Batho ba merafo ya go fapafapana ba dula lešokeng la Amazon, kua Amerika Borwa. Moo ba dulago gona ke kgolekgole le leemaema la metseng ya ditoropong. Ka gona ka July 2017, Dihlatse tša Jehofa tše 13 di ile tša rulaganya leeto la go rotoga ka Noka ya Maroni le dinokana tše di elelago ka go yona tša French Guiana. Morero wa leeto le e be e le ofe? Dihlatse tše tša Jehofa di be di nyaka go botša batho bao ba dulago moo kgauswi le noka ka molaetša o kgahlišago wa Beibele.

 Batho bao ba bego ba tlo tšea leeto leo ba ile ba swara seboka sa mabapi le leeto leo kgwedi pele ga ge ba ka tšea leeto leo la matšatši a 12. Winsley o re: “Re ile ra ithuta ka tikologo yeo le histori ya yona, e bile ra boledišana ka gore re be re tlo itokišeletša bjang leeto leo.” Yo mongwe le yo mongwe wa rena o be a na le selo sa go tswalela gabotse sa go tsenya lešela le legolo la go robala (hammock) le nnete ya go thibela menang. Gore re fihle moo re ile ra swanelwa ke go diriša difofane tše pedi le go fetša diiri tše dintši re sepela ka diketswana.

 Bao ba bego ba kgethilwe go tšea leeto le ba ile ba ikwa bjang? Claude le Lisette bao ba lego mengwageng ya go tšwa phenšene ba ile ba amogela taletšo yeo ntle le go senya nako. Claude o re: “Ke be ke thabile kudu eupša e bile ke na le letšhogonyana. Ke be ke kwele gore go na le mafelo a kotsi ka nokeng yeo moo meetse a kitimago ka lebelo godimo ga maswika.” Lisette le yena go na le seo a bego a tshwenyegile ka sona. O re: “Ke be ke ipotšiša gore ke tlo kgona bjang go bolela le batho ka maleme ao ke sa a tsebego a Amerika ao a bolelwago moo.”

 Mickaël yoo le yena a bego a tlo tšea leeto leo o be a ikwa ka tsela e swanago. O re: “Re be re sa tsebe dilo tše dintši ka morafo wa Wayana, ka gona ke ile ka dira nyakišišo Inthaneteng go ithuta mantšu a sego kae le go ithuta go dumediša batho ka segagabo bona.”

 Shirley yo a bego a sepela le monna wa gagwe Johann leetong leo o ile a ngwala maleme ao batho ba metseng ya kgauswi le noka yeo ba a bolelago. O re: “Re ile ra taonelouta dibidio go jw.org ka maleme a mantši ao batho ba moo ba a bolelago gomme ra nyaka le puku yeo e bego e ruta motho mantšu a sego kae a Sewayana.”

 Ka Labobedi la di-4 tša July, sehlopha seo se ile sa namela sefofane toropong ya Saint-Laurent du Maroni gomme sa fofela Maripasoula, e lego toropo e nyenyane yeo e lego ka garegare ga French Guiana.

 Matšatšing a mane ao a ilego a latela, sehlopha seo se ile sa tšama se ruta batho ba metseng ya kgauswi le Noka ya Maroni ka Beibele se sepela ka diketswana tšeo di nago le dientšene. Roland e lego yo mongwe wa bao ba lego sehlopheng seo o re: “Re ile ra hwetša batho ba moo ba tloga ba rata go ithuta Beibele. Ba be ba na le dipotšišo tše dintši gomme ba bangwe ba be ba nyaka gore re ithute Beibele le bona.”

 Ge Johann le Shirley ba be ba le motseng o mongwe, ba ile ba kopana le banyalani ba bafsa bao yo mongwe wa leloko la gabo bona a bego a sa tšwa go ipolaya. Johann o re: “Re ile ra ba bontšha bidio yeo e rego A Native American Finds His Creator” yeo e lego go Kgašo ya JW ya Seisemane. “Bidio yeo e ile ya kgoma banyalani bao kudu. Ba ile ba re fa aterese ya bona ya e-mail ka gobane ba be ba nyaka go tšwela pele ba boledišana le rena.”

 Motse wa kgole kudu woo ba ilego ba fihla go wona ge ba dutše ba rotoga le noka yeo e bile wa Antécume Pata. Kgoši ya motseng woo e ile ya dumelela Dihlatse tšeo tša Jehofa go bea mašela a tšona a go robala lefelong la batho bohle. Ba ile ba hlapa ka nokeng yeo ya Maroni go no swana le batho ba moo.

 Ge ba tloga moo ba ile ba ya motseng wa Twenké, moo ba ilego ba hwetša batho ba moo ba kwele bohloko ka ge ba be ba hlokofaletšwe. Éric e lego yo mongwe wa bao ba ilego ba thuša go rulaganya leeto le o re: “Monna yo e bego e le yena a ikarabelago ka ditaba tša moo, o ile a re dumelela gore re sepelasepele moo motseng ka bolokologi re tšama re homotša bao ba llago. Monna yoo le lapa la gagwe ba ile ba rata ditemana tšeo re ilego ra ba balela tšona ka Beibeleng ya Sewayana. Le gona re ile ra ba bontšha dibidio tšeo di bolelago ka tshepišo yeo e lego ka Beibeleng ya gore bahu ba tlo tsošwa.”

 Sehlopha seo se ile sa namela sefofane seo se ilego sa tšea seripa sa iri go tloga toropong ya Maripasoula go ya toropong e nyenyane ya Grand-Santi. Ka Labobedi le ka Laboraro, sehlopha seo se ile sa botša batho ba toropong yeo molaetša wa Beibele. Ka Labone, sehlopha seo se ile sa tšea leeto le lengwe la diiri tše hlano le seripa go theoga le Noka ya Maroni go ya motseng wa Apatou.

 Letšatšing la pele ga la mafelelo la leeto leo, sehlopha se ile sa etela metseng ya Maroons, moo go dulago ditlogolwana tša makgoba a Maafrika ao a ilego a tlišwa Amerika Borwa a etšwa nageng ya kgauswi le moo ya Suriname. Dihlatse tša Jehofa di ile tša mema batho ka moka go tla sebokeng seo se bego se tlo swarelwa lešokeng ka tenteng e kgolo yeo e bego e hlomilwe go tlo swara seboka seo. Claude o re: “Re be re thabile kudu ge re be re bona batho ba bantši ba etla sebokeng seo. Re be re sa tšwa go ba mema mesong yona yeo!” Karsten yoo e bego e le la mathomo a tšea leeto la mohuta woo o ile a nea polelo ya Beibele ka Seaukan. Polelo yeo e be e na le sehlogo seo se rego “Na Bophelo bjo ke Bjona Feela bjo bo Lego Gona?” Batho ba 91 ba go tšwa metseng e mmalwa ba ile ba tla sebokeng seo.

 Mafelelong sehlopha seo se ile sa boela toropong ya Saint-Laurent du Maroni. Ka moka ga bona ba be ba kgomilwe kudu ke tsela e botse yeo batho ba bantši ba ilego ba arabela ka yona. Batho bao ba ile ba tšea dikgatišo le go bogela dibidio tša Dihlatse tša Jehofa.

 Lisette o re: “Ga ke na mantšu a go hlalosa gore ke thabile gakaakang gore ke ile ka tšea leeto le.” Cindy o dumelelana le yena ka gore: “Ge e ba go ka ba le sebaka sa go boela, nka se šale. O swanetše go ikela ka noši gore o tle o kwešiše!”

 Leeto leo le ile la dira gore ba bangwe ba bana babo rena le dikgaetšedi ba nyake go boela metseng yeo gape. Mickaël o re: “Re ka boela gape!” Winsley o hudugetše toropong ya Saint-Laurent du Maroni. Claude le Lisette, bao bobedi bja bona ba nago le mengwaga ya ka godimo ga e 60, ba hudugetše toropong ya Apatou.