Ke belegetšwe toropong ya Ciudad Obregón ka leboa la Mexico. Ka gešo re bana ba senyane gomme nna ke wa bohlano. Motse wo re bego re dula go ona o be o le kgole le toropo gomme tate a na le polasa e nyenyane gona moo. Go be go le bose gomme lapa lešo le be le ipshina ka bophelo e bile re thabile. Ka manyami, ge ke be ke na le mengwaga e mehlano feela, ledimo le matla le ile la senya polasa ya gešo gomme ra swanelwa ke go thothela toropong e nngwe.

 Tate o ile a thoma go ba le tšhelete. Eupša e bile o ile a thoma go phela ka bjala. Se se ile sa dira gore yena le mma ba se sa thaba lenyalong la bona gomme seo sa kgoma le rena. Nna le bo buti ba ka ba babedi re ile ra thoma go kgoga disekerete tšeo re bego re di utswa go tate. Ke ile ka tagwa ka lekga la pele ge ke be ke na le mengwaga e tshela feela. Kapejana ka morago ga moo, batswadi ba ka ba ile ba arogana gomme mekgwa ya ka e mebe ya thoma go gakala.

 Re ile ra sepela le mma ge a be a yo dula le monna yo mongwe. Monna yoo o be a sa mo fe tšhelete, gomme re be re sa kgone go phela ka tšhelete yeo mma a bego a e gola ka ge e be e le e nyenyane. Ka gona nna le bana bešo re ile ra nyaka mešongwana yeo re ka e dirago, eupša go be go no pala, re sa hwetše tšhelete e lekanego ya go reka dilo tšeo re di hlokago. Ke be ke pholišetša batho dieta, ke rekiša borotho, dikuranta, ditšhepisi le dilo tše dingwe. Le gona ke be ke thetha le toropo ke tšama ke nyaka dijo moo bahumi ba lahlelago ditlakala.

 Ge ke be ke na le mengwaga e lesome, monna yo mongwe o ile a kgopela gore ke šome le yena lefelong leo go bego go lahlwa matlakala moo re bego re dula gona. Ke ile ka dumela gomme ka tlogela sekolo, ke moka ka se sa dula gae. O be a mpatela tšhelete ya ka tlase ga tolara ka letšatši gomme a mpha dijo tšeo a bego a di topa matlakaleng. Ke be ke dula ka mokutwaneng wo ke bego ke o agile ka dilo tšeo ke di topilego matlakaleng. Batho bao ke bego ke phela le bona ba be ba rogana e bile ba se na boitshwaro. Ba bantši ba bona ba be ba phela ka di-drugs le bjala. Yeo e be e le nako e thata kudu bophelong bja ka, ke be ke lla bošego bjo bongwe le bjo bongwe, ke thothomela ka baka la letšhogo. Ka ge ke be ke diila e bile ke se ka rutega, ke be ke lewa ke dihlong kudu. Ke ile ka dula lefelong leo go lahlelwago ditlakala ka mengwaga e ka bago e meraro, go fihlela ke hudugela karolong e nngwe ya Mexico. Ge ke be ke le moo ke be ke šoma mašemong, ke ekga matšoba le cotton, ke thokga moba gotee le go epa ditapola.

 Ka morago ga mengwaga e mene ke ile ka boela morago ka yo dula toropong ya Ciudad Obregón. Yo mongwe wa borakgadi ba ka yo e bego e le ngaka ya setšo, o ile a mpha phapoši ntlong ya gagwe. Ke ile ka thoma go lora ditoro tša go tšhoša kudu gomme ka gateletšega kudu monaganong moo ke ilego ka nagana ka go ipolaya. Bošegong bjo bongwe ke ile ka rapela Modimo ka re: “Morena, ge e ba o le gona ke nyaka go go tseba, e bile ke tla go hlankela ka mo go sa felego. Le gona ge e ba go na le bodumedi bja therešo, ke nyaka go bo tseba.”

 Ka ke be ke le motho yo a ratago go ithuta ka Modimo. Ge ke be ke sa le ngwana, ke ile ka ya dikerekeng tše dintši, eupša ga go na yeo ke ilego ka e rata. Ga go le e tee ya tšona yeo e bego e ruta Beibele goba e ilego ya nthuša go tseba Modimo. Tše dintši tša dikereke tšeo di be di tshwenyegile kudu ka tšhelete, mola batho ba bangwe bao ba bego ba tsena dikereke tšeo ba be ba se na boitshwaro.

 Ge ke be ke na le mengwaga e 19, monna wa sesi o ile a mpotša gore Dihlatse tša Jehofa di mmontšhitše seo Beibele e se bolelago mabapi le go diriša diswantšho ge re rapela. O ile a mpalela Ekisodo 20:4, 5. Lengwalo leo le re re se ke ra itirela medimo ya diswantšho. Temana 5 e re: “O se ke wa di khunamela goba wa gokeletšwa go di hlankela, gobane nna Jehofa Modimo wa gago ke Modimo yo a nyakago boineelo bjo bo feletšego.” Ke moka monna wa sesi o ile a mpotšiša gore: “Ge e ba Modimo a diriša diswantšho go dira mehlolo goba ge e ba a nyaka re di diriša borapeding, ke ka baka la’ng temaneng ye a re re se ke ra di diriša?” Potšišo yeo ya gagwe e ile ya ntira gore ke nagane. Ka morago ga moo, re ile ra boledišana ka ditaba tše mmalwa tša ka Beibeleng. Ke be ke thabela dipoledišano tšeo kudu moo e lego gore nako e be e bonagala e fofa ge re boledišana ka Beibele.

 Ka morago o ile a ya le nna sebokeng sa Dihlatse tša Jehofa. Seo ke ilego ka se bona moo le go se kwa se ile sa nkgahla kudu. Ke be ke kgahlwa le ke bana bao ba bego ba tšea karolo, ba bolela ka tsela e kwagalago ge ba le sethaleng. Ke ile ka re: ‘Ruri batho ba mo ba a rutwa!’ Le ge ke be ke na le moriri o motelele e bile ke sa apara gabotse, Dihlatse tša Jehofa tša moo di ile tša nkamogela gabotse. Lapa le lengwe le ile la ba la ntaletša gore ke tlo ja le lona dijo tša thapama ka morago ga diboka.

 Ge ke be ke ithuta Beibele le Dihlatse tša Jehofa, ke ile ka ithuta gore Jehofa Modimo ke Tate yo a re ratago go sa šetšwe gore re na le tšhelete goba ga re nayo, go sa šetšwe gore maemo a rena ke afe setšhabeng, gore re ba morafo ofe goba gore re rutegile goba ga se ra rutega. Ga a kgetholle motho. (Ditiro 10:34, 35) Mafelelong, ke ile ka ithuta se itšego ka Modimo. Ke be ke ikwa ke thabile e bile ke sa kwe ke šotha se itšego se bohlokwa bophelong.

 Bophelo bja ka bo ile bja fetoga kudu. Ke ile ka tlogela go kgoga, go nwa kudu le go rogana. Pefelo yeo ke bego ke na le yona go tloga ge ke be ke sa le ngwana e ile ya thoma go tloga, e bile ka se sa lora ditoro tša go tšhoša. Le gona ke ile ka kgona go fenya maikwelo a tseneletšego a go ikwa ke se na mohola, ao ke naganago gore a be a tlišitšwe ke go se rutege le maemo a thata ao ke ilego ka lebeletšana le ona ge ke be ke sa le ngwana.

 Ke na le mosadi yo mobotse yo a ratago Jehofa le yo a nthekgago kudu. Gona bjale ke molebeledi wa tikologo wa Dihlatse tša Jehofa, ke tšama ke etela diphuthego ke di kgothatša le go ruta badumedigotee le nna bao ba swanago le bana bešo le dikgaetšedi. Ka ge Beibele e nthušitše go hwetša thuto ya maemo a godimo yeo Modimo a re neago yona, ga bjale ga ke sa ikwa ke inyatša.