Bryn, yo a dulago North Carolina, U.S.A., ke yo mongwe wa Komiti ya go Hloma Kwano le Sepetlele, yeo e šomago le dipetlele go hlokomela balwetši bao e lego Dihlatse tša Jehofa.

 Dipetlele tše dintši di be di sa dumelele batho go etela balwetši ka lebaka la leuba la COVID-19. Bryn o ile a founela molaodi wa sepetlele gore a kwe ge e ba a ka kgona go nea balwetši bao e lego Dihlatse thekgo.

 Bryn’s o ile a bolela le mothuši wa molaodi. Bryn o ile a botšiša ge e ba a ka nea balwetši bao e lego Dihlatse nomoro ya gagwe gore a kgone go boledišana le bona. Ba ile ba dumela.

 Bryn o ile a nagana le ka bašomi ba sepetlele. O ile a botša mothuši yoo gore o leboga ka tsela yeo bašomi ba šomago ka yona le gore o tshepa gore ba sa phetše gabotse. O boletše le gore o ile a bala go gongwe gore bašomi ba dipetlele ba na le stress ka lebaka la leuba.

 Mothuši yoo o ile a dumelelana le yena ke moka a mmotša gore COVID-19 e dirile gore go šoma sepetlele go be boima.

 Bryn o itše: “Wepesaete ya rena e na le dikgatišo tšeo di ka thušago batho gore ba lebeletšane le stress. Ge o ka ya go jw.org ke moka wa ngwala gore ‘stress’ ka lepokisaneng leo le re go ‘nyaka,’ o tlo hwetša dikgatišo tšeo di kgothatšago tšeo di tlago go hola bašomi ba lena.”

 Ge ba sa dutše ba bolela, mothuši o ile a ya wepesaeteng, a ngwala gore “stress” ka lepokisaneng leo le rego nyaka, ke moka a hwetša dihlogo tša gona. O boletše gore: “Ke tla di bontšha molaodi. Di tlo thuša bašomi ba rena le batho ba bangwe. Ke ya go di gatiša ke moka ke dife batho.”

 Dibeke tše mmalwa ka morago, Bryn o ile a bolela le molaodi yoo a ilego a mmotša gore ba tsene wepesaeteng ke moka ba bala dihlogo tšeo di bolelago ka stress. Ba ile ba di bontšha le baoki le batho bao ba šomago sepetlele.

 Bryn o itše: “Molaodi o ile a leboga mošomo wa rena le dikgatišo tša rena tšeo di ngwadilwego gabotse. Di ba thušitše kudu.”