Ke belegetšwe Montreal, e lego toropo e kgolo porofenseng ya Quebec kua Canada. Nna, sesi le baratho ba ka ba babedi, re goletše motsaneng o mobotsana wa Rosemont. Batswadi ba rena ba be ba re rata. Go be go le bose ka gae.

 Ge ke be ke sa le mošemane ke be ke rata go bala Beibele. Ka letšatši le lengwe ge ke be ke na le mengwaga e 12, ke ile ka bala ka bophelo bja Jesu ka Testamenteng e Mpsha gomme ka ipshina ka ditaba tšeo ke bego ke di bala. Ge ke be ke bala, ke ile ka kgahlwa kudu ke gore Jesu o be a rata batho e bile a ba kwela bohloko gomme seo sa dira gore ke nyake go mo ekiša. Sa go nyamiša ke gore ganyenyaneganyenyane, ke ile ka thoma go se sa ikwa ka tsela yeo ka ge ke be ke gwerane le batho ba babe.

 Tate e be e le sekgwari sa go letša saxophone. O ile a mpha yona gomme a dira gore ke rate mmino moo ke ilego ka thoma go o phelela. Ke be ke rata mmino kudu moo ke ilego ka thoma go ithuta go letša katara. Ge nako e dutše e eya, nna le bagwera ba ka re ile ra thoma sehlopha sa mmino wa rock gomme re be re fela re eya go letša meletlong. Batho ba go tuma bao ba dirago gore mmino o kgone go tšwelela, ba ile ba lemoga gore ke na le bokgoni gomme ba re ba tla nthuša go ya kgole ka mmino. Ke ile ka saena konteraka ya go šoma le khamphani e kgolo ya go rekhota. Mmino wa ka o ile wa tuma, le gona o be o dula o letšwa seteišeneng sa radio sa Quebec.

 Go be go bonagala eka ga ke hloke selo. Ke be ke le mofsa e bile ke tumile, le gona ke be ke dira tšhelete e ntši, ke kgona go e šomiša ka mokgwa wo ke ratago. Ke be ke fela ke eya go itšhidulla, ke boledišana le boraditaba, ke saenela batho moo ba bego ba nyaka gore ke ba saenele gona e bile ke tšwelela thelebišeneng. Bošego ke be ke eya go opelela batho e bile ke e ya meletlong. Ke thomile go opelela batho ke sa le yo mofsa, e le gore ke se ke ka tšhoga ke be ke thoma ka go nwa bjala, gomme mafelelong ka diriša le dihlaretagi. Ke be ke itshwere gampe e bile ke se na taba le gore batho ba re’ng.

 Batho ba bangwe ba be ba duma tsela yeo ke bego ke phela ka yona ka gobane ba be ba bona eka ke thabile. Eupša ge e le gabotse ke be ke sa thaba, kudukudu ge ke be ke le nnoši. Ke be ke imetšwe kudu e bile ke dula ke balabala. Ke moka dilo tša re di sa ntshepelela gabotse ka mmino, banna ba babedi bao ba bego ba nthuša go tšweletša mmino, ba bolawa ke bolwetši bja AIDS. Ke ile ka šala ke tšhogile! Le ge ke be ke rata mmino, ke be ke hloile tsela yeo mmino woo o bego o dirile gore ke phele ka yona.

 Le ge ke be ke atlegile, ke be ke bona gore lefase le senyegile. Ke be ke ipotšiša gore ke ka baka la eng mo lefaseng go direga dilo tše mpe, le gore ke ka baka la eng Modimo a sa fediše dilo tše. Ke be ke dula ke rapela Modimo gore a arabe dipotšišo tša ka. Ge ke be ke le maikhutšong, ke ile ka thoma go bala Beibele gape. Le ge ke be ke sa kwešiše bontši bja dilo tšeo ke bego ke di bala, ke ile ka bona gore bofelo bja lefase bo kgauswi.

 Ge ke dutše ke bala Beibele, ke ile ka hwetša gore Jesu o ile a fetša matšatši a 40 a ikona dijo lešokeng. (Mateo 4:​1, 2) Le nna ke ile ka ipotša gore mohlomongwe ge nka ikona dijo, Modimo a ka nthuša gore ke mo tsebe. Ka gona ke ile ka bea letšatši leo ke tlago go thoma go ikona dijo ka lona. Ge go be go šetše dibeke tše pedi gore ke thome go ikona dijo, ke ile ka etelwa ke Dihlatse tša Jehofa. Ke ile ka di amogela ka gae moo e kego ke be ke dutše ke di letetše. Ke ile ka tsepelela Hlatse yeo e bitšwago Jacques ka mahlong, gomme ka mo kgopela gore a mpontšhe bohlatse bja gore re phela mehleng ya bofelo. O ile a mpontšha bohlatse bjoo ka go mpalela 2 Timotheo 3:​1-5. Ke ile ka botšiša Dihlatse tšeo dipotšišo tše dintši gomme seo se ilego sa nthabiša kudu ke gore di be di nkaraba ka Beibele. Ka morago ga gore Dihlatse tšeo di nketele ka makga a mmalwa, ke ile ka bona gore ga go hlokagale gore ke ikone dijo.

 Ke ile ka thoma go ithuta Beibele le Dihlatse tša Jehofa. Mafelelong, ka fokotša moriri wa ka o motelele gomme ka thoma go ya dibokeng tša Dihlatse tša Jehofa. Dibokeng tšeo ke ile ka amogelwa ka lerato gomme seo sa nkgodiša gore ke hweditše bodumedi bja nnete.

 Ke be ke swanetše go fetoša tsela yeo ke bego ke phela ka yona go bontšha gore ke kwešiša seo ke ithutago sona. Ka mohlala, ke tlogele go diriša dihlaretagi le go itshwara gampe. Ke be ke swanetše go naganela batho ba bangwe go e na le go inaganela ke nnoši. Ka ge ke be ke se na mosadi, ke be ke swanetše go ithuta go thuša bana ba ka ge ba lebeletšana le mathata a bophelo, gaešita le go ba ruta ka Modimo. Ka gona ke ile ka tlogela mmino gomme ka šoma femeng yeo e bego e mpatela tšhelete e nnyane.

 Go be go se bonolo go dira diphetogo tše. Ka mohlala, ge ke be ke leka go tlogela dihlaretagi, ke be ke hlakahlakana gomme ke boela ke di diriša gape. (Baroma 7:​19, 21-​24) Go be go le thata go fetoša tsela yeo ke bego ke itshwere ka yona. Mošomo wa ka o mofsa le wona o be o ntapiša, le gona tšhelete yeo ke bego ke e gola e be e sa re selo. Go ntšere dikgwedi tše tharo gore ke hwetše tšhelete yeo ke bego ke e hwetša ka diiri tše pedi ge ke be ke sa le seopedi.

 Thapelo e ile ya nthuša gore ke kgotlelele ge ke be ke dira diphetogo tše. Le gona, ke be ke thušwa ke go bala Beibele ka mehla. Ditemana tše dingwe tša Beibele di be di nkgothatša kudu. E nngwe ya tšona e be e le 2 Bakorinthe 7:1, yeo e eletšago Bakriste gore ba “[itlhwekiše] ditšhila tšohle tša nama le tša moya.” Temana e nngwe yeo e ilego ya nkgodiša gore nka kgona go fenya mekgwa ya ka e mebe ke la Bafilipi 4:​13, yeo e rego: “Dilong tšohle ke na le matla ka baka la yo a mphago matla.” Jehofa Modimo o ile a araba dithapelo tša ka gomme a nthuša gore ke kwešiše seo Beibele e se rutago le go se diriša bophelong bja ka. Dilo tše ka moka di ile tša dira gore ke feleletše ke ineetše go Yena. (1 Petro 4:1, 2) Ke ile ka kolobetšwa ka 1997 gore ke be Hlatse ya Jehofa.

 Ge nkabe ke ile ka tšwele pele ke phela ka tsela yeo ke bego ke phela ka yona pele ke ithuta therešo ya Beibele, nkabe ke hwile. Ga bjale ke ipshina ka bophelo! Jehofa o ntšhegofaditše ka mosadi yo a rategago e lego Elvie. Nna le yena re thabela go ruta batho Beibele ka mehla. Seo se dira gore ke thabe le go feta. Ke tloga ke leboga Jehofa gore o ile a nkgogela go yena.​—Johane 6:​44.