Irma, e lego mosadi yo mongwe yo a tšofetšego yo a dulago kua Jeremane, o na le mengwaga e ka bago e 90. Ka morago ga gore a we gabedi gabohloko e bile a dirwe diophareišene tše mmalwa, ga a sa kgona go ya ka ntlo le ntlo a yo ruta batho Beibele. Gona bjale Irma o ruta batho ba gabo Beibele le batho ba bangwe bao a ba tlwaetšego ka go ba ngwalela mangwalo. Batho ba thabela mangwalo a kgothatšago le ao a homotšago ao Irma a ba ngwalelago wona, moo gantši ba mo founelago ba mmotšiša gore o tlo ba ngwalela neng mangwalo a mangwe gape. Batho bao a ba ngwaletšego mangwalo ba a mo araba ba mo leboga, ke moka ba mo kgopela gore a ba ngwalele gape. Irma o re: “Se se a nthabiša e bile se dira gore ke kgone go tšwela pele ke ruta batho ba bangwe Beibele.”

 Le gona Irma o romela batho bao ba dulago legaeng la batšofadi mangwalo. Irma o re: “Mokgekolo yo mongwe o ile a mphounela a mpotša gore lengwalo leo ke mo ngwaletšego lona le ile la mo kgothatša kudu ka morago ga gore monna wa gagwe a hlokofale. Mokgekolo yoo o be a bea lengwalo leo ka Beibeleng ya gagwe gomme gantši a le bala bošego. Mosadi yo mongwe yoo le yena a sa tšwago go hlokofalelwa ke monna wa gagwe, o re lengwalo leo ke mo ngwaletšego lona le mo thušitše kudu go feta thero ya moruti. Mosadi yoo o be a na le dipotšišo tše dintši gomme o ile a kgopela go nketela gore ke tle ke mo arabe dipotšišo tšeo tša gagwe.”

 Motho yo mongwe yo e bego e se Hlatse ya Jehofa yo a bego a tsebana le Irma o ile a hudugela kgole gomme a kgopela Irma gore a mo ngwalele mangwalo. Irma o re: “Mosadi yoo ga se a ka a lahla le letee la mangwalo a ka. Ka morago ga gore mosadi yoo a hlokofale, morwedi wa gagwe o ile a mphounela. O ile a mpotša gore o badile mangwalo ka moka ao ke bego ke a ngwaletše mmagwe, gomme a kgopela gore le yena ke mo ngwalele mangwalo ao a nago le ditemana tša Beibele.”

 Kgaetšedi Irma o tloga a thabišwa ke go ruta batho Beibele. O re: “Ke dula ke rapela Jehofa ke mo kgopela gore a mphe matla a go tšwela pele ke mo hlankela. Le ge ke se sa kgona go ya ka ntlo le ntlo, ke dira sohle seo ke se kgonago.”