Ke belegetšwe toropong e nyenyane ya San Juan Chancalaito, tikologong ya Chiapas, kua Mexico. Batho ba gešo ba tšwa setšhabeng sa ma-Chol, e lego morafo wa Mamaya. Batswadi ba ka ba na le bana ba 12, gomme nna ke wa bohlano go bona. Ge ke be ke sa le yo monyenyane, nna le bana ba gešo re be re ithuta Beibele le Dihlatse tša Jehofa. Ka manyami, ke ile ka se diriše seo ke bego ke ithuta sona ka Beibeleng.

 Ge ke be ke na le mengwaga e 13, ke be ke diriša dihlaretagi e bile ke utswa. Ka yona nako yeo, ke ile ka tloga gae gomme ka no ralala le naga. Ge ke be ke na le mengwaga 16, ke ile ka thoma go šoma mašemong ao go bego go bjalwa patše. Ke šomile moo mo e ka bago ngwaga o tee, gomme bošegong bjo bongwe ge re be re sepediša patše e ntši ka sekepe, sehlopha sa banna bao le bona ba bego ba rekiša patše se ile sa re hlasela. Banna bao ba be ba itlhamile ka dibetša tše kotsi. Ba ile ba thoma go re thuntšha, gomme nna ka itahlela ka nokeng, ke moka ka rutha go fihlela moo noka e felelago gona. Ka morago ga moo, ke ile ka tšhabela United States.

 Ge ke be ke le United States, ke ile ka tšwela pele ka go rekiša dihlaretagi gomme ka tsena mathateng le go feta. Ke ile ka swarwa ke na le mengwaga e 19, gomme ka golegelwa bohodu le go leka go bolaya motho. Ge ke le kgolegong, ke ile ka ba setho sa sehlopha se itšego sa disenyi gomme ka dira melato e mengwe gape. Balaodi ba kgolego ba ile ba bona seo gomme ba nkiša kgolegong yeo go išwago disenyi tše kotsi yeo e lego kua Lewisburg, Pennsylvania.

 Ge ke le kgolegong ya Lewisburg, boitshwaro bja ka bo ile bja mpefala le go feta. Ka ge ke be ke na le di-tattoo tša sehlopha seo ke bego ke le go sona sa disenyi, go bile bonolo gore ke kopane le ditho tše dingwe tša sehlopha seo moo kgolegong. Ke ile ka ba bogale le go feta, e bile ke be ke phela ke elwa le bagolegwa ba bangwe. Ka letšatši le lengwe sehlopha sa rena se ile sa lwa le sehlopha se sengwe sa disenyi jarateng ya kgolego. Re ile ra lwa kudu re diriša dikota tša go bapala baseball le ditšhipi tša go itšhidulla. Bahlokomedi ba kgolego ba ile ba lamola ntwa yeo ka go diriša kgase ya go fahla. Ka morago ga moo, balaodi ba kgolego ba ile ba mpea lefelong leo go dulago disenyi tše kotsi kudu. Ke be ke le bogale kudu e bile ke na le lenyatšo. Go betha motho e be e se selo go nna! Ge e le gabotse, ke be ke go rata. Ke be ke sa swabišwe ke tsela yeo ke bego ke itshwara ka yona.

 Ge ke be ke le lefelong leo go dulago disenyi tše kotsi kudu, ke be ke fetša nako e ntši ke tswaleletšwe ka seleng, ka gona ke ile ka thoma go bala Beibele gore ke no itloša bodutu. Ka morago, moleti wa kgolego o ile a mpha puku yeo e rego, O ka Phela ka mo go sa Felego Paradeiseng mo Lefaseng. a Ge ke dutše ke bala puku yeo, ke ile ka gopola dilo tše dintši tšeo Dihlatse tša Jehofa di ilego tša nthuta tšona ka Beibeleng ge ke be ke sa le ngwana. Ka morago ga moo, ke ile ka thoma go naganišiša kamoo ke ilego ka no aroga ka gona ka baka la bogale bja ka. Le gona ke ile ka nagana le ka lapa lešo. Ka ge bosesi ba ka e le Dihlatse tša Jehofa, ke ile ka tlelwa ke kgopolo ya gore: ‘Ba tlo phela ka mo go sa felego.’ Ke moka ka ipotšiša gore: ‘Nna ke paledišwa ke’ng gore ke tle ke phele ka mo go sa felego?’ Ka yona nako yeo ke ile ka fetša le pelo ya ka gore ke nyaka go fetoga.

 Eupša ke be ke tseba gore ke swanetše go hwetša thušo e le gore ke kgone go fetoga. Ka gona, ke ile ka thoma go rapela Jehofa Modimo gore a nthuše gore ke fetoge. Ke moka ka ngwalela ofisi ya lekala ya Dihlatse tša Jehofa ya United States gomme ka kgopela go swarelwa thuto ya Beibele. Ofisi ya lekala e ile ya rulaganya gore bana babo rena ba phuthegong ya kgauswi le mo ke bego ke le gona ba ikgokaganye le nna. Ka nako yeo, ke be ke sa dumelelwa go etelwa ke batho bao e sego ditho tša lapa lešo. Ka gona yo mongwe wa banna ba phuthegong yeo o ile a thoma go nthomela mangwalo le dikgatišo tšeo di theilwego Beibeleng tšeo di ilego tša dira gore ke se sa nyaka go boela morago.

 Ke ile ka dira phetho e kgolo ka go se sa ba setho sa sehlopha sa disenyi seo ke ilego ka dirišana le sona mengwaga e mentši. Moetapele wa sehlopha seo le yena o be a beilwe karolong e kgethegilego ya bagolegwa ba kotsi, ka gona ka letšatši le lengwe ge re be re lokolotšwe gore re bethwe ke moya ke ile ka mmotša gore ke nyaka go ba yo mongwe wa Dihlatse tša Jehofa. Ke ile ka makatšwa ke ge a re: “Ge e ba o tloga o ikemišeditše, dira kamoo o phethilego ka gona. Ga ke nyake go lwa le Modimo. Eupša ge e ba o no nyaka go tlogela sehlopha sa rena ka mabaka a go se re selo, o a tseba gore go tlo direga’ng ka wena.”

 Ka morago ga mengwaga e mebedi, balaodi ba kgolego ba ile ba lemoga gore ke thoma go itshwara gabotse. Ka baka leo, ba thoma go ntshwara gabotse. Ka mohlala, ge balaodi ba kgolego ba be ba nkiša go yo hlapa, ba be ba se sa ntlema matsogo. Yo mongwe wa balaodi ba kgolego o ile a kgahlwa ke tsela yeo ke bego ke itshwere ka yona, gomme a mpotša gore ke tšwele pele ke itshwere gabotse. Ge e le gabotse, ge go be go šetše ngwaga o tee gore ke lokollwe kgolegong, balaodi ba kgolego ba ile ba nkiša lefelong leo le lego kgauswi le kgolego e kgolo moo bagolegwa ba sa bewego leihlo kudu. Ka 2004 ge ke be ke na le mengwaga e 10 ke golegilwe, ke ile ka lokollwa gomme ka išwa nageng ya Mexico ka pese ya kgolego.

 Gateetee ge ke fihla Mexico, ke ile ka nyaka moo Holo ya Mmušo ya Dihlatse tša Jehofa e lego gona. La mathomo ge ke be ke eya dibokeng ke be ke apere yunifomo ya kgolego ka ge e be e le diaparo tše kaone tšeo ke bego ke na le tšona. Le ge ke be ke apere diaparo tšeo, Dihlatse tša Jehofa di ile tša nkamogela ka lerato. Ge ke be ke bona lerato la tšona ke ile ka kgodišega gore ke Bakriste ba therešo. (Johane 13:35) Ge ke be ke le dibokeng tšeo, bagolo ba ile ba rulaganya gore go be le motho yo a tlago go ntshwarela thuto ya Beibele. Ka morago ga gore go fete ngwaga, ke ile ka kolobetšwa gore ke be Hlatse ya Jehofa. Ke kolobeditšwe ka di-3 tša September 2005.

 Ka January 2007 ke ile ka thoma go ruta batho Beibele ka mehla. Ke be ke fetša diiri tše 70 kgwedi e nngwe le e nngwe modirong wo. Ka 2011, ke ile ka aloga Sekolong sa Beibele sa Bana Babo Rena Bao ba Sego Lenyalong (seo ga bjale se bitšwago, Sekolo sa Baebangedi ba Mmušo). Sekolo se ke sona se nthušitše gore ke kgone go phetha maikarabelo ao ke a neilwego ka phuthegong.

 Ka 2013 ke ile ka nyala Pilar, e lego mosadi wa ka yo ke mo ratago kudu. Ge ke mo hlalosetša kamoo ke bego ke le ka gona pele ke ithuta Beibele, o thatafalela ke go ntshepa e bile o a ntshega. Ga sa nka ka boela mekgweng ya ka ya kgale. Nna le mosadi wa ka, ga re belaele gore Beibele e na le matla a go fetoša motho, kudukudu ge re bona kamoo e fetošitšego bophelo bja ka ka gona.​—Baroma 12:2.

 Ke kwa eka mantšu ao Jesu a a boletšego go Luka 19:10 a bolela ka nna. Temaneng yeo Jesu o itše: “[Ke] tletše go tsoma le go phološa seo se bego se timetše.” Ga ke sa ikwa ke timetše. Le gona ga ke sa ralala le naga ke kweša batho ba bangwe bohloko. Beibele e nthušitše gore ke tsebe gore ke phelela eng, le kamoo nka bago le khutšo le batho ba bangwe. Le gona sa bohlokwa le go feta, e nthušitše gore ke be le segwera se sebotse le Mmopi wa ka e lego Jehofa.