Batho ba bantši ba etela diphororo tšeo di tsebjago kudu tša kgauswi le toropo ya Pagsanjan nageng ya Philippines. Tate e lego Nardo Leron, o goletše moo a diila. O ile a galefa kudu ge a be a bona maphodisa, batho bao ba bego ba šoma mmušong le ba moo a bego a šoma gona ba dira dilo tšeo di sa lokago.

 Re be re le ba seswai ka gae. Batswadi ba rena ba be ba šoma ka thata gore ba re godiše. Ka ge ba be ba lema dithabeng, gantši ba be ba sa hwetšagale ka gae. Ka dinako tše dingwe nna le buti’aka Rodelio, re be re swanelwa ke go itlhokomela, gantši re hloka le sa go ja. Re be re sa hwetše le nako ya go bapala go swana le bana ba bangwe. Ge ke be ke na le mengwaga e šupa, yo mongwe le yo mongwe wa rena o be a gapeletšega go šoma ka thata. Re be re šoma mašemong, re sepela thabeng re rwele merwalo e boima ya di-coconut. Ge merwalo yeo e be e le boima kudu, re be re gapeletšega go e goga.

 Tate o be a dula a re betha, eupša re be re ekwa bohloko kudu ge a betha mma. Re be re leka go mo thibela, eupša go be go no swana. Nna le Rodelio, re ile ra kwana gore ge re gola re tlo bolaya tate. Ke be ke duma gore tate a re rate.

 Ge ke be ke na le mengwaga e 14 ke ile ka tloga gae ka ge ke be ke galefišitšwe ke gore tate o re swara gampe. Ke tšere nako e telele ke dula seterateng, ke moka ka thoma go kgoga patše. Ge nako e dutše e eya, ke ile ka ba mosesiši wa sekepe. Ke be ke iša batho go yo bona diphororo.

 Ka morago ga mengwaga e mmalwa, ke ile ka ya Yunibesithing ya Manila. Ke be ke se na nako e ntši ya go bala ka ge mafelobekeng ke be ke eya Pagsanjan go yo šoma. Bophelo bo be bo le boima e bile ke sa tsebe gore ke phelela eng, le patše e be e se sa nthuša. Ke ile ka thoma go kgoga di-drugs tše kotsi kudu, cocaine le heroin. Gantši go diriša di-drugs go dira gore motho a feleletše a itshwere ka tsela e gobogilego ka tša thobalano. Moo ke bego ke dula gona, batho ba be ba diila, ba tlaišega e bile go dirwa dilo tše di sa lokago. Ke be ke hloile mmušo e bile ke bona okare ke wona o bakago dilo tše. Ke ile ka botšiša Modimo gore: “Ke ka baka la’ng bophelo bo le ka tsela ye?” Ke ile ka nyaka dikarabo dikerekeng tša go fapafapana, eupša ka se di hwetše. Ke ile ka thoma go diriša di-drugs kudu gore ke itebatše mathata a ka.

 Ka 1972, barutwana ba Philippines ba ile ba rulaganya megwanto ya go lwa le mmušo. Ke ile ka tsenela o mongwe wa megwanto yeo, gomme wa feleletša ka bošoro. Batho ba bantši ba ile ba golegwa. Ka morago ga dikgwedi tše itšego, mašole a thoma go laola naga.

 Ke ile ka feleletša ke boetše seterateng gape, lekgeng le ke be ke tšhaba maphodisa ka ge ke ile ka tšea karolo megwantong ya go lwa le mmušo. Ke ile ka thoma go utswa e le gore ke kgone go hwetša tšhelete ya go reka di-drugs gomme mafelelong ka direla bahumi le batho ba go tšwa dinageng tše dingwe dilo tšeo di sego molaong. Ke be ke se na taba le bophelo.

 Ka nako yeo, mma le moratho wa ka wa mošemane ba be ba thomile go ithuta Beibele le Dihlatse tša Jehofa. Taba yeo e ile ya galefiša tate moo a ilego a fiša dipuku tša bona tša go ithuta Beibele. Eupša bobedi bja bjona ba ile ba kgotlelela go fihlela ba kolobetšwa gore e be Dihlatse tša Jehofa.

 Ka letšatši le lengwe, Hlatse ya Jehofa e ile ya bolela le papa ka tshepišo ya Beibele ya nakong yeo lefaseng ka moka go tla bego go dirwa dilo tše di lokilego. (Psalme 72:12-14) Taba ye e ile ya kgahla papa kudu moo a ilego a itirela nyakišišo ka yona. Ge a bala Beibele, o ile a hwetša gore Modimo ga a re tshepiše feela mmušo wa go loka, eupša o bolela le gore monna yo a nyetšego o swanetše go itshwara bjang ka gae le gore tate o swanetše go swara lapa la gagwe bjang. (Baefeso 5:28; 6:4) Ga se gwa tšea nako gore yena le bana bešo ba bangwe e be Dihlatse tša Jehofa. Ka ge ke be ke le kgole le gae ke be ke sa kgone go bona ge seo se direga.

 Ka 1978, ke ile ka hudugela Australia. Australia ke naga yeo e nago le khutšo le yeo e humilego, eupša le ge ke be ke le moo, ke be ke se na khutšo ya monagano. Ke ile ka tšwela pele ka go nwa bjala le go diriša di-drugs. Ka moragonyana, wona ngwageng woo, Dihlatse tša Jehofa di ile tša nketela. Ke ile ka rata seo di bego di mpontšha sona ka Beibeleng mabapi le lefase leo le nago le khutšo, eupša ke be ke tšhaba go tlwaelana le tšona.

 Ka moragonyana ga moo, ke ile ka boela Philippines gomme ka dula dibeke tše mmalwa. Bana ba gešo ba ile ba mpotša gore papa o leka ka gohle gore e be motho yo mokaone, eupša ke be ke sa mo galefetše kudu moo ke bego ke sa nyake le go mmona.

 Moratho wa ka wa mosetsana o ile a ntlhalosetša a diriša Beibele gore ke ka baka la eng batho ba tlaišega le gore ke ka baka la eng batho ba dira dilo tše di sa lokago. Ke ile ka makatšwa ke gore e be sa le mofsa, eupša o be a tseba dikarabo tša dipotšišo tša ka. Pele ke sepela papa o ile a mpha puku ya O ka Phela ka mo go sa Felego Paradeiseng mo Lefaseng. a O ile a re: “Tlogela go nyaka khutšo ka tsela yeo e sego yona. Puku ye e tla go thuša go hwetša seo o se nyakago.” O ile nkgopela gore ge ke fihla Australia ke nyake Dihlatse tša Jehofa.

 Ke ile ka dira kamoo tate a bego a mpoditše ka gona, ka nyaka Holo ya Mmušo ya Dihlatse tša Jehofa gomme ka e hwetša Brisbane kgauswi le mo ke bego ke dula gona. Ke ile ka dumela gore Dihlatse tša Jehofa di ithute Beibele le nna. Boporofeta bja Beibele bja go swana le bjo bo lego go Daniele kgaolo 7 le bjo bo lego go Jesaya kgaolo 9, bo nthutile gore mmušo wa Modimo wa go loka ke wona o tlo re bušago nakong e tlago. Ke ithutile gore re tlo thabela go phela Paradeiseng mo lefaseng. Ke be ke nyaka gore Modimo a nkamogele, eupša ke ile ka lemoga gore ke be ke swanetše go laola kgalefo ya ka, ke tlogele go kgoga di-drugs, go nwa bjala le go tlogela go phela ka tsela e gobogilego. Ke ile ka kgaogana le ngwanenyana yoo ke bego ke dula le yena, ka ba ka tlogela le dilo tšeo ke bego ke itlwaeditše tšona. Ge ke dutše ke tshepa Jehofa le go feta, ke ile ka mo rapela gore a nthuše go dira diphetogo tše dingwe bophelong bja ka.

 Ge ke dutše ke ithuta Beibele, ganyenyane-ganyenyane ke ile ka lemoga gore seo ke bego ke ithuta sona se ka dira gore motho a fetoge. Beibele e re ge re dira maiteko, re ka kgona go apara “semelo se sefsa.” (Bakolose 3:9, 10) Ge ke dutše ke leka go dira diphetogo, ke ile ka lemoga gore seo ke bego ke se kwele mabapi le gore tate le yena o dira diphetogo, se ka kgonega. Go e na le gore ke galefele tate le go mo hloya, ke be ke nyaka go dira khutšo le yena. Mafelelong, ke ile ka lebalela tate gomme ka tlogela lehloyo leo ke bilego le lona go tloga bjaneng.

 Ge ke be ke sa le lesogana, ke be ke dula ke gwerana le batho bao ba bego ba dira dilo tše mpe. Keletšo ya Beibele e bile ya nnete go nna, ditlwaelano tše mpe di ile tša dira gore ke tšwe tseleng. (1 Bakorinthe 15:33) Eupša ke hweditše bagwera bao ba tshepegago gare ga Dihlatse tša Jehofa, e bile ba nthušitše gore ke be motho yo mokaone. Le gona ke hweditše le mosadi yo mobotse e lego Loretta. Bobedi bja rena re ruta batho ba bangwe kamoo Beibele e ka ba thušago ka gona.

 Ke leboga Beibele ka ge e kgonne go thuša tate gore a fetoge gore a be monna yo mokaone yoo a ratago mosadi wa gagwe, e lego selo seo ke bego ke sa nagane gore se ka tsoga se diregile. Le gona, ga bjale tate ke Mokriste yo a nago le boikokobetšo le khutšo. Ke kolobeditšwe ka 1987 gore ke be Hlatse ya Jehofa. Ge ke kopana le tate ka morago ga moo, o ile a nkgokarela ka lekga la mathomo bophelong bja ka!

 Tate le mma ba ile ba tšwela pele ba ruta batho Beibele ba le gotee ka mengwaga ya ka godimo ga e 35. Tate o ile a thoma go šoma ka thata le go ba le botho gomme a tsebega ka go thuša batho. Mengwageng yeo ka moka, ke ile ka thoma go mo hlompha le go mo rata. Ke ile ka ikgantšha ka go ba morwa wa gagwe. Tate o hlokofetše ka 2016, eupša ke a thaba ge ke nagana ka yena ka gobane nna le yena re dirile diphetogo tše dikgolo bophelong ka ge re ile ra diriša seo re bego re ithuta sona ka Beibeleng. Ga ke sa mo hloile. Seo se nthabišago le go feta ke gore ke hweditše Tate wa ka wa legodimong, e lego Jehofa Modimo, yo a re tshepišago gore o tlo fediša dilo ka moka tšeo di re bakelago mathata.