Madián le Marcela ba be ba na le dilo tše di bonagalao kua Medellín, Colombia. Mošomo wa Madián o be o patela gabotse, gomme ba dula lefelong le lebotse kudu. Eupša selo se sengwe se ile sa dira gore ba boledišane ka dilo tše bohlokwa ka ge e le bahlanka ba Jehofa. Ba re: “Ka 2006 re ile ra ya kopanong ye e nago le sehlogo seo se rego” ‘Boloka Leihlo la Gago le Lokile’. Dipolelo tše dintši di be di bolela ka bohlokwa bja go nolofatša maphelo le go hlankela Jehofa ka mo go oketšegilego. Ge re tloga kopanong re ile ra lemoga gore rena re be re sa diriše seo se boletšwego. Re be re reka dilo tše dintši e bile re na le dikoloto tše dintši.”

 Ka morago ga dipolelo tšeo, Madián le Marcela ba ile ba thoma go nolofatša maphelo a bona. Ba re: “Re ile ra thoma go fokotša dilo tšeo re bego re iphediša ka tšona. Re ile ra yo dula ka ntlong e nyenyane, ra rekiša koloi ya rena gomme ra reka sekuta.” Le gona ba ile ba phema go dula ba eya mabenkeleng gantši ka gobane ba be ba tlo lekega go reka dilo. Ba ile ba fetša nako ya bona e ntši ba boledišana le baagišane ba bona ka Beibele. Le gona ba ile ba thoma go ba le bagwera bao ba bego ba hlankela Jehofa ka mafolofolo e le babulamadibogo ba kgethegilego. a

 Ka moragonyana, Madián le Marcela ba ile ba phetha ka go hudugela phuthegong e nyenyane yeo go se nago bagoeledi ba bantši. E le gore ba kgone go huduga, Madián o ile a tlogela mošomo wa gagwe. Motho yoo a bego a mo okamela mošomong o be a nagana gore o thomile go hlakana hlogo. Ka gona Madián o ile a mmotšiša gore: “O gola tšhelete e ntši, eupša na o thabile?” O ile a dumela gore ga se a thaba, ka gobane o be a na le mathata a mantši ao a sa kgonego go a rarolla. Madián o ile a re go yena: “Se bohlokwa ga se tšhelete yeo motho a e golago. Ke seo se dirago gore a thabe. Go ruta batho ka Modimo go dira gore nna le mosadi wa ka re thabe, le gona re nyaka go thaba le go feta ka go fetša nako e ntši re ruta batho ka Beibele.”

 Madián le Marcela ba thabišwa ke go fihlelela dipakane tša bona le go hlankela Jehofa. Mengwageng e 13 e fetilego ba hlanketše moo go nago le tlhokagala diphuthegong tša northwest Colombia. Gona bjale ba thabela tokelo ya go hlankela e le babulamadibogo ba kgethegilego.