1-2. Ke mokgwa wofeng wa gabutši ka matla wa go bala le go tšhuta Bhayibele? Re beyisele.

 TLA re fo re ke wene yewa o nyaka go reka ntlo. Ke dilo difeng tso o ka nyakang go di pombhola ga ntlo yone o soko bane o segelela sepheto? Ayitsano ne o nyoko fo lebelela sethombhe sa ntlo yone fela? A re kamake gore ne o ka nyaka go ya ga ntlo yone o yi bone ka maahlo gore o thogo dukuluga nayo, o pombhole dikamara ka mokana ga tsona, fote o lebelele le selo se sengwana le se sengwana sa ntlo yone. Di ka ba gabutši ka matla gore o pombhole gore polane ya ntlo yone yi byang gore o thogo tšiba ka mokgo ba yi yagiyeng. Di fo ba lekgwaying gore o ka nyaka go lebelela selo se sengwana le se sengwana sa ntlo yo o nyakang go yi reka.

² Re ka maka dilo ka mokgonone mo re bala le go tšhuta Bhayibele. Ye mongwana wa gore o tšhutele Bhayibele o hlayye gore Bhayibele yi tshwana le “moyago wo mogolo wa gore wo lefiye ka matla wa gore fote ba wo yagiye ga fandhiši ya gore ya yisa.” Byalo, re ka maka byang gore re di tšibe gabutši tsa gore di ka ho Bhayibeleng? Mo o ka fo yi bala o kene o taboga, o ka fo tšhuta ‘dilo tso ba go tšhutisiyeng tsona ka lentsu la Modimo ku mathomisong.’ (Maheb. 5:12) Mara, go fo tshwana le mo di nyaka o kene ka teng ga ntlo gore o thogo bona gore yi byang, di nyaka o tšhute Bhayibele gabutši gore o thogo yi kwisisa. Mokgwa wo mongwana wa gabutši ka matla wa go tšhuta Bhayibele ke go lebelela ditaba tse dingwana tsa molayetsa wa yona gore di tšhokelana ka mokgo mang le tse dingwana. Liketsa go kwisisa gore ke nnete yifeng yo wene o yi tshepang o boye o bone gore ke ntaba o yi tshepa.

3. Pawulo wa lepostola o hlohletsele magagabo ya gore ke Makreste gore ma make ying fote ke ntaba? (Maefeso 3:14-19)

³ Gore re thogo kwisisa gabutši ditaba ka mokana ga tsona tsa gore di ka teng ga Lentsu la Modimo, di nyaka re tšhute dilo tse  dingwana re kenelela. Pawulo wa lepostola o hlohletsele magagabo ya gore ke Makreste gore ma tšhute Lentsu la Modimo gabutši gore ma thogo “kwisisa gabutši bokoto, go lefa, go ya gedimo le go yisa” ga nnete yowa. Ke mokane ma ko ya mahlong ma ‘tiya fote ma ngangarela tumelo’ ya wona. (Bala Maefeso 3:14-19.) Le rune di nyaka re make ka mokgonone. Tla re boneneng gore re ka maka byang gore re sa teye mošašaša mo re tšhuta Lentsu la Modimo, mara re nape re ro kenelela gore re thogo le kwisisa gabutši.

4. O ka maka ying gore o šutele thina le Jehova? Re beyisele.

⁴ Rune Makreste, a re kgotsofatse ke go fo kwisisa fela nnete yo re yi tšhutiyeng mo re thomisa go tšhuta Bhayibele. Re tikemisele go tšhuta ‘dilo tsa Modimo tsa gore a di lula go di kwisisa,’ re gelepa ke moya wa go hlawolega wa Modimo. (1 Makor. 2:9, 10) Ke ntaba o sa thomisi go tšhuta Bhayibele o ntoši gore o thogo šutela thina le Jehova? Mo re beyisa, o ka nyakolla ka mokgo Jehova a yyeng a šupetsa malata yage ya ku botala gore o ma nyaka ka matla o boye o bone gore tsotsone di šupetsa ka mokgo mang gore le wene o go nyaka ka matla. Fote o ka tšhuta ka mokgo Jehova ne a nyaka gore Maisrayele ma mo rapele ka gona ke mokane o tshwanise le ka mokgo a nyakang rune re mo rapele ka gona lekgono. Kela o ka fo tšhuta o kenelela ga diporofeto tsa gore di makegiye tsa go bolabola ka Jeso nakwela a le ho lefaseng le mo a tšhomayela.

5. Ayitsano go na le hlogotaba ya gore o jabolela go nyakolla ka yona mo o tšhuta Bhayibele o ntoši?

⁵ Ba bangwana ba gore ba kwana le go nyakolla ba bolabodiye ka dilo tsa go tlalanyana tso ba ka jabolelang go tšhuta ka tsona ba kenelela. O ka lebelela tse dingwana tsa tsona hala ga lebhokisi la gore, “ Dihlogotaba Tso o ka di Berekisang mo o Tšhuta Bhayibele o le Ntoši.” O ka jabolela go tšhuta ka dihlogotaba tsowa o gelepa ke dikgatiso tsa go tshwana le Watch Tower Publications Index kela Tlhahlo ya go Dira Nyakišišo ya Dihlatse tša Jehofa. Mo o tšhuta Bhayibele o kenelela, tsotsone di nyoko tiyisa tumelo yago fote dya go gelepa gore o thogo “tšiba Modimo gabutši.” (Diy. 2:4, 5) Gana byalo, re nyoko petapeta ka nnete ya go kenelela ya ka ho Bhayibeleng ya gore re ka yi tšhuta re sa teye mošašaša.

6. (a) Polane le tso o tikemiseleng go di maka, di fapana mo di tla kaye? (b) Ke ntaba re ka re tso Jehova a tikemiseleng go di makela batho le lefase ke tsa go ya go yye? (Maefeso 3:11)

⁶ Mo re beyisa, lebelela gore Bhayibele yi re king ka tso Modimo a tikemiseleng go di maka. Go ba le polane go fapana kgole le go ba le tso o tikemiseleng go di maka. Re ka fo tshwanisa polane le go kgeta pata ya gore yi nyoko go yisa ga poleke yo o nyakang go ya ga yona. Mara, mo go ka ba le se sengwana ke mokane sa thibelela pata yone, di ka makega gore o sa segele ga poleke yo ne o ya ga yona. Ka nthoko ye nngwana, re ka tshwanisa tso o tikemiseleng go di maka le poleke yo o nyakang go ya ga yona. Re yi tšiba gabutši poleke yo re nyakang go ya ga yona mara re ka berekisa ditsela tsa go sa tshwane gore re segele ga yona. Mo go ka ba le so se thibelelang pata yowa, re ka tšwa ka ye nngwana. Di jabodisa ka matla gore Jehova o re wunyullele ka gonyana ka gonyana ka ho Bhayibeleng dilo tso a di ‘bolabodiyeng botala tsa gore o nyoko di segelela.’ (Maef. 3:11) Jehova a ka berekisa mekgwa ya go tlala gore a thogo segelela tso a tikemiseleng go di maka, fote o dula a phomelela ka taba la gore “o makiye dilo ka moka gore a thogo segelela tso a di nyakang.” (Diy. 16:4) Fote maphomela ya dilo tso Jehova a di makang ma nyoko ba gona go ya go yye. Anthe Jehova o tikemisele go maka ying, fote ke kaye mo a yyeng a tšhentšha gona gore a thogo di segelela?

7. Ka nthago ga mo batho ba mathomo ba jikele Jehova, o yye a tšhentšha mokgwa wo ne a nyoko wo berekisa gore a segelele tso ne a tikemisele go di maka ka mokgo mang? (Matewu 25:34)

⁷ Modimo o butsiye batho ba mathomo ho lefaseng gore o tikemisele ying ka bona. Ne di nyaka ba ‘belegane ba tlale, ba tlatse lefase ba le lawole, ba lawole . . . selo se sengwana le se sengwana sa go phela’ sa mo lefaseng. (Gen. 1:28) Mo Adamo le Efa ba mo jikela, ba maka gore tso tsa go sinya di tantetse batho ka mokana ga bona, tsotsone a sanka dya thibelela Jehova gore a segelele tso ne a tikemisele go di maka. O yye a tšhentšha mokgwa wo ne a nyaka go wo berekisa gore a di segelele. Ka nthagonyana ga gana hone, Jehova o yye a tikemisela go beya Mmušo legedimong wa gore wo nyoko segelela dilo tso a tikemiseleng go di makela lefase le batho. (Bala Matewu 25:34.) Ka nako yo Jehova a yi beyyeng, o yye a romela Morwayi wage wa letšibula lefaseng gore a tšhutise batho ka Mmušo fote a neyele ka lephelo lage gore a re lepolle ga taba ya go sinya le likgu. Ke mokane Jehova o yye a tsosa Jeso gore a boyele legedimong gore a lawole go le Kgoši ya Mmušo wa Modimo. Mara go sa na go na le tsa go tlala tso re ka di tšhutang ga tso Modimo a tikemiseleng go di maka.

8. (a) Taba ye kgolo ya gore yi ka ho Bhayibeleng ke yifeng? (b) Maefeso 1:8-11, yi re selo se segolo so Jehova a tikemiseleng go se maka king? (Lebelela sethombhe sa ka tawong.)

⁸ Phela mong taba ye kgolo ka ho Bhayibeleng ke gore lebitso la Jehova le nyoko hlatswiwa mo a kene a segelela tso ne a tikemisele go di maka ho lefaseng a berekisa Mmušo wage wa gore wo lawola ke Kreste. Tso Jehova a tikemiseleng go di maka di ka sa tšhentšhi. O tshepisa gore dilo ka mokana ga tsona di nyoko makega ka mokgo yene a hlayyeng. (Jes. 46:10, 11; Maheb. 6:17, 18) Lefase le nyoko ba pharadeyisi, fote ditlogolwane tsa Adamo le Efa tsa gore di yenele di nyoko ‘tikwisa ka lephelo go ya go yye.’ (Pis. 22:26) Mara tsowa a yi tsona fela tso Jehova a tikemiseleng go di segelela. Selo se segolo so a tikemiseleng go se maka ke gore a gahlanise malata yage ka mokana ga wona ku legedimong le ho lefaseng gore go be selo ka ssoši. Ke mokane batho ka mokana ga bona ba nyoko theetsela Jehova go le yene ye a ba Lawolang. (Bala Maefeso 1:8-11.) Nje mokgwa wo wa go bafala wo Jehova a wo berekisang gore a segelele tso a tikemiseleng go di maka, a wo go šiyi o yahlamme?

9. Mo re bala Bhayibele, re bona dilo tsa ku mahlong go segela kaye?

⁹ Lebelela seporofeto so Jehova a bolabodiyeng ka sona tšhomong ya Edeni, sa gore se ga Genesi 3:15. b Seporofeto sowa se bolabola ka dilo tsa gore di nyoko makega tsa gore di nyoko segelela tso ne a tikemisele go di maka, mara dilo tsone ne di nyoko makega ka nthago ga dikitikiti tsa mengwaga. Mo re beyisa, Modimo o butsiye Abhrahama gore ka nthago ga maloko ya go tlala, setlogolwane se sengwana sage go nyoko ba Kreste. (Gen. 22:15-18) Ke mokane ka 33 C.E., Jeso ba yye ba mo loma serethe go fo ya ka mokgo go porofitiwweng. (Meber. 3:13-15) Taba ya mafelelo ya seporofeto ya gore Sathane ba nyoko mo pshyaya hlogo, yi nyoko makega ka nthago ga mengwaga ya go teya ka ku ga 1 000 go tlugisela gana byalo. (Kut. 20:7-10) Fote Bhayibele yi wunyulla tsa go tlala ka tso di nyoko makegang mo go hloyana segareng ga lefase la Sathane le mokgahlo wa Jehova go segela mafelelong.

10. (a) Go nyoko makega dilo difeng go se botala? (b) Re ka lukiselela dipelo tsa rune le menagano ya rune ka mokgo mang? (Lebelela setwaba.)

¹⁰ O fo nagana ka dilo tsowa tsa go makatsa tsa gore di nyoko makega tso Bhayibele yi bolabodiyeng ka tsona. Sa mathomo, ditšhaba di nyoko yahlamela gore “go bebiye fote go tšhireletsegiye!” (1 Mathes. 5:2, 3) “Ka nako yonone,” motšhatšhamelo wo mogolo wo nyoko thomisa mo ditšhaba di kutulugela dikereke ka moka tsa matsaka. (Kut. 17:16) Ka nthago ga hone, go ka fo bonala tsa go makatsa, go nyarela “Morwayi wa motho a tla ka maru ya legedimong a na le matšhika fote a gadima ka matla.” (Mat. 24:30) Jeso o nyoko yahlula batho, a hlawola dinku gare ga dipudi. (Mat. 25:31-33, 46) Ka dinako tsone, Sathane o nyoko tiwomisa hlogo, a lwisana le Jehova. Ka taba la gore o hloyye batho ba Modimo ka pelo yage ka moka, o nyoko kutšetsela ditšhaba gore di timake ngata ka yyoši, Bhayibele yi re ditšhaba tsone ke Ghogho wa naga ya Maghogho fote o nyoko hlasela batho ba Jehova. (Hezek. 38:2, 10, 11) Go ko ba le nako ya gore ba kgobaketsele bo ba šeleng ba go tlotsiwa gore ba ye legedimong gore ba be le Kreste le masole yage ya ku legedimong gore ba lwe ntwa ya Aremaghedoni, ka nako yonone  motšhatšhamelo wo mogolo wo ko ba wo korisela. c (Mat. 24:31; Kut. 16:14, 16) Ke mokane Kreste a thomisa go Lawola Sekete sa Mengwaga lefaseng ka mokana ga lona.—Kut. 20:6.

11. O yi bona byang tshepo ya go phela go ya go yye? (Lebelela le sethombhe.)

¹¹ Gana byalo o fo nagana ka lephelo lago la ku mahlong ka nthago ga 1 000 ya mengwaga. Bhayibele yi re ye a re Makiyeng “o makiye gore dipelo tsa [rune] di nabele go phela go ya go yye.” (Mmo. 3:11) O fo nagana ka mokgo taba yone yi nyoko yamang senghana sago le Jehova. Puku ya gore, Batamela Kgaufsi le Jehofa, lephephe 319, yi re tšikilita ditsebe ka gore: “Mo re šele re phidiye makgolokgolo ya mengwaga kela dikitikiti kela dimiliyoni re ra le mong dibhiliyoni tsa mengwaga, re ko ba re šele re tšiba dilo tsa go tlala ka Jehova Modimo go phala gana byalo. Mara re nyoko fo kwa nkare go sa na le dilo tsa go tlala tsa go makatsa tso di nyakang re di tšhuta ka yene. . . . Re šitega le go hlaya ka mokgo lephelo le ko bang le bafele fote le jabodisa ka gona pharadeyising—fote sa go di phala ka moka ke gore re nyoko dula re le thina ka matla le Jehova.” Mara gana byalo, mo re kene re ya mahlong re tšhuta Lentsu la Modimo, ke dilo difeng tso re ka kenelelang ga tsona?

12. Re ka maka byang gore re lebelele ku magedimong? Beyisa.

¹² Lentsu la Modimo le fo re lekisa gore go byang go ba mahlong ga Jehova “ku malenghelengheng.” (Jes. 33:5) Bhayibele yi re botsa ka dilo tsa go makatsa ka Jehova le mokgahlo wage wa ku legedimong. (Jes. 6:1-4; Dan. 7:9, 10; Kut. 4:1-6) Mo re beyisa, re ka bala ka dilo tsa go makatsa tso Hezekiyele a di bonneng mo “magedimo ma bulega ke mokane a thomisa go bona memmono ya go tšwa ga Modimo.”—Hezek. 1:1.

13. O tikwa byang ka tso Jeso a di makang a le ku magedimong, go ya ka mokgo Maheberu 4:14-16 yi hlatollang?

¹³ Nagana fote ka tso Jeso a re makelang tsona  a le ku magedimong go le Kgoši ya rune le Moprista ye Mogolo wa gore o kwelana go baba. Re gelepa ke yene gore re thogo šutela thina le “setulo sa go lawola sa Modimo wa gore o re kwela go baba,” re mo kgopela gore a re kwele go baba a boye a re gelepe “ka nako ya gona.” (Bala Maheberu 4:14-16.) Barena, re sa lisetsi letšatši le šinye le dikele re soko bane re ghayela ka dilo tso Jehova le Jeso ba šeleng ba re makele tsona le tsa gore ba kene ba re makela tsona gana byalo ba le ku magedimong. Taba ya gore ba re nyaka ka matla di nyaka yi re tikise pelo fote yi re tšhofe gore re be le matšato mo re kene re berekela Jehova.—2 Makor. 5:14, 15.

14. Ke selo sefeng sa gabutši ka matla so re ka se makang go šupetsa gore re leboga Jehova le Jeso? (Lebelela le dithombhe.)

¹⁴ Mokgwa wo mongwana wa gabutši ka matla wa go šupetsa gore re leboga Modimo le Morwayi wage, ke mo re liketsa ka matla gore re gelepe ba bangwana gore go be Dihlatse Tsa Jehova le malata ya Jeso. (Mat. 28:19, 20) Ke so Pawulo wa lepostola a se makiyeng go šupetsa gore o leboga Modimo le Kreste. Ke mo a di tšiba gore tso Jehova a di nyakang ke gore “batho ka mokana ga bona ba phonisiwe fote ba tšibe mong yona nnete.” (1 Thim. 2:3, 4) O yye a karakara ka matla ga mmereko wage wa go tšhomayela gore a gelepe batho ba go tlala ka mokgo a ka kgonang ‘gore mo di kgonega a phonise ba bangwana.’—1 Makor. 9:22, 23.

15. Pisalema 1:2 yi re king so se nyoko makang gore re jabole?

¹⁵ Ye a ngwadiyeng pisalema ya mathomo, mo a hlatolla motho wa gore o jabodiye wa gore fote o phomelele, o re motho yene o “jabodisa ke molawo wa Jehova” fote “o bala molawo Wage ka lentsu la tlase motshegare le bošego.” (Pis. 1:1-3) Morene mongwana wa go hlatolla Bhayibele mo a bolabola ka ditemanyana tsowa o re motho o tshwanele “a nyake mayele ya Modimo ka matla, a ma nyakele, a ma tšhute fote a fetse nako ya go tlala a ghayela ka wona.” O tokegele ka gore “mo go ka šinya go fela letšatši motho a soko bala Bhayibele, o kganne ka letšatši lone.” O ka natefela ke go tšhuta Bhayibele mo o jabolela ditaba tsa go tlala tse dikgolo le go bona gore di tšhokelana byang. A yi go jabodisa ga tsona go nyakela Lentsu la Modimo o boya o kenelela ga lona!

16. Re nyoko petapeta ka ying ga hlogotaba ya go latela?

¹⁶ Nnete yowa ya go bafala yo Jehova a re tšhutisang yona ka Lentsung lage a yi thathafe go yi kwisisa. Ga hlogotaba ya go latela, re nyoko lebelela nnete ye nngwana ya go kenelela—tempele ya Jehova ye kgolo ya tso tsa Modimo, ya gore Pawulo o yye a yi hlatolla ga borifi byo a bo ngwaleleng Makreste ya gore ke Maheberu. Nkare o ka tikwisa ka go tšhuta o kenelela ga hlogotaba yone.