Artur yoo a šomago go etela diphuthego tša Dihlatse tša Jehofa kua Armenia, o be a etetše e nngwe ya diphuthego tša moo. Ge a fihla o ile a lemoga gore phuthego yeo ga se ya tšwa e thoma go ruta batho Beibele mafelong a batho bohle e diriša diteroli tšeo di nago le dikgatišo tša go ithuta Beibele. E le gore a kgothaletše phuthego yeo go dira seo, Artur le mosadi wa gagwe Anna gotee le Hlatse e nngwe ya Jehofa e lego Jirayr, ba ile ba bea teroli ya bona ya dikgatišo toropong e nngwe e nyenyane ya moo. Ba ile ba kgetha lefelo leo go fetafetago batho ba bantši.

 Kapejana batho bao ba bego ba feta moo ba ile ba kgahlwa ke seo ba se bonago gomme ba thoma go tšea dikgatišo. Eupša go se go ye kae le batho bao ba sa ratego Dihlatse tša Jehofa le bona ba ile ba lemoga seo se diregago. Baruti ba babedi ba ile ba ya teroling yeo, ke moka yo mongwe wa bona a no thoma le go e raga. O ile a betha Artur sefahlegong, a lahlela fase digalase tša gagwe tša mahlo. Artur, Anna le Jirayr ba ile ba leka go theoša maswafo a baruti bao, eupša ba se kgone. Baruti bao ba ile ba pšhatlaganya teroli yeo ka maoto ke moka dipuku tša gašana gohle. Ka morago ga go roga Dihlatse tšeo tša Jehofa le go di tšhošetša, baruti bao ba ile ba sepela.

 Artur, Anna le Jirayr ba ile ba ya go bula molato maphodiseng. Ba ile ba hlalosa seo se diragetšego, ke moka ba bolela ka Beibele ganyenyane le maphodisa le batho ba ba bangwe bao ba šomago moo. Dihlatse tša Jehofa tšeo tše tharo di ile tša išwa ka ofising wa molaodi yo mogolo wa maphodisa. Mathomong o be a no nyaka go tseba feela gore go diragetše eng. Eupša ge a ekwa gore Artur, yoo e bego e le monna wa senatla ga se a ka a itwela, o ile a tlogela go botšiša ka molato woo gomme a botšiša ka dilo tšeo Dihlatse tša Jehofa di di dumelago. Dihlatse tšeo tša Jehofa di ile tša fetša diiri tše nne di bolela le lephodisa leo! Lephodisa leo le be le maketše kudu moo le ilego la kgotsa ka gore: “Ijoo, kereke ye ke yonayona! Le nna ke nyaka go e tsena!”

 Letšatšing le le latelago ge Artur a be a boetše go yo ruta batho Beibele a diriša teroli, monna yo mongwe yo a bego a bone seo se diragetšego letšatšing le le fetilego o ile a tla go yena. Monna yoo o ile a reta Artur gore o ile a itshwara gomme a se lwe le baruti. O ile a oketša ka gore seo a se bonego se ile sa dira gore a se sa hlompha baruti ka moka.

 Wona mantšiboeng ao molaodi yola yo mogolo wa maphodisa o ile a bitša Artur gore a boe gape. Eupša go e na le gore ba bolele ka molato yola wa maabane, o ile a botšiša dipotšišo tša mabapi le Beibele. Maphodisa a mangwe a mabedi a ile a tla a theetša poledišano yeo.

 Letšatšing le le latelago Artur o ile a boela gape go molaodi yo mogolo wa maphodisa gomme a mmontšha tše dingwe tša dibidio tša rena tšeo di theilwego Beibeleng. Molaodi yoo o ile a bitša maphodisa a mangwe gore le ona a tle a bogele dibidio tšeo.

 Seo baruti bao ba ilego ba se dira se ile sa dira gore maphodisa a mantši a kwe molaetša wa Beibele ka lekga la pele. E bile se ile sa dira gore maphodisa ao a rate Dihlatse tša Jehofa le go di kwešiša gakaone.