Monna yo mongwe o ile a mmpotša gore: “Ge e ba o tloga o nyaka go ithuta ka Modimo, tšwela pele o ithuta le Dihlatse tša Jehofa.” Mantšu ao a ile a mmakatša. Ge ke be ke botšwa mantšu ao, e be e se kgale ke ithuta le Dihlatse tša Jehofa. Eupša e le gore o tle o kwešiše gore nna ke ile ka arabela bjang, e re ke go hlalosetše ganyenyane ka bophelo bja ka.

 Ke belegetšwe toropong ya Quezaltepeque kua El Salvador. Ka gae re be re le bana ba 15 gomme nna ke le wa botshelela. Batswadi ba ka ba ile ba nkgodiša gabotse le go nthuta go kwa molao. Go oketša moo, Dihlatse tše dingwe tša Jehofa di be di fela di etla go tlo nthuta Beibele. E be e le Leonardo le basadi ba bangwe ba babedi. Eupša ke be ke se na taba le seo ke bego ithuta sona, gomme ke dula ke dira diphetho tša go tšwa tseleng. Ge ke be ke na le mengwaga e 14, ke ile ka thoma go nwa bjala le go diriša di-drugs le bagwera ba ka ba sekolong. Bagwera bao ba ka ka moka ba ile ba tlogela sekolo gomme ya ba ditho tša sehlopha sa disenyi, ke moka le nna ke ile ka ba latela. Re be re ehlwa diterateng, re gapeletša batho gore ba re nee tšhelete, e bile re utswa e le gore re kgone go reka bjala le di-drugs.

 Sehlopha seo sa disenyi se ile sa fetoga lapa lešo. Ke be ke ikwa okare ke swanetše go se botegela. Ka mohlala, ka letšatši le lengwe yo mongwe sehlopheng sa rena sa disenyi yo a bego a tagilwe ke di-drugs, o ile a hlasela yo mongwe wa baagišani ba ka. Ge ba be ba dutše ba elwa, moagišani wa ka o ile a kgona go fetša mogwera wa ka matla ke moka a bitša maphodisa. Ke ile ka galefa kudu gomme ka thoma go pšhatlaganya koloi ya moagišani wa ka ka molamo, ka gobane ke be ke leka go mo dira gore a tlogele mogwera wa ka. Moagišani wa ka o ile a nthapela gore ke tlogele koloi ya gagwe ge ke dutše ke pšhatlaganya mafasetere a yona le go e senya, eupša ke ile ka gana.

 Ge ke be ke na le mengwaga e 18, sehlopha sa rena sa disenyi se ile sa lwa le maphodisa. Ge ke be ke le kgauswi le go foša pomo yeo re bego re itiretše yona, e ile ya thunyetša ka letsogong la ka. Ga ke tsebe gore go tlile bjang gore e thunye. Ke no gopola ke bona letsogo la ka le rathagane, ke moka ke ile ka idibala. Ke phafogile ke le sepetlele gomme ka hwetša gore ke kgaogile letsogo la le letona, le gore tsebe ya ka ya ka go le letona ga e sa kwa e bile leihlo la ka la ka go le letona le be le se sa bona gabotse.

 Le ge ke be ke be gobetše ka tsela yeo, ge ke etšwa sepetlele ke ile ka no boela sehlopheng sa ka sa disenyi. Eupša ka moragonyana ga moo, maphodisa a ile a ntshwara gomme ka ya kgolegong. Ge ke le moo, segwera sa ka le ditho tša sehlopha sa rena sa disenyi se ile sa tia le go feta. Re be re dira dilo gotee letšatši ka moka, go tloga ge re be re eja dijo tša mesong ge re kgoga patše ya rena ya mathomo, le go fihlela bošego ge re yo robala.

 Ge ke be ke le kgolegong, Leonardo o ile a nketela. Ge re dutše re bolela, o ile a šupa tattoo yeo e bego e le letsogong la ka le letona ke moka a mpotšiša a re: “Na o a tseba gore maswaonyana a a mararo a emela’ng?” Ke ile ka re: “Ee, a emela thobalano, di-drugs le mmino wa rock and roll.” Eupša Leonardo o ile a re: “Nna ke re a emela sepetlele, kgolego le lehu. O šetše o tšo boa sepetlele gomme gona bjale o kgolegong. Ga bjale o a tseba gore o letetšwe ke eng.”

 Mantšu a Leonardo a ile a dira gore ke nagane. O be a rereša. Ke be ke ikepela lebitla ka tsela yeo ke bego ke phela ka yona. Leonardo o ile a kgopela go ithuta Beibele le nna gomme ke ile ka dumela. Seo ke bego ke ithuta sona ka Beibeleng se ile sa dira gore ke fetoše bophelo bja ka. Ka mohlala, Beibele e re “ditlwaelano tše mpe di senya mekgwa e holago.” (1 Bakorinthe 15:33) Ka gona selo sa pele seo ke ilego ka swanelwa ke go se dira e be e le go hwetša bagwera ba bafsa. Ka baka leo, ke ile ka tlogela go ya moo sehlopha sa disenyi se bego se kopana gona, gomme ka thoma go ya dibokeng tša Dihlatse tša Jehofa tšeo di bego di swarelwa gona moo kgolegong. Dibokeng tšeo tša Dihlatse tša Jehofa, ke ile ka kopana le Andrés yoo le yena e bego e le mogolegwa. O be a kolobeditšwe gona kamoo kgolegong gore e be yo mongwe wa Dihlatse tša Jehofa. O ile a mmema gore ke tlo ja le yena dijo tša mesong. Go tloga ka nako yeo, ke ile ka se sa tsogela go kgoga patše. Go e na le moo, nna le Andrés re be boledišana ka Beibele mesong e mengwe le e mengwe.

 Sehlopha sa disenyi se ile sa lemoga kapejana gore ke be ke fetoga. Ka baka leo, yo mongwe wa baetapele sehlopheng seo o ile a re o nyaka go bolela le nna. Ke be ke tšhogile. Ke be ke sa tsebe gore o tlo ntira eng ge a ka kwa seo ke bego ke ikemišeditše go se dira, ka gobane gantši ga go kgonege go no tlogela sehlopha sa disenyi. O ile a re: “Re lemogile gore ga o sa kopana le rena eupša o ya dibokeng tša Dihlatse tša Jehofa. O ikemišeditše go dira’ng?” Ke ile ka mmotša gore ke be ke nyaka go tšwela pele ke ithuta Beibele gomme ke fetoše bophelo bja ka. Ke ile ka makala kudu ge a mpotša gore sehlopha sa disenyi se be se tla ntlhompha ge feela ke be nka bontšha gore ke tloga ke nyaka go ba Hlatse ya Jehofa. Ke moka o ile a re: “Ge e ba o tloga o nyaka go ithuta ka Modimo, tšwela pele o ithuta le Dihlatse tša Jehofa. Re tshepa gore o tla tlogela go dira dilo tše mpe. Ke a go lebogiša. O swere tsela ya nnete. Dihlatse tša Jehofa di tlo go thuša. Nkile ka ithuta le tšona ge ke be ke sa le United States, le gona go na le batho ba gešo bao e lego Dihlatse tša Jehofa. O se ke wa tšhoga. Swara bjalo.” Ka nako yeo ke be ke tšhogile e bile ke thabile kudu. Ke ile ka leboga Jehofa Modimo ka pelong. Ke ile ka ikwa bjalo ka nonyana yeo e lokolotšwego ka hokong ya yona, gomme ka kwešiša mantšu a Jesu ao a rego: “Le tla tseba therešo gomme therešo e tla le lokolla.”—Johane 8:32.

 Eupša ba bangwe ba bagwera ba ka ba kgale ba ile ba nteka ka go nnea di-drugs. Go bolela nnete, ka dinako tše dingwe ke be ke lekega. Eupša ge nako e dutše e eya, ka morago ga go rapela go tšwa pelong, mafelelong ke ile ka tlogela mekgwa ya ka e mebe.—Psalme 51:10, 11.

 Ka morago ga gore ke tšwe kgolegong, batho ba bantši ba be ba nagana gore ke tla boela mekgweng ya ka ya kgale, eupša ga se gwa ba bjalo. Go e na le moo, ke be ke eya kgolegong gantši gore ke yo botša bagolegwa ba bangwe seo ke ithutilego sona ka Beibeleng. Mafelelong, ba bangwe ba bagwera ba ka ba ile ba kgodišega gore ke be ke fetogile. Se se nyamišago ke gore bao e bego e le manaba a ka ba be ba sa nagane bjalo.

 Ka letšatši le lengwe ge ke be ke le tšhemong ke tšama ke ruta batho Beibele, gateetee nna le motho yo ke bego ke sepela le yena re ile ra ikhwetša re dikologilwe ke sehlopha sa disenyi seo se bego se elwa le sehlopha seo ke bego ke le go sona kgale. Sehlopha seo se be se nyaka go mpolaya. Motho yo ke bego ke sepela le yena o ile a ba hlalosetša ka botho le ka sebete gore ke be ke se sa le setho sa sehlopha sa disenyi. Ge a dutše a hlalosa, ke ile ka leka go dula ke išitše maswafo fase. Ka morago ga gore ba mpethe gomme ba mpotše tsebe go kwa gore ke se sa boa gape tikologong yeo, banna bao ba ile ba re tlogela gomme ba re dumelela re feta. Ruri Beibele e fetošitše bophelo bja ka. Ge nkabe e be e le kgale ke be ke tlo leka go itefeletša. Eupša gona bjale ke kwa keletšo ya Beibele yeo e lego go Bathesalonika ba Pele 5:15 yeo e rego: “Le boneng gore go se be le yo a lefetšago bobe ka bobe go yo mongwe, eupša ka mehla phegelelang go dirana botse le go bo dira go ba bangwe ka moka.”

 Ga e sa le ke eba Hlatse ya Jehofa, ke leka go botega. Ga se ka mehla go lego bonolo. Eupša ke kgona go atlega ka baka la thušo yeo Jehofa Modimo a mphago yona, le ka keletšo yeo e tšwago ka Beibeleng gotee le thekgo ya bagwera ba ka ba bafsa. Ga ke nyake go boela mekgweng ya ka ya kgale.—2 Petro 2:22.

 Pele ke eba Hlatse ya Jehofa, ke be ke le motho yo šoro le yo a phelago a galefile. Ke tshepa gore nkabe ke hwile kgale ge nkabe ke ile ka no tšwela pele ke phela ka tsela yeo. Seo ke ithutilego sona ka Beibeleng se fetošitše bophelo bja ka. Ke tlogetše mekgwa ya ka e mebe. Ke ithutile go phela ka khutšo le batho bao e bego e le manaba a ka. (Luka 6:27) Le gona ga bjale ke na le bagwera bao ba nthušago go ba le dika tše dibotse. (Diema 13:20) Gona bjale ke thabile e bile ke a tseba gore ke phelela eng. Ke hlankela Modimo yo a ikemišeditšego go ntebalela dilo ka moka tše mpe tšeo ke ilego ka di dira.—Jesaya 1:18.

 Ka 2006, ke ile ka ya sekolong se se kgethegilego sa go tlwaetša banna ba Bakriste bao ba sego lenyalong. Ka morago ga mengwaga e sego kae, ke ile ka nyala mosadi wa ka yo ke mo ratago gomme gona bjale re godiša morwedi wa rena. Gona bjale ke fetša nako e ntši ke ruta batho ba bangwe ka keletšo ya ka Beibeleng yeo le nna e nthušitšego. Le gona ke hlankela ke le mogolo ka phuthegong e bile ke leka go thuša bafsa gore ba se ke ba dira diphošo tšeo ke di dirilego ge ke be ke lekana le bona. Go e na le go ikepela lebitla, gona bjale ke leka go phela ka tsela yeo e tlago go nthuša gore ke tle ke hwetše bophelo bjo bo sa felego bjoo Modimo a re holofetšago bjona ka Beibeleng.