Ke belegetšwe toropong ya Calgary kua Alberta, Canada. Batswadi ba ka ba ile ba hlalana ke sa le ngwana, ka gona nna le mma re ile ra sepela ra ya go dula le batswadi ba gagwe. Koko le rakgolo ba be ba re rata kudu, ke be ke thabile kudu ge ke be ke sa le ngwana. Ke sa gopola kamoo bophelo bja ka bo bego bo thabiša ka gona ge ke be ke sa le ngwana, ke be ke na le khutšo.

 Ge ke be ke na le mengwaga e 7 mma le papa ba ile ba nyalana gape, go tloga ka yona nako yeo bophelo bja ka bo ile bja thoma go ba boima kudu. Re ile ra hudugela St. Louis, Missouri, kua United States. Ke ile ka lemoga gore papa o be a se na pelo. Ka mohlala ke rile ke boa sekolong sa ka se sefsa ka letšatši la mathomo, papa a kwa gore bana ba bangwe kua sekolong ba be ba ntshwenya le gore ga se ka itwela. O ile a kwata kudu, a ba a mpetha go feta kamoo bana ba kua sekolong ba mpethilego ka gona. Go tloga ka lona letšatši leo ke ile ka thoma go lwa le bana ba bangwe ke na le mengwaga e 7 fela.

 Mma o be a kwatišwa ke gore papa o be a no rata go kwatakwata, ka gona ba be ba phela ba elwa. Ke ile ka thoma go nwa bjala le go diriša dihlaretagi ke na le mengwaga e 11 fela. Ke ile ka thoma go ba ntwa dumela e bile ke phela ke lwele le batho. Ge ke šalela ke fetša sekolo ke be ke le bogale kudu.

 Ge ke be ke na le mengwaga e 18 ke ile ka tsenela bošole kua U.S. Ke ile la ithuta go bolaya batho gona moo bošoleng. Ka morago ga mengwaga e 5 ke ile ka tlogela bošole, ke moka ka thoma go ithutela go ba ngaka ya menagano ka gobane ke be ke nyaka go šomela Federal Bureau of Investigation. Ke thomile dithuto tša ka United States, ke moka ge ke boela Canada ka tšwetša pele dithuto tša ka moo.

 Ge ke le yunibesithi ke ile ka nyamišwa kudu ke batho. Batho ba be ba bonagala eka ba inaganela ba nnoši, dilo ka moka mo lefaseng di be di bonagala di se na mohola e bile mathata a batho a be a bonagala a se na tharollo. Ke ile ka lahlela toulo tabeng ya gore batho ba ka kgona go dira gore lefase e be lefelo le le kaone.

 Ka ge ke be ke sa bone morero wa bophelo, ke ile ka thoma go rata tšhelete, thobalano, go diriša dihlaretagi le go nwa bjala kudu. Ke be ke phelela menate le go robala le basadi ba go fapafapana. Tlwaetšo yeo ke e hweditšego bošoleng, e ile ya dira gore ke phele ke elwa le batho ba bangwe. Ke be ke nagana gore ke na le matla a go dira phetho ya gore ke eng seo se nepagetšego le seo se fošagetšego, e bile ke be ke kgona go ya go motho yo ke bego ke bona eka o tshwenya batho ba bangwe. Nnete ke gore ke ile ka dumelela bošoro bo ntaola.

 Ka letšatši le lengwe ge nna le mogwera wa ka re be tagilwe ke dihlaretagi, re dutše ka kamoreng ya ka tlase mo ke dulago gona, re le gare re lokišeletša go romela patše ka tsela e sego molaong, mogwera wa ka o ile a mpotšiša gore na ke dumela go Modimo. Ke ile ka re go yena: “Ge eba Modimo e le yena a dirago gore re tlaišege ka tsela ye, gona ga ka nyake go kwa selo ka yena!” Letšatši le le latelago e be e le letšatši la ka la mathomo mošomong wa ka o moswa, mošomi gotee le nna yo e bego e le hlatse ya Jehofa o ile a mpotšiša gore: “Na o dumela gore Modimo ke yena a dirago gore re tlaišege mo lefaseng?” Ke ile ka makala ka gobane maabane re be re bolela ka yona taba ye, ke be ke nyaka go kwa kamoo go oketšegilego. Ka dikgwedi tše tshela fela re be re šetše re boledišane ka dilo tše dintši, e bile o be a araba dipotšišo tše dintši tšeo ke bego ke na le tšona ka bophelo a diriša Beibele.

 Mosadi yo ke bego ke dula le yena ka nako yeo o be a sa nyake go kwa selo ka dilo tšeo ke bego ke ithuta tšona. Ka Sontaga se sengwe ke ile ka mmotša gore ke laleditše Dihlatse tša Jehofa gore di tle legaeng la rena di tle di re rute Beibele le rena. Letšatši le le latelago ge ke boa mošomong ke ile ka hwetša a tšere thoto ya rena ka moka a ntlogetše. Ke ile ka ya ka ntle ka lla kudu, ka ba ka kgopela Modimo gore a nthuše. E be e le la mathomo ke rapela ke diriša leina la Modimo e lego Jehofa thapelong ya ka.—Psalme 83:18.

 Ka morago ga matšatši a mabedi ke ile ka thoma go ithuta Beibele le banyalani ba bangwe ba Dihlatse tša Jehofa. Ka morago ga gore ba sepele ke ile ka bala puku ya O ka Phela ka mo go sa Felego Paradeiseng mo Lefaseng, ka ba ka e fetša letšatšing lona leo. a Seo ke ithutilego sona ka Jehofa le morwa wa gagwe Jesu Kriste se ile sa nkgoma pelo. Ke ile ka bona gore Jehofa o na le kwelobohloko le gore o kwa bohloko ge a re bona re tlaišega. (Jesaya 63:9) Ke be ke kgomilwe kudu ke ka tsela yeo Jehofa a nthatago ka yona, mo a ilego a ntirela sehlabelo ka Morwa wa gagwe. (1 Johane 4:10) Ke ile ka bona gore Modimo o be a sa mphelele pelo “ka gobane ga a rate gore go fedišwe le ge e le mang, eupša o rata gore bohle ba fihlelele boitsholo.” (2 Petro 3:9) Ke ile ka bona gore Jehofa o be a nyaka gore ke be mogwera wa gagwe.—Johane 6:44.

 Ka yona beke yeo ke ile ka thoma go ya dibokeng. Ke be ke na le meriri e metelele, ke apere mangina e bile ke tšhoša, eupša Dihlatse tša Jehofa di be di thabetše go mpona, o be o ka re ke wa leloko yo e lego kgale ba mmone. Ba be ba bontšha gore ke Bakriste ba therešo. Ke ile ka ikwa eka ke boetše gae go koko le rakgolo, eupša le e be e le lefelo leo le bego le tletše ka khutšo kudu.

 Dilo tšeo ke bego ke ithuta tšona ka Beibeleng di ile tša thoma go fetoša bophelo bja ka. Ke ile ka kota meriri ya ka, ka tlogela boitshwaro bjo bo gobogilego, dihlaretagi le bjala. (1 Bakorinthe 6:9, 10; 11:14) Ke be ke nyaka go thabiša Jehofa, ka gona ge ke be ke ithuta gore selo se itšego seo ke se dirago ga se kgahliše Jehofa, ke be ke sa no se bethiša moya. Ke be ke ekwa bohloko kudu, e bile ke ipotša gore ‘nka se sa bušeletša selo sa mohuta woo.’ E bile ke be ke fetoša tsela yeo ke bego ke nagana ka yona le dilo tšeo ke bego ke di dira ka ntle le go senya nako. Ka gona ke ile ka bona gore bophelo bja ka bo be bo thoma go ba kaone, ka gobane ke be ke dira seo Jehofa a nyakago ke se dira. Ke ile ka kolobetšwa gore ke be yo mongwe wa Dihlatse tša Jehofa ka morago ga dikgwedi tše 6 ke thomile go ithuta Beibele ka di 29 tša July 1989.

 Beibele e ile ya nthuša go fetoga. Mathomong ge motho wa go tshwenya a be a ka nthoma ke be ke elwa le yena. Eupša ga bjale ke leka ka thata gore ke be “le khutšo le batho bohle.” (Baroma 12:18) Ke be nka se kgone go fetoga ka bonna, eupša ke leboga Jehofa ka ge a ile a diriša moya wa gagwe wo mokgethwa le Beibele go nthuša gore ke fetoge.—Bagalatia 5:22, 23; Baheberu 4:12.

 Go e na le gore ke be lekgoba la dihlaretagi, dintwa le boitshwaro bjo bo gobogilego, ga bjale ke leka ka thata gore ke thabiše Jehofa Modimo, le go mo hlankela ka mokgwa wo nka kgonago. Seo se akaretša le go botša ba bangwe ka yena. Ka morago ga mengwaga e mmalwa ke kolobeditšwe, ke ile ka hudugela nageng e nngwe mo go nago le tlhokagalo go yo bolela ditaba tše dibotse. Mengwageng ye ka moka ke be ke thabela go ruta batho ba bangwe le go bona kamoo Beibele e fetošago maphelo a bona. Ke thabile kudu ka gore mma le yena o ile a ba yo mongwe wa Dihlatse tša Jehofa, ka ge a ile a bona diphetogo tše dibotse tšeo ke ilego ka di dira bophelong bja ka.

 Ka 1999, kua El Salvador, ke ile ka aloga sekolong seo ga bjale se bitšwago Sekolo sa Baebangedi ba Mmušo. Sekolo seo se ile sa nthuta go etiša pele modiro wa go bolela ditaba tše dibotse le go ruta phuthego le go e kgothatša. Wona ngwageng woo ke ile ka nyalana le mosadi wa ka yo a rategago Eugenia. Nna le mosadi wa ka re hlankela bjalo ka Baebangedi ba nako e tletšego kua Guatemala.

 Go e na le gore ke nyamišwe ke dilo tšeo di diregago mo bophelong, ga bjale ke thabile kudu. Go diriša seo ke bego ke ithuta sona ka Beibeleng go dirile gore ke se sa ba ntwa dumela le go itshwara ka tsela yeo e gobogilego, go dirile gore ke dule ke na le khutšo e bile ke ikwa ke ratwa.