Rachel yoo ga bjale a dulago Dominican Republic o re “ke belegetšwe ka lapeng leo le bego le hlankela Jehofa.” Ka manyami, ge ke be ke na le mengwaga e 7 papa o ile a tlogela go hlankela Jehofa, e bile ditherešo di be di mo galefiša, a sa nyake go kwa selo ka tšona. O be a dira gore go be boima go nna gore ke hlankele Jehofa. Ka dinako tše dingwe, o be a ntshepiša gore o tla mpha dilo, go swana le founo, go nkiša Disneyland goba go mpha tšhelete, ge fela nka tlogela go hlankela Jehofa! Ka dinako tše dingwe o be a mpetha le ka difeisi go no re ke tlogele go hlankela Jehofa. O be a re ge e ba ke sa kgone go bolela goba go sepela, gona ke be nka se kgone go ya dibokeng. Dilo tše ka moka ga se tša ka tša nthibela go ya dibokeng.

 “Papa o be a sa mpethi ge Mma a le gona. O be a mpotša gore ge nka botša Mma gore o a mpetha, o be a tlo gobatša Mma. Ka ge a be a gapeletša go nthuta karate, o be a re mabadi ao ke bego ke na le o na a bakilwe ke karate.

 “Ke be ke le yo mo nnyane kudu, e bile ke tšhaba papa kudu moo nka se kgonego go botša Mma dilo tšeo di bego di direga. Ka gona, ke be ke botša Jehofa. Ke be ke rata go itshepelela ka gare ga dihlare tšeo di bego di le ka morago ga ntlo ya gešo kua Maryland, U.S.A. Ka gare ga mehlare yeo, go be go na le mohlare o mobotse kudu wa Mo-oak woo ke bego ke rata go o namela, ge ke le moo ke be ke rata go boIela le Jehofa. Ke be ke botša Jehofa kamoo ke ikwago ka gona le gore ke nyaka go mo direla eng ge ke gola, ge fela nka phela go fihlela ke gola. Ke be ke mmotša le gore lefaseng le leswa ke tlo dira eng, le ka lapa leo ke tla bego ke na le le lona, go na le khutšo le lethabo, ke sa kwe bohloko e bile ke sa boife selo.

 “Ge papa a be a leka go dira gore ke se sa hlankela Jehofa ka go ntshepiša dilo le go mpetha, ke be ke dula ke ekwa Jehofa a nkhomotša le go mmatlafatša. Modimo o ile a nthuša gore ke dule ke botega le gore ke kgone go kgotlelela.

 “Ke ile ka kolobetšwa ke na le mengwaga e 10, ke moka ka ba mmulamadibogo wa ka mehla ka morago ga mengwaga e mebedi. Mathomong, papa o be a sa tsebe ka ditaba tše. Ge a tlo tseba, o ile a mpetha kudu moo mehlagare ya ka e ilego ya se sa ba madulong.

 “Batho ba bangwe ba be ba re ke sa le yo mo nnyane kudu gore nkaba mmulamadibogo, e bile ba nagana gore ga ke tsebe seo ke se dirago, le gore bobulamadibogo ga se papadi. Ge nako e dutše e e ya, ke ile ka bona bafsa ba moo ke bego ke dula gona ba se sa na taba le go hlankela Jehofa. Ba be ba phelela menate. Dilo tšeo ba bego ba di dira di be di dumiša! Ka dinako tše dingwe le nna ke be ke nyaka go dira dilo tšeo ba bego ba di dira. Ke be ke ipotšiša gore, ‘ke ka baka la eng le nna ke sa no tlogela go bolela ditaba tše dibotse, ke ipshine ka bophelo go swana le dithaka tša ka?’ Eupša ge ke be ke ikwa ka tsela yeo, ke be ke bolela le Jehofa.

 “Ge ke be ke na le mengwaga e 15, ke ile ka founelwa ke motho yoo e bego e le wa khamphani ya go tuma ya bo mmasebotsana. Ba be ba re ba tla mpatela tšhelete e ntšhi kudu ge nka šoma le bona kua Milan, Italy. Taba ya gore ke be nka ba mmasebotsana, ka tšwelela dimakasineng le go bapatša diaparo tša go tura kudu e be e nkweša bose kudu. Ke be ke šetše ke na le mengwaga e meraro ke le mmulamadibogo, e bile mošomo wo o be o tlo dira gore ke kgone go itlhokomela, le gore ke be le tšhelete e lekanego gore ke tšwele pele ka bobulamadibogo ka nako e telele!’ Papa o be a re tlogetše, ka gona ke be ke nagana gore tšhelete yeo e ka thuša le Mma.

 “Ke ile ka rapela ka taba ye. Ke ile ka bolela le Mma ka taba ye, o be a na le mengwaga e mentšhi e le mmulamadibogo, ka ba ka bolela le mogolo yoo a bego a ratega le go hlomphega. Ke ile ka ya le mohlareng woo ke bego ke rapela go ona ke moka ka rapela. Jehofa o ile a araba dithapelo tša ka a diriša mantšu ao a lego ka Beibeleng ao mogolo a ilego a mpalela ona. Ke mantšu ao a lego go Mmoledi 5:4, ao a rego: ‘Ka mehla ge o enela Modimo keno, o e phethe. Seo o se enago, o se phethe.’ Ke be ke enne ka gore ke tla hlankela Jehofa ka mo go feletšego, e bile ke be ke tseba gore mošomo woo, o be o tlo dira gore ke se hlankele Jehofa gabotse. Ka gona, ke ile ka gana mošomo woo.

 “Go sa šetšwe dilo tšeo di ilego tša ntiragalela ge ke be ke sa le yo mo nnyane, ke ile ka phologa! Ga bjale ke na le lelapa leo le nthabišago kudu e lego monna wa ka Jaser le morwa wa rena, Connor yo a nago le mengwaga e 9. Monna wa ka ke mogolo, e bile morwa wa rena ke mogoeledi yo a sa kolobetšwago. Ke na le mengwaga e ka bago e 27 ke le tirelong ya nako e tletšego.

 “Ke fela ke nagana ka nako e telele yeo ke bego ke e fetša ke boledišana le Jehofa ke le godimo ga mohlare wa Mo-oak, woo o bego o le ka gare ga mehlare yeo e bego e le ka morago ga ntlo ya gešo. Ke ile ka kgopela Jehofa gore a nthuše, e bile o nthušitše ka ditsela tšeo di makatšago. O ile a mmatlafatša, a nkhomotša le go ntlhahla. Bophelong bja ka ka moka, Jehofa o mpontšhitše gantšhi kudu gore ke tate yo lerato. Ke thabišwa ke gore, ke ile ka kgetha go mo hlankela ka pelo ya ka ka moka. Ga gona phetho e botse kudu yeo ke ilego ka e dira go phala ye.”