Tšhuta go Kwelana le “Mehlobo ka Mokana ga Yona ya Batho”
NAKWELA Jeso a tšhutisa malata yage go tšhomayela ditaba tsa go bafala, o yye a ba botsa le gore a yi batho ka mokana ga bona bo ba nyoko jabolelang molayetsa wa Mmušo. (Luka 10:3, 5, 6) Ho re le tšhomong re kene re tšhomayela, le rune re ka gahlana le batho ba go re kgwasola, ba bangwana ba ka re tshepisa le go re teya. Ho batho bowa re ba tšhomayelelang ba maka tsotsone, re ka šinya re lesetsa go ba kwela go baba.
Motho wa go kwelana go baba o leketsa go lebelela gore batho bo a phelang nabo ba tikwa byang le gore ba hlopa king, ke mokane a kwa a nabela go ba gelepa. Mara mo batho bo re ba tšhomayelelang re sa sa ba kwela go baba, rune beng re ka thomisa go šepisa, ra sa sa jabolela tšhomo. Ka thoko ye nngwana, mo re ka fo dula re kwelana go baba, ke setšha re gotetsa mollo—re ya mahlong re rotetsa mollo wa rune wa go tšhomayela, wa napa o thunya le dihlase!—1 Mathes. 5:19.
Re ka maka byang gore re šupetse go kwelana go baba le mo go se lola? Tla re bolaboleneng ka bo re ka kopiselang ga bona ka bararo ke bowa—Jehova, Jeso le lepostola Pawulo.
JEHOVA O KWELANA GO BABA—MO YEKISELE
Go fitiye mengwagangwaga Jehova a kene a tiyisele go rogelediwa. Mara le gana byalo o sa fo ba le “pelo ye butši ga batho ba go sa leboge le ba dipelo tse diphifadu.” (Luka 6:35) Re ro napa re di bona gore o gabutši ka matla ho a lefisa pelo. Jehova o nyaka gore go phone “mehlobo ka mokana ga yona ya batho.” (1 Thim. 2:3, 4) Le ho Modimo a di nyenya tsa go befa, batho o ba tseya go le makolwane, aa nyake go bona le ka o teya a kgwa.—2 Pet. 3:9.
Jehova o di tšiba gabutši tsa gore Sathane o popetsiye batho gore ba sa bone selo. (2 Makor. 4:3, 4) Ba go tlala ba tšhutisiwwe matsaka ka Modimo go tlogisela go sa le ba banyana, sosone se maka gore ba kwe di roba go yamogela dinnete. Ba mohlobo wonone Jehova o nyaka go ba gelepa. Re tšiba ka ying?
Nagana ka mokg’o Jehova a yyeng a lebelela Maninive ya ku botala. Batho bone ke mo ba na le lešidi, mara Jehova o yye a botsa Jona gore: “O ra gore ke sa kwisi go baba ke mutši wowa wo mogolo wa Ninive, wa gore wo na le batho ba go teya ka ku ga 120 000, ba gore a ba di tšibi tsa go fapanisa sa go loka le sa go befa?” (Jona 4:11) Jehova ke mo a tseya gore Maninive ma fo ba ma sa tšibi selo ka Modimo, byalo o yye a ma kwela go baba, a roma Jona gore a ye pasopisa batho bone.
Le rune re tshwana le Jehova, batho re ba tseyela gedimo ka matla. Re kopisela gage mo re leketsa ka matla go gelepa batho bo ba re theetselang, le mo di šupetsa nkare ba ka sa segele kgole natso.
JESO O KWELANA GO BABA—MO YEKISELE
Jeso o fo tshwana la Papage, o yye a kwa di mo tšhofa gore a gelepe batho ba gore ne ba sa tšibi selo ka tso tsa Modimo, ka taba la go ba kwela go baba. “Mo a bona megoba ya batho, o yye a yi kwela go baba, ka taba la gore ke mo wo palakanne go fo tshwana le dinku tsa go se na modisi.” (Mat. 9:36) Jeso ke mo a na a di bona gore bo e ba mo theetsele ke mo ba tšhutisiwwe matsaka fote bo ba yetang dikereke ka ku mahlong ke mo ba ba tshwara go baba. Ke mo a di tšiba tsa gore ba go tlala ba ka fo wutama ka lehlokwa gore ba sa yamogele molayetsa, mara Jeso yene o yye a fo ya mahlong “a ba tšhutisa tsa go tlala.”—Mar. 4:1-9.
O sa tobe ho nkare motho aa fo tloga le go di jabolela
Lephelo le ya tšhentšha-tšhentšha, le motho a ka thomisa go kwana le dinnete
Mo batho ba sa theetsele molayetsa wa rune, di nyaka re bone gore ba maka king. Batho ba bangwana ba ka tseya Baebele kela go ba Mokreste ka mokg’o mongwana ka taba la mo ba bona maphelelo ya go fo tikela ku ya bo ba reng ke bona Makreste. Ba bangwana ba ka fo ba ba kwelele matsaka ka rune. Ba bangwana mo ba re baa re theetsela, ba ka fo tshegiwa ke batho gana hone ba dulang gona kela ke mašaga ya bona.
Ba bangwana bo re gahlanang nabo ho re le tšhomong ba ka fo nyenya tso re di bolabolang ka taba la gore ba yye ba hlupiwa ka matla ba šala ba kgongwele. Morumiwa ye mongwana ye ba reng ke Kim o re: “Ga poleke ye nngwana yo re tšhomayelang ga yona, batho ba go tlala ba yye ba phona dintwa tso di yyeng tsa suwela dilo tsa bona ka mokana ga tsona ba šala ba hloka ba hloka. A ba sa tshepa gore go ko tsoga go lukiye. Ba hlakahlakanne fote a ba sa tshepa selo. Ga poleke yowa, ba go tlala a ba yi kene ya rune. Ka letšatši le lengwana ba yye ba nkwisa go baba ke le tšhomong.”
Kim o makiye byang gore a ye mahlong a ba kwela go baba le mo ba mo makiye tsotsone? O re: “Mo ke tshwariwa lešidi, ke leketsa go nagana ka Diyema 19:11, ya gore: ‘Motho wa go tseya gabutši aa yakgoswele go kwata.’ Mo ke nagana ka tso di makegeleng batho ba tšhomong ya rune, ke fo kwa di ntšhofa gore ke ba kwele go baba. Fote a yi ka mokana ga bona ba gore a ba re nyake. Gana hone ga poleke yone, re na le dipoyelo tsa go jabodisa ka matla.”
Re ka tiputsisa gore, ‘Mola ba tšhomayelela nna, ayitsano ke mo ke nyoko di yamogela ditaba tsowa tsa Mmušo?’ Mo re beyisa, nko re king mo nkare ke butsiwwe matsaka gatleletlele ka Dihlatse tsa Jehova? Ga taba yonone, nakwenngwana le rune ke mo re nyoko maka tsotsone mara ra nyaka go kwediwa go baba. Mo re nagana ka taba ya Jeso ya gore re tshware ba bangwana ka mokg’o re nyakang go tshwariwa ka gona, tsotsone di tšhofa le rune gore re kwelane go baba le mo go thathafa.—Mat. 7:12.
PAWULO KE MO A KWELANA GO BABA—MO YEKISELE
Pawulo wa lepostola o yye a kwela le dikgohlane go baba. Ke ntaba? Aa lebala botaleng byage. O yitseri: “Botaleng byaka ke mo ke rogelelana, ke hlorisana fote ke na le tšhinghi. Mara ke yye ka kwediwa go baba ka taba la gore ke mo ke sa timakisi fote ke gayela tumelo.” (1 Thim. 1:13) Le yene o di bonne gore Jehova le Jeso ba mo kwele go baba ka matla. Mo a kene a tšhomayela, a ka fo ba a bonne ba bangwana ba gore ke mo a tshwana nabo.
Pawulo o yye a gahlana le batho ba gore ba logele ka teng ga matsaka. O makiye byang ga taba yone? Mebereko 17:16 yi re nakwela Pawulo a le ku Athene, “o yye a kwa di mo silikisa ka matla mo a bona poleke yone yi tlele ka medimonyana ya dithombhe.” Mara Pawulo o yye a berekisa taba yonone ya gore ne yi mo silikisa, a tšhomayela ka yona. (Meber. 17:22, 23) O yye a maka gore tso a di tšhutisang di yelane le tso ne di tšiba ke batho ba mehlobohlobo gore “mo di kgonega a thogo phonisa ba bangwana.”—1 Makor. 9:20-23.
Le rune re ka kopisela ga Pawulo, le mo re di bona gore batho a ba make dilo gabutši kela tso ba di dumelang ke matsaka, re ka leketsa go ba botsa “ditaba tsa go bafala tso di makang gore re hlohlotele.” (Jes. 52:7) Mogageru ye mongwana wa mosadi ye ba reng ke Dorothy o re: “Batho ba go tlala ga tšhomo ya rune ba tšhutisiwwe gore Modimo o na le swele fote o fo dula a re ramele gore re make tsa go tšwa pateng. Batho bone ke ba thanaka ka taba la gore ga Modimo ba mo tshepa ka matla, mo ke fetsa ke ba šupetsa ka ho Baebeleng gore Jehova o re nyaka ka matla fote o re tshepisa se sengwana ka motsho.”
“ARIYENENG MAHLONG LE LWISANA LE TSA GO BEFA KA TSA GABUTŠI”
Mo re kene re kenelela ga ‘matšatši yawa ya mafelelo,’ batho ba bangwana bo re ba tšhomayelelang ba sa nyoko “tloga ga tsa go befa ba ye ga tsa go napa di ro topela.” (2 Thim. 3:1, 13) Mara tla re sa lesetseneng tsa mohlobo wonone di re kgongwetsa wa kraya go segela le ho re sa sa kwelanang go baba kela re sa sa jabola. Jehova a ka re neya matšhika wa kraya ‘re ya mahlong re lwisana le tsa go befa ka tsa gabutši.’ (Maroma 12:21) Lephayona le lengwana lo ba reng ke Jessica le re: “Ke gahlana ga go tlala le batho ba gore a baa tinyanafatsa le ba gore ba tseyela rune le ditaba tsa rune fase ka matla. Sosone se ka re tinwisa. Mo ke šele ke nyoko bolabola le motho, ke thomisa ka go rapela Jehova ka ho pelong gore a n’gelepe ke lebelele motho yene go tshwana naye. Ke maka ke tsotsone gore ke nagane ka matla gore motho yewa nka mo gelepa byang, ke sa tlalele ga tsela tsa gore ba ntseyela fase.”
A re lesetse go nyakana le bo ba tlaleleng ga tsowa tsa lephelo la go ya go yye
Ba bangwana baa di theetsela ditaba tso tsa Modimo ho re ba lefisela pelo
Di nyaka re nagane le ka taba ya go tiyisa bo re tšhomayelang nabo. Jessica o re: “Mo ye mongwana ho ga rune a makegele ke tsa go befa, ke leketsa go sa bolabole ka matla ka yona. Ke fo thomisa ditaba tsa gore di ya yagisa, tsa go tshwana le gore re segelela dilo tsa gabutši ka matla ho re le tšhomong le mo ba bangwana ba sa re nyake.”
Jehova o di tšiba gabutši tso re gahlanang natso ku tšhomong. Aa jabole lona ho le rune re tšhuta gage, mo re kwela batho go baba! (Luka 6:36) Tsona ke nnete gore Jehova a ka sa kwele batho go baba go ya go yye. Re ya di tshepa tsa gore o tšiba nako ya gabutši ya go tl’le fetsa ka lefase lo. Ka gore rune re sa yemele gore go segele nako yonone, tla re tšhomayeleneng re sa nanankele. (2 Thim. 4:2) Koriyeneng mahlong re kene re maka mmereko wowa ka go karakara, re kene re kwelana le “mehlobo ka mokana ga yona ya batho.”
