yemme gabutši.” Ayitsano o hlupa ke taba ya gore phutego ya lune ba yi gahlanisiye le ye nngwana kela ba go tšhentšhiye ga mmereko wago? O sa kamake gore Jehova o kwisisa ka mokgo o tikwang. Mo o ka thega tsotsone ba di tšhentšhiyeng o boya o mamarela Jehova ka go tshepega le mokgahlo wo a wo berekisang, a go jiki o nyoko rufiwa.—Pis. 18:25.

15. Re ka dula re berekisa monagano wa rune ka mokgo mang mo re gahlana le dintshitshire tsa gore di tšwa ka ho phutegong?

¹⁵ Re ka litela dintshitshire tsa gore di tšwa ka ho phutegong, mo lefase lowa le kene le bakiye mafelelong. Dintshitshire tsone di ka liketsa taba ya rune ya gore re ya tshepega ga Jehova. Byalo, di nyaka re berekise monagano wa rune gabutši. Mo o kwa nkare mogageru aa go tshwara gabutši, o sa nape o pipegana ka matla. Mo ba go wolola di sa go tšebisi, yamogela mo ba go wolola fote o potolle mo di nyakang o potolla gona. Fote mo mokgahlo wa Jehova wo tšhentšha se sengwana sa gore le wene se ya go yama, yamogela ka pelo ye tšhwewu fote o latelele molawo.

16. O ka maka byang gore o dule o tshepa Jehova le mokgahlo wage?

¹⁶ Mo taba ya gore wa tshepega yi liketsiwa o ka dula o tisamela ka Jehova le mokgahlo wage. Mara, di nyaka o berekise monagano wago gore o thogo maka ka mokgonone, go leng go dula o kgibiye, go nagana gabutši o boya o lebelela dilo ka mokgo Jehova a di lebelelang. Tikemisele go tšhuta ka batho ba ka ho Bhayibeleng ba gore ba yye ba ba le maphomela ya gabutši mo ba gahlana le tsa mošaga wonone fote o ghayele ka mošupetso wa bona. Rapela Jehova gore a go gelepe. Fote o sa tsoge o tihlawolele kgole le phutego. Le mo go ka teya leduma la mošaga mang, Sathane a ka sa tsoge a phomelele ga taba ya go go yahluganya le Jehova kela mokgahlo Wage.—Jak. 4:7.