Re hweditše gore batho ba bantši bao ba šetšego ba na le bodumedi bja bona ba thabela go ahlaahla dihlogo tša Beibele. Ke therešo gore re hlompha tshwanelo ya motho ya go ikgethela bodumedi bjoo bo fapanego le bja rena, e bile ga re gapeletše ba bangwe gore ba kwe molaetša wa rena.

Ge re boledišana le motho ka bodumedi, re leka go diriša keletšo ya Beibele ya gore re boledišane le yena ka “moya o boleta” le go mmontšha “tlhompho e tseneletšego.” (1 Petro 3:15) Re letetše gore ba bangwe ba gane molaetša woo re ba tlišetšago wona. (Mateo 10:14) Lega go le bjalo, ga re tsebe gore batho ba tla arabela bjang go fihlela ge re boledišana le bona. Le gona re lemoga gore maemo a batho a a fetoga.

Ka mohlala, motho a ka ba a swaregile kudu gore a ka boledišana le rena eupša a ka rata go boledišana le rena ka nako e nngwe. E bile batho ba ka lebeletšana le mathata a mafsa goba maemo ao a ka ba dirago gore ba be le kgahlego molaetšeng wa Beibele. Ka gona, re katanela gore re boledišane le batho ka makga a mantši.