Maud yo a dulago France o šoma ka go thuša bana bao ba sa itekanelago sekolong. Bana ba sekolo ka letšatši le lengwe ba ile ba ithuta ka polao le dikampa tša tlaišo tša ma-Nazi. Bagolegwa ba moo dikampeng ba be ba swanetše ke go apara maswao a mebala diaparong tša bona. Mebala yeo e bego e le maswaong ao e be e bontšha gore ke ka baka la’ng motho yoo a golegilwe moo.

 Morutiši yo mongwe o ile a bolela ka maswao a maphepholo ao a bego a apere ke bagolegwa ba bangwe moo gore: “Ke nagana gore ba be ba ratana le batho ba bong bja bona.” Ka morago ga gore Morutiši yoo a tšwe ka klaseng, Maud o ile a ya go morutiši yoo gomme a mmotša gore leswao leo e be e le la go hlaola Dihlatse tša Jehofa. a O ile a ithaopela go mo tlišetša boitsebišo bjo bongwe. Morutiši yoo o ile a dumela gomme a ba a kgopela Maud gore a tle a tsebiše le bana ba bangwe ba sekolo.

 Morutiši yo mongwe o ile a tla ka klaseng gomme a bontšha bana ba sekolo tšhate ya maswao ao a bego a aparwa ke bagolegwa. Tšhate yeo e ile ya bontšha gore leswao le lephepholo le be le aparwa ke Dihlatse tša Jehofa. Ka morago ga gore morutiši a tšwe ka klaseng, Maud o ile a kgopela go mo nea boitsebišo bjo bongwe. Morutiši yoo le yena o ile a dumela gomme a kgopela Maud gore a tle a tsebiše le bana ba sekolo.

 Maud o ile a lokišetša metsotso e 15 gore a tle a boledišane le bana ba sekolo ka klaseng, eupša ge nako yeo e fihla o ile a tsebišwa gore: “O na le iri ka moka.” Maud o ile a thoma ka go bapala dibio ya ge Dihlatse tša Jehofa di be di tlaišwa ke ma-Nazi. Ge bidio yeo e thoma, e ile ya bontšha ma-Nazi a tšea bana ba Dihlatse ba 800 go batswadi ba bona, Maud o ile a emiša bidio gomme a bala phihlelo ya bana ba bararo bao ba bego ba le gare ga ba 800. Ka morago ga dibio Maud o ile a fetša ka go bala lengwalo la ngwana wa mengwaga e 19 yo a bitšwago Gerhard Steinacher leo a le ngwaletšego batswadi ba gagwe ka 1940 diiri tše sego kae pele a ka bolawa ke ma-Nazi. b

 Maud o ile a bontšha bana ba ka klaseng ya bobedi se se swanago. Re leboga Maud ka ge a ile a bontšha sebete, barutiši bao ba babedi gona bjale ba kgonthišetša gore ba bolela ka Dihlatse tša Jehofa ge ba ruta ka bagolegwa bao ba bego ba le dikampeng tša tlaišo tša ma-Nazi.