Nna le lapa la gešo re tšwa Tonga, e lego naga yeo e lego ka borwabodikela bja Pacific, yeo e nago le dihlakahlaka tše 170. Ge re be re sa dula Tonga, re be re itshokolela, re se na le ka mohlagase le koloi. Eupša gagešo re be re na le meetse le dikgogo tše sego kae. Ge dikolo di tswaletšwe, nna, buti le moratho wa ka re be re thuša tate go šoma mašemong moo re bego re gaša dipanana, di-cassava le digwere tše di bitšwago di-yam le di-taro. Tate o be a re hlokomela ka go rekiša dijo tše le go šoma mešomo e mengwe e menyenyane. Go no swana le batho ba bantši bao ba dulago dihlakahlakeng tša Pacific, lapa la gešo le lona be le hlompha Beibele gomme re be re dula re eya kerekeng. Eupša re be re dumela gore tsela e nnoši ya go kaonefatša bophelo bja rena ke go hudugela nageng yeo e humilego kudu.

 Ge ke be ke na le mengwaga e 16, malome o ile a rulaganya gore lapa la gešo le hudugele California, U.S.A. Ruri re ile ra thatafalelwa ke go tlwaela setšo sa moo ka ge se fapane kgole le sa moo re tšwago gona. Le ge re ile ra se sa diila kudu, re be re dula tikologong yeo e tletšego bošoro le go dirišwa gampe ga di-drugs. Gantši bošego re be re ekwa dithunya di lla e bile ba bantši ba baagišani ba rena ba be ba tšhaba ditsotsi. Batho ba bantši ba be ba swara dithunya gore ba itšhireletše goba gore ba itwele ge go eba le diphapano. Ke sa na le kolo mo kgareng ya ge ke be ke elwa le tše dingwe tša ditsotsi tšeo.

 Ge ke be ke le sekontari, ke be ke nyaka go swana le bafsa ba bangwe. Ganyenyane-ganyenyane ke ile ka ikhwetša ke eya diphathing tšeo di sa lokago, ke enwa kudu, ke rata bošoro e bile ke diriša di-drugs tše di sego molaong. Ge nako e dutše e eya, ke ile ka lemalela cocaine. Ke be ke utswa e le gore ke reke di-drugs. Le ge lapa la gešo le be le rata go ya kerekeng, ga sa nka ka hwetša tlhahlo yeo e bego e ka nthuša gore ke se ke ka no dira dilo tše mpe tšeo bagwera ba ka ba di dirago. Ke ile ka swarwa ka makga a mantši ka baka la ge ke be ke rata bošoro. Bophelo bja ka bo be bo tšwile taolong. Mafelelong ke ile ka ya kgolegong.

 Ka 1997, ka letšatši le lengwe ge ke be ke le kgolegong, mogolegwa yo mongwe o ile a mpona ke swere Beibele. E be e le ka Keresemose, e lego nako yeo batho ba Tonga ba e bonago e le e kgethwa kudu. Monna yoo o ile a mpotšiša ge e ba ke tseba gore Beibele e re’ng ka go tswalwa ga Kriste. Eupša ke be ke sa tsebe gore e reng. O ile a mpontšha pego e bonolo ya matswalo a Jesu, le gona ke ile ka bona gore dithuto tše dintši tša setšo tša mabapi le Keresemose ga go bolelwe ka tšona. (Mateo 2:1-12; Luka 2:5-14) Ka morago ga gore ke kwe seo Beibele e se rutago, ke ile ka šala ke ahlame, le gona ka ipotšiša gore Beibele e ruta le eng gape. Monna yoo o be a eya dibokeng tša beke le beke tša Dihlatse tša Jehofa tšeo di bego di swarwa moo kgolegong. Ka gona ke ile ka phetha ka gore ke ye le yena. Dibokeng tšeo go be go ahlaahlwa puku ya Kutollo. Le ge ke be ke sa kwešiše seo se bego se rutwa, ke ile ka lemoga gore dilo ka moka tšeo di bego di rutwa moo di be di etšwa ka Beibeleng.

 Ge Dihlatse tša Jehofa di be di nkgopela gore ke ithute le tšona Beibele, ke ile ka dumela ntle le go senya nako. E be e le la mathomo ke ithuta seo Beibele e re tshepišago sona ka paradeise yeo e tlago go ba gona mo lefaseng. (Jesaya 35:5-8) Ke ile ka bona gabotse gore ke be ke swanetše go dira diphetogo tše dintši bophelong bja ka e le gore ke kgahliše Modimo. Ke ile ka lemoga le gore Jehofa Modimo o be a ka se ntumelele ke tsena lefaseng le lefsa ge e ba ke sa fetoše mekgwa ya ka e mebe. (1 Bakorinthe 6:9, 10) Ka gona ke ile ka fetša le pelo gore ke swanetše go tlogela go felafela pelo, ke tlogele go kgoga e bile ke se sa boela mokgweng wa ka wa go nwa kudu le wa go diriša di-drugs gampe.

 Ka 1999, pele nka fetša mengwaga yeo ke bego ke e ahloletšwe go dula kgolegong, ke ile ka išwa kgolegong e nngwe. Ke ile ka fetša lebaka la ka godimo ga ngwaga ke sa kgone go bona Dihlatse tša Jehofa. Eupša ke be ke ikemišeditše go tšwela pele ke dira diphetogo. Ka 2000, mmušo o ile wa se sa ntumelela go dula United States, ka gona ke ile ka išwa nageng ya gešo kua Tonga.

 Ge ke be ke le Tonga, ke ile ka nyaka Dihlatse tša Jehofa gomme ka ithuta le tšona Beibele gape. Ke be ke thabela seo ke bego ke ithuta sona, le gona ke ile ka thabela gore Dihlatse tša Jehofa tša moo sehlakahlakeng di be di thea dithuto tša tšona Beibeleng, go no swana le Dihlatse tša Jehofa tšela tša kua United States.

 Tate o be a tsebja kudu mo motseng ka gobane o be a na le maemo a godimo ka kerekeng yeo a bego a e tsena. Mathomong lapa la gešo le ile la makala e bile le be le tenwa ke gore ke ithuta le Dihlatse tša Jehofa. Eupša ka morago batswadi ba ka ba ile ba thabišwa ke gore melao ya motheo ya Beibele e be e nthuša go tlogela mekgwa e mebe.

 E nngwe ya diphethogo tše thata tšeo ke ilego ka swanelwa ke go di dira e be e le go tlogela go nwa bjala bjo bo nwewago kudu setšong sa gabo rena. Banna ba bantši ba Matonga ba rata go nwa bjala bjo bo bitšwago kava beke e nngwe le e nngwe, e lego bjala bjo bo lapološago bjo bo dirilwego ka sehlašana sa pepper. Gona bjale ka ge ke be ke boetše gagešo, ke ile ka tlwaela mokgwa wa go ya mo go nwewago bjala bja kava bošego bjo bongwe le bjo bongwe gomme ke be ke enwa bjala bjoo, ke tagwa la mafelelo. Bothata e be e le gore ke be ke gwerane le batho bao ba bego ba sa iše felo ka melao ya boitshwaro ya Beibele. Mafelelong, ke ile ka thušwa go bona gore mekgwa ya ka e be e nyamiša Modimo. Ke ile ka dira diphetogo e le gore Modimo a tle a nkamogele le go ntšhegofatša.

 Ke ile ka thoma go ya dibokeng ka moka tša Dihlatse tša Jehofa. Go gwerana le Dihlatse tša Jehofa go nthušitše gore ke ganetše diteko gomme ke thabiše Modimo. Ka 2002 ke ile ka kolobetšwa gore ke be yo mongwe wa Dihlatse tša Jehofa.

 Jehofa o ile a se mphelele pelo go etša ge Beibele e bolela. E re: ‘Jehofa ga a re felele pelo ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.’ (2 Petro 3:9) Nkabe kgale Jehofa a fedišitše lefase le la Sathane, eupša o nyaka gore batho ba go swana le nna ba be le segwera se sebotse le yena. Ke rata go naganišiša ka taba ye, gore a ka ntiriša gore le nna ke thuše ba bangwe gore ba fetoge.

 Jehofa o ile a nthuša gore bophelo bja ka bo laolege. Ga ke sa utswetša batho gore ke reke di-drugs goba bjala bjo bo tlago go mpolaya. Eupša ke leka go thuša baagišani ba ka gore le bona e be bagwera ba Jehofa. Go gwerana le Dihlatse tša Jehofa go nthušitše gore ke kopane le mosadi wa ka e lego Tea. Nna le yena le morwa wa rena, re ipshina ka bophelo. Re ruta batho ba bangwe seo Beibele e se rutago ka go tlo phela mo lefaseng paradeiseng yeo e nago le khutšo.