Hlatse ya Jehofa ya kua Asia e lego Yanmei o ile a thuša mosadi yo a foufetšego e lego Mingjie go tshela tsela. a Mingjie o ile a re: “Ke a leboga. Eka Modimo a ka go šegofatša!” Ka morago ga moo, Yanmei o ile a kgopela Mingjie gore a ka thabela go ithuta Beibele le yena. Ke moka Mingjie o ile a botša Yanmei gore ke kgale a rapela gore ka letšatši le lengwe a hwetše Bakriste ba nnete. Ke ka baka la’ng a ile a rapela Modimo gore a mo thuše gore a hwetše Bakriste ba nnete?

 Mingjie o re ka 2008, mogwera wa gagwe yoo le yena a foufetšego o ile a mo mema gore a tle kerekeng ya batho bao ba golofetšego. Ka morago ga gore Mingjie a kwe moruti a rera, o ile a ya go yena gomme a mmotšiša gore mantšu ao a bego a a bolela o a tšere pukung efe. Moruti yoo o ile a mmotša gore mantšu ao a be a etšwa ka Beibeleng, e lego Lentšu la Modimo leo le bolelago nnete. Mingjie o ile a thoma go fela pelo ya go nyaka go bala Beibele. Ke moka o ile a hwetša Beibele ya mongwalo wa braille ya se-China gomme ka morago ga dikgwedi tše e ka bago tše tshela, o be a šetše a baile dipuku tše 32. Ge Mingjie a dutše a bala Beibele, o ile a lemoga gore thuto ya Borarobotee yeo moruti a bego a e ruta kerekeng ke maaka le gore leina la Modimo ke Jehofa.

 Ge nako e dutše e eya, Mingjie o ile a kweša bohloko ke tsela yeo batho ba kereke yeo a bego a eya go yona ba bego ba swara batho ba bangwe ka yona. O ile a lemoga gore ba be ba sa phele ka go dumelelana le seo a bego a se bala ka Beibeleng. Ka mohlala, ge go be go jewa dijo, batho bao ba foufetšego ba be ba fiwa dijo tšeo di šetšego goba tša marathana. Ka gona seo se be se kweša Mingjie bohloko, ke moka a thoma go nyaka dikereke tše dingwe lefelong la gabo. Ke ka baka leo Mingjie a ilego a thoma go rapela Modimo gore a mo thuše go hwetša kereke ya nnete.

 Mingjie o ile a dumela go ithuta Beibele ka gobane Yanmei o ile a mmontšha botho. Ka morago, o ile a ya lefelong leo Dihlatse tša Jehofa di bokanago go lona. Mingjie o re: “Nka se lebale letšatši la ka la mathomo lefelong leo. Batho ka moka ba ile ba nkamogela le go ndumediša. Seo se ile sa kgoma pelo ya ka. Le ge ke foufetše ke ile ka lemoga gore batho ba moo ba a ratana.”

 Mingjie o ile a tšwelapele gabotse gomme a thoma go ya dibokeng tša Dihlatse tša Jehofa ka mehla. O be a rata go opela dikopelo tša Dihlatse tša Jehofa. Eupša kopelo ya mongwalo wa braille woo a bego a kgona go o bala e be e se gona. Ka gona Dihlatse tša Jehofa di ile tša mo thuša gore a be le kopelo ya gagwe. O ile a tšea diiri tše 22 a ngwalolla dikopelo tše 151 ka mongwalo wa braille! Ka April 2018, Mingjie o ile a thoma go yo botša batho ba bangwe ditaba tše dibotse. Ka gona kgwedi le kgwedi o be a fetša diiri tše 30 a ruta ba bangwe Beibele.

 Mingjie o ile a phetha ka gore o nyaka go kolobetšwa. Ka gona Yanmei o ile a mo rekhotela dipotšišo le ditemana tša Beibele tšeo di lego ka pukung ya Go Rulaganyetšwa go Dira Thato ya Jehofa gore a mo thuše gore a itokišeletše. Mingjie o ile a kolobetšwa ka July 2018. O re: “Ke ile ka kgongwa ke tsela yeo Dihlatse tša Jehofa di ilego tša mpontšha lerato ka yona kopanong ya selete. Ke ile ka thaba kudu moo ke ilego ka feleletša ke lla ka gobane ke be ke hweditše bodumedi bja nnete.” (Johane 13:34, 35) Gona bjale Mingjie o ikemišeditše go bontšha batho ba bangwe lerato leo Dihlatse tša Jehofa di ilego tša mmontšha lona, le gona o ruta batho Beibele ka mehla.